Ipedori ijo aduarun Ajakanut nainera oni kane?— Eebo, erai Ajakanut Naka Edeke, na ebuni aitaraun akwap na paradais. Ikoto kereka ijo aisisiaun nuikamunitos Ajakanut na?—

Kangin jakanut ejaas ka ekabaka. Ido ipugai ekabaka itunga lu akwap ke. Kijeni ijo ekabaka loka Ajakanut Naka Edeke?— Erai Yesu Kristo. Iboyei kotoma akuj. Edodor nges araun ekabaka loka itunga kere kotoma akwap. Kiwomit ijo ebe ibuni oni aiyalamikin ne eraar Yesu ekabaka loka akwap kere?—

Ibuni oni aiyalamikin! Kotoma paradais, mam bobo itunga epote ejie. Epote itunga araun lueminanara. Emameun yen edekanakin araibo atwanere. Epote imudukiok aikweny, lukiming da epote aipup, ka ingwalasik da epote akerit araibo aisom. Kangol itunganan ebuni ajaun keda inyamat luipu. Ejauni epaperone kiding naka itiang kede itunga da. Itunga lu etwakitos epote ajarun. Ikiliok keda Angor luipu luidau ijo asisiaun koitabo kalo kwape nat Rebeka, Rakab, Daudi, keda Eliya, epote bobo ajarun! Ikoto  kereka ijo airiamun keda kesi na ejarunatar?—

Emina Yawe ijo ido ekoto nges ijo kojaas ka aiyalama. Arai kinyikok ijo aisisiaenen nuikamunitos Yawe kede arimar nges, ipedori ijo aijar ikar kere kotoma paradais naibus! Eraas ngun nuikoto ijo?—