Nopolme ya swentain jtul Ajwalil te Balumilale. ¿Yabal akʼan ya anaʼ te machʼa-ae?... Jaʼme te Ajwalil tsabil yuʼun te Diose. Jaʼme ya spas ta nichimal kʼinal te Balumilale, te banti ya x-ayin tʼujbil kuxlejalil. ¿Yabal akʼan ya anaʼbey sba ta lek te machʼa-a te Ajwalil-abi?...

Jaʼnax yuʼun, ¿yabal anaʼ bin aʼtelil ya spas jtul ajwalil?Jaʼ te machʼa ya swentain tsobol ta jtul ants winiketik. ¿Yabal akʼan ya anaʼ machʼa-a te tsabil yuʼun Dios swenta ya x-och ta Ajwalil?... ¡Jaʼ te Jesuse! Kuxul ta chʼulchan sok nopolme ya xbajtʼ swentain ta swolol te Balumilale. Jaʼukmeto, ¿lekbal ya xbajtʼ swentain te ants winiketik te Jesuse? ¿Yabal x-ayin tseʼel oʼtanil kuʼuntik te kʼalal ya swentain swolol Balumilal te Jesuse?...

¡Yak, yame x-ayin tseʼel oʼtanil! Te kʼalal pastajemix ta nichimal kʼinal-a te Balumilale, mame x-ayinix guerraetik. ¡Te ants winiketike mame ayukix bin ya stsak sbaik yuʼun! Mame ayuk machʼa ya stsakotix ta chamel sok mame ayuk machʼa ya xlaj. Yame yilik kʼinal te machʼatik maʼsitetik ta ora ini, yame xjam schikinik te machʼatik ma xyaʼiyik kʼinale. Te machʼatik koxoetik ta ora ini yame xbajtʼ beenukik sok yame x-animajik. Yame xbajtʼ ayinuk bayal weʼelil kuʼuntik. Te chambalametike mame xbajtʼ yutsʼin sbaik euk, sok yame xjuʼ ya xtajinotik sok. Mame jaʼuknax-abi, te machʼatik lajemikixe  yame xchaʼkuxajik talel, jich bitʼil te Rebeca, Rahab, David, Elías sok bayalxan ta jtul ants winiketik. ¿Mabal jichuk te ya akʼan ya anaʼtiklambey sbae?...

Kʼax kʼuxatme ta yoʼtan te Jehovae sok ya skʼan te tseʼeluk awoʼtane. Nopaxan ta swenta te Jehová sok chʼuumbeya te smantale. Teme jich ya apase yame xkuxinat ta sbajtʼel kʼinal ta jun nichimal kʼinal. ¿Yabal akʼan ya xkuxinat ta Nichimal Kʼinal?...