Maaram ka ba kon ano ito nga Ginhadian?— Oo, ito an Ginhadian han Dios, an Ginhadian nga maghihimo han kalibotan nga paraiso. Karuyag mo ba mas mahibaro pa mahitungod hini nga Ginhadian?—

An ngatanan nga Ginhadian may hadi. Ngan an hadi nagmamando ha mga tawo ha lugar nga iya sakop. Maaram ka ba kon hin-o an Hadi han Ginhadian han Dios?— Hi Jesu-Kristo. Aadto hiya ha langit. Diri na mag-iiha, magigin Hadi hiya ha ngatanan nga tawo ha bug-os nga kalibotan! Para ha imo, magigin malipayon ba kita kon hi Jesus na an Hadi ha bug-os nga kalibotan?—

Magigin malipayon gud kita! Ha paraiso, diri na mag-aaragway an mga tawo o magkakaada girra. An ngatanan maghihigugmaay na. Waray na magkakasakit o mamamatay. An mga buta makakakita na, an mga bungol makakabati na, ngan an mga diri nakakalakat makakadalagan ngan makakalukso na. An ngatanan magkakaada na damu nga pagkaon. Ngan an mga hayop diri na mag-aaragway ngan magigin sangkay na naton hira. An mga tawo nga namatay mababanhaw. Damu han kalalakin-an ngan kababayin-an nga imo nahibaroan dinhi hini nga brosyur pariho kanda Rebeca, Rahab, David, ngan Elias an  mababanhaw liwat! Karuyag mo ba hira makilala kon mabuhi na hira utro?—

Hinigugma ka ni Jehova ngan karuyag niya nga magin malipayon ka. Kon padayon ka nga mag-aaram mahitungod kan Jehova ngan masunod ha iya, mabubuhi ka ha waray kataposan ha makaruruyag nga paraiso! Karuyag mo ba ito?—