1, 2. Wanem nao thrifala disaepol blo Jesus herem Jehovah talem, and wanem nao olketa duim?

 SAPOS Jehovah seleva askem iu for duim wanfala samting, wanem nao bae iu duim? Waswe, bae iu willing for duim eni samting hem askem? Barava nao!

² Samfala day bihaen lo Pasova lo 32 C.E., thrifala aposol blo Jesus, Peter, James, and John, lukim wanfala samting wea olketa bae no forgetim. (Readim Matthew 17:1-5.) Lo datfala taem, olketa stap witim Jesus antap lo “wanfala hae maunten” and olketa lukim wanfala vision lo taem wea Jesus bae kamap King lo heven. Datfala vision hem olsem real samting wea happen so Peter trae for join insaed tu. Taem Peter toktok yet, wanfala cloud kavarem olketa. Then Peter and tufala nara aposol herem voice blo Jehovah. Diswan hem spesol tumas, from no staka pipol herem diswan. Bihaen Jehovah talem Jesus nao Son blo hem, hem sei moa: “Iufala mas herem samting wea hem talem.” Olketa aposol followim datfala toktok. Olketa herem samting wea Jesus teachim, and talem olketa narawan for duim sem samting tu.—Acts 3:19-23; 4:18-20.

3. Why nao Jehovah laekem iumi for herem Son blo hem, and wanem nao iumi need for minim gud?

³ Olketa toktok hia “iufala mas herem samting wea hem talem” stap lo Bible for helpem iumi. (Rome 15:4) Why nao olsem? Bikos Jesus hem man wea Jehovah iusim for toktok for hem and evritaem Jesus teach hem storyim samting wea Dadi blo hem laekem iumi for savve. (John 1:1, 14) From Jesus evritaem story abaotem Kingdom blo God, wea hem gavman blo Messiah lo heven wea Christ Jesus and 144,000 bae rul insaed, diswan showimaot hem important for iumi minim gud disfala Kingdom. (Rev. 5:9, 10; 14:1-3; 20:6) Firstaem, bae iumi storyim why nao Jesus evritaem story abaotem Kingdom blo God.

4. Wanem nao Jesus duim wea showimaot hem tinghae tumas lo Kingdom?

⁴ Jesus tinghae tumas lo Kingdom. Hao nao iumi savve lo datwan? Bikos wanem man storyim hem showimaot samting wea important lo hem. Jesus seleva sei: “Samting wea man  tingting tumas abaotem nao bae hem storyim.” (Matt. 12:34) Jesus iusim evri chance wea hem garem for story abaotem Kingdom. Insaed fofala Gospel, olketa story abaotem Kingdom winim 100-fala taem, and staka taem Jesus nao story abaotem datwan. Main samting wea Jesus preach abaotem hem Kingdom. Hem sei: “Mi mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.” (Luke 4:43) Nomata bihaen Jesus resurrect, hem gohed story abaotem Kingdom lo olketa disaepol blo hem. (Acts 1:3) Jesus mas barava tinghae lo Kingdom dastawe hem laek for story tumas abaotem lo nara pipol.

5-7. (a) Wanem nao Jehovah duim wea showimaot hem tinghae lo Kingdom? Storyim example. (b) Wanem nao iumi savve duim for showimaot iumi tinghae lo Kingdom?

⁵ Jehovah tinghae tu lo Kingdom. Why nao iumi sei olsem? Tingim, Jehovah sendem kam spesol Son blo hem lo world. Evri samting wea Jesus talem and teachim kam from Jehovah. (John 7:16; 12:49, 50) And tu, evri samting abaotem laef and ministry blo Jesus wea olketa raetem insaed lo fofala Gospel kam from Jehovah. Bae iumi storyim wanfala example.

⁶ Tingim, iu bae go lo wanfala ples. Iu garem staka kaleko bat basket wea iu bae tekem hem no fitim evri kaleko blo iu. Wanem nao bae iu duim? Iu bae chusim nomoa olketa kaleko wea bae iu tekem. Lo sem wei, fofala Gospel hia hem olsem basket wea fulap lo olketa story abaotem Jesus. No evri samting wea Jesus duim and talem taem hem stap lo earth nao Jehovah muvim olketa wea raetem fofala Gospel for raet abaotem. (John 20:30; 21:25) Bat, spirit blo Jehovah helpem olketa for raetem olketa toktok and samting wea Jesus duim for helpem iumi minim why nao hem duim ministry and wanem nao barava important lo Jehovah. (2 Tim. 3:16, 17; 2 Pet. 1:21) From olketa Gospel fulap lo olketa samting wea Jesus teachim abaotem Kingdom blo God, iumi sure Jehovah tinghae tu lo Kingdom. Tingim, Jehovah laekem iumi for savve abaotem Kingdom blo hem!

⁷ Hem gud for iumi askem iumiseleva, ‘Waswe, mi tinghae lo Kingdom blo God?’ Sapos iumi tinghae lo Kingdom, iumi bae evritaem laek for herem wanem Jesus talem and teachim abaotem datfala Kingdom, why hem important, wanem bae hem duim taem hem kam, and wanem taem bae hem kam.

8. Wanem important samting nao Jesus talem abaotem Kingdom?

⁸ Tingim datfala Lord’s Prea. Jesus iusim olketa toktok wea isi for minim for storyim olketa important samting wea Kingdom bae duim. Sevenfala samting nao insaed datfala prea. Thrifala first samting lo prea hem join witim wanem Jehovah laek for duim, wea hem nao for mekem nem blo Jehovah holy, Kingdom blo hem for kam, and for duim samting wea hem  laek for duim lo earth olsem hem duim lo heven. (Readim Matthew 6:9, 10.) Thrifala samting hia join tugeta. Jehovah bae iusim Kingdom wea Jesus rulim for mekhae lo nem blo hem and for duim samting wea hem laekem.

9, 10. (a) Wanem nao Kingdom blo God bae duim? (b) Wanem kaen promis lo Bible nao iu laek for lukim happen?

⁹ Wanem nao Kingdom blo God bae duim? Taem iumi prea and sei, “Mifala laekem Kingdom bilong iu for kam,” iumi askem datfala Kingdom for duim samting. Taem datfala Kingdom kam, hem bae duim olketa big samting lo earth. Hem bae finisim disfala nogud world witim olketa gavman blo man and bae mekem wanfala niu earth wea evri samting bae raeteous. (Daniel 2:44; 2 Pet. 3:13) Then taem Kingdom hem rul, full earth bae kamap paradaes. (Luke 23:43) Olketa wea God tingim wea stap insaed lo grev bae laef bak and stap moa witim olketa wea olketa lovem. (John 5:28, 29) Olketa wea obey bae kamap perfect and enjoyim laef olowe lo earth. (Rev. 21:3-5) Bihaen datwan, earth bae garem peace olsem heven, wea hem nao plan blo Jehovah God! Waswe, iu laek for lukim olketa promis wea Bible storyim kamap tru? Tingim, taem iu evritaem prea for Kingdom blo God for kam, iu prea for olketa promis hia for kamap tru.

¹⁰ Iumi luksavve, Kingdom blo God hem no “kam” yet for fulfillim datfala Lord’s Prea. Olketa gavman blo man gohed rul distaem and niu world wea evriting bae raeteous nomoa yet. Bat gud nius hem stap. Kingdom blo God hem rul finis, bae iumi storyim datwan lo next chapter. Distaem bae iumi story raonem wanem Jesus talem abaotem wanem taem nao Kingdom bae start for rul and wanem taem nao bae hem kam.

11. Wanem nao Jesus talem abaotem taem wea Kingdom blo God bae start for rul?

¹¹ Jesus talem Kingdom bae no start for rul lo first century C.E., nomata hem nao wanem samfala lo olketa disaepol tingim. (Acts 1:6) Lukim wanem hem talem lo tufala difren tokpiksa, wanfala maet lo 31 C.E., and narawan lo 33 C.E.

12. Hao nao tokpiksa abaotem wheat and olketa rabis grass showimaot Kingdom no start for rul lo first century C.E.?

¹² Tokpiksa abaotem wheat and olketa rabis grass. (Readim Matthew 13:24-30.) Bihaen Jesus talem disfala tokpiksa, maet lo start blo 31 C.E., hem storyim mining blo hem lo olketa disaepol. (Matt. 13:36-43) Diswan nao main point and mining blo datfala tokpiksa: Bihaen olketa aposol dae, Devil bae plantim olketa rabis grass, wea hem nao olketa laea Christian, midolwan olketa wheat, wea hem nao “olketa son bilong Kingdom” or olketa anointed Christian. Olketa bae letem wheat and olketa rabis grass for grow tugeta go kasem taem blo harvest, wea hem nao “taem wea world hem gogo for finis.” Bihaen lo start blo harvest, olketa bae aotem olketa rabis grass. Then olketa bae hipimap olketa wheat. Tokpiksa hia  showimaot Kingdom bae no start for rul lo first century C.E., bat hem bae start for rul taem harvest hem start lo 1914.

13. Wanem nao Jesus talem for showimaot hem no King stretawe bihaen hem go bak lo heven?

¹³ Tokpiksa abaotem olketa mina. (Readim Luke 19:11-13.) Jesus storyim disfala tokpiksa lo 33 C.E. lo lastfala gogo blo hem for Jerusalem. Samfala wea herem hem tingse hem bae startim Kingdom blo hem taem olketa arrive lo Jerusalem. For stretem datfala tingting and showimaot Kingdom bae no rul stretawe, Jesus sei, hem olsem “wanfala man wea born long laen bilong king” wea bae go lo “wanfala farawe ples for kasem paoa mekem taem hem kam bak hem king nao.” a Lo story blo Jesus, datfala “farawe ples” hem heven and lo there nao bae hem kasem paoa from Dadi blo hem for King. Jesus savve hem bae no stretawe kamap King bihaen hem go bak lo heven. Bat hem bae sidaon lo raet saed blo God and weit go kasem taem wea God markem. Hem weit for staka handred year.—Sams 110:1, 2; Matt. 22:43, 44; Heb. 10:12, 13.

14. (a) Hao nao Jesus ansarem kwestin wea fofala disaepol blo hem askem? (b) From profesi blo Jesus hem fulfill, wanem nao diswan showimaot abaotem taem hem stap and Kingdom?

¹⁴ Samfala day bifor olketa killim dae Jesus, fofala disaepol blo hem askem hem olsem: “Wanem nao saen wea bae showimaot iu stap and world hem gogo for finis?” (Matt. 24:3; Mark 13:4) For ansarem olketa, Jesus storyim profesi wea stap lo Matthew chapter 24 and 25. Hem storyim staka difren samting wea bae happen lo world wea hem saen for showimaot  hem “stap.” Taem Jesus hem stap, bae start taem Kingdom hem start for rul, and bae finis, taem Kingdom hem rul ovarem full earth. Iumi garem staka pruv wea showim olketa profesi blo Jesus gohed fulfill start lo year 1914. b So datfala year hem markem start blo taem hem stap and taem Kingdom hem start for rul.

15, 16. Hu nao olketa blo “disfala genereson”?

¹⁵ Sapos olsem, wanem taem nao Kingdom blo God bae kam? Jesus no talem barava taem wea datwan bae happen. (Matt. 24:36) Bat hem storyim samting wea bae mekem iumi sure Kingdom hem barava klosap for kam. Jesus talem hao Kingdom bae kam bihaen “disfala genereson” lukim saen wea profesi story abaotem hem fulfill. (Readim Matthew 24:32-34.) So hu nao olketa blo “disfala genereson”? Bae iumi story raonem olketa toktok wea Jesus talem.

¹⁶ “Disfala genereson.” Waswe, Jesus minim olketa wea no Christian? Nomoa. Tingim, hu nao Jesus story lo olketa. Jesus storyim disfala profesi lo tu-thri aposol blo hem wea “kam long hem.” (Matt. 24:3) Olketa aposol klosap nao for kasem anointing from holy spirit. Tingim tu nara samting wea Jesus storyim. Bifor hem story abaotem “disfala genereson,” hem sei: “Tingim wanfala fig tree. Taem olketa leaf start for grow long olketa niu branch, iufala savve taem for evri samting grow gud hem klosap nao. Olsem tu, taem iufala lukim evri samting hia, iufala bae savve hem klosap for kam, hem aotsaed long door nao.” Olketa anointed Christian nao bae lukim olketa samting wea Jesus story abaotem, and luksavve lo mining blo olketa, olsem Jesus “hem aotsaed long door nao.” So taem Jesus story abaotem “disfala genereson,” hem minim nao olketa anointed Christian.

17. Wanem nao mining blo toktok “genereson” and “evri samting hia”?

¹⁷ “Bae laef yet taem evri samting hia happen.” Hao nao iumi sure olketa toktok hia bae kamap tru? For ansarem datwan, iumi need for savve lo tufala samting: mining blo “genereson” and “evri samting hia.” Staka taem toktok “genereson” savve minim grup blo pipol wea age blo olketa no semsem bat wea laef lo semtaem. Genereson no savve long tumas, and hem savve finis. (Ex. 1:6, NW) Disfala toktok “evri samting hia” hem minim evri samting wea bae happen lo taem wea Jesus stap, wea start lo 1914 go kasem taem hem end, lo “bigfala trabol.”—Matt. 24:21.

18, 19. Taem Jesus sei “disfala genereson” wanem nao maet hem minim and wanem nao iumi savve lanem?

¹⁸ So taem Jesus sei “disfala genereson” wanem nao hem minim? Disfala genereson hem garem tufala grup blo olketa anointed Christian wea laef lo semtaem. First grup, hem olketa anointed Christian wea lukim olketa difren part lo saen wea start for fulfill lo 1914, mek-tu grup hem olketa anointed Christian wea laef lo semtaem witim olketa lo first grup.  Samfala lo olketa lo mek-tu grup bae laef and bae lukim taem wea bigfala trabol hem start. Tufala grup hia hem wanfala genereson bikos olketa anointed Christian hia laef lo semtaem. c

¹⁹ Wanem nao iumi lanem? Iumi savve datfala saen wea showim Jesus hem rul lo Kingdom hem showaot klia lo olketa samting wea happen raonem world. Iumi savve tu olketa anointed Christian wea laef yet distaem wea insaed lo “disfala genereson” olketa olo distaem, and Bible sei samfala lo olketa bae laef yet taem bigfala trabol hem start. So iumi lanem, klosap nao Kingdom blo God bae kam and rul ovarem full earth! Hem bae gud tumas for lukim prea wea Jesus teachim iumi taem hem sei: “Mifala laekem Kingdom bilong iu for kam,” bae kamap tru.

20. Olketa wanem important subject nao bae iumi lanem lo disfala buk, and wanem nao bae iumi storyim lo next chapter?

²⁰ Tru nao, iumi mas evritaem tingim samting wea Jehovah talem kam from heven abaotem Son blo hem taem hem sei: “Iufala mas herem samting wea hem talem.” Iumi olketa tru Christian iumi barava laek followim datfala toktok wea Jehovah talem. Iumi barava interest lo evri samting wea Jesus talem and teachim abaotem Kingdom blo God. Bae iumi storyim lo disfala buk olketa important subject, olsem wanem nao Kingdom duim finis and olketa samting wea hem bae duim lo future. Lo nextfala chapter bae iumi storyim olketa nambawan samting wea bae happen taem Kingdom blo God rul lo heven.