BÍHWIIDOOʼÁŁÍGÍÍ 14
Nahatʼaʼ Léiʼ Nahasdzáán Yikʼi Hooʼáał Doo
Haʼátʼíí Nahatʼaʼ shı̨́ı̨́ baa yádeiltiʼ nínízin?— Aooʼ, God biNahatʼaʼ. Díí nahasdzáán bikáaʼgi ayóí áhonóolingo áhodoolííł. Díí Nahatʼaʼígíí hazhóʼó baa íhwideeshʼááłísh nínízin?—
Nahatʼaʼ tʼáá ałtso bił nahazʼą́ą́góó naatʼáanii hólǫ́ǫ łeh. Áko díí naatʼáanii éí bikéyahgi kéédahatʼínígíí yikʼi hooʼááł łeh. God biNahatʼaʼ biNaatʼáanii nilínígíísh nił bééhózin?— Éí Jesus Christ. Bí éí yáʼąąshdi bighan. Diné tʼáá ałtso nahasdzáán yikááʼ kéédahatʼínígíí biNaatʼáanii jidooleełgo bichʼįʼ hoolzhish! Jesus nahasdzáán biNaatʼáanii jílı̨́įgo, nihił dahózhǫ́ǫ́sh doo nínízin?—
Ayóí Áhonóolin ánáhoolyaadi, haʼátʼíísh nínízinígíí bíká díníʼįįʼ?
Yéigo éí nihił dah hózhǫ́ǫ doo! Ayóí Áhonóolin ánáhoolyaago, diné doo ałkʼinéiijah da doo. Diné tʼáá ałtso ayóíʼádaʼahóʼníi doo. Doo łaʼda bąąh dahazʼą́ą da doo, dóó doo ndi łaʼ dadootsaał da. Doo daʼooʼínígíí daʼooʼı̨́ nídadoodleeł, bijédaahkałígíí nídaʼdidootsʼı̨́ı̨́ł. Áádóó bijáád doo yee nidaakaiígíí náádadiilwoʼgo dah nídaniljı̨́įh doo. Diné tʼáá ałtso chʼiyáán deidooyı̨́įłgi łą́ągo bá hólǫ́ǫ doo. Naaldlooshii éí ahił nidaanée doo nihí ałdóʼ bił nideiiʼnée doo. Diné ádaadin yę́ę náábidiʼdooljahgo náádahiináa doo. Ląʼígo hastóí dóó sání díí naaltsoos biiʼ baa íhwiiniłʼą́ą́ʼ. Éí Rebékah, Réíhab, David
dóó Iiláíjahgi ádaatʼéhígíí, náábidiʼdooljahgo náádahiináa doo! Díí iiná baa nídadeestʼą́ągo bił ahéédahodíísįįłísh nínízin?—Jiihóvah éí ayóíʼánóʼníigo nił hózhǫ́ǫ doo nóʼní. Jiihóvah bééhonísįįhgo bikʼeh honílʼı̨́ı̨́ ládą́ą́ʼ, nahasdzáán bikáaʼgi ayóí áhonóolingo hoolʼáágóó hinínáa dooleełgo átʼé! Niísh éí díí nínízin?—