1, 2. Nso ke apostle Jesus ita ẹkekop nte Jehovah etịn̄de ke idemesie, ndien nso ke mmọ ẹkenam ẹban̄a oro?

NSO ke akpanam edieke Jehovah Abasi ke idemesie ọkpọdọhọde fi anam n̄kpọ? Nte ukpunamke se ededi oro enye ọdọhọde fi anam? Ke akpanikọ, akpanam!

² Esisịt ini ke Passover isua 32 eyo Christ ama ekebe, enyene se Jehovah ke idemesie ọkọdọhọde apostle Jesus ita—Peter, James, ye John—ẹnam. (Kot Matthew 17:1-5.) Ke ini mmọ ẹkedude ye Eteufọk mmọ ke “edikon̄ obot,” mmọ ẹma ẹkụt n̄kukụt emi akaban̄ade ubọn̄ oro ẹdinọde Jesus nte Edidem ke heaven. N̄kukụt oro eketie Peter nte ata idem n̄kpọ tutu enye oyom ndiwụk tent ita. Un̄wana ama ofụk mmọ ke ini Peter okosụk etịn̄de ikọ. Ndien Peter ye apostle iba eken ẹma ẹkop n̄kpọ emi akanam ibat ibat owo kpọt ẹnyenede ifet ndikop—oro edi, ata uyo Jehovah. Ke Jehovah ama eketịn̄ ke Jesus edi Eyen imọ, enye ama ọdọhọ in̄wan̄-in̄wan̄ ete: “Ẹkpan̄ utọn̄ ẹnọ enye.” Mme apostle oro ẹma ẹnam item Abasi oro. Mmọ ẹma ẹkpan̄ utọn̄ ẹkop se Jesus ekekpepde, ẹnyụn̄ ẹsịn udọn̄ ẹnọ mbon en̄wen ẹnam kpa ntre.—Utom 3:19-23; 4:18-20.

3. Ntak emi Jehovah oyomde nnyịn ikpan̄ utọn inọ Eyen esie, ndien nso ke oyom itịn̄ enyịn ineme?

³ Ẹkewet ikọ oro—“Ẹkpan̄ utọn̄ ẹnọ enye”—ke Bible man ẹkpeda ẹkpep nnyịn n̄kpọ. (Rome 15:4) Ntak-a? Sia Jesus edi etịn̄ikọ ke ibuot Jehovah, ndien kpukpru ini emi Jesus okụbọrede inua ekpep mme owo n̄kpọ, enye esitịn̄ se Ete esie oyomde nnyịn ifiọk. (John 1:1, 14) Obio Ubọn̄ Abasi edi ukara Messiah emi Christ Jesus ye owo 144,000 ẹditienede enye ikara. Jesus ama esiwak nditịn̄ n̄kpọ mban̄a Obio Ubọn̄ oro akan nte etịn̄de aban̄a n̄kpọ en̄wen. Ntem, ọfọn itịn̄ enyịn ineme akpan ibuotikọ emi. (Edi. 5:9, 10; 14:1-3; 20:6) Edi akpa kan̄a, yak ineme ntak emi Jesus ekesimade nditịn̄ n̄kpọ ntre mban̄a Obio Ubọn̄ Abasi.

4. Didie ke Jesus okowụt ke Obio Ubọn̄ enen̄ede ebehe imọ?

⁴ Obio Ubọn̄ enen̄ede ebehe Jesus. Ntak emi idọhọde ntre? Koro ẹsida ikọ owo ẹfiọk se isịnede enye ke esịt —oro edi, ikọ nnyịn owụt se inen̄erede ibehe nnyịn. Jesus ke idem esiemmọ ọkọdọhọ ete: “Oto uyọhọ esịt inua osio etịn̄.” (Matt. 12:34) Jesus ama esida kpukpru ifet oro enye enyenede etịn̄ n̄kpọ aban̄a Obio Ubọn̄. Gospel mbinan̄ ẹtịn̄ n̄kpọ ẹban̄a Obio Ubọn̄ ẹbe utịm ike 100, ndien ata ediwak ke otu emi ẹdi ikọ emi Jesus eketịn̄de. Obio Ubọn̄ ekedi ibuotikọ ukwọrọikọ esie. Enye ọkọdọhọ ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43) Idem ke Jesus ama ekeset ke n̄kpa, enye ama aka iso etịn̄ n̄kpọ aban̄a Obio Ubọn̄ ọnọ mme mbet esie. (Utom 1:3) Ke akpanikọ, Jesus ama enen̄ede ama Obio Ubọn̄, emi akanam enye esitịn̄ n̄kpọ aban̄a enye.

5-7. (a) Isan̄a didie ifiọk ke Obio Ubọn̄ enen̄ede ebehe Jehovah? Nọ uwụtn̄kpọ. (b) Didie ke ikeme ndiwụt ke Obio Ubọn̄ enen̄ede ebehe nnyịn?

⁵ Obio Ubọn̄ enen̄ede ebehe Jehovah n̄ko. Isan̄a didie ifiọk? N̄kọ emeti ke Jehovah ọkọdọn̄ ikpọn̄-ikpọn̄ edibon Eyen esie edi ererimbot; kpukpru n̄kpọ emi Eyen esie eketịn̄de onyụn̄ ekpepde ẹketo Jehovah. (John 7:16; 12:49, 50) Kpukpru n̄kpọ oro ẹwetde ke Gospel mbinan̄ emi ẹban̄ade uwem ye utom ukwọrọikọ Jesus ẹto Jehovah n̄ko. Kere se emi ọwọrọde.

⁶ Yak idọhọ ke afo ọdọn̄ ndise ke n̄kpọ udọn̄ ndise ubon mbufo. Ndise ẹnen̄ede ẹwak, edi kpukpru ndise ikemeke ndidụk n̄kpọ udọn̄ ndise oro. Nso ke akpanam? Edisasat ndise emi edidọn̄de. Mme Gospel ẹtie nte n̄kpọ udọn̄ ndise oro, emi anamde nnyịn inen̄ede ifiọk orụk owo emi Jesus edide. Jehovah ikọnọhọ mme andiwet Gospel odudu spirit ẹda ẹwet kpukpru n̄kpọ oro Jesus eketịn̄de onyụn̄ anamde ke ini emi enye okodude ke isọn̄. (John 20:30; 21:25) Edi spirit Jehovah eketeme mme owo ẹwet se Jesus eketịn̄de onyụn̄ anamde man nnyịn ifiọk uduak utom ukwọrọikọ Jesus ye se idide ata akpan n̄kpọ inọ Jehovah. (2 Tim. 3:16, 17; 2 Pet. 1:21) Sia mme n̄kpọ oro Jesus ekekpepde aban̄a Obio Ubọn̄ Abasi ẹyọhọde-yọhọ mme Gospel, enen ndidọhọ ke Obio Ubọn̄ enen̄ede ebehe Jehovah. Idịghe omokụt do, Jehovah oyom nnyịn ifiọk n̄kpọ iban̄a Obio Ubọn̄ esie!

⁷ Ọfọn nnyịn owo kiet kiet ibụp idem nnyịn ite, ‘Ndi Obio Ubọn̄ Abasi enen̄ede ebehe mi?’ Edieke ebehede nnyịn, eyenen̄ede ọdọn̄ nnyịn ndikop se Jesus eketịn̄de onyụn̄ ekpepde aban̄a Obio Ubọn̄—nte Obio Ubọn̄ oro edide akpan n̄kpọ ye ini emi enye edidide.

8. Didie ke Jesus eketịn̄ ibio ibio aban̄a nte Obio Ubọn̄ edide akpan n̄kpọ?

⁸ Kere ban̄a akam Ọbọn̄. Jesus akada ikọ emi otode enye esịt onyụn̄ ọsọpde ndin̄wan̄a owo etịn̄ ibio ibio aban̄a nte Obio Ubọn̄ edide akpan n̄kpọ, onyụn̄ owụt se Obio Ubọn̄ oro edinamde. Akam oro esịne eben̄e itiaba. Akpa eben̄e ita  ẹban̄a mme uduak Jehovah—oro edi, edinam enyịn̄ esie asana, Obio Ubọn̄ esie ndidi, ye edinam uduak esie ke isọn̄ nte ẹnamde ke heaven. (Kot Matthew 6:9, 10.) Eben̄e ita emi ẹsan̄a kiet. Obio Ubọn̄ Messiah ke Jehovah edida inam enyịn̄ esie asana inyụn̄ inam uduak esie.

9, 10. (a) Obio Ubọn̄ Abasi edidi didie? (b) Ewe un̄wọn̄ọ Bible ọdọn̄ fi ndikụt nte osude?

⁹ Obio Ubọn̄ Abasi edidi didie? Ke ini ibọn̄de akam ite, “Yak obio ubọn̄ fo edi,” nnyịn isiben̄e ite Obio Ubọn̄ oro enen̄ede okpụhọde n̄kpọ ke isọn̄ emi. Obio Ubọn̄ oro ama edi, enye ayakara ofụri isọn̄. Enye oyosobo idiọk editịm n̄kpọ oro odude idahaemi, emi esịnede ukara owo, onyụn̄ ọtọn̄ọ edinen obufa ererimbot. (Dan. 2:44; 2 Pet. 3:13) Ndien ke ini Obio Ubọn̄ oro edikarade, ofụri isọn̄ ayakabade edi Paradise. (Luke 23:43) Mbon oro Abasi edinamde ẹset ẹyefiak ẹdidiana ye mme owo mmọ. (John 5:28, 29) Mbon n̄kopitem ẹyefọn ẹma ẹnyụn̄ ẹdu uwem ke nsinsi. (Edi. 21:3-5) Ke akpatre, enyọn̄ ye isọn̄ ẹyediana kiet ke mfọnmma usụn̄ nte Jehovah Abasi akaduakde! Ndi idọn̄ke fi ndikụt nte mme un̄wọn̄ọ Bible oro ẹsude? Ti ete ke kpukpru ini emi afo ọbọn̄de akam ete Obio Ubọn̄ Abasi edi, ke ọdọhọ yak nti un̄wọn̄ọ emi ẹsu.

¹⁰ Edi akpanikọ ke Obio Ubọn̄ Abasi idịghe kan̄a nte isiben̄ede ke akam Ọbọn̄. N̄kọ ukara owo ke ẹkakara, ndien edinen obufa ererimbot idịghe kan̄a. Edi imenyene eti mbụk, oro edi ke Obio Ubọn̄ Abasi ama ọtọtọn̄ọ ndikara, nte idinemede ke ọyọhọ ibuot iba. Idahaemi yak ineme se Jesus eketịn̄de aban̄a ini emi Obio Ubọn̄ editọn̄ọde ndikara ke heaven ye ini emi enye edidide isọn̄.

11. Nso ke Jesus eketịn̄ aban̄a ini emi Obio Ubọn̄ Abasi editọn̄ọde ndikara?

¹¹ Jesus ama owụt ke Obio Ubọn̄ iditọn̄ọke ndikara ke eyo mme apostle kpa ye oro ndusụk mbet esie ẹkekerede ke ọyọtọn̄ọ ndikara. (Utom 1:6) Kere ban̄a se enye eketịn̄de ke uwụtn̄kpọ iba emi enye ọkọnọde ke ufọt ini emi mîyọhọke isua iba.

12. Didie ke uwụtn̄kpọ oro aban̄ade wheat ye mbiet owụt ke Obio Ubọn̄ ikọtọn̄ọke ndikara ke eyo mme apostle?

¹² Uwụtn̄kpọ oro aban̄ade wheat ye mbiet. (Kot Matthew 13:24-30.) Ke Jesus ama ọkọnọ uwụtn̄kpọ emi, emi etiede nte ekedi ke ini utọ eke isua 31 eyo Christ, enye ama asian mme mbet esie se uwụtn̄kpọ oro ọwọrọde. (Matt. 13:36-43) Ọkpọikọ uwụtn̄kpọ oro ye se enye ọwọrọde edi ntem: Mme apostle ẹma ẹkpan̄a, Devil ayasuan mbiet (mme Christian abian̄a) ọdọn̄ ke otu wheat (“nditọ obio ubọn̄,” m̀mê mme Christian oro ẹyetde aran). Ẹyeyak wheat ye mbiet ẹkọri ọtọkiet tutu esịm ini ukpen̄e, emi edide “akpatre ini editịm n̄kpọ emi.” Ke ini ukpen̄e ama ọkọtọn̄ọ, ẹyesion̄o mbiet ẹbon. Ekem, ẹyetan̄ wheat ẹbon ọtọkiet. Uwụtn̄kpọ emi owụt ke Obio Ubọn̄ ikọtọn̄ọke ndikara ke eyo mme apostle, edi ke ekenyene nditọn̄ọ ke ini emi wheat ye mbiet ẹkọride ọtọkiet  ama ekebe. Ini emi mmọ ẹkekọride ọtọkiet mi ama etre, ini ukpen̄e onyụn̄ ọtọn̄ọ ke 1914.

13. Nso uwụtn̄kpọ ke Jesus ọkọnọ emi owụtde ke imọ iditọn̄ọke ndikara nte Edidem emi edide Messiah ke ndondo oro imọ inyọn̄de heaven?

¹³ Uwụtn̄kpọ oro aban̄ade mina. (Kot Luke 19:11-13.) Jesus ọkọnọ uwụtn̄kpọ emi ke isua 33 eyo Christ ke akpatre ini emi enye akakade Jerusalem. Ndusụk owo emi ẹkekopde ikọ esie ẹkekere ke enye ọyọtọn̄ọ ukara Obio Ubọn̄ esie ke ndondo oro mmọ ẹsịmde Jerusalem. Jesus ama ada idemesie odomo ye “Ọbọn̄ kiet” emi akakade “anyan idụt ndikọbọ ubọn̄ nda” man owụt ke ekikere mmọ inenke ye nte ke Obio Ubọn̄ editọn̄ọ ndikara anyan ini ko ke iso. * “Anyan idụt” oro Jesus eketịn̄de aban̄a ekedi heaven, emi Ete esie ọkọnọde enye odudu nte Edidem. Jesus ama ọfiọk ke imọ iditọn̄ọke ndikara nte Edidem emi edide Messiah ke ndondo oro imọ ifiakde inyọn̄ heaven. Edi ke iyetie ke ubọk nnasia Abasi ibet tutu ini edikem. Ndien ata ediwak isua ẹma ẹbe mbemiso ini oro ekekemde.—Ps. 110:1, 2; Matt. 22:43, 44; Heb. 10:12, 13.

14. (a) Didie ke Jesus ọkọbọrọ mbụme oro apostle esie inan̄ ẹkebụpde enye? (b) Nso ke ntịn̄nnịm ikọ Jesus ndisu asian nnyịn aban̄a edidu esie ye Obio Ubọn̄?

¹⁴ Usen ifan̄ mbemiso ẹkewotde Jesus, apostle esie inan̄ ẹma ẹbụp enye ẹte: “Sian nnyịn, Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu fo ye eke akpatre ini editịm n̄kpọ emi?” (Matt. 24:3; Mark 13:4) Jesus akada anyan ntịn̄nnịm ikọ ọbọrọ mmọ; ẹwet ntịn̄nnịm ikọ emi ke Matthew  ibuot 24 ye 25. Jesus ama etịn̄ ekese n̄kpọ aban̄a mme n̄kpọ oro ẹditịbede ke ofụri ererimbot, emi ẹdinamde ẹdiọn̄ọ ini “edidu” esie. Edidu esie editọn̄ọ ke ukem ini emi Obio Ubọn̄ ọtọn̄ọde ndikara; utịt edidu esie onyụn̄ edi ukem ini ye ini emi Obio Ubọn̄ edidide. Ekese n̄kpọ ẹwụt ke ntịn̄nnịm ikọ Jesus ke ẹsu toto ke 1914. * Ntem, isua oro ke edidu esie ọkọtọn̄ọ, Obio Ubọn̄ onyụn̄ ọtọn̄ọ ndikara.

15, 16. Mmanie ke ikọ oro “emana emi” aban̄a?

¹⁵ Edi ini ewe ke Obio Ubọn̄ Abasi edidi? Jesus iketịn̄ke ata nnennen ini emi Obio Ubọn̄ edidide. (Matt. 24:36) Edi enye ama etịn̄ n̄kpọ emi anamde nnyịn ifiọk ke enye enen̄ede ekpere. Jesus ọkọdọhọ ke Obio Ubọn̄ edidi ke “emana emi” ẹma ẹkekụt nte idiọn̄ọ emi ẹketịn̄de ẹnịm ẹsude. (Kot Matthew 24:32-34.) Mmanie ẹsine ke “emana emi”? Ẹyak itịn̄ enyịn idụn̄ọde ikọ Jesus.

¹⁶ “Emana emi.” Ndi Jesus eketịn̄ aban̄a mbon oro mînịmke ke akpanikọ? Baba. Kere ban̄a mbon emi enye eketịn̄de ikọ ọnọ. Jesus eketịn̄ ntịn̄nnịm ikọ emi ọnọ mme apostle esie ifan̄ emi “[ẹkekade] ẹbịne enye ke ndịbe.” (Matt. 24:3) Ẹkenyene ndida edisana spirit nyet mme apostle aran esisịt ini ke oro ebede. Kere n̄ko ban̄a se ẹkenemede. Mbemiso Jesus eketịn̄de aban̄a “emana emi,” enye ama ọdọhọ ete: “Edi ẹkpep n̄kpọ emi ẹto eto fig nte uwụtn̄kpọ: Ke ndondo oro nsek n̄kọk esie esehede onyụn̄ osion̄ode ikọn̄, mbufo ẹfiọk ẹte ndaeyo ke ekpere. Kpasụk ntre n̄ko, ke ini mbufo ẹkụtde kpukpru n̄kpọ emi, ẹfiọk ẹte enye ekpere, odu ke enyịnusụn̄.” Mme anditiene Jesus oro ẹkeyetde aran—idịghe mbon oro mînịmke ke akpanikọ—ẹkenyene ndikụt mme n̄kpọ emi enye eketịn̄de ẹnyụn̄ ẹfiọk se mmọ ẹwọrọde, oro edi, ke Jesus “ekpere, odu ke enyịnusụn̄.” Ke ntem, ke ini Jesus eketịn̄de aban̄a “emana emi,” enye eketịn̄ aban̄a mme anditiene enye oro ẹyetde aran.

17. Nso ke ikọ oro “emana” ye “kpukpru n̄kpọ emi” ẹwọrọ?

¹⁷ “Idibehe ifep tutu kpukpru n̄kpọ emi ẹwọrọ ẹsu.” Didie ke ikọ emi edisu? Oyom ifiọk se “emana” ye “kpukpru n̄kpọ emi” ẹwọrọde man ikeme ndibọrọ mbụme oro. “Emana” esiwak ndida mban̄a mme owo emi ẹdide nsio nsio isua emana emi ẹdude uwem ke akpan ini kiet. Emana isiniọn̄ke ikaha, esinyụn̄ enyene utịt. (Ex. 1:6) Ikọ oro “kpukpru n̄kpọ emi,” esịne kpukpru n̄kpọ oro ẹketịn̄de ẹnịm ke ẹditịbe ke ini edidu Jesus, ọtọn̄ọde ke ntọn̄ọ edidu esie ke 1914 tutu esịm utịt ke “akwa ukụt.”—Matt. 24:21.

18, 19. Nso ke ikọ Jesus oro aban̄ade “emana emi” ọwọrọ, ndien nso ke emi anam nnyịn ifiọk?

¹⁸ Nso ndien ke ikọ Jesus oro aban̄ade “emana emi” ọwọrọ? Emana emi esịne otu iba emi ẹdide mbon oro ẹyetde aran—akpa otu edi mbon oro ẹyetde aran, emi ẹkekụtde ini emi idiọn̄ọ oro ọkọtọn̄ọde ndisu ke 1914. Ọyọhọ iba edi mbon oro ẹyetde aran emi ẹkedude uwem ke ini emi akpa otu oro  ẹkesụk ẹdude uwem. Ọdiọk nte ọdọdiọk, ndusụk owo ke ọyọhọ otu iba oro ẹyedu ẹsịm ntọn̄ọ akwa ukụt. Otu iba emi ẹdi emana kiet sia ndusụk owo ke akpa otu oro ẹma ẹdu uwem ẹkụt ọyọhọ otu iba. *

¹⁹ Nso ke emi anam nnyịn ifiọk? Nnyịn imọfiọk ke idụhe ebiet ke ererimbot emi owo mîkwe idiọn̄ọ emi owụtde ke Jesus ama ọtọn̄ọ ndikara ke Obio Ubọn̄ heaven. Imonyụn̄ ikụt ke mbon oro ẹyetde aran, emi ẹsụk ẹdude uwem ẹnyụn̄ ẹdide ubak “emana emi” ẹnen̄ede ẹsọn̄. Kpa ye oro, ndusụk mmọ ẹyedu uwem ẹkụt ntọn̄ọ akwa ukụt. Mmọdo, imekeme ndidọhọ ke idibịghike Obio Ubọn̄ Abasi ọmọn̄ edi edikara ofụri isọn̄! Edinem didie ntem ndikụt nte akam oro Jesus ekekpede nnyịn mi osude: “Yak Obio Ubọn̄ fo edi”!

20. Nso idi akpan n̄kpọ emi idinemede ke n̄wed emi, ndien nso ke ibuot oro etienede edineme?

²⁰ Ẹyak nnyịn ikûdedei ifre ikọ oro Jehovah ke idemesie eketiede ke heaven etịn̄ aban̄a Eyen esie ete: “Ẹkpan̄ utọn̄ ẹnọ enye.” Sia idide ata mme Christian, enen̄ede ọdọn̄ nnyịn ndinam item Abasi emi. Onyụn̄ enen̄ede ọdọn̄ nnyịn ndifiọk kpukpru n̄kpọ oro Jesus eketịn̄de onyụn̄ ekpepde aban̄a Obio Ubọn̄ Abasi. Se Obio Ubọn̄ ama akananam ye se enye edinamde ke ini iso ẹdi akpan n̄kpọ oro idinemede ke n̄wed emi. Ibuot oro etienede eyeneme mme aduai-owo-idem n̄kpọ oro ẹketịbede ke ini Obio Ubọn̄ Abasi ọkọtọn̄ọde ndikara ke heaven.