1, 2. Ngumaphi emavi Jehova lawakhuluma laviwa baphostoli baJesu labatsatfu, futsi yini labayenta ngemuva kwekuweva?

 NANGABE bekungenteka Jehova Nkulunkulu akutjele ngalokucondzile kutsi asewente intfo letsite, bewutakwenta njani? Ngisho nobe abengakutjela kutsi wenteni, bewungeke yini ukujabulele kulalela sicondziso sakhe? Ngalokucinisekile, bewutakujabulela!

² Ngalelinye lilanga, ngemuva kweliPhasika la-32 C.E., baphostoli baJesu labatsatfu​—boPhetro, Jakobe kanye naJohane baba sesimeni lesinjalo. (Fundza Matewu 17:1-5.) Ngesikhatsi bahleti kanye neNkhosi yabo “entsabeni lendze,” babona umbono waJesu anjengeNkhosi yasezulwini lekhatimulako. Lombono bewubonakala shengatsi yintfo lebeyenteka mbamba, kangangekutsi Phetro wetama nekuhlanganyela kuwo. Ngesikhatsi Phetro asakhuluma, kwavela lifu etikwabo. Ngako boPhetro nalaba labanye baphostoli beva intfo lokubantfu labambalwa kuphela labake baba nelilungelo lekuyiva​—beva livi laJehova. Ngemuva kwekutsi Jehova asacinisekisile kutsi Jesu uyiNdvodzana yakhe, watsi: “Yilaleleni.” Labaphostoli basilalela lesicondziso lebesivela kuNkulunkulu. Bakulalela loko lebekufundziswa nguJesu, futsi bakhutsata nalabanye bantfu kutsi nabo bente intfo lefanako.​—Imis. 3:19-23; 4:18-20.

3. Kungani Jehova afuna kutsi silalele iNdvodzana yakhe, futsi yini lesenta kahle ngekuyihlola?

³ Lamavi latsi “yilaleleni,” abhalwa eBhayibhelini kute sizuze kuwo. (Rom. 15:4) Kungani? Kungenca yekutsi Jesu ungumkhulumeli waJehova futsi ngaso sonkhe sikhatsi lapho Jesu akhuluma kute afundzise, abekhuluma loko Babe wakhe labefuna sikwati. (Joh. 1:1, 14) Ngesizatfu sekutsi Jesu wakhuluma kakhulu ngeMbuso waNkulunkulu kwendlula nobe yini lenye, senta kahle kuwuhlola ngekucophelela lohulumende wasezulwini lobuswa nguMesiya nalabangu-144 000. (Semb. 5:9, 10; 14:1-3; 20:6) Nanobe kunjalo, ase sihlole kutsi kungani Jesu akhuluma kakhulu ngeMbuso waNkulunkulu.

4. Jesu wakhombisa kanjani kutsi uyawutsandza uMbuso?

⁴ Jesu abewutsandza kakhulu loMbuso. Kungani sisho njalo? Kungenca yekutsi emavi aveta loko lokusenhlitiyweni​—lokusho kutsi emavi etfu embula loko lokubaluleke mbamba  kitsi. Jesu ngekwakhe watsi: “Umlomo ukhuluma loko lokugcwele enhlitiyweni.” (Mat. 12:34) Ngaso sonkhe sikhatsi nakuvela litfuba, Jesu abekhuluma ngaloMbuso. EmaVangelini lamane kukhulunywa ngeMbuso tikhatsi letingetulu kwa-100, futsi kuletinyenti tato kucashunwa emavi lashiwo nguJesu. Wenta uMbuso waba sihloko semsebenti wakhe wekushumayela, watsi: “Nakulamanye emadolobha kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” (Luk. 4:43) Ngisho nangemuva kwekuvuswa kwakhe, Jesu wachubeka akhuluma ngeMbuso kubafundzi bakhe. (Imis. 1:3) Ngalokucinisekile, inhlitiyo yaJesu beyiphuphuma kubonga lanako ngaloMbuso, futsi loko bekumenta akhulume ngawo.

5-7. (a) Sati ngani kutsi naJehova uyawutsandza uMbuso? Fananisa. (b) Tsine singakhombisa njani kutsi siyawutsandza uMbuso?

⁵ NaJehova uyawutsandza loMbuso. Sikwati njani loko? Jehova watfumela iNdvodzana yakhe lekuphela kwayo kutsi ite emhlabeni; tonkhe tintfo letashiwo nguleNdvodzana yakhe naleyatifundzisa, betivela kuYe. (Joh. 7:16; 12:49, 50) Konkhe lokubhalwe emaVangelini lamane lakhuluma ngekuphila kwaJesu kanye nemsebenti wakhe, nako kuvela kuJehova. Ase ucabangisise kutsi loko kusho kutsini.

⁶ Ticabange ufaka titfombe ku-albhamu yemndeni. Kunetitfombe letinyenti lokufanele ukhetse kuto, kodvwa le-albhamu ifaka letimbalwa kuphela. Yini lotayenta? Utawukhetsa kutsi ngutiphi lotatifaka kuyo. Ngendlela lefanako, emaVangeli anjenge-albhamu yetitfombe futsi asenta simati kahle Jesu. Jehova akazange aphefumulele babhali bemaVangeli kutsi babhale konkhe lokwashiwo nguJesu kanye nalakwenta nakasasemhlabeni. (Joh. 20:30; 21:25) Kunaloko, umoya waJehova wabacondzisa kutsi babhale emavi kanye netento taJesu letisisita sicondze injongo yemsebenti wakhe, kanye naloko lokubaluleke kakhulu kuJehova. (2 Thim. 3:16, 17; 2 Phet. 1:21) Njengobe emaVangeli agcwele timfundziso taJesu letimayelana neMbuso waNkulunkulu, singaphetsa ngekutsi Jehova uyawutsandza loMbuso. Ase ucabange nje, Jehova ufuna siwati uMbuso wakhe.

⁷ Ngamunye wetfu wenta kahle ngekutibuta: ‘Ngiyawutsandza yini uMbuso waNkulunkulu?’ Nangabe siwutsandza, sitakulangatelela kulalela loko Jesu lakusho nalakufundzisa mayelana naloMbuso​—kutsi ubaluleke ngani nekutsi utawufika ngayiphi indlela futsi nini.

8. Jesu wakufinca njani kubaluleka kweMbuso?

⁸ Cabanga ngemthantazo losibonelo. Asebentisa emavi lakhangako kodvwa lamelula, Jesu wafinca kubaluleka kwaloMbuso futsi wakhombisa loko lotakwenta. Lomthantazo uneticelo letisikhombisa. Letintsatfu tekucala timayelana nenjongo yaJehova​—kungcweliswa kwelibito lakhe, kufika kweMbuso wakhe, kanye nekwentiwa kwentsandvo yakhe emhlabeni njengobe yentiwa ezulwini. (Fundza Matewu 6:9, 10.) Leticelo  letintsatfu tihlobene. UMbuso waNkulunkulu lobuswa nguMesiya ulithulusi Jehova latalisebentisa kute angcwelise libito lakhe futsi kwentiwe intsandvo yakhe.

9, 10. (a) UMbuso waNkulunkulu utawufika njani? (b) Ngusiphi setsembiso seliBhayibheli lolangatelela kusibona sigcwaliseka?

⁹ UMbuso waNkulunkulu utawufika njani? Nasithantaza sitsi “uMbuso wakho awute,” sisuke sicela kutsi loMbuso utsatse sinyatselo lesibalulekile. Nawufika loMbuso, utawusebentisa emandla awo emhlabeni. Utawususa lelive lelibi lelikhona nyalo, lokuhlanganisa nabohulumende bebantfu, bese uletsa umhlaba lomusha lonekulunga. (Dan. 2:44; 2 Phet. 3:13) Ngemuva kwaloko, ngephansi kwekubusa kwaloMbuso umhlaba wonkhe utawuba lipharadisi. (Luk. 23:43) Labo labasenkhumbulweni yaNkulunkulu, batawuvuswa ekufeni baphindze bahlanganiswe nebantfu labasondzelene nabo. (Joh. 5:28, 29) Bantfu labalalelako batawubate sono futsi batawujabulela kuphila lokungapheli. (Semb. 21:3-5) Ekugcineni, umhlaba utawufana ncamashi nelizulu, ngekutsi utawuveta loko lokuyintsandvo yaJehova Nkulunkulu. Awukulangateleli yini kutibona tigcwaliseka letetsembiso teliBhayibheli? Khumbula kutsi ngaso sonkhe sikhatsi nawuthantazela kutsi uMbuso waNkulunkulu ufike, usuke uthantazela kutsi letetsembiso letiligugu tigcwaliseke.

¹⁰ Kuyacaca kutsi uMbuso waNkulunkulu ‘usengaketi’ kute wente loko lokushiwo ngulomthantazo losibonelo. Phela bohulumende bebantfu basabusa, futsi umhlaba lomusha lonekulunga nawo usangakefiki. Kodvwa tikhona tindzaba letimnandzi. UMbuso waNkulunkulu sewucalile kubusa, njengobe sitawufundza esehlukweni lesilandzelako. Kwanyalo, ase sihlole loko Jesu lakusho mayelana nekutsi uMbuso utawucala nini kubusa nekutsi utawufika nini.

11. Yini Jesu layiveta ngekucala kwekubusa kweMbuso waNkulunkulu?

¹¹ Jesu waveta kutsi uMbuso bewungeke ucale kubusa ngesikhatsi yena asesemhlabeni, ngisho nangetulu kwaloko lebekulindzelwe ngulabanye bafundzi bakhe. (Imis. 1:6) Ase ucabange ngaloko lakusho emifanekisweni lemibili lengafani layisho emkhatsini weminyaka lemibili.

12. Umfanekiso wakolo nelukhula ukhombisa njani kutsi uMbuso awuzange ucale kubusa ngesikhatsi sebaphostoli?

¹² Umfanekiso wakolo nelukhula. (Fundza Matewu 13:24-30.) Ngemuva kwekusho lomfanekiso, lokungenteka wawusho entfwasahlobo ya-31 C.E., Jesu wawuchazela bafundzi bakhe. (Mat. 13:36-43) Nayi inchazelo yalomfanekiso kanye naloko lokushoko: Ngemuva kwekufa kwebaphostoli, Develi abetawuhlanyela lukhula (emaKhristu mbumbulu) emkhatsini wakolo (‘emadvodzana eMbuso’ nobe emaKhristu lagcotjiwe). Kolo kanye nelukhula bekutawuvunyelwa kutsi kukhule kanye kanye ngesikhatsi sekulima lebesitawuchubeka kuze kufike kuvuna, ‘lokukuphela kwalelive.’ Nasekucale sikhatsi sekuvuna, lukhula belutawubutfwa. Ngemuva kwaloko, kolo bese ubutselwa ndzawonye. Ngako-ke, lomfanekiso uveta kutsi uMbuso  bewungeke ucale kubusa ngesikhatsi sebaphostoli, kodvwa bewutawucala nasekuphele sikhatsi sekulima. Njengobe tintfo tichubeka tenteka, sikhatsi sekulima saphela, futsi kwacala sikhatsi sekuvuna nga-1914.

13. Jesu watifananisa nani kute akhombise kutsi abengeke acale kubusa njengeNkhosi lenguMesiya ngekushesha nakefika ezulwini?

¹³ Umfanekiso wemamina. (Fundza Lukha 19:11-13.) Jesu walandzisa lomfanekiso nga-33 C.E., ngesikhatsi aya eJerusalema kwekugcina. Labanye kulabo lebebamlalele bebacabanga kutsi abetawucalisa uMbuso wakhe ngekushesha nje nabefika eJerusalema. Kute alungise loyo mbono loliphutsa futsi akhombise kutsi uMbuso bewungeke ucale kubusa ngaleso sikhatsi, Jesu watifananisa ‘nendvodza yasebukhosini,’ lebekumelwe ihambe ‘iye eveni lelikhashane kute iyewubekwa kutsi ibe yinkhosi.’ a KuJesu, ‘lelive lelikhashane,’ belisezulwini, lapho Babe wakhe bekatambeka khona kutsi abe yiNkhosi. Kodvwa Jesu bekati kutsi abengeke abe yiNkhosi lenguMesiya ngekushesha nje nakefika ezulwini. Kunaloko, bekatawuhlala ngesekudla saNkulunkulu, alindze kudzimate kufike sikhatsi lesibekiwe. Lesikhatsi sekulindza satsatsa emakhulu lamanyenti eminyaka.​—Hla. 110:1, 2; Mat. 22:43, 44; Heb. 10:12, 13.

14. (a) Jesu wawuphendvula njani umbuto lawubutwa baphostoli bakhe labane? (b) Kugcwaliseka kwesiphrofetho saJesu kusitjelani ngekuba khona kwakhe nangeMbuso?

¹⁴ Emalangeni lambalwa ngembikwekutsi Jesu abulawe, baphostoli bakhe labane bambuta: “Siyawuba yini sibonakaliso sekuba khona kwakho nesekuphela kwalelive?” (Mat. 24:3; Mak. 13:4) Jesu wabaphendvula ngekubatjela siphrofetho lesidze  lesitfolakala kuMatewu sehluko 24 na-25. Wachaza tintfo letehlukahlukene letenteka emhlabeni wonkhe, lebetitawuba sibonakaliso sesikhatsi lesibitwa ngekutsi ‘kuba khona’ kwakhe. Kucala kwekuba khona kwakhe bekutawuhambisana nekucala kwekubusa kweMbuso; kantsi siphetfo sekuba khona kwakhe besitawuhambisana nekufika kweMbuso. Sinebufakazi lobucinile bekutsi siphrofetho saJesu besisolo sigcwaliseka kusukela nga-1914. b Ngako-ke, kuba khona kwakhe kanye nekubusa kweMbuso kwacala ngalowo mnyaka.

15, 16. Emavi latsi “lesitukulwane,” asho bobani?

¹⁵ Nanobe kunjalo, utawufika nini uMbuso waNkulunkulu? Jesu akazange asho ngalokucondzile kutsi loko bekutakwenteka nini. (Mat. 24:36) Kodvwa washo lokutsite lokusenta siciniseke kutsi sewusedvute kakhulu. Jesu watsi loMbuso bewutawufika ngemuva kwekutsi “lesitukulwane” sibone kugcwaliseka kwesibonakaliso salesiphrofetho. (Fundza Matewu 24:32-34.) Lamavi latsi “lesitukulwane,” asho bobani? Ase siwahlolisise lamavi aJesu.

¹⁶ “Lesitukulwane.” Jesu abesho bantfu labangakholwa yini? Cha. Cabanga ngebantfu labekhuluma nabo. Jesu washo lesiphrofetho kubaphostoli bakhe labambalwa ‘lebebete kuye babodvwa.’ (Mat. 24:3) Masinyane, baphostoli bebatawugcotjwa ngemoya longcwele. Phindze ucabange nangengcikitsi yendzaba. Ngembikwekutsi akhulume ‘ngalesitukulwane,’ Jesu watsi: “Fundzani sifundvo esihlahleni semkhiwa: Ngekushesha nasesihluma emagala lamasha futsi siveta emacembe, nibese niyati kutsi lihlobo selifikile. Ngalokufanako, nanibona tonkhe letintfo kufanele nati kutsi iNdvodzana yemuntfu seyisemnyango.” Bekubalandzeli baJesu labagcotjiwe, hhayi bantfu labangakholwa, lebebatawubona letintfo labetibiketele futsi bacondze inchazelo yato​—kutsi Jesu ‘sewusemnyango.’ Ngako-ke, ngesikhatsi Jesu akhuluma ‘ngalesitukulwane’ abekhuluma ngebalandzeli bakhe labagcotjiwe.

17. Asho kutsini emavi latsi “lesitukulwane,” nemavi latsi “tonkhe letintfo”?

¹⁷ “Ngeke siphele tingakenteki tonkhe letintfo.” Lamavi atawugcwaliseka njani? Kute siphendvule loko, kufanele sati nati tintfo letimbili: Inchazelo ‘yesitukulwane,’ kanye neyemavi latsi “tonkhe letintfo.” Ligama lelitsi ‘situkulwane,’ livame kusho bantfu labangalingani ngeminyaka, kepha kuphila kwabo lokugabancako emkhatsini wesikhatsi lesitsite. Situkulwane asibi sidze kakhulu futsi siba nesiphetfo. (Eks. 1:6) Emavi latsi “tonkhe letintfo,” ahlanganisa konkhe lokwabiketelwa lebekutakwenteka ngesikhatsi sekuba khona kwaJesu, kusukela nga-1914 kute kufike emvutfwandzabeni wako, ‘kuhlupheka lokukhulu.’​—Mat. 24:21.

18, 19. Kufanele siwacondze njani emavi aJesu lamayelana ‘nalesitukulwane,’ futsi kufanele siphetse ngekutsini?

¹⁸ Ngako-ke, kufanele siwacondze njani emavi aJesu lamayelana ‘nalesitukulwane’? Lesitukulwane sihlanganisa emacembu lamabili alabagcotjiwe kuphila kwabo lokugabancako​—licembu lekucala, lakhiwa ngulabagcotjiwe labakubona kugcwaliseka kwalesibonakaliso nga-1914, lesibili, ngulabagcotjiwe  labake baphila ngesikhatsi lesifanako nelicembu lekucala. Labanye labakulelicembu lesibili batakubona kucala kwekuhlupheka lokukhulu. Labantfu labakulamacembu lamabili bakha situkulwane sinye ngobe kuphila kwabo njengemaKhristu lagcotjiwe kwagabanca sikhatsi lesitsite. c

¹⁹ Yini lokufanele siphetse ngayo? Siyati kutsi sibonakaliso sekuba khona kwaJesu eMbusweni sibonakala ngalokucacile emhlabeni wonkhe. Siyabona nekutsi labagcotjiwe labasaphila futsi labayincenye ‘yalesitukulwane’ bayaguga, kodvwa ngeke bafe bonkhe kungakacali kuhlupheka lokukhulu. Ngako-ke, singaphetsa ngekutsi ngekushesha uMbuso waNkulunkulu utawufika bese ubusa emhlabeni. Kutawujabulisa kakhulu kubona kugcwaliseka kwemthantazo Jesu lasifundzisa wona, lotsi: “UMbuso wakho awute.”

20. Nguyiphi intfo lebalulekile lesitawucoca ngayo kulencwadzi, futsi yini lesitawuyihlolisisa esehlukweni lesilandzelako?

²⁰ Asingawakhohlwa emavi lashiwo nguJehova asezulwini lamayelana neNdvodzana yakhe, latsi: “Yilaleleni.” Njengobe singemaKhristu, siyakulangatelela kusilalela lesicondziso lesivela kuNkulunkulu. Sinendzaba nako konkhe Jesu lakusho kanye nalakufundzisa ngeMbuso waNkulunkulu. Kutsi yini loMbuso lesewuvele uyentile kanye naloko losatawukwenta esikhatsini lesitako, kuyindzaba lebalulekile lesitawucoca ngayo kulencwadzi. Sehluko lesilandzelako sitawukhuluma ngentfutfuko lemangalisako leyaba khona ngemuva kwekutalwa kweMbuso waNkulunkulu ezulwini.