‘E lava ke ke mate‘i mai pe ko e hā ‘a e Pule‘anga ‘oku tau talanoa ki aí?— ‘Io, ko e Pule‘anga ia ‘o e ‘Otuá, ko e Pule‘anga ia te ne ‘ai ‘a e māmaní ke hoko ko ha palataisi. Te ke sai‘ia ke ako lahi ange ‘o kau ki he Pule‘anga ko ení?—

Ko e pule‘anga kotoa pē ‘oku ‘i ai hono tu‘i. Pea ko e tu‘í ‘okú ne pule‘i kotoa ‘a e kakai ‘i hono fonuá. ‘Okú ke ‘ilo‘i pe ko hai ‘a e Tu‘i ‘i he Pule‘anga ‘o e ‘Otuá?— Ko Sīsū Kalaisi. ‘Oku nofo ia ‘i hēvani. ‘Oku vavé ni ke ne hoko ko e Tu‘i ki he tokotaha kotoa ‘i he māmaní! ‘Okú ke fakakaukau te tau fiefia ‘i he taimi ‘e Tu‘i ai ‘a Sīsū ki he māmaní kotoa?—

Te tau fiefia lahi ‘aupito! ‘I he palataisí, ko e kakaí ‘e ‘ikai ke nau toe kē pe ō ki he taú. Ko e tokotaha kotoa te nau fe‘ofa‘aki. He‘ikai ke toe ‘i ai ha taha ‘e puke pe mate. ‘E sio ‘a e kuí, ‘e fanongo ‘a e tulí pea ko e fa‘ahinga ‘oku ‘ikai lava ke ‘alú te nau lava ‘o lele mo puna. ‘E lahi ‘a e me‘akaí ki he tokotaha kotoa. Pea ko e fanga manú te nau vā lelei ‘iate kinautolu pea kaume‘a mo kitautolu. Ko e kakai kuo nau maté te nau toe mo‘ui mai. Ko e tokolahi ‘o e kau tangata mo e kau fefine na‘á ke ako fekau‘aki mo kinautolu ‘i he polosiua ko ení hangē ko Lepeka, Lēhapi, Tēvita mo ‘Ilaisiā te nau toe mo‘ui mai foki! Te ke  sai‘ia ke ke fe‘iloaki mo kinautolu ‘i he taimi te nau toe mo‘ui mai aí?—

‘Oku ‘ofa ‘a Sihova ‘iate koe pea loto ke ke fiefia. Kapau ‘e hokohoko atu ho‘o ako fekau‘aki mo Sihová pea talangofua ma‘u pē kiate ia, ‘e malava ke ke mo‘ui ta‘engata ‘i he māmani palataisi faka‘ofo‘ofá! Te ke loto ki aí?—