Combelela kutsi ngumuphi loMbuso lesikhuluma ngawo?— NguMbuso waNkulunkulu futsi loMbuso utakwenta umhlaba ube lipharadisi. Ungatsandza yini kufundza kabanti ngawo?—

Yonkhe imibuso inenkhosi, futsi inkhosi ibusa bantfu labahlala eveni layo. Ngubani iNkhosi yeMbuso waNkulunkulu?— NguJesu Khristu. Uhlala ezulwini. Masinyane, utawuba yiNkhosi yabo bonkhe bantfu emhlabeni. Ucabanga kutsi sitawujabula yini lapho Jesu sekayiNkhosi yemhlaba wonkhe?—

Sitawujabula kakhulu! EPharadisi, bantfu ngeke basalwa nobe baye emphini. Bonkhe bantfu batawutsandzana. Kute lotawugula nobe afe. Labangaboni emehlweni batawubona, labangeva etindlebeni batawuva, futsi labo labangakhoni kuhamba batawukwati kugijima nekugcuma. Kutawube kunekudla lokunyenti kwabo bonkhe bantfu. Tilwane titawuvana futsi titawuba bangani betfu. Bantfu labafile batawuphindze baphile. Lamadvodza nebafati labanyenti lofundze ngabo kulencwajana, lokufaka ekhatsi Rebheka, Rahabi, Davide na-Elija batawuphindze  baphile. Ungatsandza yini kubabona nabavuswa?—

Jehova uyakutsandza futsi ufuna ujabule. Nawuchubeka ufundza ngaJehova uphindze umlalele, utawuphila phakadze epharadisi lelihle. Uyafuna yini?—