Wanganaminya nga ni Bwami bwahi obo tukakanayako?— B’oBwami b’oMungu, obukandisyayira ekihugho mo paradiso. Unanzire erigha binene oko Bwami obu?—

Obwami bosi bosi bukabya n’omwami. Kandi omwami akatabala abandu abali omo kihugho kiwe. Unasi oMwami w’oBwami b’oMungu nga nindi?— Ni Yesu Kristo. Ikere elubula. Hakisiya hake, iniatabala obuli mundu oko kihugho! Ukalengekanaya uti tunemwendisyatsema Yesu akatabala ng’oMwami we kihugho kyosi?—

Tukendisyatsema kutsibu! Omo paradiso abandu sibendisyasyalwa, ni bughambu sihendisyasyabya evita. Abandu bosi bakendisyanzana. Sihendiswasyabya oyukalwala kutse erihola. Esyondimetime sikendisyalangira, abatsiha bosi bakendisy’owa, n’abalema bakasyatoka eritibita n’eriyisumbanga. Obuli mundu akasyabana akalyo kanji. N’esyonyama sikendisyatsanga kughuma netu, isyatubegherako. Ababirihola bakandisyalubuka. Abalume n’abakali banji abo wabirighako omo katabu kano nga Rebeka, Rahabu, Daudi, na Eliya  bakendisyalubuka! Unanzire erisyalola kubo b’alubuka?—

Yehova akwanzire kandi anzire naghu iwatsema. Wamalola embere ukigha oko Yehova n’erimowa ighukendisyabyaho kera na kera omo paradiso eyuwene kundu! Ekyo kyo wanzire?—