1, 2. Kiko tres apòstel di Hesus a tende Yehova mes bisa, i kon nan a reakshoná?

 SI Yehova Dios manda bo hasi algu, kon lo bo reakshoná? Lo bo no ta ansioso pa hasié, sin importá ta kiko? Klaru ku sí!

² Esei ta netamente loke a pasa den e promé siglo ku tres apòstel di Hesus—Pedro, Santiago i Huan—poko despues di e Pasku Hudiu di aña 32. (Lesa Mateo 17:1-5.) Nan tabata riba “un seru haltu” huntu ku nan Maestro, Hesus. Ei, den un vishon, nan a haña un bista adelantá di Hesus komo un Rei selestial glorioso. E vishon tabata asina real ku Pedro a purba di partisipá den dje. Segun ku Pedro tabata papia, un nubia a forma riba nan kabes. Anto Pedro ku su kompañeronan a haña un privilegio úniko, algu ku ta un par di hende so a yega di eksperensiá: Nan a tende e stèm di Yehova. Promé, Yehova a konfirmá ku Hesus ta su Yu, kaba el a bisa bon kla: “Skuch’é.” E apòstelnan a obedesé e instrukshon divino ei. Nan a skucha loke Hesus a siña nan i tambe a urgi otro hende pa hasi meskos.—Echo. 3:19-23; 4:18-20.

3. Dikon Yehova ke pa nos skucha su Yu, i ki tema ta bon pa nos analisá?

³ “Skuch’é.” E instrukshon ei di Dios ta den Beibel pa nos benefisio. (Rom. 15:4) Kon asina? Wèl, Hesus ta e bosero di Yehova i kada biaha ku Hesus a habri su boka pa siña hende, el a kompartí loke su Tata tabata ke pa nos sa. (Huan 1:1, 14) E kos ku mas Hesus a papia di dje tabata e Reino di Dios, esta, e gobièrnu Mesiániko selestial ku ta konsistí di Kristu Hesus mes ku su 144.000 ko-gobernantenan. Pues, lo ta bon pa nos analisá e tópiko importante akí mas a fondo. (Rev. 5:9, 10; 14:1-3; 20:6) Pero promé, laga nos wak dikon Hesus a papia asina tantu tokante e Reino di Dios.

4. Kon Hesus a indiká ku e Reino tabata un tema sumamente importante p’e?

⁴ Pa Hesus, e Reino tabata un tema sumamente importante. Dikon nos por bisa esei? Pasobra loke nos ta papia ta revelá kiko ta biba den nos kurason. Ke men, nos palabranan ta mustra kiko ta realmente importante pa nos. Hesus mes a bisa: “Loke kurason ta yen di dje, boka ta papia.” (Mat. 12:34) Wèl,  ki ora ku Hesus a haña oportunidat, el a papia tokante e Reino. E kuater Evangelionan ta menshoná e Reino mas ku 100 biaha, i mayoria di biaha ta ora Hesus tabata papia. E Reino tabata e tema di su predikashon; p’esei el a bisa: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Luk. 4:43) Asta despues ku Hesus a resusitá, el a sigui papia tokante e Reino ku su disipelnan. (Echo. 1:3) No tin duda anto ku Hesus su kurason tabata yen di apresio pa e Reino, i esei a motiv’é pa papia tokante dje.

5-7. (a) Kon nos por sa ku e Reino ta sumamente importante pa Yehova? Duna un ehèmpel. (b) Kon nos por mustra ku e Reino ta un tema sumamente importante pa nos?

⁵ Pa Yehova tambe e Reino ta un tema sumamente importante. Kon nos por sa esei? Wèl, kòrda ku ta Yehova a manda su Yu unigénito na mundu; Yehova ta e fuente di tur loke e Yu a bisa i siña hende. (Huan 7:16; 12:49, 50) Ademas, Yehova ta e fuente di tur loke e kuater Evangelionan ta bisa di e bida i sirbishi di Hesus. Pensa un ratu kiko esei ta nifiká.

⁶ Suponé ku bo ta preparando un álbum ku potrèt di famia. Bo tin masha hopi potrèt ku bo ke hinka den e álbum, pero ta un sierto kantidat so e por karga. Kiko bo ta hasi? Bo ta skohe kua potrèt bo ta pone aden. Den un sentido, e Evangelionan ta manera un álbum ku ta duna nos un idea kla ken Hesus tabata. Yehova no a inspirá e eskritornan di Evangelio pa skirbi tur loke Hesus a bisa i hasi tempu ku e tabata riba tera. (Huan 20:30; 21:25) Mas bien, e spiritu di Yehova a guia nan pa skirbi e palabranan i echonan di Hesus ku ta yuda nos komprondé e propósito di su sirbishi i kiko ta e kosnan mas importante pa Yehova. (2 Tim. 3:16, 17; 2 Ped. 1:21) Ya ku e Evangelionan ta papia prinsipalmente di loke Hesus a siña hende relashoná ku e Reino di Dios, nos por konkluí sin mas ku pa Yehova tambe e Reino ta un tema sumamente importante. Figurá bo! Yehova ke pa nos sa kiko su Reino ta kome i bebe!

⁷ Pero ta bon pa kada un di nos puntra nos mes: ‘E Reino di Dios ta un tema sumamente importante pa mi?’ Si esei ta e kaso, nos lo ta ansioso pa skucha kiko Hesus a bisa i siña hende tokante e Reino ei. Por ehèmpel, kon importante Reino ta? Kon i ki dia e Reino lo bini?

8. Kon Hesus a indiká den poko palabra kon importante e Reino ta?

⁸ Laga nos analisá e orashon modelo. Ku algun palabra simpel pero elokuente, Hesus a indiká kon importante e Reino ta i kiko lo e logra. E orashon ei ta konsistí di shete petishon. E promé tresnan ta relashoná ku e propósito di Yehova, esta, santifikashon di su nòmber, binimentu di su Reino i kumplimentu di su boluntat riba tera meskos ku den shelu. (Lesa Mateo 6:9, 10.) E tres petishonnan ei ta estrechamente ligá ku  otro, ya ku e Reino Mesiániko ta e medio ku Yehova lo usa pa santifiká su nòmber i kumpli ku su boluntat.

9, 10. (a) Kiko e Reino di Dios lo hasi ora e bini? (b) Ki promesa di Beibel abo ta anhelá pa mira kumpli?

⁹ Kon e Reino di Dios lo bini? Kiko presis nos ta pidi p’e ora nos ta bisa den orashon “Laga bo Reino bini”? Wèl, nos ta pidi pa e Reino tuma akshon desisivo. Ora e Reino bini, lo e ehersé su pleno poder riba tera. Lo e eliminá e mundu malbado akí, inkluso tur gobièrnu formá pa hende, i lo e trese un mundu nobo di hustisia. (Dan. 2:44; 2 Ped. 3:13) E ora ei, bou di gobernashon di e Reino, henter e tera lo bira un paradeis. (Luk. 23:43) E hendenan ku ta den e memoria di Dios lo resusitá i bini bèk serka nan sernan kerí. (Huan 5:28, 29) Hende obedesidu lo bira perfekto i disfrutá di bida pa semper. (Rev. 21:3-5) Despues di esei, tera lo ta kompletamente na armonia ku shelu, reflehando asina e boluntat di Yehova Dios! Bo no ta anhelá pa mira e promesanan ei di Beibel kumpli? Kòrda ku kada biaha ku bo pidi den orashon pa e Reino di Dios bini, bo ta pidiendo pa e promesanan maravioso ei kumpli.

¹⁰ Ta bisto ku ainda e Reino di Dios no a “bini” pa kumpli ku e orashon modelo. Gobièrnunan humano ainda ta na poder i e mundu nobo di hustisia no a yega ainda. Pero tin bon notisia: E Reino di Dios a kuminsá goberná kaba. Den e siguiente kapítulo nos lo bai mas den detaye di esei, pero promé, laga nos analisá loke Hesus a bisa tokante ki dia e Reino lo kuminsá goberná i ki dia lo e “bini.”

11. Kiko Hesus a indiká tokante e tempu ku e Reino di Dios lo a kuminsá goberná?

¹¹ Hesus a indiká ku e Reino lo no a kuminsá goberná den su tempu, apesar ku algun di su disipelnan a ferwagt esei. (Echo. 1:6) Tuma nota di loke el a bisa den dos ilustrashon ku el a duna den un periodo di dos aña.

12. Kon e ilustrashon di e trigu i e mal yerba ta indiká ku e Reino no a kuminsá goberná den tempu di Hesus?

¹² E ilustrashon di e trigu i e mal yerba. (Lesa Mateo 13:24-30.) Hesus a duna e ilustrashon akí probablemente na kuminsamentu di aña 31. Despues el a splika su disipelnan kiko e ilustrashon a nifiká. (Mat. 13:36-43) Den poko palabra, e ilustrashon i su nifikashon ta esaki: Despues di morto di e apòstelnan, Diabel lo a sembra mal yerba (kristiannan falsu) entre e trigu (“e yunan di Reino,” es desir, kristiannan ungí). Lo a laga e trigu ku e mal yerba krese huntu te na e kosecha, ku ta “konklushon di un era.” Despues ku e tempu di kosecha kuminsá, lo a separá e mal yerba. Kaba, lo a rekohé e trigu pa warda den mangasina. Pues, e ilustrashon ta indiká ku e Reino lo no a kuminsá goberná den tempu di Hesus, sino despues ku e periodo di kresementu terminá. Manera kosnan a kana, e temporada di kresementu a terminá na 1914, i e ora ei e tempu di kosecha a kuminsá.

13. Ki ilustrashon Hesus a usa pa mustra ku lo e no a keda koroná mesora komo Rei Mesiániko ora ku e bolbe na shelu?

 ¹³ E ilustrashon di e minanan. (Lesa Lukas 19:11-13.) Hesus a duna e ilustrashon akí na aña 33, ora e tabata riba kaminda pa Herúsalèm pa último biaha. Algun di Hesus su oyentenan a kere ku lo el a establesé su Reino asina ku nan yega Herúsalèm. Pa korigí e idea robes ei i pa mustra ku tabata falta basta ainda pa e Reino kuminsá goberná, Hesus a kompará su mes ku ‘un hòmber di nasementu noble ku a biaha bai un tera leu pa keda koroná komo rei.’ a Den kaso di Hesus, e “tera leu” tabata shelu, kaminda lo el a risibí poder komo Rei serka su Tata. Ma Hesus tabata sa ku lo e no a keda koroná mesora komo Rei Mesiániko ora ku lo el a bolbe na shelu. Mas bien, lo el a sinta na man drechi di Dios i warda te na e tempu stipulá. Manera a resultá despues, e mester a warda basta siglo.—Sal. 110:1, 2; Mat. 22:43, 44; Heb. 10:12, 13.

14. (a) Kon Hesus a kontestá e pregunta ku kuater di su apòstelnan a hasié? (b) E echo ku e profesia di Hesus ta kumpliendo ta laga nos komprondé kiko tokante su presensia i e Reino?

¹⁴ Un par di dia promé ku nan a mata Hesus, kuater di su apòstelnan a puntr’é: “Ki dia e kosnan akí lo sosodé, i kiko lo ta e señal di bo presensia i di konklushon di e era akí?” (Mat. 24:3; Mar. 13:4) Komo kontesta, Hesus a duna nan e profesia ekstenso ku nos ta haña na Mateo kapítulo 24 i 25. Hesus a duna detaye di vários suseso mundial ku lo a sirbi komo un señal pa identifiká un periodo di tempu ku el a  yama su “presensia.” E periodo akí lo a kuminsá ora e Reino a keda establesí i lo terminá ora e Reino bini. Nos tin basta prueba ku ta mustra ku e profesia di Hesus ta kumpliendo for di aña 1914. b Pues, e aña ei a marka e kuminsamentu di su presensia i di e gobernashon di e Reino.

15, 16. Na ken e ekspreshon “e generashon akí” ta referí?

¹⁵ Pero ki dia e Reino di Dios lo bini por fin? Hesus no a bisa ki dia presis esei lo sosodé. (Mat. 24:36) Pero un otro kos ku el a bisa ta sigurá nos ku e dia ei ta hopi serka. Hesus a indiká ku e Reino lo bini despues ku “e generashon akí” mira e señal profétiko kumpli. (Lesa Mateo 24:32-34.) Na ken e ekspreshon “e generashon akí” ta referí? Ban analisá loke Hesus a bisa.

¹⁶ “E generashon akí.” Akaso Hesus tabata referí na hende ku no ta kreyente? Nò. Wak ta ku ken e tabata papia. El a konta e profesia akí na algun apòstel ku “a bini nan so serka dje.” (Mat. 24:3) I denter di poko e apòstelnan lo a ser ungí ku spiritu santu. Wak tambe e konteksto. Promé ku Hesus a papia tokante “e generashon akí,” el a bisa: “Tuma por ehèmpel e palu di figu: Asina ku su taki nobo sprùit i saka blachi, boso sa ku zomer ta serka. Asina tambe, ora boso mira tur e kosnan akí, boso por ta sigur ku e Yu di hende ta serka, sí, djis tras di porta.” Ta Hesus su siguidónan ungí—no hende ku no ta kreyente—lo a mira kumplimentu di e kosnan ku el a profetisá i komprondé nan nifikashon, esta, ku Hesus ta “djis tras di porta.” P’esei, ora Hesus a papia di “e generashon akí,” e tabata ke men su siguidónan ungí.

17. Kiko e ekspreshonnan “generashon” i “tur e kosnan akí” ta nifiká?

¹⁷ “E generashon akí lo no kaba na nada promé ku tur e kosnan akí tuma lugá.” Kon e palabranan akí lo kumpli? Pa kontestá esei, nos tin ku sa dos kos: Kiko e palabra “generashon” i e ekspreshon “tur e kosnan akí” ta nifiká. Den Beibel, hopi biaha e palabra “generashon” ta referí na un grupo di hende di vários edat ku ta biba den e mesun periodo di tempu. Un generashon no ta demasiado largu i e ta yega na un fin. (Éks. 1:6) E ekspreshon “tur e kosnan akí” ta enserá tur e susesonan profetisá ku ta tuma lugá durante e presensia di Hesus, esta, for di 1914 te na e “tribulashon grandi.”—Mat. 24:21.

18, 19. Kon nos mester komprondé loke Hesus a bisa tokante “e generashon akí,” i kiko nos por konkluí for di esaki?

¹⁸ Pues, kon nos mester komprondé e palabranan di Hesus tokante “e generashon akí”? E generashon ta konsistí di dos grupo di ungí ku na un dado momento a biba den e mesun periodo: E promé grupo ta konsistí di e ungínan ku a mira e señal kuminsá kumpli na 1914; e di dos grupo ta e ungínan ku pa un tempu tabata kontemporáneo di e promé  grupo. Por lo ménos algun di esnan di e di dos grupo lo ta na bida pa mira e kuminsamentu di e binidero tribulashon. E dos gruponan ei ta forma ún generashon, pasobra pa un periodo nan a biba den e mesun tempu. c

¹⁹ Kiko nos por konkluí for di esaki? Wèl, nos sa ku e señal di Hesus su presensia komo Rei koroná ta bisto rònt mundu. Tambe nos ta mira ku e ungínan ku ta na bida ainda i ku ta forma parti di “e generashon akí” ta birando mas bieu; pero nan tur lo no muri promé ku e tribulashon grandi kuminsá. P’esei nos por konkluí ku pronto e Reino di Dios lo bini i kuminsá goberná riba tera! Lo ta masha emoshonante pa mira e kumplimentu di e orashon ku Hesus a siña nos: “Laga bo Reino bini”!

20. Ki tópiko importante nos lo analisá den e buki akí, i kiko nos lo trata den e siguiente kapítulo?

²⁰ Laga nos no lubidá ku Yehova mes a bisa for di shelu en konekshon ku su Yu: “Skuch’é.” Komo kristiannan berdadero, nos ta ansioso pa obedesé e instrukshon divino ei. Nos ta masha interesá den tur loke Hesus a bisa i siña hende tokante e Reino di Dios. Loke e Reino ei a logra kaba i loke lo e hasi den futuro ta un tópiko importante ku meresé un estudio profundo, i ta netamente riba esei e buki akí lo bai konsentrá. E siguiente kapítulo lo trata e desaroyonan emoshonante ku a tuma lugá rònt di e tempu ku e Reino di Dios a nase den shelu.