Ka rauka ia koe te akakite mai e eaa teia Patireia e tuatua nei taua?— Ae, ko te Patireia o te Atua te ka akariro i te enua ei parataito. Ka inangaro koe kia kite no runga i teia Patireia?—

E ariki to te au patireia pouroa. Na te ariki e tutara ana i te tangata i roto i tona enua. Kua kite koe e koai te Ariki o te Patireia o te Atua?— Ko Iesu Karaiti. E noo ana aia i runga i te rangi. Kare e roa atu ka tutara te Ariki i te au tangata ravarai i runga nei i te enua! Eaa ra toou manako, ka mataora ainei tatou me riro a Iesu ei Ariki no teianei ao katoa?—

Ka mataora tatou pouroa! I roto i te Parataito, kare te tangata e tamaki akaou. Ka akaperepere te tangata i tetai e tetai. Kare e tangata e maki me kore e mate. Ka kite akaou te matapo, ka akarongo akaou te turi, e te aronga kare e rauka i te aere, ka oro aere ratou e ka rere akaou. E maata te kai na te katoatoa. E ka varenga ua te au manu ki tetai e tetai e kia tatou. Ka ora akaou mai te au tangata i mate. Te au tane e te au vaine taau i kite i roto i teia poroutia mei ia Rebeka, Rahaba, Davida, e Elia, ka ora akaou mai ratou! Ka inangaro rai koe i te aravei ia ratou me oki akaou mai ratou?—

 Inangaro maata to Iehova ia koe e te inangaro ra aia kia mataora koe. Me apii ua rai koe no runga ia Iehova e me akarongo iaia, ka rauka ia koe kia noo e mutu kore ua atu i roto i tetai parataito manea! Ko tera rai taau ka inangaro?—