I Gâloŋ-laai kɔ́lɔŋ kwa lonoi é pîlaŋ ma?— Ôoei, Ɣâla ŋɔkâloŋ-laai ɓe, nyii pai nɔii kɛi a páledai.Ya ŋwɛ̂lii I mɛni támaa kɔ́lɔŋ é pîlaŋ Gâloŋ-laai ŋí ma?—

Kâloŋ-laa kélee ŋɔkâloŋ káa ma. Nyaŋ gâloŋ a ŋɔnûai mɛi káa. I Ɣâla ŋɔkâloŋ-laai mɛi kâloŋ kɔ́lɔŋ?— Yîsɛ Kôrai ɓe. Gáa Ɣâla-taa. Tãi kpua yée mu, a pai kɛi a kâloŋ núu kélee mɛi nɔii ma! Ilaai la lii-see da lii-laa da pai kɛi nɔii ma tãi Yîsɛ a pai kɛi la a Kâloŋ nɔii mɛi?—

Ôoei, lii-see da lii-laa da pai kɛi naa! Páledai lɔii ma, nûa dífe pai kɔ́ kɔi naa. Kɛ́lɛ, nûa da pai dikîe-ni wɛ́lii. Núu ta kélee fé pai kɔlɛi kpaa máŋ e saa. Ŋɛi-pu-ɓelai ŋɛi la a pai ɓoi, ŋ̀óli-tiniŋ-ɓelai wóli la é ɓó, gɛ̀ ní, gɔ́ɔ-pu-ɓelai dia máŋ da pai ɓáloi. Mii-sɛŋ támaa a pai kɛi naa núu kélee mɛni ma. Núu-kpune da sua-ŋa da pai dikîe wɛ̂lii dikɛ tɔnɔ. Diai daâ saai, da pai dimu-siɣei saa yéeì. Nûai dámaa ɣele kwa lónoi é pîlaŋ dîa gɔlɔi ŋí sui, yɛ̂ɛ Lubɛkɛ, Leeyɛɛ, Deeɓe, da Ilâiza, dia máŋ da pai dimu-siɣei saa yéeì!  Da dimu-siɣe saa yéeì, gbɛ̂ɛ kpɔ́ɔi ɓe ya ŋwɛ̂lii I gáa?—

Ziova e ka wɛ́lini, nyaŋ, a ŋwɛ̂lii ka lii nɛ̃ɛ sɔlɔ ɓó. À kɛ̀ ka kánaŋ Ziova maa mɛni maa-kɔ́ri, ka pai pɔri kɛi páledai wɔlɔ-wɔlɔ da wɔlɔ-wɔlɔ. M̀ɛnii ya ŋwɛ̂lii nya ɓe tí?