CHIIYO 14
Bwami Buyooyendelezya Nyika Yoonse
Uyeeyela kuti mbuubuli Bwami mbutuli kwaambuula atalaa mbubo?— Mbwami bwaLeza, buyoocita kuti nyika ibe paradaiso. Ulayanda na kwiiya zyiingi atalaa Bwami oobo?—
Bwami bumwi abumwi bulaa mwami. Mwami weendelezya bantu bali munyika yakwe. Ulizi na kuti ngwani Mwami waBwami bwaLeza?— NguJesu Kristo. Ukkala kujulu. Lino-lino uyooba Mwami wabantu boonse balaa nyika! Ubonaanga tuyoobotelwa na kuti Jesu akuba Mwami wanyika yoonse?—
Ulangililaanzi muParadaiso?
Tuyoobotelwa loko! MuParadaiso, bantu tabakoyoolwana naa kuya kunkondo limbi. Umwi awumwi uyooyanda mweenzinyina. Taakwe utakaciswe naa utakafwe. Boofu bayoobona, basinke matwi bayoomvwa, alimwi batakonzyi kweenda bayoosotoka akucijana. Muntu woonse uyoobaa zilyo zyiingi. Banyama bayoomvwanana cabo-cabo andiswe tuyoosana ambabo. Bafwide bayoobuka. Baalumi abanakazi mbuwayiiya atalaa mbabo mukabbuku aaka bali mbuli ba Rebeka, Rahabu, Davida, aEliya bayoobuka! Ulayanda
na kuyoobonana ambabo nibayoobusigwa?—Jehova ulakuyanda alimwi uyanda kuti ubotelwe. Ikuti wiinkilila kunembo kwiiya atalaa Jehova alimwi wamuswiilila, uyookonzya kupona mane kukabe kutamani muparadaiso mbotu! Nzizyo nzuyanda na?—
MUBALE MUBBAIBBELE LYANU
-
Isaya 2:4; 11:6-9; 25:8; 33:24; 35:5, 6