Vaysht du vass fa Reich es miah am shvetza sinn diveyya?— Yau, ‘s is Gott Sei Reich, un’s zayld di gans eaht zu’n paradise macha. Vetsht du may lanna veyyich dess Reich?—

Alli reich hott en kaynich. Un da kaynich roold ivvah di leit in sei land. Vaysht du veah da Kaynich is funn Gott Sei Reich?— ‘S is da Jesus. Eah voond in da himmel. Glei zayld eah da Kaynich sei ivvah alli ebbah uf di eaht! Denksht du miah zayla haebbi sei vann da Jesus moll da Kaynich is ivvah di gans eaht?—

Miah zayla reeli haebbi sei! In di Paradise zayla leit immah goot along kumma mitt nannah un zayla nett fechta. Alli ebbah zayld leevi havva fa nannah. Nimmand zayld grank vadda adda shtauva. Di blinda kenna no sayna, di dawba zayla heahra, un selli es nett lawfa kenna, kenna no shpringa un tshumba. Alli ebbah zayld blendi havva fa essa. Un di animals zayla freindlich sei mitt nannah un aw mitt uns. Leit es kshtauva sinn zayla no zrikk zu layva kumma. Feel funn di mansleit un veibsleit es du gland hosht diveyya in deah brochure so vi di Rebekka, di Rahab, da Dawfit, un da Elijah zayla aw zrikk zu layva kumma! Vetsht du shvetza mitt si vann si moll zrikk kumma?—

 Jehova hott leevi fa dich un vill havva es du haebbi bisht. Vann du oh’haldsht lanna veyyich Jehova un een heichsht, no kansht du layva fa’immah inna shayni paradise! Is sell vass du vitt?—