1, 2. Ki Zeova li menm ti dir trwa zapot Zezi e ki mannyer zot ti reazir?

 SI Zeova li menm ti donn ou lord pour fer en keksoz, ki ou ti pou fer? Nenport kwa i ti kapab demann ou pour fer, eski ou ti pou pare pour swiv son lord? Sirman wi!

² En pti pe letan apre Lapannkot 32 Nou Lepok, Pyer, Zak ek Zan, trwa zapot Zezi ti eksperyans en sityasyon parey. (Lir Matye 17:1-5.) Zot ti ansanm avek zot Met anler lo “en montanny” byen o kan zot ti ganny en vizyon kot zot ti vwar Zezi konman Lerwa glorye dan lesyel. Sa vizyon ti paret sitan reel ki Pyer ti oule partisip ladan li osi. Me, letan Pyer ti ankor pe koze, en nyaz ti formen par lao zot. Apre sa, Pyer ek lezot ti tande pour zot menm sa ki zis en ptigin dimoun in ganny sans tande. Zot ti tann lavwa Zeova. Apre ki Zeova ti’n dir ki Zezi ti son Garson, i ti dir klerman: “Ekout li.” Sa bann zapot ti swiv sa lord. Zot ti ekout tou sa ki Zezi ti ansennyen e zot ti ankouraz lezot pour fer parey.​—Akt 3:19-23; 4:18-20.

3. Akoz Zeova i anvi ki nou ekout son Garson e ki size i byen nou egzamin o profon?

³ Sa lekspresyon “ekout li” in ganny mete dan Labib pour nou byenfe. (Rom. 15:4) Akoz? Parski Zezi i Portparol Zeova e sak fwa Zezi ti ansennyen, i ti pe dir nou sa ki son Papa i anvi nou konnen. (Zan 1:1, 14) Zezi ti koz plis lo Rwayonm Bondye oubyen sa gouvernman dan lesyel kot Kris i dirize konman Lerwa ansanm avek 144,000 lezot, plis ki okenn lezot size. Alor, nou osi nou bezwen egzamin sa size o profon. (Rev. 5:9, 10; 14:1-3; 20:6) Me, premyerman annou egzaminen akoz Zezi ti koz bokou lo Rwayonm Bondye.

4. Ki mannyer Zezi ti montre ki Rwayonm Bondye ti enportan pour li?

⁴ Rwayonm Bondye ti vreman enportan pour Zezi. Akoz nou kapab dir sa? Parski sa ki nou koz lo la, sanmenm ki dan nou leker, andotmo, nou parol i revel sa ki vreman enportan pour nou. Zezi li menm ti dir: “Labous i koz sa ki deborde dan leker.” (Mat. 12:34) Sak loportinite ki i ti gannyen, Zezi ti koz lo Rwayonm Bondye. Dan sa kat Levanzil,  Labib i mansyonn sa Rwayonm plis ki 100 fwa e dan laplipar ka, se Zezi ki pe koz lo la. Rwayonm Bondye ti tenm son predikasyon, i ti dir: “Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.” (Lik 4:43) Menm apre ki i ti resisite, Zezi ti kontinyen koz lo Rwayonm Bondye avek son bann disip. (Akt 1:3) Sirman leker Zezi ti deborde avek lapresyasyon pour Rwayonm Bondye e sa ti pous li pour koz lo sa Rwayonm.

5-7. (a) Ki mannyer nou konnen Rwayonm Bondye i enportan pour Zeova? Donn legzanp. (b) Ki mannyer nou kapab montre ki Rwayonm Bondye i enportan pour nou?

⁵ Sa Rwayonm i enportan pour Zeova osi. Ki mannyer nou konn sa? Pa oubliye, Zeova ti anvoy son sel Garson byenneme dan lemonn e Zeova ki sours tou sa ki son Garson ti dir e ansennyen. (Zan 7:16; 12:49, 50) Tou sa ki’n ganny ekrir dan sa kat Levanzil konsernan lavi ek minister Zezi lo later i sorti kot Zeova. Reflesir en pe lo ki sa i vedir.

⁶ Meton ou pe aranz ou albonm portre lafanmir. Petet ou pou annan en ta portre pour ou swazir, me pa tou ki pou antre dan sa albonm. Ki ou ti pou fer? Ou ti pou swazir sa ki ou anvi met ladan. Dan en sans, bann Levanzil i parey sa albonm ki donn nou en lide lo lekel Zezi. Zeova pa ti enspir bann ekriven Levanzil pour ekri tou sa ki Zezi ti dir ouswa fer ler i ti lo later. (Zan 20:30; 21:25) Plito, lespri sen Zeova ti gid zot pour ekri bann parol ek aksyon ki kapab ed nou pour konpran bi minister Zezi e sa ki pli enportan pour Zeova. (2 Tim. 3:16, 17; 2 Pyer 1:21) Vi ki bann Levanzil i ranpli avek lansennyman Zezi konsernan Rwayonm Bondye, nou kapab tonm lo sa konklizyon ki sa Rwayonm i enportan pour Zeova. Zis mazin sa, Zeova i anvi nou konnen ki son Rwayonm i enplike!

⁷ Sakenn ant nou i devret demann son lekor, ‘Eski Rwayonm Bondye i enportan pour mwan?’ Si i leka, nou pou kontan pour ekout sa ki Zezi ti dir e ansennyen konsernan sa Rwayonm, son lenportans ensi ki ki mannyer e kan ki i pou vini.

8. Ki pti rezimen Zezi ti fer pour montre ki sa Rwayonm i enportan?

⁸ Annou egzamin lapriyer model. An servan bann mo senp e tousan, Zezi ti met lanfaz lo lenportans Rwayonm Bondye par montre sa ki sa Rwayonm ti pou akonplir. Dan sa lapriyer, i annan set demann. Premye trwa i an rapor avek plan Zeova, setadir, ki son non i ganny sanktifye, ki son Rwayonm i vini e ki son lavolonte i ganny fer lo later parey dan lesyel. (Lir Matye 6:9, 10.) Sa trwa demann i relye avek kanmarad. Sa Rwayonm kot Kris i dirize konman Lerwa i sa mwayen ki Zeova pou servi pour sanktifye son non e fer son lavolonte.

9, 10. (a) Ki mannyer Rwayonm Bondye pou vini? (b) Ki promes Labib ou vreman anvi vwar akonpli?

 ⁹ Ki mannyer Rwayonm Bondye pou vini? Kan nou priye, ‘Ki ou Rwayonm i vini,’ nou pe demande ki sa Rwayonm i pran aksyon. Ler sa Rwayonm pou vini, i pou egzers dominasyon konplet lo later. I pou detri sa move lemonn, ensi ki son bann gouvernman ki zonm in etablir e i pou etabli en nouvo lemonn drwat. (Dan. 2:44; 2 Pyer 3:13) Apre sa, anba dominasyon sa Rwayonm, later antye pou vin en paradi. (Lik 23:43) Sa bann ki dan memwar Bondye pou ganny resisite e zot pou reini avek sa bann ki kontan zot. (Zan 5:28, 29) Bann imen obeisan pou gradyelman vin parfe e rezouir lavi pour touzour. (Rev. 21:3-5) A lafen, later pou parey lesyel, tou keksoz pou parfe e sa pou reflekte lavolonte Bondye. Eski pa ou vreman anvi vwar sa bann promes ganny realize? Rapel byen ki a sak fwa ki ou priye ki Rwayonm Bondye i vini, ou pe priye pour ki sa bann promes merveye i ganny akonplir.

¹⁰ I kler ki anliny avek sa lapriyer model, Rwayonm Bondye pa’n ankor vini. Apre tou, bann gouvernman ki zonm in etablir i ankor pe dirize e sa nouvo lemonn drwat pa ankor arive. Me i annan en bon nouvel selman. Parey nou pou vwar dan lot sapit, Rwayonm Bondye in fini ganny etablir. Me, aprezan, annou vwar sa ki Zezi ti dir konsernan kan ki sa Rwayonm ti pou ganny etablir e kan ki i ti pou vini.

11. Ki Zezi ti montre son bann disip konsernan Rwayonm Bondye?

¹¹ Zezi ti montre ki Rwayonm Bondye pa ti pou ganny etablir dan premye syek Nou Lepok, parey serten son bann disip ti ekspekte. (Akt 1:6) Get sa ki i ti dir dan de diferan parabol. I ti rakont sa dezyenm parabol mwens ki de-z-an apre sa enn premye.

12. Ki mannyer sa parabol lo dible ek move zerb i montre ki Rwayonm Bondye pa ti ganny etablir dan premye syek N.L.?

¹² Parabol lo dible ek move zerb. (Lir Matye 13:24-30.) Apre ki i ti’n rakont sa parabol, petet apepre prentan lannen 31 N.L., Zezi ti eksplik son bann disip son sinifikasyon. (Mat. 13:36-43) La en pti rezimen sinifikasyon sa parabol: Apre lanmor bann zapot, Dyab ti pou senm move zerb (bann swadizan Kretyen) parmi dible (bann garson Rwayonm oubyen Kretyen swazir). Sa dible ek move zerb ti pou ganny permet pour pous ansanm pour en peryod letan ziska larekolt setadir konklizyon sa move lemonn. Apre ki larekolt i konmanse, move zerb ti pou ganny anmase. Apre sa, dible ti pou ganny anmase li osi. Alor, sa parabol i montre ki Rwayonm pa ti pou ganny etablir dan premye syek N.L., me i ti pou ganny etablir apre ki sa bann plant in fini pouse. Parey listwar in finalman montre, sezon ki sa bann plant i pouse ti termin an 1914 e se la ki sezon rekolt ti konmanse.

13. Ki legzanp Zezi ti servi pour montre ki i pa ti pou ganny etabli konman Lerwa dan Rwayonm Bondye deswit apre ki i ti retourn dan lesyel?

 ¹³ Parabol larzan. (Lir Lik 19:11-13.) Zezi ti rakont sa parabol lannen 33 N.L. ler i ti pe al Zerizalenm pour en dernyen fwa. Serten parmi bann ki ti pe ekout li ti krwar ki i ti pou etabli son Rwayonm desito ki zot ti ariv Zerizalenm. Pour prouve ki zot ti mal e montre ki sa Rwayonm pa ti pou ganny etablir sa lepok, me pli tar, Zezi ti konpar son lekor avek “en zonm, sorti dan en fanmir Nob” ki ti bezwen vwayaze pour al “dan en pei lwen pour li ganny kouronnen konman lerwa.” a Dan ka Zezi, sa “pei lwen” ti reprezant lesyel kot son Papa ti pou donn li pouvwar konman Lerwa. Me Zezi ti konnen ki i pa ti pou ganny etabli konman Lerwa dan Rwayonm Bondye deswit apre ki i ti pou’n retourn dan lesyel. Plito, i ti pou bezwen asiz lo kote drwat Bondye e espere ziska sa letan fikse i arive. Parey listwar i montre, anfet i ti bezwen espere pour plizyer syek.​—Ps. 110:1, 2; Mat. 22:43, 44; Ebr. 10:12, 13.

14. (a) Ki mannyer Zezi ti reponn sa kestyon ki kat son zapot ti demann li? (b) Ki lakonplisman profesi Zezi i montre nou konsernan son prezans ek Rwayonm Bondye?

¹⁴ Detrwa zour avan Zezi ti ganny touye, kat parmi son bann zapot ti demann li ki siny ki ti pou endik son prezans ek konklizyon sa move lemonn? (Mat. 24:3; Mark 13:4) Pour reponn zot, Zezi ti koz lo en profesi ki annan plizyer lakonplisman e ki ganny rikorde dan Matye sapit 24 ek 25. Zezi ti koz an detay lo plizyer levennman ki ti pou arive dan  lemonn antye e ki ti pou form sa siny ki ti pou endik sa letan ki ganny apele son prezans. Son prezans ti pou konmanse ler Rwayonm Bondye ti pou ganny etablir e i ti pou terminen ler Rwayonm Bondye i vini. Nou annan ase laprev ki profesi Zezi in konmans ganny akonplir depi 1914. b Alor, sa menm lannen, prezans Kris ti konmanse e Rwayonm Bondye ti ganny etablir.

15, 16. Sa lekspresyon “sa zenerasyon” pe refer avek lekel?

¹⁵ Me, kan ki Rwayonm Bondye pou finalman vini? Zezi pa ti dir egzakteman kan ki sa ti pou arive. (Mat. 24:36) Me i ti dir en keksoz ki devret asir nou ki i vreman pros menm. Zezi ti endike ki sa Rwayonm ti pou vini apre ki “sa zenerasyon” ti pou’n temwanny lakonplisman sa profesi konsernan sa siny. (Lir Matye 24:32-34.) Sa lekspresyon “sa zenerasyon” pe refer avek lekel? Annou egzamin byen parol Zezi.

¹⁶ “Sa zenerasyon.” Eski Zezi ti pe mazin bann non krwayan? Non. Rapel byen avek lekel i ti pe koze. Zezi ti koz lo sa profesi avek detrwa son bann zapot ki ti’n “vin kot li an prive.” (Mat. 24:3) Sa bann zapot ti pros pour zot ganny swazir avek lespri sen. Remark son konteks osi. Avan ki i ti koz lo “sa zenerasyon,” Zezi ti dir: “Pran legzanp lo pye fig: De ki son brans i vin ver e tann, ki son bann fey i konmans pouse, zot konnen ki lete i pros. De menm, kan zot pou war tou sa bann keksoz arive, zot a konnen ki Fis-de-Lonm i pros, i devan laport.” Bann disip swazir Zezi e non pa bann non krwayan ki ti pou vwar sa bann keksoz ki i ti predir arive e zot ti pou konpran son sinifikasyon, setadir, ki Zezi “i devan laport.” Alor, ler Zezi ti pe koz lo “sa zenerasyon,” i ti pe mazin son bann disip swazir.

17. Ki sinifikasyon sa de mo “zenerasyon” ek “tousala”?

¹⁷ “Pa pou fini avan ki tousala i arive.” Ki mannyer sa parol pou vin vre? Pour reponn sa kestyon, nou bezwen konn de keksoz: ki sa mo “zenerasyon” e osi sa mo “tousala” i refer avek. Sa mo “zenerasyon” i souvan refer avek dimoun diferan laz ki viv ansanm pandan en serten letan. Sa kantite letan ki sa zenerasyon i dire i pa sitan long e i annan en lafen. (Egz. 1:6) Sa lekspresyon “tousala” i enplik tou sa bann levennman ki Zezi ti predir pou arive pandan son prezans depi 1914 ziska ki i terminen zour gran ladetres i konmanse.​—Mat. 24:21.

18, 19. Ki mannyer nou konpran parol Zezi konsernan “sa zenerasyon” e ki konklizyon nou kapab tonm lo la?

¹⁸ Alor, ki mannyer nou devret konpran parol Zezi konsernan “sa zenerasyon”? Sa zenerasyon i refer avek de group Kretyen swazir ki viv ansanm pour en serten letan. Premye group se sa bann ki ti vwar konmansman lakonplisman sa siny an 1914 e dezyenm group se bann Kretyen swazir ki pour en serten letan ti viv dan menm letan ki sa premye  group. Omwen serten parmi sa bann ki dan sa dezyenm group pou vwar konmansman sa gran ladetres ki pe vini. Sa de group i form en sel zenerasyon akoz zot viv ansanm konman Kretyen swazir pour en serten letan. c

¹⁹ Ki konklizyon nou kapab tonm lo la? Be, nou konnen ki siny prezans Kris konman Lerwa i klerman evidan dan lemonn antye. Nou osi kapab vwar ki bann Kretyen swazir ki form parti “sa zenerasyon” i ankor vivan me byen aze, pourtan, pa zot tou ki pou’n mor avan gran ladetres i konmanse. Alor, nou kapab dir ki tre byento Rwayonm Bondye pou vini e egzers son dominasyon lo later! Eski pa i vreman eksitan pour vwar lakonplisman lapriyer ki Zezi ti ansenny nou: ‘Ki ou Rwayonm i vini’!

20. Ki size vreman enportan ki pou ganny diskite dan sa piblikasyon e ki nou pou egzaminen dan lot lartik?

²⁰ Annou pa zanmen oubliy parol ki Zeova li menm ti dir dan lesyel konsernan son Garson. I ti dir: “Ekout li.” Konman vre Kretyen, nou vreman anvi ekout sa konsey Bondye. Nou vreman enterese avek tou sa ki Zezi ti dir e ansennyen konsernan Rwayonm Bondye. I vreman enportan pour etidye lo sa ki sa Rwayonm in deza akonplir e sa ki i pou akonplir dan lavenir, alor sanmenm ki pou ganny etidye dan sa piblikasyon. Lot sapit pou koz lo bann levennman eksitan ki ti arive kan Rwayonm Bondye ti vin an egzistans dan lesyel.