I to oe manaˈo, e tauaparau tatou no nia i teihea Basileia?— Te Basileia o te Atua, te faatereraa e faariro i te fenua ei paradaiso. E hinaaro anei oe e ite eaha tera Basileia?—

E arii to te mau basileia atoa o te faatere i te mau taata o to ratou fenua. No oe, o vai te Arii o te Basileia o te Atua?— O Iesu Mesia. Tei te raˈi o ˈna e fatata roa oia i te riro ei Arii no te taatoaraa o te taata i te fenua nei! I to oe manaˈo, e oaoa anei tatou ia faatere Iesu i te fenua taatoa?—

E, e oaoa roa tatou! I roto i te paradaiso, e here te taata te tahi i te tahi, aita faahou ïa e tatamaˈiraa e e tamaˈi. E ore te maˈi e te pohe. E ite te matapo e e faaroo te feia tariˈa turi. E horo e e ouˈa te taata o te ore e nehenehe e haere e e rahi te maa no te taatoaraa! E hauti te tahi animara e te tahi atu e na muri atoa i te taata. E ora faahou mai te feia i pohe mai te mau tane e vahine ta oe i ite i roto i teie buka rairai mai ia Rebeka, Rahaba, Davida e Elia! E hinaaro anei oe e farerei ia ratou i tera taime?—

 Te here ra Iehova ia oe e te hinaaro atoa ra ia oaoa oe. A haapii noa o vai Iehova e a faaroo ia ˈna, e ora ïa oe e a muri noa ˈtu i roto i te hoê paradaiso nehenehe roa! Tera anei ta oe e hinaaro?—