1, 2. (a) Na vosa cava eratou rogoca na yapositolo ni cavuta o Jiova? (b) Na cava eratou cakava?

 KAYA mada ke vakaroti iko o Jiova ena dua na ka, cava o na cakava? Macala ga ni o na via muria se mani cava e kerea.

² Qori na ka e yacovi ratou na yapositolo i Jisu, o Pita, Jemesa, kei Joni ni oti na kanavata ni Lakosivia ena 32 G.V. (Wilika Maciu 17:1-5.) Ni ratou tiko kei na nodratou Turaga ena “dua na ulunivanua cecere,” eratou raica vakalailai ga ni sa Tui vakaiukuuku mai lomalagi o Jisu. E vaka ga e yaco dina tiko na raivotu qori, ni via birika sara ga o Pita e tolu na valelaca. Ni se vakamacala tiko ga o Pita sa vakaruguti ratou na o, ratou rogoca sara na ka talei era rogoca ga e le vica, na domo i Jiova. Ni vakadeitaka oti vei ratou o Jiova ni luvena o Jisu, e qai kaya: “Dou rogoci koya.” Eratou muria na yapositolo na veidusimaki vakalou qori, ratou qai uqeta eso tale mera muria.—Caka. 3:19-23; 4:18-20.

3. (a) Na cava e vinakata kina o Jiova meda rogoci Luvena? (b) Na usutu cava meda dikeva vinaka?

³ Na matavosa, “Dou rogoci koya,” e volai ena iVolatabu meda vuli kina. (Roma 15:4) Na vuna? O Jisu e dau vosa ena vuku i Jiova, na gauna kece e veivakavulici kina e wasea ga na veika e vinakata o Tamana meda kila. (Joni 1:1, 14) E dau wewenigusu i Jisu na Matanitu ni Kalou, na matanitu vakaMesaia ena veiliutaki kina kei ira na le 144,000. E bibi gona meda dikeva vinaka na usutu qo. (Vkta. 5:9, 10; 14:1-3; 20:6) Meda raica mada na vuna e vakamacalataka kina vakalevu o Jisu na Matanitu ni Kalou.

4. E vakaraitaka vakacava o Jisu ni bibi vua na Matanitu ni Kalou?

⁴ E bibi vei Jisu na Matanitu ni Kalou. Eda kila vakacava qori? Na veika eda tukuna e vakaraitaka na ka e tiko e lomada, na veika eda cavuta e dusia na ka e bibi duadua vei keda. E kaya sara ga o Jisu: “[E]na cavuta ga na gusumudou na ka e sinai tu e lomamudou.” (Maciu 12:34) E dau tukuna o koya na veika me baleta na Matanitu ni Kalou ena gauna veiganiti kece. E cavuti vaka100 vakacaca ena Kosipeli na Matanitu ni Kalou, levu e cavuta o Jisu. E usutu ni nona vunau na  Matanitu ni Kalou, ni kaya: “E dodonu meu tukuna tale ga na itukutuku vinaka ni Matanitu ni Kalou ena koro tale eso, ni qo na ka au talai mai kina.” (Luke 4:43) Ni vakaturi oti o Jisu, se tukuna tiko ga vei ratou nona tisaipeli na Matanitu ni Kalou. (Caka. 1:3) Na levu ni nona marautaka na Matanitu ni Kalou e uqeti koya me dau vakamacalataka.

5-7. (a) Eda kila vakacava ni bibi vei Jiova na Matanitu ni Kalou? Vakatauvatana. (b) Eda na vakaraitaka vakacava ni bibi vei keda na Matanitu ni Kalou?

⁵ E bibi tale ga vei Jiova na Matanitu ni Kalou. Eda kila vakacava? E tala mai vuravura o Jiova na luvena duabau ga e bulia; o Jiova na ivurevure ni ka kece e mai tukuna o Luvena kei na veika e vakavulica. (Joni 7:16; 12:49, 50) E ivurevure tale ga ni itukutuku kece e volai ena va na Kosipeli me baleta na bula i Jisu kei na nona cakacaka vakaitalatala. Meda veivosakitaka mada na kena ibalebale.

⁶ Kaya mada ke o biuta vata tiko na kemudou itaba vakavuvale ena kena itawatawa. E levu na itaba, e lailai ga na kena itawatawa. Cava o na cakava? O na digia ga na itaba me vakayagataki. Na Kosipeli e vaka na itawatawa ni itaba eda na kilai Jisu vinaka kina. E sega ni uqeti ira na dauvola Kosipeli o Jiova mera vola na ka kece e tukuna se cakava o Luvena ni se tiko e vuravura. (Joni 20:30; 21:25) E dusimaki ira na yalo i Jiova mera vola ga na veika e tukuna se cakava o Jisu meda kila kina na inaki ni nona cakacaka vakaitalatala, kei na loma i Jiova. (2 Tim. 3:16, 17; 2 Pita 1:21) Ni vutucoqa ena Kosipeli na ivakavuvuli i Jisu me baleta na Matanitu ni Kalou, rawa gona nida tukuna ni bibi vei Jiova na Matanitu qori. Vakasamataka mada, e vinakata o Jiova meda kila na nona Matanitu!

⁷ E vinaka mo taroga, ‘E bibi vei au na Matanitu ni Kalou?’ Ke vaka kina, eda na via kila na ka e tukuna o Jisu kei na ka e vakavulica me baleta na Matanitu ni Kalou. E okati e keri na vuna e bibi kina, na ka ena cakava, kei na gauna ena yaco mai kina.

8. E vakamacalataka vakacava o Jisu na bibi ni Matanitu ni Kalou?

⁸ Vakasamataka mada na masu e vakavulica o Jisu. E matata qai rawarawa nona vakamacalataka kina na bibi ni Matanitu ni Kalou kei na veika ena vakayacora. E vitu na ka e kerei ena masu qori. Na tolu na ka e kerei e liu e vauca na inaki i Jiova, oya me vakarokorokotaki na yacana, me yaco mai na nona Matanitu, me caka na lomana e vuravura me vaka e caka tiko mai lomalagi. (Wilika Maciu 6:9, 10.) E veisemati vinaka na tolu na ka e kerei qori. Ena vakayagataka o Jiova na Matanitu vakaMesaia me vakarokorokotaka na yacana, me vakayacora tale ga na lomana.

9, 10. (a) Na cava ena cakava na Matanitu ni Kalou ni yaco mai? (b) Na vosa ni yalayala cava ena iVolatabu o na via raica me vakayacori?

⁹ Na cava ena cakava na Matanitu ni Kalou ni yaco mai?  Nida masulaka, “Me yaco mai na nomuni Matanitu,” eda kerea me sa veiliutaki na Matanitu ni Kalou. Ni yaco mai na Matanitu qori ena vakayagataka na kena lewa kece e vuravura. Ena vakarusa na ituvaki ca nikua, wili kina na matanitu kece vakatamata qai sosomitaka ena vuravura vou ni yalododonu. (Tani. 2:44; 2 Pita 3:13) Ni sa veiliutaki, ena parataisi na vuravura taucoko. (Luke 23:43) Era na vakaturi o ira e nanumi ira na Kalou mera sotavi ira tale na wekadra lomani. (Joni 5:28, 29) Era na bula uasivi na tamata talairawarawa, era na marautaka na bula me tawamudu. (Vkta. 21:3-5) Sa na qai vakayacori e vuravura na loma i Jiova me vaka sa caka tiko mai lomalagi! Vakacava o via raica na vakayacori ni vosa ni yalayala qori ena iVolatabu? Kua ni guilecava ni gauna kece o masulaka kina me yaco mai na Matanitu ni Kalou, o sa masulaka tiko me vakayacori na yalayala totoka qori.

¹⁰ E macala ni se bera ni “yaco mai” na Matanitu ni Kalou me vakayacora na ka e kerei ena masu a vakavulica o Jisu. Era se veiliutaki tiko na veimatanitu vakatamata, se bera tale ga na vuravura vou ni yalododonu. Ia qo na itukutuku vinaka. Sa tauyavu oti na Matanitu ni Kalou me vaka eda na veivosakitaka ena wase tarava. Meda raica mada na gauna e tukuna o Jisu ena tauyavu kina na Matanitu ni Kalou kei na gauna ena yaco mai kina.

11. Na cava e vakaraitaka o Jisu me baleta na tauyavu ni Matanitu ni Kalou?

¹¹ E vakaraitaka o Jisu ni na sega ni tauyavu na Matanitu ni Kalou ena imatai ni senitiuri G.V., me vaka era namaka eso na nona tisaipeli. (Caka. 1:6) Dikeva mada na ka e tukuna o koya ena rua na vosa vakatautauvata, dua e rairai cavuta ena 31 G.V., kena ikarua ena 33 G.V.

12. E kilai vakacava mai na vosa vakatautauvata ni witi kei na co ca ni sega ni tauyavu na Matanitu ni Kalou ena imatai ni senitiuri G.V.?

¹² Vosa vakatautauvata ni witi kei na co ca. (Wilika Maciu 13:24-30.) Ni talanoataka oti na vosa vakatautauvata qo o Jisu, rairai ena itekivu ni 31 G.V., sa qai vakamacalataka na kena ibalebale vei ratou na nona tisaipeli. (Maciu 13:36-43) Qo na uto ni vosa vakatautauvata kei na kena ibalebale: Ni ratou sa mate na yapositolo, ena kaburaka na Tevoro na co ca (ira na lotu vaKarisito lasu) ena maliwa ni witi (“luve ni Matanitu” se lotu vaKarisito lumuti). Ena biu me rau tubu vata na witi kei na co ca me yacova na gauna ni tatamusuki, qori na “ivakataotioti ni veika vakavuravura.” Ni tekivu na gauna ni tatamusuki, ena kumuni na co ca. Oti ena qai kumuni na witi. E macala gona ena vosa vakatautauvata qo ni sega ni tauyavu na Matanitu ni Kalou ena imatai ni senitiuri G.V., e tauyavu ga ni sa cava na gauna  ni nodrau tubu vata na witi kei na co ca. E cava na gauna qori ena 1914 qai tekivu na gauna ni tatamusuki.

13. Na vosa vakatautauvata cava e vakamacalataka kina o Jisu ni na sega ni vakatikori me Tui vakaMesaia ni lesu ga i lomalagi?

¹³ Vosa vakatautauvata ni ilavo siliva. (Wilika Luke 19:11-13.) A cavuta na vosa vakatautauvata qo o Jisu ena iotioti ni nona lako i Jerusalemi ena 33 G.V. Nira rogoca qori eso, era nanuma ni na tauyavutaka na nona Matanitu nira yaco ga i Jerusalemi. Me vakadodonutaka na rai qori, me vakaraitaka tale ga ni se yawa sara na tauyavu ni Matanitu ni Kalou, e vakatauvatani koya o Jisu kei na “dua e sucu turaga” e lako ina ‘vanua yawa me lai vakadeitaka nona itutu vakatui.’ a Na ‘vanua yawa’ e lakova o Jisu o lomalagi, ena solia kina vua o Tamana na lewa vakatui. Ia e kila ni na sega ni vakatikori me Tui vakaMesaia ni lesu ga i lomalagi. Ena dabe toka ena ligaimatau ni Kalou me waraka na gauna lokuci. E vica vata na senitiuri na nona wawa tiko.—Same 110:1, 2; Maciu 22:43, 44; Iper. 10:12, 13.

14. (a) E sauma vakacava o Jisu na nodratou taro e va na nona yapositolo? (b) Ni vakadinadinataki ni sa vakayacori na parofisai i Jisu, na cava e rawa ni tukuni me baleta na nona tiko kei na Matanitu ni Kalou?

¹⁴ Ni vo e vica na siga me vakamatei o Jisu, eratou tarogi koya e va na nona yapositolo: ‘Na cava na ivakatakilakila e dusia ni oni sa tiko, kei na ivakataotioti ni veika vakavuravura?’ (Maciu 24:3; Mari. 13:4) A sauma o Jisu ena nona vakamacalataka e dua na parofisai e rabailevu na kena ibalebale e volatukutukutaki ena Maciu wase 24 kei na 25. E  vakamacalataka e keri o koya na veika ena yaco e vuravura me dusia na nona “tiko.” Ena tekivu nona tiko donuya na tauyavu ni Matanitu ni Kalou; na icavacava ni nona tiko ena donuya na yaco mai ni Matanitu ni Kalou. Levu na ivakadinadina e dusia ni sa tekivu vakayacori ena 1914 na parofisai i Jisu. b Qori na yabaki e tiko kina o Jisu, e tauyavu tale ga kina na Matanitu ni Kalou.

15, 16. E tukuni cei tiko na vosa “itabatamata qo”?

¹⁵ Na gauna cava ena yaco mai kina na Matanitu ni Kalou? Sega ni tukuna o Jisu na gauna ena yaco kina. (Maciu 24:36) E vakamacalataka ga na ka meda kila kina ni sa voleka sara. E tukuna o Jisu ni na yaco mai na Matanitu ni Kalou ni raica na “itabatamata qo” na vakayacori ni ivakatakilakila e parofisaitaki. (Wilika Maciu 24:32-34.) O cei na “itabatamata” e tukuni tiko qo? Meda dikeva vinaka mada na vosa i Jisu.

¹⁶ “iTabatamata qo.” Vakacava e tukuni ira tiko na sega ni vakabauta o Jisu? Sega. Raica mada se vosa tiko vei cei. E vakamacalataka na vosa vakatautauvata qo o Jisu vei ratou na vica na yapositolo ratou “lako vuni vua.” (Maciu 24:3) Eratou vakarau lumuti ena yalo tabu na yapositolo. Raica tale ga na ikotokoto. Ni bera ni vakamacalataka o Jisu na “itabatamata qo,” e tukuna: “Dou vuli mai na ivakatautauvata ni vunilolo: ni rovu mai na tabana qai belebele na drauna, dou kila sara ni sa voleka na vulaikatakata. Ni dou raica tale ga na ka kece qo, dou kila ni sa voleka sara o koya e katuba.” Era na raica na imuri lumuti i Jisu na ka e parofisaitaka ra qai kila na kena ibalebale, oya ni sa “voleka sara o koya e katuba,” era na sega ni raica qori na sega ni vakabauta. Ni cavuta o Jisu na “itabatamata qo,” e tukuni ira tiko na nona imuri lumuti.

17. Na cava na ibalebale ni matavosa “itabatamata” kei na “ka kece qo”?

¹⁷ ‘Ena sega ni takali, ena yaco mada e liu na ka kece qo.’ Ena vakayacori vakacava na vosa qo? Me saumi qori, e bibi meda kila e rua na ka: na ibalebale ni “itabatamata” kei na “ka kece qo.” Na vosa “itabatamata” e dau dusi ira e duidui nodra yabaki ni bula, era bula vata ena loma ni dua na gauna. Sega ni dau dede e dua na itabatamata, e tiko tale ga na kena itinitini. (Lako 1:6) Na matavosa “ka kece qo” e okati kina na ka kece e parofisaitaki ni na yaco ni sa tiko o Jisu, me tekivu ena 1914 me yacova na kena icavacava ena “veivakararawataki levu.”​—Maciu 24:21.

18, 19. (a) Na cava eda kila ena ka e tukuna o Jisu me baleta na “itabatamata qo”? (b) Na cava eda sa vulica?

¹⁸ Na cava gona na ibalebale ni “itabatamata qo” a cavuta o Jisu? Na itabatamata e vakaibalebaletaka e rua na ilawalawa lumuti era bula vata. Kena imatai o ira na lumuti era raica na itekitekivu ni kena vakayacori na ivakatakilakila ena 1914, kei na kena ikarua o ira na lumuti era bula vata kei  na imatai ni ilawalawa ena loma ni dua na gauna. Eso vei ira ena ikarua ni ilawalawa era na bula tiko mera raica na itekitekivu ni veivakararawataki levu sa voleka. Na rua na ilawalawa qo e dusia ga e dua na itabatamata, nira bula vata na lotu vaKarisito lumuti qori ena loma ni dua na gauna. c

¹⁹ Na cava eda sa vulica? Eda kila ni sa laurai levu e veiyasa i vuravura na ivakatakilakila ni sa tiko o Jisu me veiliutaki ena Matanitu ni Kalou. Era sa qase tale ga na lumuti era se bula tiko ra qai wili ena “itabatamata qo,” ia era na bula tiko eso ni tekivu na veivakararawataki levu. Eda rawa gona ni tukuna ni sa voleka sara ni yaco mai na Matanitu ni Kalou me lewa na vuravura! Sa na matalau dina meda raica ni sa vakayacori na masu a vakavulici keda kina o Jisu: “Me yaco mai na nomuni matanitu”!

20. (a) Na cava ena veivosakitaki ena ivola qo e bibi meda vulica? (b) Na cava ena vakamacalataki ena wase tarava?

²⁰ Meda kua sara ni guilecava na vosa a cavuta mai lomalagi o Jiova me baleti Luvena: “Dou rogoci koya.” Eda via muria sara ga na lotu vaKarisito dina na veidusimaki vakalou qori. Eda via kila na ka kece a tukuna qai vakavulica o Jisu me baleta na Matanitu ni Kalou. E bibi meda vulica na veika sa vakayacora oti na Matanitu ni Kalou kei na veika ena vakayacora ena gauna se bera mai me vaka ena veivosakitaki ena ivola qo. Na wase tarava ena vakamacalataka na veika vakatubuqoroqoro me baleta na tauyavu ni Matanitu ni Kalou mai lomalagi.