O dapge Suā lo Buɛ̄-mɛnɛ i gaa kɔ nu akiiloo ni?— Aiī, ɛɛ na Buɛ̄-mɛnɛ Bari, lo Buɛ̄-mɛnɛ a gaa le doo kɔ kɛnɛkɛ̄ alu paradais. E niā ge a loe nɔ̄ nu akiiloo lo Buɛ̄-mɛnɛ yere loo ni?—

Dɛ̄dɛɛ̄ Buɛ̄-mɛnɛ wee ɛrɛ mɛnɛ-buɛ̄. E lo mɛnɛ wee bɛɛ dɛ̄dɛɛ̄ pya nɛɛ̄ ale lo buɛ̄. O suāge nɛɛ̄ alu Mɛnɛ loo Buɛ̄-mɛnɛ Bari ni?— Ɛɛ na Jizɔs Kraist. A tɔɔ̄ li bunyɔɔ. Sɔ̄ sɔ̄ naa lee binia a gaa le lu Mɛnɛ abɛɛ dɛ̄dɛɛ̄ nɛɛ̄ a tɔɔ̄ a nyɔɔ kɛnɛkɛ̄! O kɛɛrɛge kɔ bu i e’ɛɛ sɔ̄ Jizɔs elu Mɛnɛ abɛɛ yube loo nyɔuwe ni?—

Bu i e’ɛɛ kaānā! Ii bu Paradais, pya nɛɛ̄ naalee be be ale benɔ̄ lɔgɔ sɔ̄. Dɛ̄dɛɛ̄ nɛɛ̄ e wereloo ɛnia aba. Lɔgɔ nɛɛ̄ naalee ɛrɛ na dumɛloo ale u luh. Pya zimadɛɛ̄ e’muɛ̄nu, pya naɛbee e’dānu e pya kɔga edap teera sa pɛgi. Dɛ̄dɛɛ̄ nɛɛ̄ e’ɛrɛ gbɛnɛkpo nuede. Dɛ̄dɛɛ̄ nam gaa le yiigbo ziī sa yiinage gbo nɛɛ̄. Pya nɛɛ̄ ebee u esikɛ̄ tɔɔ̄dum. Gbɛnɛ-edo pya nɛɛ̄dam le nɛɛ̄wa oe nɔānu akiiloo bu nwīekpo kpa ama doodoo Ribeka, Rehab, Devid, le Elaija esinage kɛ̄ tɔɔ̄dum! E niā ge a lo emuɛ̄ wa sɔ̄ ba e’aakɛ̄ bu luh ni?—

 Jɛhova were aloo sa gbī kɔ o ɛrɛ ɛɛbu. Lo o kiisī loe nɔ̄ nu akiiloo Jɛhova sa ye gbaɛ̄tɔ̄loo, o dap tɔɔ̄dum mmɛ dee anaatah bu ekpedɛɛ̄ paradais! Lege nu o gbī lo ni?—