ជំពូកទី១
«សូមឲ្យរាជាណាចក្ររបស់លោកបានមកដល់»
១, ២. តើព្រះយេហូវ៉ាបានមានប្រសាសន៍យ៉ាងណាទៅកាន់សាវ័កបីនាក់របស់លោកយេស៊ូ ហើយតើពួកគាត់មានប្រតិកម្មយ៉ាងណា?
បើព្រះយេហូវ៉ាបង្គាប់អ្នកដោយផ្ទាល់ឲ្យធ្វើអ្វីមួយ តើអ្នកនឹងមានប្រតិកម្មយ៉ាងណា? ទោះជាលោកបង្គាប់ឲ្យធ្វើអ្វីក៏ដោយ អ្នកច្បាស់ជានឹងរំភើបចិត្តធ្វើតាមបង្គាប់លោក មែនទេ?
២ នៅពេលមួយបន្ទាប់ពីបុណ្យរំលងនៅឆ្នាំ៣២ គ.ស. ពេត្រុស យ៉ាកុប និងយ៉ូហានដែលជាសាវ័ករបស់លោកយេស៊ូ បានត្រូវព្រះយេហូវ៉ាបង្គាប់ដោយផ្ទាល់មែន។ (សូមអាន ម៉ាថាយ ១៧:១-៥) ពួកគាត់នៅជាមួយនឹងលោកម្ចាស់របស់ពួកគាត់នៅលើ«ភ្នំខ្ពស់មួយ»។ នៅទីនោះ សិរីរុងរឿងដែលលោកយេស៊ូនឹងមានពេលលោកទៅជាស្តេចនៅស្ថានសួគ៌ បានត្រូវបើកបង្ហាញទុកជាមុនឲ្យពួកគាត់ឃើញក្នុងគំនិត។ អ្វីដែលពួកគាត់ឃើញក្នុងគំនិតគឺហាក់ដូចជាកំពុងកើតឡើងពិតៗ រហូតដល់ពេត្រុសខំចូលរួមក្នុងអ្វីដែលគាត់បានឃើញនោះ។ កាលដែលពេត្រុសកំពុងនិយាយនៅឡើយ នោះមានពពកមួយមកគ្របបាំងពួកគាត់។ បន្ទាប់មក ពេត្រុសនិងសាវ័កឯទៀតបានឮយ៉ាងច្បាស់នូវសំឡេងមួយដែលមនុស្សជាតិតិចណាស់ធ្លាប់មានឯកសិទ្ធិឮ គឺសំឡេងរបស់ព្រះយេហូវ៉ាផ្ទាល់។ ក្រោយពីព្រះយេហូវ៉ាបញ្ជាក់ថាលោកយេស៊ូជាបុត្ររបស់លោក នោះព្រះយេហូវ៉ាបង្គាប់យ៉ាងចំៗថា៖ «ចូរស្ដាប់តាមលោក»។ សាវ័កទាំងនោះបានធ្វើតាមបង្គាប់របស់ព្រះដោយស្ដាប់អ្វីដែលលោកយេស៊ូបង្រៀន។ ពួកគាត់ក៏បានដាស់តឿនអ្នកឯទៀតឲ្យធ្វើដូច្នោះដែរ។—សកម្ម. ៣:១៩-២៣; ៤:១៨-២០
លោកយេស៊ូបានបង្រៀនអំពីរាជាណាចក្ររបស់ព្រះច្រើនជាងប្រធានបទឯទៀតទាំងអស់
៣. ហេតុអ្វីព្រះយេហូវ៉ាចង់ឲ្យយើងស្ដាប់តាមបុត្ររបស់លោក ហើយហេតុនេះតើយើងគួរពិនិត្យមើលសេចក្ដីបង្រៀនអ្វី?
៣ ពាក្យថា«ចូរស្ដាប់តាមលោក» បានត្រូវកត់ទុកក្នុងគម្ពីរដើម្បីដាស់តឿនយើង។ (រ៉ូម ១៥:៤) ហេតុអ្វី? គឺដោយសារលោកយេស៊ូជាអ្នកនាំពាក្យរបស់ព្រះយេហូវ៉ា ហើយរាល់ដងដែលលោកយេស៊ូបង្រៀន លោកកំពុងប្រាប់នូវអ្វីដែលបិតារបស់លោកចង់ឲ្យយើងដឹង។ (យ៉ូន. ១:១, ១៤) លោកយេស៊ូបានបង្រៀនអំពីរាជាណាចក្ររបស់ព្រះ ដែលជារដ្ឋាភិបាលនៅស្ថានសួគ៌គ្រប់គ្រងដោយមេស្ស៊ី គឺលោកយេស៊ូគ្រិស្ត ហើយក៏មាន១៤៤.០០០នាក់គ្រប់គ្រងជាមួយនឹងលោកដែរ។ ដោយសារលោកយេស៊ូបានបង្រៀនអំពីរាជាណាចក្រនេះច្រើនជាងប្រធានបទឯទៀតទាំងអស់ នោះយើងគួរពិនិត្យមើលសេចក្ដីបង្រៀនដ៏សំខាន់ចាំបាច់នេះឲ្យបានដិតដល់។ (បប. ៥:៩, ១០; ១៤:១-៣; ២០:៦) ក៏ប៉ុន្តែ មុនបង្អស់ សូមយើងពិនិត្យអំពីមូលហេតុដែលលោកយេស៊ូបានបង្រៀនច្រើនអំពីរាជាណាចក្ររបស់ព្រះ។
« . . . អ្វីដែលមានពោរពេញនៅក្នុងចិត្ត»
៤. តើលោកយេស៊ូបានបង្ហាញយ៉ាងដូចម្ដេចថា លោករមែងគិតអំពីរាជាណាចក្ររបស់ព្រះ?
៤ លោកយេស៊ូរមែងគិតអំពីរាជាណាចក្ររបស់ព្រះ។ ហេតុអ្វីយើងដឹង? គឺដោយសារសម្ដីរបស់បុគ្គលម្នាក់បញ្ជាក់ឲ្យដឹងអ្វីដែលមាននៅក្នុងចិត្តរបស់គាត់ ហើយឲ្យដឹងអ្វីដែលគាត់ចាត់ទុកថាពិតជាសំខាន់។ លោកយេស៊ូផ្ទាល់បានមានប្រសាសន៍ថា៖ «មាត់តែងនិយាយអ្វីដែលមានពោរពេញនៅក្នុងចិត្ត»។ (ម៉ាថ. ១២:៣៤) រាល់ដងដែលលោកយេស៊ូមានឱកាស លោកបានមានប្រសាសន៍អំពីរាជាណាចក្ររបស់ព្រះ។ សៀវភៅដំណឹងល្អទាំងបួនលើកឡើងអំពីរាជាណាចក្រជាង១០០ដង ហើយនោះច្រើនតែជាប្រសាសន៍របស់លោកយេស៊ូ។ លោកយេស៊ូបានយករាជាណាចក្ររបស់ព្រះជាប្រធានបទសំខាន់បំផុតដែលលោកផ្សព្វផ្សាយ។ លោកបានមានប្រសាសន៍ថា៖ «ខ្ញុំត្រូវប្រកាសដំណឹងល្អអំពីរាជាណាចក្ររបស់ព្រះនៅក្រុងផ្សេងទៀតដែរ ពីព្រោះនេះជាមូលហេតុដែលខ្ញុំបានត្រូវចាត់ឲ្យមក»។ (លូក. ៤:៤៣) សូម្បីតែក្រោយពីលោកបានត្រូវប្រោសឲ្យរស់ឡើងវិញក្ដី ក៏លោកនៅតែនិយាយជាមួយនឹងអ្នកកាន់តាមលោកអំពីរាជាណាចក្ររបស់ព្រះដែរ។ (សកម្ម. ១:៣) លោកយេស៊ូច្បាស់ជាឲ្យតម្លៃខ្ពស់ទៅលើរាជាណាចក្ររបស់ព្រះ ហើយនោះបានជំរុញលោកឲ្យមានប្រសាសន៍អំពីរាជាណាចក្រនោះ។
៥-៧. (ក) ហេតុអ្វីយើងដឹងថាព្រះយេហូវ៉ារមែងគិតអំពីរាជាណាចក្រ? សូមឲ្យឧទាហរណ៍។ (ខ) តើយើងអាចបង្ហាញយ៉ាងដូចម្ដេចថា យើងរមែងគិតអំពីរាជាណាចក្ររបស់ព្រះ?
៥ ព្រះយេហូវ៉ាក៏រមែងគិតអំពីរាជាណាចក្រដែរ។ ហេតុអ្វីយើងអាចនិយាយដូច្នេះ? សូមចាំថា គឺព្រះយេហូវ៉ាដែលបានចាត់លោកយេស៊ូជាបុត្រតែមួយរបស់លោកឲ្យចូលក្នុងពិភពលោក ហើយអ្វីៗទាំងអស់ដែលលោកយេស៊ូបាននិយាយនិងបង្រៀនសុទ្ធតែមកពីព្រះយេហូវ៉ា។ (យ៉ូន. ៧:១៦; ១២:៤៩, ៥០) ព្រះយេហូវ៉ាក៏ជាអ្នកដឹកនាំឲ្យសរសេរអ្វីៗទាំងអស់ដែលមានក្នុងសៀវភៅដំណឹងល្អទាំងបួន ស្តីអំពីជីវិតនិងកិច្ចបម្រើរបស់លោកយេស៊ូដែរ។ ដោយសារព្រះយេហូវ៉ាបានធ្វើដូច្នេះ តើយើងអាចសន្និដ្ឋានយ៉ាងណា?
យើងទាំងអស់គ្នាគួរសួរខ្លួនថា ‹តើខ្ញុំរមែងគិតអំពីរាជាណាចក្ររបស់ព្រះឬទេ?›
៦ ឧបមាថាអ្នកចង់ប្រមូលរូបថតក្រុមគ្រួសារដាក់ក្នុងសៀវភៅរូបថត។ អ្នកមានរូបថតជាច្រើន ប៉ុន្តែមិនអាចដាក់រូបថតទាំងអស់ក្នុងសៀវភៅនោះបានទេ។ ដូច្នេះតើអ្នកត្រូវធ្វើយ៉ាងណា? អ្នកត្រូវជ្រើសរើសរូបថតណាដែលអ្នកចង់ដាក់។ យើងអាចនិយាយថាសៀវភៅដំណឹងល្អគឺប្រៀបដូចជាសៀវភៅរូបថត ដែលយើងអាចមើល ដើម្បីយល់ច្បាស់អំពីលោកយេស៊ូ។ ព្រះយេហូវ៉ាមិនបានឲ្យអ្នកសរសេរសៀវភៅដំណឹងល្អកត់អ្វីៗទាំងអស់ដែលលោកយេស៊ូបានធ្វើនិងមានប្រសាសន៍កាលដែលលោកនៅផែនដីទេ។ (យ៉ូន. ២០:៣០; ២១:២៥) ផ្ទុយទៅវិញ ពេលដែលពួកគេបានកត់ពាក្យសម្ដីរបស់លោកយេស៊ូនិងសរសេរអំពីការប្រព្រឹត្តរបស់លោក នោះសកម្មពលរបស់ព្រះយេហូវ៉ាបានដឹកនាំពួកគេឲ្យសរសេរតែអ្វីដែលជួយឲ្យយល់នូវគោលបំណងនៃកិច្ចបម្រើរបស់លោកយេស៊ូ និងអ្វីដែលព្រះយេហូវ៉ាចាត់ទុកថាសំខាន់បំផុត។ (២ធី. ៣:១៦, ១៧; ២ពេ. ១:២១) ដោយហេតុថាសៀវភៅដំណឹងល្អគឺពេញទៅដោយសេចក្ដីបង្រៀនរបស់លោកយេស៊ូស្តីអំពីរាជាណាចក្រ នោះយើងអាចសន្និដ្ឋានយ៉ាងត្រឹមត្រូវថា ព្រះយេហូវ៉ារមែងគិតអំពីរាជាណាចក្រ។ នេះមានន័យថាព្រះយេហូវ៉ាចង់ឲ្យយើងយល់អំពីរាជាណាចក្ររបស់លោក។ នេះពិតជាអស្ចារ្យណាស់!
៧ យើងទាំងអស់គ្នាគួរសួរខ្លួនថា ‹តើខ្ញុំរមែងគិតអំពីរាជាណាចក្ររបស់ព្រះដែរឬទេ?›។ បើយើងរមែងគិតអំពីរាជាណាចក្រមែន យើងនឹងរំភើបចិត្តចង់ដឹងអ្វីដែលលោកយេស៊ូបានបង្រៀននិងមានប្រសាសន៍អំពីរាជាណាចក្រនោះ ជាពិសេសស្តីអំពីរបៀបដែលរាជាណាចក្រនឹងមកដល់ អំពីពេលដែលរាជាណាចក្រនឹងមកដល់ និងអំពីសារៈសំខាន់នៃរាជាណាចក្រនោះ។
តើតាមរបៀបណា‹រាជាណាចក្ររបស់ព្រះនឹងមកដល់›?
៨. តើលោកយេស៊ូបានបញ្ជាក់សារៈសំខាន់នៃរាជាណាចក្ររបស់ព្រះយ៉ាងដូចម្ដេច?
៨ សូមគិតអំពីសេចក្ដីអធិដ្ឋានដែលលោកយេស៊ូបានទុកជាគំរូ។ លោកយេស៊ូបានប្រើពាក្យដែលស្រួលយល់តែមានន័យជ្រាលជ្រៅ។ ក្នុងសេចក្ដីអធិដ្ឋាននោះ លោកបានបញ្ជាក់យ៉ាងសង្ខេបអំពីសារៈសំខាន់នៃរាជាណាចក្ររបស់ព្រះ ដោយប្រាប់អំពីអ្វីដែលរាជាណាចក្រនោះនឹងសម្រេច។ ក្នុងសេចក្ដីអធិដ្ឋានគំរូមានសំណូមពរ៧។ សំណូមពរបីដំបូងទាក់ទងនឹងគោលបំណងរបស់ព្រះយេហូវ៉ា ពោលគឺការធ្វើឲ្យនាមរបស់លោកបានបរិសុទ្ធ ការមកដល់នៃរាជាណាចក្ររបស់លោក និងការសម្រេចគោលបំណងរបស់លោកនៅផែនដីដូចនៅស្ថានសួគ៌។ (សូមអាន ម៉ាថាយ ៦:៩, ១០) សំណូមពរទាំងបីនោះជាប់ទាក់ទងគ្នា។ រាជាណាចក្ររបស់មេស្ស៊ីគឺជាមធ្យោបាយដែលព្រះយេហូវ៉ានឹងប្រើដើម្បីធ្វើឲ្យនាមរបស់លោកបានបរិសុទ្ធ និងដើម្បីសម្រេចបំណងប្រាថ្នារបស់លោក។
៩, ១០. (ក) តើរាជាណាចក្ររបស់ព្រះនឹងធ្វើអ្វីពេលដែលរាជាណាចក្រនោះមកដល់? (ខ) តើអ្នកចង់ឃើញព្រះធ្វើតាមសេចក្ដីសន្យាមួយណាខ្លាំងបំផុត?
៩ តើរាជាណាចក្ររបស់ព្រះនឹងមកដល់យ៉ាងដូចម្ដេច? ពេលដែលយើងអធិដ្ឋានថា៖ «សូមឲ្យរាជាណាចក្ររបស់លោកបានមកដល់» យើងកំពុងសុំឲ្យរាជាណាចក្រនោះចាត់វិធានការច្បាស់លាស់។ ពេលដែលរាជាណាចក្រមកដល់ រាជាណាចក្រនឹងប្រើអំណាចយ៉ាងពេញលេញចំពោះផែនដីនេះ។ រាជាណាចក្រនោះនឹងបំបាត់ចោលពិភពលោកដ៏អាក្រក់នេះ រួមទាំងរដ្ឋាភិបាលទាំងឡាយរបស់មនុស្ស ហើយនឹងនាំមកនូវពិភពលោកថ្មីដ៏សុចរិតមួយ។ (ដាន. ២:៤៤; ២ពេ. ៣:១៣) រួចមក ក្រោមការគ្រប់គ្រងនៃរាជាណាចក្ររបស់ព្រះ ផែនដីទាំងមូលនឹងក្លាយទៅជាសួនឧទ្យាន។ (លូក. ២៣:៤៣) អ្នកដែលនៅក្នុងសេចក្ដីនឹកចាំរបស់ព្រះនឹងត្រូវប្រោសឲ្យរស់ឡើងវិញ ហើយអាចជួបជុំជាមួយមនុស្សជាទីស្រឡាញ់របស់ពួកគេម្ដងទៀត។ (យ៉ូន. ៥:២៨, ២៩) មនុស្សដែលស្ដាប់បង្គាប់ នឹងក្លាយទៅជាមនុស្សល្អឥតខ្ចោះ ហើយនឹងរស់ជារៀងរហូត។ (បប. ២១:៣-៥) ដូចស្ថានសួគ៌ដែរ នៅទីបំផុតផែនដីនឹងមានលក្ខណៈស្របតាមបំណងប្រាថ្នារបស់ព្រះយេហូវ៉ាទាំងស្រុង! អ្នកប្រាកដជាចង់ឃើញព្រះធ្វើតាមសេចក្ដីសន្យារបស់លោកដែលចែងក្នុងគម្ពីរ មែនទេ? សូមចាំថា រាល់ដងដែលអ្នកអធិដ្ឋានសុំឲ្យរាជាណាចក្ររបស់ព្រះមកដល់ នោះអ្នកកំពុងសុំឲ្យព្រះធ្វើតាមសេចក្ដីសន្យាពិសេសទាំងនេះហើយ។
១០ យើងអាចឃើញច្បាស់ថា រាជាណាចក្ររបស់ព្រះមិនទាន់«មកដល់»ស្របតាមសេចក្ដីអធិដ្ឋាន ដែលលោកយេស៊ូបានបង្រៀនជាគំរូនោះទេ។ ហេតុអ្វីយើងអាចនិយាយដូច្នេះ? គឺពីព្រោះរដ្ឋាភិបាលរបស់មនុស្សកំពុងគ្រប់គ្រងនៅឡើយ ហើយមិនទាន់មានពិភពលោកថ្មីដ៏សុចរិតនោះទេ។ ប៉ុន្តែមានដំណឹងល្អ គឺថា រាជាណាចក្ររបស់ព្រះបានចាប់ផ្ដើមគ្រប់គ្រងហើយ។ នេះជាអ្វីដែលយើងនឹងរៀនក្នុងជំពូកបន្ទាប់។ ប៉ុន្តែឥឡូវនេះ សូមយើងពិចារណាអំពីអ្វីដែលលោកយេស៊ូមានប្រសាសន៍ស្តីអំពីពេលដែលរាជាណាចក្រនឹងចាប់ផ្ដើមគ្រប់គ្រង និងអំពីពេលដែលរាជាណាចក្រនោះនឹងមកដល់។
តើរាជាណាចក្ររបស់ព្រះចាប់ផ្ដើមគ្រប់គ្រងនៅពេលណា?
១១. តើលោកយេស៊ូបានឲ្យដឹងអ្វីខ្លះស្តីអំពីពេលរាជាណាចក្រនឹងចាប់ផ្ដើមគ្រប់គ្រង?
១១ ទោះជាអ្នកកាន់តាមខ្លះរបស់លោកយេស៊ូ បានរំពឹងថារាជាណាចក្ររបស់ព្រះនឹងចាប់ផ្ដើមគ្រប់គ្រងនៅសតវត្សរ៍ទី១ គ.ស.ក៏ដោយ តែលោកបានឲ្យដឹងថា រាជាណាចក្រនឹងមិនចាប់ផ្ដើមគ្រប់គ្រងនៅពេលនោះទេ។ (សកម្ម. ១:៦) សូមពិចារណាអ្វីដែលលោកបានមានប្រសាសន៍ក្នុងឧទាហរណ៍ពីរផ្សេងគ្នា។ លោកបានរៀបរាប់ឧទាហរណ៍ទី១ ហើយជិតពីរឆ្នាំក្រោយមក លោកបានរៀបរាប់ឧទាហរណ៍ទី២។
១២. តើឧទាហរណ៍អំពីស្រូវសាលីនិងស្រងែបញ្ជាក់ឲ្យដឹងយ៉ាងដូចម្ដេចថា រាជាណាចក្ររបស់ព្រះមិនចាប់ផ្ដើមគ្រប់គ្រងនៅសតវត្សរ៍ទី១ គ.ស.ទេ?
១២ ឧទាហរណ៍អំពីស្រូវសាលីនិងស្រងែ: (សូមអាន ម៉ាថាយ ១៣:២៤-៣០) លោកយេស៊ូប្រហែលជាបានរៀបរាប់ឧទាហរណ៍នេះនៅរដូវស្លឹកឈើលាស់ នៅឆ្នាំ៣១ គ.ស.។ ក្រោយមក លោកបានពន្យល់អ្នកកាន់តាមលោកអំពីអត្ថន័យឧទាហរណ៍នេះ។ (ម៉ាថ. ១៣:៣៦-៤៣) អត្ថន័យសង្ខេបនៃឧទាហរណ៍នោះគឺដូចតទៅនេះ: ក្រោយពីសាវ័ករបស់លោកយេស៊ូស្លាប់ទៅ មេកំណាចនឹងសាបព្រោះស្រងែ (គឺគ្រិស្តសាសនិកក្លែងក្លាយ) ក្នុងចំណោមស្រូវសាលី («កូននៃរាជាណាចក្រ» គឺគ្រិស្តសាសនិកដែលបានត្រូវរើសតាំង a)។ ស្រូវសាលីនិងស្រងែនឹងត្រូវទុកឲ្យដុះជាមួយគ្នាក្នុងរដូវលូតលាស់។ រដូវនោះត្រូវបន្តរហូតដល់រដូវច្រូតកាត់ ដែលជា«ទីបញ្ចប់នៃរបៀបរបបពិភពលោក»។ ក្រោយពីរដូវច្រូតកាត់ចាប់ផ្ដើម ស្រងែនឹងត្រូវប្រមូល។ រួចមកស្រូវសាលីនឹងត្រូវច្រូតដែរ។ ដូច្នេះ ឧទាហរណ៍នេះបញ្ជាក់ថា រាជាណាចក្ររបស់ព្រះនឹងមិនចាប់ផ្ដើមគ្រប់គ្រងនៅសតវត្សរ៍ទី១ គ.ស.ទេ តែនឹងចាប់ផ្ដើមគ្រប់គ្រងក្រោយពីរដូវលូតលាស់ចប់វិញ។ នៅឆ្នាំ១៩១៤ រដូវលូតលាស់បានចប់ ហើយរដូវច្រូតកាត់បានចាប់ផ្ដើម។
១៣. តើលោកយេស៊ូបានរៀបរាប់ឧទាហរណ៍អ្វីដែលបញ្ជាក់ឲ្យដឹងថា លោកមិនទទួលតំណែងជាស្តេចភ្លាមៗក្រោយពីត្រឡប់ទៅស្ថានសួគ៌ទេ?
១៣ ឧទាហរណ៍អំពីមិណា: (សូមអាន លូកា ១៩:១១-១៣) លោកយេស៊ូបានរៀបរាប់ឧទាហរណ៍នេះនៅឆ្នាំ៣៣ គ.ស. កាលដែលលោកកំពុងធ្វើដំណើរទៅក្រុងយេរូសាឡិមជាលើកចុងក្រោយ។ មនុស្សខ្លះដែលកំពុងស្ដាប់លោកបានគិតស្មានថា លោកនឹងរៀបចំរាជាណាចក្ររបស់លោកភ្លាមៗ ក្រោយពីលោកទៅដល់ក្រុងយេរូសាឡិម។ ដើម្បីកែតម្រូវគំនិតរបស់ពួកគេ ហើយបញ្ជាក់ថារាជាណាចក្រនឹងចាប់ផ្ដើមគ្រប់គ្រងក្រោយមួយរយៈពេលយ៉ាងយូរកន្លងទៅ នោះលោកយេស៊ូបានប្រដូចខ្លួនលោកទៅនឹង«បុរសម្នាក់ដែលកើតក្នុងរាជវង្ស» ហើយដែលធ្វើដំណើរ«ទៅប្រទេសឆ្ងាយ ដើម្បីទទួលអំណាចគ្រប់គ្រងជាស្តេច»។ b ក្នុងករណីលោកយេស៊ូ «ប្រទេសឆ្ងាយ»នោះគឺស្ថានសួគ៌ ជាកន្លែងដែលលោកនឹងទទួលអំណាចគ្រប់គ្រងជាស្តេចពីបិតារបស់លោក។ ប៉ុន្តែលោកយេស៊ូជ្រាបថា លោកនឹងមិនត្រូវតែងតាំងជាស្តេចដែលជាមេស្ស៊ីភ្លាមៗ ក្រោយពីលោកត្រឡប់ទៅស្ថានសួគ៌ទេ។ ផ្ទុយទៅវិញ លោកនឹងអង្គុយនៅខាងស្ដាំព្រះ ហើយចាំរហូតដល់ពេលកំណត់។ គ្រាដែលលោកបានរង់ចាំនោះ គឺមានរយៈពេលរាប់រយឆ្នាំ។—ទំនុក. ១១០:១, ២; ម៉ាថ. ២២:៤៣, ៤៤; ហេ. ១០:១២, ១៣
តើរាជាណាចក្ររបស់ព្រះនឹងមកដល់នៅពេលណា?
១៤. (ក) ពេលសាវ័ករបស់លោកយេស៊ូសួរសំណួរលោក តើលោកបានឆ្លើយយ៉ាងណា? (ខ) ដោយសារព្រឹត្ដិការណ៍ផ្សេងៗដែលលោកយេស៊ូបានទាយទុកជាមុនកំពុងកើតឡើង តើនេះបញ្ជាក់យ៉ាងណាអំពីវត្តមានរបស់លោក និងអំពីរាជាណាចក្ររបស់ព្រះ?
១៤ ប៉ុន្មានថ្ងៃមុនលោកយេស៊ូត្រូវគេប្រហារជីវិត សាវ័កបួននាក់របស់លោកបានសួរលោកថា៖ «តើអ្វីជាសញ្ញាសម្គាល់ដែលបញ្ជាក់វត្តមានរបស់លោក និងគ្រាចុងបញ្ចប់នៃរបៀបរបបពិភពលោក?»។ (ម៉ាថ. ២៤:៣; ម៉ាក. ១៣:៤) លោកយេស៊ូបានឆ្លើយសំណួរនោះដោយប្រកាសទំនាយដែលបានត្រូវកត់ទុកនៅម៉ាថាយ ជំពូកទី២៤និង២៥។ ក្នុងទំនាយនោះ លោកបានបញ្ជាក់យ៉ាងល្អិតល្អន់អំពីព្រឹត្ដិការណ៍ផ្សេងៗក្នុងពិភពលោក ដែលរួមគ្នាជាសញ្ញាសម្គាល់នៃគ្រាមួយដែលហៅថា«វត្តមាន»របស់លោក។ វត្តមានរបស់លោកចាប់ផ្ដើមនៅពេលដែលរាជាណាចក្រចាប់ផ្ដើមគ្រប់គ្រង។ វត្តមានរបស់លោកចប់ ពេលរាជាណាចក្រមានអំណាចគ្រប់គ្រងយ៉ាងពេញលេញលើផែនដី។ យើងមានភ័ស្តុតាងជាច្រើនដែលបង្ហាញថា ព្រឹត្ដិការណ៍ដែលលោកយេស៊ូបានទាយទុកជាមុនកំពុងកើតឡើងមែន តាំងពីឆ្នាំ១៩១៤មកម្ល៉េះ។ c ដូច្នេះ ឆ្នាំ១៩១៤ជាការចាប់ផ្ដើមនៃវត្តមានរបស់លោក និងក៏ជាឆ្នាំដែលរាជាណាចក្ររបស់ព្រះចាប់ផ្ដើមគ្រប់គ្រងដែរ។
១៥, ១៦. តើពាក្យ«ជំនាន់នេះ»សំដៅលើអ្នកណា?
១៥ ក៏ប៉ុន្តែ តើរាជាណាចក្ររបស់ព្រះនឹងមកដល់នៅពេលណា? លោកយេស៊ូមិនបានមានប្រសាសន៍ចំៗថារាជាណាចក្រនឹងមកដល់នៅពេលណាឡើយ។ (ម៉ាថ. ២៤:៣៦) ប៉ុន្តែលោកបានប្រាប់អ្វីមួយដែលពង្រឹងទំនុកចិត្តយើងថា ទីបញ្ចប់ពិតជាជិតមកដល់មែន។ លោកយេស៊ូបានបញ្ជាក់ថា រាជាណាចក្រនឹងមកដល់ ក្រោយពី«ជំនាន់នេះ»ឃើញសញ្ញាសម្គាល់ដែលលោកបានប្រកាសទុកជាមុន។ (សូមអានម៉ាថាយ ២៤:៣២-៣៤) តើពាក្យថា«ជំនាន់នេះ»សំដៅលើអ្នកណា? សូមពិនិត្យមើលប្រសាសន៍របស់លោកយេស៊ូឲ្យបានដិតដល់ជាង។
១៦ «ជំនាន់នេះ»: ពេលលោកយេស៊ូពោលពាក្យនោះ តើលោកកំពុងសំដៅលើអ្នកមិនជឿឬ? មិនមែនទេ។ ហេតុអ្វីយើងដឹង? សូមពិចារណាថាអ្នកណាកំពុងស្ដាប់លោកយេស៊ូពេលលោកមានប្រសាសន៍អំពីរឿងនេះ។ លោកយេស៊ូបានប្រកាសទំនាយនេះប្រាប់សាវ័កបួននាក់ដែល«បានមកឯលោកដោយឡែកពីគេ»។ (ម៉ាថ. ២៤:៣) មិនយូរក្រោយនោះ សាវ័ករបស់លោកនឹងត្រូវរើសតាំងតាមរយៈសកម្មពលបរិសុទ្ធ។ ម្យ៉ាងទៀត សូមគិតអំពីអ្វីដែលលោកយេស៊ូបានមានប្រសាសន៍មុនលោករៀបរាប់អំពី«ជំនាន់នេះ»។ លោកមានប្រសាសន៍ថា៖ «ចូរទាញយកមេរៀនពីឧទាហរណ៍អំពីដើមល្វាតូចដូចតទៅនេះ៖ កាលដែលមែកខ្ចីរបស់វាទៅជាទន់ ហើយដុះស្លឹក អ្នកដឹងភ្លាមថា រដូវក្ដៅជិតដល់ហើយ។ ចំពោះអ្នករាល់គ្នាក៏ដូចគ្នាដែរ។ កាលដែលអ្នកឃើញការទាំងអស់នេះ ចូរដឹងថាកូនមនុស្សនៅជិតមាត់ទ្វារហើយ»។ អ្នកកាន់តាមលោកយេស៊ូដែលបានត្រូវរើសតាំងនឹងឃើញអ្វីដែលលោកបានទាយទុកជាមុន ហើយពួកគេក៏នឹងយល់អត្ថន័យនៃព្រឹត្ដិការណ៍ទាំងនោះដែរ ពោលគឺលោកយេស៊ូ«នៅជិតមាត់ទ្វារហើយ»។ អ្នកមិនជឿនឹងមិនយល់អត្ថន័យនៃព្រឹត្ដិការណ៍ទាំងនោះទេ។ ដូច្នេះ ពេលលោកយេស៊ូមានប្រសាសន៍អំពី«ជំនាន់នេះ» លោកកំពុងសំដៅលើអ្នកកាន់តាមលោកដែលបានត្រូវរើសតាំង។
១៧. តើពាក្យថា«ជំនាន់»និង«ការទាំងអស់នេះ»មានន័យដូចម្ដេច?
១៧ «នឹងមិនកន្លងបាត់ទៅសោះឡើយ ទាល់តែការទាំងអស់នេះកើតឡើង»: តើពាក្យទាំងនេះនឹងកើតឡើងយ៉ាងដូចម្ដេច? ដើម្បីឆ្លើយសំណួរនោះ យើងត្រូវយល់អ្វីពីរយ៉ាងជាមុនសិន គឺយើងត្រូវយល់ថាពាក្យ«ជំនាន់»មានន័យដូចម្ដេច ហើយក៏ត្រូវយល់ថាពាក្យ«ការទាំងអស់នេះ»មានន័យដូចម្ដេចដែរ។ ក្នុងគម្ពីរ ពាក្យថា«ជំនាន់»ច្រើនតែសំដៅលើមនុស្សដែលមានអាយុខុសៗគ្នា តែធ្លាប់រស់នៅសម័យមួយជាមួយគ្នា។ មួយជំនាន់មានទីបញ្ចប់ ហើយគឺមិនវែងពេកទេ។ (និក្ខ. ១:៦) ពាក្យថា«ការទាំងអស់នេះ» សំដៅលើព្រឹត្ដិការណ៍ទាំងឡាយដែលលោកយេស៊ូបានប្រកាសជាមុនថានឹងកើតឡើងក្នុងអំឡុងវត្តមានរបស់លោក តាំងពីវត្តមាននោះចាប់ផ្ដើមនៅឆ្នាំ១៩១៤ រហូតដល់វត្តមាននោះចប់នៅគ្រា«ទុក្ខវេទនាជាខ្លាំង»។—ម៉ាថ. ២៤:២១
១៨, ១៩. តើពាក្យរបស់លោកយេស៊ូស្តីអំពី«ជំនាន់នេះ»បញ្ជាក់ន័យអ្វី ហើយតើយើងអាចសន្និដ្ឋានយ៉ាងណា?
១៨ បើដូច្នេះ តើលោកយេស៊ូចង់បញ្ជាក់អំពីអ្នកណា ពេលលោកថា«ជំនាន់នេះ»? ជំនាន់នេះជាគ្រិស្តសាសនិកពីរក្រុមដែលបានត្រូវរើសតាំងឲ្យឡើងទៅស្ថានសួគ៌។ ក្រុមទី១ ជាគ្រិស្តសាសនិកដែលបានត្រូវរើសតាំង ហើយបានឃើញសញ្ញាសម្គាល់ចាប់ផ្ដើមនៅឆ្នាំ១៩១៤។ ក្រុមទី២ ជាគ្រិស្តសាសនិកដែលបានត្រូវរើសតាំងកាលដែលក្រុមទី១នៅរស់នៅឡើយ។ គ្រិស្តសាសនិកខ្លះពីក្រុមទី២នឹងនៅរស់នៅឡើយពេលគ្រាទុក្ខវេទនាជាខ្លាំងចាប់ផ្ដើម។ ក្រុមទាំងពីររួមគ្នាជាជំនាន់តែមួយ ពីព្រោះពួកគេបានរស់នៅសម័យតែមួយអស់មួយរយៈជាមួយគ្នា ជាគ្រិស្តសាសនិកដែលមានសេចក្ដីសង្ឃឹមឡើងទៅស្ថានសួគ៌។ d
១៩ ដោយផ្អែកលើព័ត៌មាននេះ តើយើងអាចសន្និដ្ឋានយ៉ាងណា? នៅទូទាំងពិភពលោក យើងឃើញជាក់ច្បាស់នូវសញ្ញាសម្គាល់ដែលបញ្ជាក់ថា លោកយេស៊ូកំពុងគ្រប់គ្រងជាស្តេច។ យើងក៏ឃើញដែរថា គ្រិស្តសាសនិកដែលបានត្រូវរើសតាំង និងដែលនៅរស់នៅឡើយ ហើយថែមទាំងនៅក្នុងក្រុមដែលហៅថា«ជំនាន់នេះ» គឺមានវ័យចាស់ហើយ។ តែមិនមែនពួកគេទាំងអស់គ្នានឹងស្លាប់មុនទុក្ខវេទនាជាខ្លាំងចាប់ផ្ដើមនោះទេ។ ដូច្នេះ យើងអាចសន្និដ្ឋានថា បន្ដិចទៀតរាជាណាចក្ររបស់ព្រះនឹងមកដល់ ហើយចាប់ផ្ដើមគ្រប់គ្រងលើផែនដីទាំងមូល! យើងពិតជានឹងរំភើបចិត្តមែន ពេលឃើញ«រាជាណាចក្ររបស់លោកបានមកដល់» ដូចលោកយេស៊ូបានបង្រៀនយើងឲ្យអធិដ្ឋានសុំនោះ!
២០. សៀវភៅនេះជាជំនួយសិក្សាអំពីប្រធានបទដ៏សំខាន់ចាំបាច់មួយ។ តើប្រធានបទនោះជាអ្វី ហើយតើយើងនឹងពិនិត្យមើលរឿងអ្វីក្នុងជំពូកបន្ទាប់?
២០ សូមកុំភ្លេចនូវអ្វីដែលព្រះយេហូវ៉ាបានមានប្រសាសន៍ដោយផ្ទាល់ពីស្ថានសួគ៌ ស្តីអំពីបុត្ររបស់លោកថា៖ «ចូរស្ដាប់តាមលោក»។ ដោយសារយើងជាគ្រិស្តសាសនិកពិត យើងប្រាកដជាចង់ធ្វើតាមបង្គាប់របស់ព្រះ។ យើងចាប់អារម្មណ៍យ៉ាងខ្លាំងទៅលើអ្វីៗទាំងអស់ដែលលោកយេស៊ូបានមានប្រសាសន៍និងបានបង្រៀនអំពីរាជាណាចក្ររបស់ព្រះ។ អ្វីដែលរាជាណាចក្រនោះបានសម្រេចរួចហើយ និងអ្វីដែលរាជាណាចក្រនោះនឹងធ្វើនៅថ្ងៃមុខ ជាប្រធានបទដ៏សំខាន់ដែលយើងនឹងពិចារណាក្នុងសៀវភៅនេះ។ ក្នុងជំពូកបន្ទាប់យើងនឹងពិនិត្យមើលព្រឹត្ដិការណ៍ដ៏គួរឲ្យរំភើបចិត្តដែលទាក់ទងនឹងការចាប់ផ្ដើមគ្រប់គ្រងនៃរាជាណាចក្ររបស់ព្រះនៅស្ថានសួគ៌។
a នេះសំដៅលើអ្នកដែលបានត្រូវរើសតាំងតាមរយៈសកម្មពលបរិសុទ្ធ ដើម្បីឡើងទៅស្ថានសួគ៌និងដើម្បីគ្រប់គ្រងជាមួយនឹងគ្រិស្ត។
b ឧទាហរណ៍របស់លោកយេស៊ូប្រហែលជាធ្វើឲ្យអ្នកដែលកំពុងស្ដាប់លោក នឹកឃើញអាខេឡាស ដែលជាកូនរបស់ស្តេចហេរ៉ូឌ។ មុនស្តេចហេរ៉ូឌទទួលមរណភាព លោកបានតែងតាំងអាខេឡាសជាអ្នកស្នងតំណែងឲ្យគ្រប់គ្រងតំបន់យូឌានិងតំបន់ផ្សេងទៀត។ ក៏ប៉ុន្តែ មុនអាខេឡាសអាចចាប់ផ្ដើមគ្រប់គ្រងបាន គាត់ត្រូវធ្វើដំណើរឆ្ងាយទៅក្រុងរ៉ូមដើម្បីទទួលការអនុញ្ញាតពីសេសារអូគូស។
c ដើម្បីទទួលព័ត៌មានថែមទៀត សូមមើលជំពូកទី៩ក្នុងសៀវភៅតើគម្ពីរអាចបង្រៀនយើងអំពីអ្វី?
d អ្នកណាដែលបានត្រូវរើសតាំងក្រោយពីសមាជិកចុងក្រោយនៃក្រុមទី១បានស្លាប់ ពោលគឺក្រោយពីអ្នកដែលបានឃើញ«ការចាប់ផ្ដើមនៃគ្រាលំបាក»នៅឆ្នាំ១៩១៤បានស្លាប់ អ្នកនោះមិនមែនជាសមាជិកនៃក្រុម«ជំនាន់នេះ»ឡើយ។—ម៉ាថ. ២៤:៨
