1, 2. Ano an sinabi ni Jehova na nadangog kan tulong apostol ni Jesus, asin ano an ginibo ninda?

 KUN si Jehova Diyos mismo an nagbuot sa saimo na gibuhon an sarong bagay, ano an gigibuhon mo? Ano man iyan, bako daw na gustong-gusto mo siyang sunudon? Iyo nanggad!

² Pagkatapos kan Paskuwa kan 32 C.E., naeksperyensiyahan iyan kan tulong apostol ni Jesus—si Pedro, Santiago, asin Juan. (Basahon an Mateo 17:1-5.) Mantang nasa ‘sarong bukid na halangkaw’ kaiba kan saindang Kagurangnan, patiinot nindang nahiling si Jesus sa sarong bisyon bilang mamuraway na langitnon na Hadi. Garo baga totoong-totoo an bisyon kaya gusto ni Pedro na magin kabali diyan. Mantang nagtataram si Pedro, may panganuron na luminindong sa sainda. Dangan malinaw nindang nadangog an boses na nagkapirang tawo sana kasuarin man an nagkapribilehiyong madangog—an boses ni Jehova. Pagkatapos siyertuhon ni Jehova na Aki niya si Jesus, ipinagbuot niya: ‘Hinanyugon nindo siya.’ Sinunod iyan kan mga apostol. Naghinanyog sinda sa itinukdo ni Jesus, asin sinadol an iba na gibuhon man iyan.—Gui. 3:19-23; 4:18-20.

3. Taano ta gusto ni Jehova na maghinanyog kita sa Aki niya, asin huli kaini anong tema an marahay na siyasaton niyato?

³ Isinurat sa Bibliya an mga tataramon na ‘Hinanyugon nindo siya’ para sa kapakinabangan ta. (Roma 15:4) Taano? Huling si Jesus an tagapagtaram ni Jehova asin kada magtaram siya para magtukdo, ipinapaabot niya an gusto kan Ama na maaraman ta. (Juan 1:1, 14) Huling mas dakul kisa sa iba pang tema an sinabi ni Jesus dapit sa Kahadian nin Diyos—an langitnon na Mesiyanikong gobyerno na pamamahalaan ni Cristo Jesus asin kan 144,000 na kairiba niya—marahay na maingat tang siyasaton an mahalaga nanggad na temang ini. (Kap. 5:9, 10; 14:1-3; 20:6) Pero, siyasaton nguna niyato kun taano ta dakulon an sinabi niya dapit sa Kahadian nin Diyos.

4. Paano ipinahiling ni Jesus na harani sa puso niya an Kahadian?

⁴ Harani sa puso ni Jesus an Kahadian. Taano ta nasabi niyato iyan? Huling an mga tataramon garo bintana kan puso—an buot sabihon, nahahayag sa tataramon kun ano talaga an mahalaga sa sato. Nagsabi si Jesus: ‘Sa kapanuan nin puso nagtataram  an nguso.’ (Mat. 12:34) Pag may oportunidad, nagtataram siya dapit sa Kahadian. Labing 100 na beses na sinambit an Kahadian sa apat na Ebanghelyo, na kadaklan kaiyan sinabi niya. Kahadian an tema kan paghuhulit niya, na nagsasabi: ‘Ako kaipuhan na maghulit kan marahay na bareta kan Kahadian nin Diyos sa ibang mga banwaan man, huli ta dahil kaini ako isinugo.’ (Luc. 4:43) Dawa pagkabuhay liwat ni Jesus, padagos siyang nagtaram sa mga disipulo niya dapit sa Kahadian. (Gui. 1:3) Siyertong dakulaon an pagpahalaga niya sa Kahadian kaya napahiro siyang magtaram dapit diyan.

5-7. (a) Paano ta naaraman na harani sa puso ni Jehova an Kahadian? Iilustrar. (b) Paano niyato ikakapahiling na harani sa puso ta an Kahadian?

⁵ Harani man sa puso ni Jehova an Kahadian. Paano ta naaraman iyan? Girumdumon na isinugo niya sa kinaban an saiyang bugtong na Aki; hali ki Jehova an gabos na sinabi asin itinukdo kan Aki. (Juan 7:16; 12:49, 50) Hali man ki Jehova an gabos na nakasurat sa apat na Ebanghelyo dapit sa buhay asin ministeryo ni Jesus. Isip-isipa nguna kun ano an kahulugan kaiyan.

⁶ Ipamugtak ta baga na ilinalaag mo sa sarong album an mga ritrato kan saimong pamilya. Kadakul kan ritratong mapagpipilian mo, pero dai iyan magkakaigo gabos. Ano an gigibuhon mo? Mapili ka kun arin sana an ilalaag mo. An mga Ebanghelyo puwede man iagid sa album na nagtatao sa sato nin malinaw na paglaladawan dapit ki Jesus. Dai pinasabngan ni Jehova an mga kagsurat kaiyan na isurat an gabos na sinabi asin ginibo ni Jesus kan nasa daga siya. (Juan 20:30; 21:25) Imbes, giniyahan sinda kan espiritu ni Jehova na isurat an mga tataramon asin gibo na makakatabang sa sato na masabutan an katuyuhan kan ministeryo ni Jesus saka kun ano an pinakamahalaga ki Jehova. (2 Tim. 3:16, 17; 2 Ped. 1:21) Huling dakul an sinasabi kan mga Ebanghelyo manungod sa mga katukduan ni Jesus dapit sa Kahadian nin Diyos, tama sanang magkongklusyon kita na harani sa puso ni Jehova an Kahadian. Isip-isipa na sana—gusto niyang maaraman ta kun ano man nanggad an Kahadian!

⁷ Marahay na ihapot kan kada saro sa sato, ‘Harani daw sa puso ko an Kahadian nin Diyos?’ Kun iyo, gustong-gusto tang maghinanyog sa sinabi asin itinukdo ni Jesus dapit sa Kahadian—an kahalagahan kaiyan saka kun paano pati kun nuarin iyan madatong.

8. Paano sinumaryo ni Jesus an kahalagahan kan Kahadian?

⁸ Pag-ulayan ta an modelong pamibi. Sa makahulugan pero simpleng paagi, sinumaryo ni Jesus an kahalagahan kan Kahadian, na nagsasabi kun ano an gigibuhon kaiyan. May pitong kahagadan an pamibi. An inot na tulo may koneksiyon sa mga katuyuhan ni Jehova—pagpakangbanal kan pangaran niya, pagdatong kan Kahadian niya, asin paggibo kan kabutan niya digdi sa daga nin siring sa langit. (Basahon an Mateo 6:9, 10.) Magkakakonektar na marhay an tulong ini. An Mesiyanikong Kahadian an  gagamiton ni Jehova para pakangbanalon an pangaran niya asin gibuhon an kabutan niya.

9, 10. (a) Paano madatong an Kahadian nin Diyos? (b) Anong panuga sa Bibliya an gustong-gusto mong mahiling an kautuban?

⁹ Paano madatong an Kahadian nin Diyos? Pag namimibi kita na ‘Dumatong lugod an Kahadian mo,’ hinahagad ta na lugod humiro na iyan. Pagdatong kan Kahadian, gagamiton kaiyan sa daga an bilog na kapangyarihan kaiyan. Hahalion kaiyan an maraot na sistema nin mga bagay sa presente, pati an gabos na gobyerno nin tawo, asin pupunan kaiyan an matanos na bagong kinaban. (Dan. 2:44; 2 Ped. 3:13) Dangan, magigin paraiso an bilog na daga sa pamamahala kan Kahadian. (Luc. 23:43) Bubuhayon liwat an mga nasa memorya nin Diyos asin makakaibanan giraray ninda an mga mahal sa buhay. (Juan 5:28, 29) Magigin perpekto an mga makinuyog asin mabubuhay nin daing katapusan. (Kap. 21:3-5) Sa katapos-tapusi, an kamugtakan sa daga magigin kauyon nanggad kan sa langit, na nagpapahiling kan kabutan ni Jehova Diyos! Bako daw na gustong-gusto mong mahiling an kautuban kan mga panugang iyan sa Bibliya? Girumdumon na pag namimibi ka na dumatong lugod an Kahadian nin Diyos, ipinapamibi mo na lugod mautob an mahalagang marhay na mga panugang iyan.

¹⁰ Malinaw na dai pa ‘nagdatong’ an Kahadian nin Diyos para utubon an modelong pamibi. Iyo, namamahala pa an mga gobyerno nin tawo asin mayo pa an matanos na bagong kinaban. Pero may maugmang bareta. Naestablisar na an Kahadian, na pag-uulayan ta sa sunod na kapitulo. Siyasaton ta ngunyan an sinabi ni Jesus dapit sa kun nuarin eestablisaron asin kun nuarin madatong an Kahadian.

11. Ano an ipinarisa ni Jesus dapit sa pag-establisar kan Kahadian nin Diyos?

¹¹ Ipinarisa ni Jesus na an Kahadian dai eestablisaron kan inot na siglo C.E., dawa ngani inasahan ini kan nagkapirang disipulo niya. (Gui. 1:6) Pag-ulayan ta an sinabi niya sa duwang magkalain na parabula na haros duwang taon an pag-ultanan.

12. Paano ipinarisa kan parabula dapit sa trigo asin mga duot na dai inestablisar an Kahadian kan inot na siglo C.E.?

¹² An parabula dapit sa trigo asin mga duot o awot. (Basahon an Mateo 13:24-30.) Pagkasaysay kaini ni Jesus, na posibleng kan tigsuli nin 31 C.E., ipinaliwanag niya ini sa mga disipulo. (Mat. 13:36-43) Uni an sumaryo asin kahulugan kan parabula: Pagkagadan kan mga apostol, masabwag an Diyablo nin mga duot (imitasyon o bako totoong mga Kristiyano) sa tahaw nin trigo (‘mga aki kan Kahadian,’ o linahidan na mga Kristiyano). Papabayaan iyan na magkaibang tumalubo sagkod sa panahon nin pag-ani, an “pagtatapos nin sarong sistema nin mga bagay.” (NW) Pagpuon kan panahon nin pag-ani, titipunon an mga duot. Dangan, titipunon an trigo. Kun siring, ipinaparisa kan parabula na eestablisaron an Kahadian, bako kan inot na siglo C.E., kundi pagkatapos sana kan panahon nin pagtalubo. Arog kan nangyari, natapos an panahon nin pagtalubo asin nagpuon an panahon nin pag-ani kan 1914.

13. Paano iinilustrar ni Jesus na dai siya tulos papatukawon bilang Mesiyanikong Hadi pagbalik niya sa langit?

 ¹³ An parabula dapit sa mga mina. (Basahon an Lucas 19:11-13.) Isinaysay ini ni Jesus kan 33 C.E. kan siya pa-Jerusalem sa huring pagkakataon. An paghuna kan iba na naghihinanyog sa saiya eestablisaron niya tulos an saiyang Kahadian pag-abot ninda sa Jerusalem. Tanganing itama iyan asin ipahiling na haluyon pa bago establisaron an Kahadian, ikinumparar niya an saiyang sadiri sa ‘sarong ginoo’ o maharlika na kaipuhan magduman ‘sa sarong harayong daga [para] mag-ako nin sarong kahadian.’ a Sa kamugtakan niya, an “harayong daga” iyo an langit, na duman siya tatawan kan saiyang Ama nin kapangyarihan bilang Hadi. Pero aram niya na dai siya tulos papatukawon bilang Mesiyanikong Hadi pagbalik niya sa langit. Imbes, siya matukaw sa tuo nin Diyos asin mahalat sagkod sa itinalaan na panahon. Arog kan nangyari, an paghalat luminawig nin dakul na siglo.—Sal. 110:1, 2; Mat. 22:43, 44; Heb. 10:12, 13.

14. (a) Paano sinimbag ni Jesus an hapot sa saiya kan apat na apostol? (b) Ano an sinasabi sa sato kan kautuban kan hula ni Jesus dapit sa saiyang presensiya asin Kahadian?

¹⁴ Pirang aldaw bago gadanon si Jesus, naghapot sa saiya an apat na apostol: “Ano an magigin tanda kan saimong presensiya asin kan pagtatapos kan sistema nin mga bagay?” (Mat. 24:3, NW; Mar. 13:4) Nagsimbag siya paagi sa pagsaysay kan detalyadong hula na nasa Mateo kapitulo 24 asin 25. Idinetalye niya an lain-lain na pangyayari sa bilog na kinaban na magigin tanda kan peryodo nin panahon na inaapod na saiyang “presensiya.”  An kapinunan kan presensiya magigin kasabay kan pag-establisar kan Kahadian; asin an pagtatapos kan presensiya magigin kasabay kan pagdatong kan Kahadian. Kadakul kitang pruweba na nauutob na an hula ni Jesus puon pa kan 1914. b Huli kaini, kan taon na iyan nagpuon an saiyang presensiya asin inestablisar an Kahadian.

15, 16. Kiisay nanunungod an mga tataramon na ‘an kapag-arakian na ini’?

¹⁵ Pero, nuarin talaga madatong an Kahadian nin Diyos? Dai eksaktong sinabi ni Jesus. (Mat. 24:36) Pero may sinabi siya na masiyerto sa sato na haranihon na nanggad iyan. Ipinarisa niya na madatong an Kahadian pagkatapos na mahiling kan ‘kapag-arakian na ini’ an kautuban kan ihinulang tanda. (Basahon an Mateo 24:32-34.) Kiisay nanunungod an pananaram na ‘an kapag-arakian na ini’? Urog tang siyasaton an mga tataramon ni Jesus.

¹⁶ ‘An kapag-arakian na ini.’ An mga dai daw nin pagtubod an nasa isip niya? Bako. Isip-isipa an mga kaulay niya. Isinaysay niya an hulang ini sa pirang apostol na ‘nagdurulok sa saiya’ nin pasekreto. (Mat. 24:3) Dai mahahaloy, lalahidan na nin banal na espiritu an mga apostol. Mangnuhon man an konteksto. Bago siya magtaram dapit sa ‘kapag-arakian na ini,’ nagsabi siya: ‘Ngunyan, [makanuod] kamo kan halimbawang ini sa higera: Kun an saiyang sanga nagsusuli asin nagdadahon, aram nindo na an tig-init harani na. Siring man kamo, kun mahiling na nindo an gabos na bagay na ini, sabuton nindo na siya harani na sa mga tata.’ An linahidan na mga parasunod ni Jesus—bako an mga daing pagtubod—an makakahiling asin makakasabot kan kahulugan kan mga bagay na ihinula niya, an buot sabihon, na siya ‘harani na sa mga tata.’ Kun siring, kan magtaram siya dapit sa ‘kapag-arakian na ini,’ an linahidan na mga parasunod an nasa isip niya.

17. Ano an kahulugan kan mga pananaram na ‘kapag-arakian’ asin ‘gabos na bagay na ini’?

¹⁷ ‘Dai malihis sagkod na mautob an gabos na bagay na ini.’ Paano magkakatotoo iyan? Para masimbag iyan, kaipuhan tang aramon an duwang bagay: an kahulugan kan ‘kapag-arakian’ asin kan ‘gabos na bagay na ini.’ An terminong ‘kapag-arakian’ parating nanunungod sa mga magkakalain an edad na nagkainabutan sa sarong partikular na peryodo nin panahon. An sarong kapag-arakian bako man halawigon, asin may katapusan iyan. (Ex. 1:6) Kaiba sa pananaram na ‘an gabos na bagay na ini’ an gabos na ihinulang pangyayari sa panahon kan presensiya ni Jesus, puon 1914 sagkod sa pagtatapos kaiyan sa ‘dakulang kahurasaan.’—Mat. 24:21.

18, 19. Paano ta sasabuton an sinabi ni Jesus dapit sa ‘kapag-arakian na ini,’ asin ano an magigin kongklusyon niyato?

¹⁸ Kun siring, paano ta sasabuton an sinabi ni Jesus dapit sa ‘kapag-arakian na ini’? Iyan kompuwesto nin duwang nagkainabutan na grupo nin mga linahidan—an inot kompuwesto kan mga linahidan na nakahiling sa kapinunan kan kautuban kan tanda kaidtong 1914 asin an ikaduwa kompuwesto kan mga  linahidan na sa sarong panahon nagin kakontemporanyo kan inot na grupo. Kisiyera may nagkapira sa ikaduwang grupo na makakahiling kan kapinunan kan maabot na kahurasaan. An duwang grupo saro sanang kapag-arakian huling nagkainabutan sinda sa sarong panahon bilang linahidan na mga Kristiyano. c

¹⁹ Ano an magigin kongklusyon ta? Buweno, aram tang malinaw nang nahihiling sa bilog na kinaban an tanda kan presensiya ni Jesus bilang tagapamahala kan Kahadian. Nahihiling ta man na naggururang na an mga linahidan na buhay pa saka kabtang kan ‘kapag-arakian na ini’; alagad, an iba sa sainda dai magagadan bago magpuon an dakulang kahurasaan. Kun siring, makakakongklusyon kita na dai na nanggad mahahaloy madatong na asin mamamahala na sa bilog na daga an Kahadian nin Diyos! Nakakaugma nanggad na mahiling an kautuban kan pamibi na itinukdo sa sato ni Jesus: ‘Dumatong lugod an Kahadian mo’!

20. Anong mahalagang marhay na tema an pag-uulayan sa publikasyon na ini, asin ano an sisiyasaton sa sunod na kapitulo?

²⁰ Nungka tang lingawan an ipinagbuot mismo ni Jehova hali sa langit dapit sa Aki niya: ‘Hinanyugon nindo siya.’ Bilang tunay na mga Kristiyano, gustong-gusto tang sunudon iyan. Interesado nanggad kita sa gabos na sinabi asin itinukdo ni Jesus dapit sa Kahadian nin Diyos. An mga nagibo na kan Kahadian asin gigibuhon pa kaiyan sa maabot na panahon an mahalagang marhay na tema na pag-uulayan ta sa publikasyon na ini. Sisiyasaton sa sunod na kapitulo an interesanteng mga pangyayari may koneksiyon sa pagkamundag sa langit kan Kahadian nin Diyos.