Cai Allpataca ñallami shuj mandana mandanga. ¿Chai mandana ima cashcata yachasha ninguichu?... Diospaj Mandanami can. Chai mandanaca tucui Allpatami shuj sumaj paraisota ruranga. Chaipi causanaca sumajmi canga. ¿Diospaj Mandanamanta ashtahuan yachasha ninguichu?...

Callaringapajca shuj mandaj ima cashcata yachashun. Shuj mandajca shuj llajtata pushajmi can. Diospaj Mandanapish shuj mandajtami charin. ¿Chai mandaj pi cashcata yachasha ninguichu?... ¡Jesusmi can! Paica jahua pachapimi causan. Ñallami tucui Allpata mandanga. Shinapish ¿Jesusca alli mandajchu canga? ¿Pai Allpata mandajpica cushillachu causashun?...

Jesús cai Allpata mandajpica, mana macanacuicuna tiyangachu. Gentecunaca imamanta mana pꞌiñanacungachu. Ni pi mana ungungachu, mana huañungachu. Mana ricujcunaca ricungami, mana uyajcunapish uyangami. Mana puri tucujcunapish puringami. Tucuicunami achca alli micunata charinga. Animalcunapish paicunapura mana macanacungachu, ñucanchijpish paicunahuanmi pugllashun. Ashtahuanpish huañushcacunapish causaringami. Shinashpaca Rebeca, Rahab, David,  Elías shujtaj gentecunapish causaringami. ¿Paicunata rijsisha ninguichu?...

Jehová Diosca cantaca achcatami cꞌuyan, cushilla causachunmi munan. Chaimantami paimanta ashtahuan yachashpa cazuna cangui. Chaita rurashpaca huiñai huiñaitami paraíso Allpapi causangui. ¿Paraisopi causasha ninguichu?...