1, 2. Yezu ka ciden saba ye kuma jumanw mɛn Jehova yɛrɛ daa la? U ye mun lo kɛ do?

 NI Jehova Ala yɛrɛ tun ye koo dɔ ɲini i fɛ, i tun bena mun lo kɛ do? A ka kɛ koo o koo ye, i tun bena kɔrɔtɔ k’o kɛ. Tiɲɛn tɛ?

² O ɲɔgɔn lo ye Yezu ka kalanden saba nunu sɔrɔ: Piyɛri, Zaki ni Zan. O kɛra saan 32 wagati la, dɔɔni Tɛmɛnkan seli kɔ (Matiyo 17:1-5 kalan). U tun be “kulujan dɔ” kan n’u Matigi Yezu ye. Yezu tun bena nɔɔrɔ min sɔrɔ a ka Masaya la sankolo la, u y’o ye yelifɛn dɔ la. A tun be komi o koo be kɛra yɛrɛ yɛrɛ la, fɔɔ Piyɛri y’a ɲini k’a niin don o koo la. Ka Piyɛri to kuma na, sankaba dɔ y’u datugu. O kɔ, Piyɛri, Zaki ani Zan ye nɛɛmaba dɔ sɔrɔ, mɔgɔ caaman ma deli ka min ɲɔgɔn sɔrɔ: u ye Jehova yɛrɛ kumakan mɛn. Jehova ko Yezu ye ale Dencɛ ye. O kɔ, a y’a fɔ ka gwɛ ko: “Aw ka mɛnni kɛ a fɛ.” Kalandenw y’o lo kɛ. U ye Yezu ka kalan lamɛn, ani u ye mɔgɔw jija ko u k’o kɛ fana.—Kɛw. 3:19-23; 4:18-20.

3. Mun na Jehova b’a fɛ an ka mɛnni kɛ a Dencɛ fɛ? A kɔrɔtanin lo an ka sɛgɛsɛgɛri kɛ koɲuman mun lo koo la?

³ “Aw ka mɛnni kɛ a fɛ.” O kumaw sɛbɛra Bibulu kɔnɔ an nafa kosɔn (Ɔrɔm. 15:4). Mun na do? Sabu Yezu lo ye Jehova ka kuma lasebaga ye. A Faa tun b’a fɛ an ka min lɔn, a tun be mɔgɔw kalan o lo la tuma bɛɛ (Zan 1:1, 14). Yezu kumana Ala ka Masaya koo la ka tɛmɛ fɛɛn bɛɛ kan. O kama, a kɔrɔtanin lo kosɔbɛ an k’o koo sɛgɛsɛgɛ koɲuman. O Masaya ye Masiya ka gofɛrɛnɛman ye sankolo la. Yezu Krista n’a marakɛɲɔgɔn 144 000 lo b’o Masaya kun na (Yir. 5:9, 10; 14:1-3; 20:6). An k’a filɛ fɔlɔ mun na Yezu kumana Ala ka Masaya koo la caaman ten.

4. Yezu y’a yira cogo di ko Ala ka Masaya koo ka gwɛlɛ a ma?

⁴ Ala ka Masaya koo ka gwɛlɛ Yezu ma. Mun na an ko ten? Sabu mɔgɔ ka kumaw b’a yira min b’a dusukun na, o kɔrɔ, min kɔrɔtanin lo kosɔbɛ a fɛ. Yezu yɛrɛ y’a fɔ ko: “Mɔgɔ dusu fanin be fɛɛn min na, a daa b’o le fɔ.” (Mat.  12:34). Yezu tun mana sababu sɔrɔ dɔrɔn, a tun be Ala ka Masaya lo kofɔ mɔgɔw ye. O Masaya kofɔra siɲɛ 100 ni kɔ Bibulu ka Evanzili naani kɔnɔ. Yezu lo y’o fanba fɔ. A ye Ala ka Masaya koo lo kɛ a ka waajuli barokun ye. A y’a fɔ ko: “Ne ka kan ka Ala ka masaya kibaru diman fɔ dugu tɔw la fana, bari ne cikun ye o le ye.” (Luka 4:43). Yezu tora ka Ala ka Masaya kofɔ a ka kalandenw ye hali a kununin kɔ ka bɔ saya la (Kɛw. 1:3). A gwɛnin lo k’o Masaya koo ka gwɛlɛ Yezu ma kosɔbɛ. O lo y’a to a tun b’a kofɔ mɔgɔw ye.

5-7. a) An b’a lɔn cogo di ko Masaya koo ka gwɛlɛ Jehova ma? A ɲɛfɔ. b) An be se k’a yira cogo di ko Ala ka Masaya koo ka gwɛlɛ an ma?

⁵ O Masaya koo ka gwɛlɛ Jehova ma fana. An b’o lɔn cogo di? An k’a to an hakili la ko Jehova lo tun y’a Dencɛ fɔlɔ bangelen ci ka na duniɲa na. O kama, a Dencɛ ye fɛɛn o fɛɛn fɔ mɔgɔw ye, o bɔra ale Jehova lo yɔrɔ (Zan 7:16; 12:49, 50). Min bɛɛ fɔra Bibulu ka Evanzili naani kɔnɔ Yezu ka ɲɛnamaya n’a ka waajuli baara koo la, o fana bɔra Jehova lo yɔrɔ. O be mun lo yira an na do?

⁶ Miiri k’a filɛ: I be tagara voyazi la ani i ka faniw ka ca. U bɛɛ tɛ se ka don i ka saki kɔnɔ. I bena mun lo kɛ do? I bena dɔw sugandi ka dɔw to yen. O cogo kelen na, Evanziliw be i n’a fɔ saki, min fanin be kunnafoniw na Yezu koo la. Ka Yezu to dugukolo kan, a ye min fɔ ani a ye min kɛ, Jehova m’a kɛ Evanziliw sɛbɛbagaw k’u bɛɛ sɛbɛ (Zan 20:30; 21:25). Nka, Jehova ka hakili senu y’o cɛɛw ɲɛminɛ u ye Yezu ka kumaw n’a ka kɛwale dɔw sɛbɛ. U ye min sɛbɛ, o b’an dɛmɛ ka Yezu ka cidenya baara kuun faamu ani k’a lɔn min kɔrɔtanin lo Jehova fɛ (2 Tim. 3:16, 17; 2 Piyɛri 1:21). Komi Evanziliw kɔnɔnakow fanba ye Yezu ka kalanw lo ye a ye minw kɛ Ala ka Masaya koo la, an be se k’a fɔ k’o Masaya koo ka gwɛlɛ Jehova ma. O b’a yira ko Jehova b’a fɛ an k’a lɔn ale ka Masaya ye min ye.

⁷ An kelen kelen bɛɛ ka ɲi k’an yɛrɛ ɲininga ko: “Ala ka Masaya koo ka gwɛlɛ ne ma wa?” N’a koo ka gwɛlɛ an ma, an ka ɲi ka mɛnni kɛ sɔbɛ la Yezu fɛ walisa k’a lɔn o Masaya nafa ye min ye, a bena na cogo min na ani tuma min na.

8. Ala ka Masaya nafa ye min ye, Yezu y’o fɔ ka surunya cogo di?

⁸ Yezu y’a ka kalandenw degi delili min na, an k’o lajɛ. O delili man gwɛlɛ, nka a kɔrɔ ka dun. Ala ka Masaya nafa ye min ye, ani a bena min kɛ, Yezu y’o fɔ o delili la ka surunya. Fɛɛn 7 lo kofɔra o delili la. Fɛɛn fɔlɔ, 2nan ani 3nan ɲɛsinna Jehova sagonata lo ma: a tɔgɔ saniyako, a ka Masaya nako, ani a sago dafali koo dugukolo kan i n’a fɔ sankolo la (Matiyo 6:9, 10 kalan). O fɛɛn saba tɛ taga  ka ɲɔgɔn dan. Jehova bena tɛmɛ Masiya ka Masaya lo fɛ k’a tɔgɔ saniya ani k’a sago dafa.

9, 10. a) Ala ka Masaya bena na cogo di? b) E kɔrɔtɔnin lo Bibulu ka layidu juman ka dafa i ɲɛɛ na?

⁹ Ala ka Masaya bena na cogo di? N’an be delili kɛ ko “I ka masaya ka na,” o kɔrɔ ko an b’a fɛ Ala ka Masaya ka na yɛlɛmani don koow la. N’o Masaya nana, a bena dugukolo kuru bɛɛ mara. A bena duniɲa juguman nin halaki. O kɔrɔ ko a bena adamadenw ka gofɛrɛnɛmanw bɔ yen ani ka duniɲa kura sigi u nɔɔ na. Tilenninyako dama lo bena kɛ yen (Dan. 2:44; 2 Piyɛri 3:13). O kɔ, a bena dugukolo kuru bɛɛ kɛ alijɛnɛ ye (Luka 23:43). Ala hakili be mɔgɔ sanin minw na, a bena olu kunu ani u bena kɛ n’u diyanyemɔgɔw ye tugun (Zan 5:28, 29). Minw be mɛnni kɛ Ala fɛ, olu bena kɛ mɔgɔ dafaninw ye ani u bena ɲɛnamaya kɛ fɔɔ abada (Yir. 21:3-5). A laban, Jehova Ala sago bena kɛ dugukolo kan i ko a be kɛ sankolo la cogo min na! I kɔrɔtɔnin tɛ o layidu kabakomanw bɛɛ ka dafa wa? I hakili to a la ko i mana delili kɛ tuma o tuma ko Ala ka Masaya ka na, o kɔrɔ ko i be delili kɛra k’o layiduw ka dafa.

¹⁰ A gwɛnin lo ko Ala ka Masaya ma “na” fɔlɔ i ko an b’a ɲinina Ala fɛ cogo min na. Adamadenw ka gofɛrɛnɛmanw bele be yen, ani duniɲa kura ma sigi fɔlɔ. Nka kibaro diiman dɔ be yen: Ala ka Masaya sigira ka ban. An bena o lo ye sapitiri nata la. Yezu ye min fɔ o Masaya sigituma n’a natuma koo la, an k’o lajɛ sisan.

11. Yezu ye mun lo fɔ ka gwɛ Ala ka Masaya sigiko la?

¹¹ Yezu ka kalanden fɔlɔ dɔw tun b’a miiri ko Ala ka Masaya bena sigi sen kan olu ka wagati la. Nka Yezu y’a yira ka gwɛ k’o tɛ (Kɛw. 1:6). An k’a filɛ a ye min fɔ ntalen fila la. N’a sɔrɔ a y’u dɔ la saan 31, ka tɔɔ kelen la saan 33 wagati la.

12. Ntalen min lara bile ni binjugu koo la, o b’a yira cogo di ko Ala ka Masaya ma sigi sen kan saan kɛmɛkulu fɔlɔ la?

¹² Ntalen min lara bile ani binjugu koo la (Matiyo 13:24-30 kalan). N’a sɔrɔ Yezu y’o ntalen la saan 31 daminɛ na. O kɔ, a y’a kɔrɔ ɲɛfɔ a ka kalandenw ye (Mat. 13:36-43). An be se k’o ntalen n’a kɔrɔ lakali ka surunya ten: Cidenw sanin kɔ, Sutana tun bena binjugu dan bile cɛma. Binjugu ye kerecɛn tɔgɔtigiw ye ani bile ye Masaya deenw, wala kerecɛn mɔlenw ye. Binjugu ni bile fila bɛɛ tun bena falen ka bonya ɲɔgɔn fɛ fɔɔ ka taga se sumantigɛ wagati ma, o kɔrɔ, “diɲɛ laban” tuma na. Sumantigɛ wagati tun mana daminɛ, sumantigɛlaw tun bena binjugu lajɛn. O kɔ, u tun bena bile tigɛ k’a don bondo kɔnɔ. O la, Yezu ka ntalen b’a yira ko Masaya tun tɛna sigi sen kan saan kɛmɛkulu fɔlɔ la, nka a tun bena  sigi bile ni binjugu kɔgɔnin kɔ le. Koow b’a yira ko suman tun ka ɲi ka bonya wagati min kɔnɔ, o banna saan 1914, ani o saan na, sumantigɛ wagati daminɛna.

13. Yezu ye mun lo fɔ k’a yira ko a kɔseginin kɔ sankolo la, a tun tɛna sigi Masaya la kelen?

¹³ Ntalen min lara sanukuru koo la (Luka 19:11-13 kalan). Yezu y’o ntalen la saan 33 wagati la, a tagatɔ Zeruzalɛmu a siɲɛ laban na. Minw tun be n’a ye, olu dɔw tun b’a miiri ko a senin kɔ Zeruzalɛmu dɔrɔn, a tun bena a ka Masaya sigi. Yezu y’u ka miiriya latilen ani k’u dɛmɛ k’a faamu ko wagatijan tun bena tɛmɛ sanni Masaya ka sigi sen kan. O kama, a y’a yɛrɛ suma ni “Masacɛ dɔ ka deen” ye min tagara “jamanajan” dɔ la walisa ka masaya sɔrɔ. a Yezu ka koo la, o “jamanajan” tun ye sankolo lo ye, yɔrɔ min na a tun bena masaya sɔrɔ a Faa fɛ. Yezu tun b’a lɔn ko a kɔseginin kɔ sankolo la, a tun tɛna sigi masaya la kelen. Nka, a tun bena sigi Ala kinibolo fɛ ani ka kɔnɔni kɛ fɔɔ wagati latigɛnin ka se. A laban, a ye kɔnɔni kɛ fɔɔ saan kɛmɛkulu caaman.—Zab. 110:1, 2; Mat. 22:43, 44; Eburuw 10:12, 13.

14. a) Yezu y’a ka ciden naani ka ɲiningali jaabi cogo di? b) Yezu ka kiraya kuma be dafara minkɛ, o be mun lo yira Yezu ani Masaya koo la?

¹⁴ Tile damanin sanni Yezu ka sa, a ka ciden naani y’a ɲininga ko: “Taamasiɲɛ jumɛn bena i nako, ni diɲɛ laban koo yira?” (Mat. 24:3; Mariki 13:4). Yezu ye kiraya kuma dɔ fɔ k’u jaabi. O be sɔrɔ Matiyo sapitiri 24 ani 25 kɔnɔ.  Yezu y’a fɔ ko koo dɔw tun bena kɛ duniɲa kuru bɛɛ kɔnɔ ka kɛ tagamasiɲɛ ye min be a nako yira, o kɔrɔ kabi wagati min na a be masaya la sankolo la. O wagati tun bena daminɛ tuma min na Masaya sigira sen kan ani a bena ban tuma min na Yezu bena Masaya kɛ dugukolo kuru bɛɛ kun na. Koo caaman b’a yira ko Yezu ka kiraya kuma be dafara kabi saan 1914. b O b’a yira ko kabi o saan na, Masaya sigira sen kan ani ko Yezu be masaya la.

15, 16. Yezu ye “bɔnsɔn” min kofɔ, o ɲɛsinna jɔn lo ma?

¹⁵ Nka, Ala ka Masaya bena na tuma juman? Yezu m’o loon tigitigi fɔ (Mat. 24:36). Nka, a ye kuma dɔ fɔ min b’an hakili sigi k’o wagati surunyana kosɔbɛ. Yezu ye tagamasiɲɛ min kofɔ a ka kiraya kuma na, a y’a yira k’o bena dafa “bii mɔgɔ nunu [wala bɔnsɔn nin, NW]” ɲɛɛ na. O kɔ le, Masaya bena na (Matiyo 24:32-34 kalan). Nka, “bɔnsɔn nin” ɲɛsinna jɔn lo ma? An ka Yezu ka kuma sɛgɛsɛgɛ koɲuman.

¹⁶ “Bɔnsɔn nin.” Yala Yezu tun kaan be dannabaliw lo ma wa? Ayi. An be se k’o fɔ kuun fila kama. A fɔlɔ, Yezu tun be kumana ni jɔn lo ye? A tun be kumana a ka ciden damanin dɔw lo fɛ minw tun “gwɛrɛla a la u danna.” Dɔɔni o kɔ, hakili senu tun bena jigi u kan (Mat. 24:3). A filanan, sanni Yezu ka kuma o “bɔnsɔn” koo la, a kɔnna k’a fɔ ko: “Aw ka koo nunu faamu ka kɛɲɛ ni torosun cogo ye. N’a bolow nugura tuma min na ka furaburu bɔ, aw b’a lɔn ko samiɲa surunyana. O cogo kelen na, aw mana o koow bɛɛ kɛtɔ ye tuma min na, aw k’a lɔn ko Mɔgɔ Dencɛ natuma sera ka ban, a be sira la.” Yezu kɔnna ka koo minw fɔ, mɔgɔ minw tun bena u ye ani k’a faamu ko Yezu “natuma sera ka ban,” dannabaliw tɛ, nka a ka kalanden mɔlenw lo. O kama Yezu ye “bɔnsɔn” min kofɔ, o ɲɛsinna a ka kalanden mɔlenw lo ma.

17. Kuma nunu kɔrɔ ko di: “bɔnsɔn” ani “koo nunu bɛɛ”?

¹⁷ “Tena sa, ni koo nunu bɛɛ ma kɛ.” O kumaw tun bena dafa cogo di? Walisa k’o lɔn, fɔɔ an k’a faamu fɔlɔ o “bɔnsɔn” ani “koo nunu bɛɛ” kɔrɔ ye min ye. Bibulu kɔnɔ, n’u ko “bɔnsɔn,” tuma caaman na o ye wagati kelen mɔgɔw ye hali n’u bɛɛ sanda tɛ kelen ye. O wagati man jan kojugu, daan b’a la fana (Ɛkiz. 1:6). “Koo nunu bɛɛ” ye mun lo ye? Yezu ye koo minw bɛɛ fɔ a ka kiraya kuma kɔnɔ, olu lo. U tun bena dafa tuma min na Yezu be masaya la sankolo la: k’a daminɛ saan 1914, fɔɔ ka taga se “tɔɔrɔba” laban wagati la.—Mat. 24:21.

18, 19. Yezu ye min fɔ “bɔnsɔn nin” koo la, an b’o faamu cogo di? O be mun lo yira an na?

¹⁸ N’o lo, Yezu ye min fɔ “bɔnsɔn nin” koo la, an ka ɲi k’o faamu cogo di? O bɔnsɔn mɔgɔw ye jɛnkulu fila ye. U bɛɛ ye kerecɛn mɔlenw ye ani u ye ɲɛnamaya kɛ  ɲɔgɔn fɛ wagati dɔ la. Tagamasiɲɛ min b’a yira ko Yezu be masaya la, o daminɛna jɛnkulu fɔlɔ mɔgɔw ɲɛɛ na, saan 1914. Jɛnkulu 2nan mɔgɔw ye ɲɛnamaya kɛ wagati dɔ la ni jɛnkulu fɔlɔ mɔgɔw ye. Jɛnkulu 2nan mɔgɔ dɔw bele bena kɛ sii la tɔɔrɔba daminɛ tuma na. O jɛnkulu fila bɛɛ ka mɔgɔw ye bɔnsɔn kelen ye sabu u kɛnin kɔ kerecɛn mɔlenw ye, u ye ɲɛnamaya kɛ ɲɔgɔn fɛ wagati dɔ la. c

¹⁹ O koow bɛɛ be mun lo yira an na? Tagamasiɲɛ min b’a yira ko Yezu be Masaya la, an b’o yera duniɲa kuru bɛɛ kɔnɔ. An ɲɛɛ b’a la fana ko kerecɛn mɔlen minw bele be sii la ani u ye “bɔnsɔn nin” mɔgɔw ye, u be kɔrɔla ka taga. An do b’a lɔn ko u bɛɛ tɛna sa sanni tɔɔrɔba ka daminɛ. O kama, an be se k’a fɔ ko yanni dɔɔni, Ala ka Masaya bena na ani ka dugukolo bɛɛ mara! An bena ɲagali kosɔbɛ k’a ye ko Yezu ka delili nin jaabira: “I ka masaya ka na”!

20. Mun lo ɲɛfɔra gafe nin kɔnɔ? An bena mun lo ye sapitiri nata la?

²⁰ Jehova tora sankolo la ka kuma minw fɔ a Dencɛ koo la, an kana ɲinɛ u kɔ abada. A ko: “Aw ka mɛnni kɛ a fɛ.” An minw ye kerecɛn sɔbɛw ye, an b’a fɛ sɔbɛ la k’o cikan labato. Yezu ye fɛɛn o fɛɛn fɔ Ala ka Masaya koo la, an b’o ta sɔbɛ la. O Masaya ye kooba minw kɛ ka ban, ani a bena minw kɛ, olu lo ɲɛfɔra gafe nin kɔnɔ. Kooba dɔw kɛra Ala ka Masaya sigituma na sankolo la. An bena o lo ye sapitiri nata la.