Xana u nga vhumbha leswaku hi wihi Mfumo lowu hi vulavulaka ha wona?— Ina, i Mfumo wa Xikwembu, ku nga Mfumo lowu nga ta endla leswaku misava yi va paradeyisi. Xana u nga tsakela ku dyondza swo tala hi Mfumo lowu?—

Mfumo wun’wana ni wun’wana wu ni hosi. Nakambe hosi yi fuma vanhu va tiko ra yona. Xana wa swi tiva leswaku i mani Hosi ya Mfumo wa Xikwembu?— I Yesu Kreste. U tshama etilweni. Ku nga ri khale u ta va Hosi ya vanhu hinkwavo emisaveni! Xana u ehleketa leswaku hi ta tsaka loko Yesu a va Hosi ya misava hinkwayo?—

Hi ta tsaka swinene! EParadeyisini, vanhu a va nge lwi naswona a va nge he yi enyimpini. Vanhu hinkwavo va ta rhandzana. Ku hava munhu loyi a nga ta vabya kumbe ku fa. Lava nga voniki va ta vona, lava nga twiki va ta twa naswona lava nga fambiki va ta kota ku tsutsuma ni ku tlula-tlula. Vanhu hinkwavo va ta va ni swakudya swo tala. Nakambe swiharhi swi ta hanyisana swi tlhela swi tshama hi ku rhula na hina. Vanhu lava feke va ta tlhela va hanya. Vavanuna ni vavasati vo tala lava u dyondzeke ha vona eka broxara leyi vo fana na Raveka, Rahava, Davhida na Eliya na vona va ta tlhela va hanya!  Xana u nga swi tsakela ku hlangana na vona loko va pfuxiwa?—

Yehovha wa ku rhandza naswona u lava leswaku u tsaka. Loko u hambeta u dyondza ha yena u tlhela u n’wi yingisa, u ta kota ku hanya hilaha ku nga heriki eparadeyisini yo saseka! Xana sweswo hi swona leswi u swi lavaka?—