¿Ko ꞌite ꞌā koe o ruŋa i ariki hē e vānaŋa atu ena?... O ruŋa i te ariki vaꞌai mai era e te ꞌAtua, e mo te ariki nei e aŋa mo riro te ꞌao taꞌatoꞌa pahe henua nehe⁠-⁠nehe e tahi. ¿Haŋa rō koe mo ata ꞌite o ruŋa o nei ariki?...

Taꞌatoꞌa ariki e hapaꞌo rō ꞌā i te taŋata o toꞌona kona. ¿Ko ꞌite ꞌā koe ko ai te ariki ka vaꞌai mai ena e te ꞌAtua?... ¡Ko Ietū! A īa e noho ena i ruŋa i te raŋi. ꞌIna he hora toe, maꞌana e ariki i te taŋata o te ꞌao taꞌatoꞌa. ¿E koa rō tātou ka ariki mai era e Ietū i te ꞌao taꞌatoꞌa?...

He koa tahi tātou i ruŋa i te henua nehe⁠-⁠nehe, te taŋata e ko moto ꞌe e ko tamaꞌi haka ꞌou. He here tahi ki a rāua, ꞌina e ko maiūi haka ꞌou. Te mata keva he tikeꞌa, te tariŋa pō he haka roŋo, e te taŋata taꞌe haꞌere, he tahuti e he rere⁠-⁠rere. Takoꞌa he ai te rahi o te kai mo kai. Te manu tere henua e ko moto haka ꞌou ki a rāua ꞌā, e he riva mo kori i muri i te taŋata. Te taŋata ko mate ꞌā, he ora haka ꞌou. Te ŋā viꞌe, e te taŋata i hāpī ai e koe i ruŋa i te puka iti⁠-⁠iti nei pē Rebeka, Rahab, Tavita, e a Elias, he ora haka ꞌou. ¿Haŋa rō koe mo mahani ki a rāua, i te hora ka ora haka ꞌou mai ena?...

 A Iehoha e here rahi rō ꞌā ki a koe e ko haŋa ꞌā mo koa rahi ꞌoꞌou. Mo hāpī mo oho koe o ruŋa o Iehoha e mo haka roŋo ki a Īa, he riva koe mo ora mo oho rō ai i ruŋa i te henua nehe⁠-⁠nehe. ¿Haŋa rō koe mo noho i rā kona?...