Na o ka re botša gore re bolela ka Mmušo ofe?— Ee, ke Mmušo wa Modimo, wona Mmušo wo o tlago go dira gore lefase e be paradeise. Na o ka rata go ithuta ditaba tše dingwe ka Mmušo wo?—

Mmušo o mongwe le o mongwe o na le kgoši. Le gona kgoši e buša batho bao ba dulago nageng ya yona. Na o a tseba gore Kgoši ya Mmušo wa Modimo ke mang?— Ke Jesu Kriste. O dula legodimong. Kgauswinyane o tla ba Kgoši ya motho yo mongwe le yo mongwe mo lefaseng! Na o nagana gore re tla thaba ge Jesu e le Kgoši ya lefase ka moka?—

Re tla thaba kudu! Paradeiseng, batho ba ka se sa lwa goba go ya ntweng. Batho ka moka ba tla be ba ratana. Ga go na motho yo a tlago go babja goba go hwa. Difofu di tla bona, difoa di tla kwa gomme bao ba sa kgonego go sepela ba tla kgona go kitima le go tshelatshela. Motho yo mongwe le yo mongwe o tla be a na le dijo tše dintši. Le gona diphoofolo di tla kwana e bile re tla dula le tšona ka khutšo. Batho bao ba hwilego ba tla phela gape. Banna le basadi ba bantši bao o ithutilego ka bona ka poroutšheng ye, go swana le Rebeka, Rahaba, Dafida le Eliya le bona ba tla boela ba phela!  Na o ka rata go tlo ba bona ge ba phela gape?—

Jehofa o a go rata gomme o nyaka gore o thabe. Ge e ba o tšwela pele o ithuta ka Jehofa le go mo kwa, o tla phela ka mo go sa felego paradeiseng e botse! Na se ke seo o se nyakago?—