Bu sibi es i kal Renu ku na faladu del? — I Renu di Deus, Renu ki na bin pui pa Tera sedu un paraisu. Bu misti aprindi mas aserka des Renu? —

Tudu renu tene un rei. I rei ta manda riba di povu di si tera. Bu sibi kin ki Rei di Renu di Deus? — I Jesus Kristu. I mora na seu. I ka na tarda, i na bin sedu Rei riba di tudu jintis na Tera! Bu pensa kuma no na kontenti ora ku Jesus sedu Rei riba di tudu Tera? —

No na kontenti dimas! Na paraisu, jintis ka na tene mas purblema ku n̈utru i nin e ka na bai mas gera. Tudu jintis na gosta di n̈utru. Ningin mas ka na duensi o muri. Segu na oja, surdu na obi i kilis ku ka pudi yanda na pudi kuri i salta. Tudu jintis na tene manga di kusas di kume. Limarias na brinka ku n̈utru i no na brinka ku elis. Jintis ku muri na lantandadu pa vivi mas. Manga di omis ku minjeris ku no falaba del nes broŝura  suma Rebeka, Raabi, Davi ku Elias na bin lantandadu pa vivi mas! Bu misti oja elis ora ke lanta di mortu? —

Jeova gosta di bo i misti pa bu sedu filis. Si bu kontinua aprindi aserka di Jeova i obdisil, bu na bin pudi vivi pa sempri na paraisu bonitu! I kila ku bu misti? —