Naa ni nga humbulela uri ri khou amba nga ha Muvhuso ufhio?— Ee, ndi Muvhuso wa Mudzimu, Muvhuso une wa ḓo ita uri shango ḽi vhe paradiso. Ni nga takalela u ḓivha zwinzhi nga ha wonoyu Muvhuso?—

Muvhuso muṅwe na muṅwe u na khosi. Nahone khosi i vhusa vhathu vha shango ḽayo. Naa ni a ḓivha uri Khosi ya Muvhuso wa Mudzimu ndi nnyi?— Ndi Yesu Kristo. U dzula ṱaḓulu. Hu si kale u ḓo vha Khosi ya muṅwe na muṅwe a re kha ḽifhasi! Ni humbula uri ri ḓo vha ro takala musi Yesu a tshi vha Khosi ya shango ḽoṱhe?—

Ri ḓo vha ro takala vhukuma! Paradisoni, vhathu a vha tsha ḓo lwa kana vha ya nndwani. Vhathu vhoṱhe vha ḓo funana. A hu na muthu ane a ḓo lwala kana a fa. Mabofu a ḓo vhona, vho dzingaho nḓevhe vha ḓo pfa nahone vha sa koni u tshimbila vha ḓo kona u gidima na u fhufha. Muṅwe na muṅwe u ḓo vha na zwiḽiwa zwinzhi. Nahone zwipuka zwi ḓo vha dzikhonani u katela na riṋe. Vhathu vho faho vha ḓo dovha vha tshila. Vhanna na vhafumakadzi vhanzhi vhe ra guda nga havho kha yeneyi bugwana, vha ngaho Rebeka, Rahaba, Elia na Davida vha ḓo dovha vha tshila! Ni nga takalela u vha vhona musi vha tshi vuswa?—

 Yehova u a ni funa nahone u ṱoḓa ni tshi takala. Arali na bvela phanḓa ni tshi guda nga ha Yehova na u mu thetshelesa, ni ḓo kona u tshila lwa tshoṱhe kha paradiso yo nakaho! Naa ni a ṱoḓa zwenezwo zwi tshi itea?—