Ichikllachönam juk gobiernu mandakamunqa. ¿Ima gobiernu?. . . Diospa Gobiernunmi. Kë Patsatam shumaqyätsimunqa kushishqa kawakunapaq. ¿Tsë Gobiernupita musyëta munankiku?. . .

¿Imataq juk reyqa? Juk gobiernuchö mandakoq kaqmi. Diospa Gobiernunchöpis juk rey kanmi. ¿Musyankiku pï kanqanta?. . . ¡Jesusmi! Ciëluchömi kawan. Ichikllachönam llapan nunakuna mandädunchö kayanqa. ¿Jesusqa alli reytsuraq kanqa? ¿Kushishqatsuraq kawashun mandakamuptin?. . .

¡Awmi! Kë Patsa shumaqman tikrariptinqa mananam guërrakuna kanqanatsu, chikinakur pelyayanqanatsu, qeshyayanqanatsu ni wanuyanqanatsu. Wiskukunapis rikäyanqam y mana wiyaqkunapis wiyayanqam. Purita mana puëdeqkunapis cörrikachäyanqam. Mikunapaqpis imëkam kanqa. Animalkunapis mananam mikunakuyanqanatsu. Y pëkunawan pukllëtam puëdishun. ¡Hasta wanushqakunapis kawariyämunqam! Rebëca, Rahab, David, Elïas y wakin kaqkunapis. ¿Pëkunata reqita munankiku?. . .

 ¡Jehoväqa alläpam kuyashunki, y kushishqa kanëkitam munan! Tsëmi pëpita yachakunëki y nishunqëkita ruranëki. Tsënöpam, shumaq Patsachö imëyaqpis kawakunki. ¿Shumaq Patsachö kawëta munankiku?. . .