Sena ulibuzyi Bwami mbotwaamba?— Inzya, Mbwami bwa Leza, Bwami ibuyoopa kuti nyika ibe paradaiso. Sena inga wayanda kwiiya zinji kujatikizya Bwami oobu?—

Bwami buli boonse bulijisi mwami. Alimwi mwami ooyo ulalela bantu bamucisi cakwe. Sena ulimuzyi Mwami wa Bwami bwa Leza?— Ngu Jesu Kristo. Ukkala kujulu. Ino-ino uyooba Mwami wabantu boonse anyika! Sena uyeeya kuti tuyookkomana Jesu aakuba Mwami wanyika yoonse?—

Inzya, tuyookkomana kapati! Mu Paradaiso, bantu tabanoolwani nokuba kuunka kunkondo. Bantu boonse banooyandana. Kunyina uyoociswa nokuba kufwa. Bataboni bayoobona, batamvwi bayoomvwa, alimwi aabo batakonzyi kweenda bayootalika kuzuza alimwi akusotauka. Boonse banoojisi zyakulya zinji. Banyama banoomvwana mulicabo alimwi akumvwana andiswe. Bafwide bayoobuka. Bamaalumi abamakaintu mbomwaiya mubroshuwa eeyi, mbuli Rebeka, Rahabu, Davida, alimwi a Elija abalo bayoobuka!  Sena ulayanda kuyoobabona baakubusyigwa?—

Jehova ulakuyanda alimwi uyanda kuti kokkomene. Ikuti wazumanana kwiiya kujatikizya Jehova alimwi akumumvwida, uyoopona kukabe kutamani muparadaiso, ibusena bubotu kapati! Sena oobo mbobuumi mboyanda?—