XIPIMO 1
“A wute Mufumo wa wena”
1, 2. Zini lezi Jehova a nga wula zi zwiwa hi vapostoli vanharu va Jesu, niku va hlamulisile kuyini?
LOKU Jehova i wo ku kombela ku maha nchumu, u wa ta hlamulisa kuyini? Na ku nga khataliseki lezaku i kombela yini, xana u wa nga ta xuva ku maha lezi a zi kombelako? Handle ko kanakana u wa ta zi maha!
2 Xikhatanyana nzhako ka Pasika ga lembe ga 32 Nguveni ya Hina, a vapostoli vanharu va Jesu — Pedro, Jakobe, na Johani — va vile ni lungelo lego. (Gonza Mateu 17:1-5.) Na va hi “xitsungeni” ni Hosi yabye, va lo wona a muwoniso wa Jesu na a hi Hosi yo ngangamela le tilweni. A muwoniso lowo wu wo khwatsi ngwa lisine hakuva Pedro i lavile ku patseka ka wona. Na Pedro a ha wulawula, va lo khubhunyetwa hi refu. Zonake Pedro ni vanghana vakwe va lozwa a gezu ga Jehova wutsumbu hi kudlunyatekileko — ku nga zilo zi kalako nguvu ku maheka. Anzhako ka ku tiyisa lezaku Jesu i wa hi N’wana wakwe, Jehova i lo va byela lezi hi kukongoma: “Mu ingiseni.” A vapostoli va mahile lezi va nga leletelwa hi Nungungulu. Va lo ingisa lezi Jesu a nga va gonzisa, va tlhela va kuca vanwani a ku maha zalezo. — Mitiro 3:19-23; 4:18-20.
Jesu i wulawulile nguvu hi Mufumo wa Nungungulu a ku hunza timhaka tinwani
3. Hikuyini Jehova a lavako lezaku hi ingisa a N’wana wakwe, niku i mhaka muni hi to yi kambisisa?
3 A magezu — “Mu ingiseni” — ma tsalilwe lomu ka Biblia lezaku hi vuneka. (Rom. 15:4) Hikuyini? Hakuva Jesu muwulawuli wa Jehova, niku khati ni khati Jesu a nga kari a vulula nomu wakwe lezaku a gonzisa, i wa gonzisa lezi Dadani wakwe a nga lava lezaku hi zi tiva. (Joh. 1:1, 14) Jesu i wulawulile nguvu hi Mufumo wa Nungungulu. A mufumo lowo wa wuMessia wa le tilweni wu wumbiwa hi Jesu Kristu ni lava va 144.000 va to fuma naye. Kota lezi Jesu a wulawulileko nguvu hi wona a ku hunza timhaka tinwani, hi ta maha khwatsi hi ku kambisisa a mhaka leyi hi wukheta. (Kuv. 5:9, 10; 14:1-3; 20:6) Kanilezi, a hi sanguleni hi ku kambisisa lezaku hikuyini Jesu a wulileko zotala xungetano hi Mufumo wa Nungungulu.
“Hi wunyingi ga mbilu . . .”
4. Xana Jesu i zi kombisile kuyini lezaku wa khatala hi Mufumo?
4 Jesu wa khatala nguvu hi Mufumo. Hikuyini hi wulako lezo? Kota lezi a magezu ma kombako lezi zi nga mbilwini, lezi hi wulako zi komba lezi hakunene zi nga za lisima ka hina. Jesu i te ngalo: “A nomu wa wulawula hi wunyingi ga mbilu.” (Mat. 12:34) Khati ni khati a nga hi ni lungelo, Jesu i wa vulula a nomu wakwe lezaku a wulawula hi Mufumo. A mune wa mabhuku ya tiIvangeli ma kumbuka Mufumo a makhati yo hunza 100, niku a kutala ka wona magezu ya Jesu. A Mufumo hi wona wu nga hi hloko ya mhaka ya kuxumayela kakwe. Yena i wulile lezi: “Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.” (Luka 4:43) Hambu anzhako ka kuvuxiwa kakwe, Jesu i simamile ku wulawula hi Mufumo ka vapizani vakwe. (Miti. 1:3) Handle ko kanakana, Jesu i wa tsakela nguvu a Mufumo, laha ka kuza a kuceka ku bhulela vanwani hi wona.
5-7. a) Xana hi zi tivisa kuyini lezaku Jehova wa khatala hi Mufumo? Tlhamusela hi mufananiso. b) Xana hi nga zi kombisa kuyini lezaku ha khatala hi Mufumo?
5 Jehova yenawu wa khatala nguvu hi Mufumo. Hi zi tivisa kuyini? Alakanya lezaku Jehova i rumele a N’wana wakwe a belekilweko yece lezaku ata misaveni; Jehova hi yena mutumbuluxi wa zontlhe lezi a N’wana wakwe a zi wulileko ni ku zi gonzisa. (Joh. 7:16; 12:49, 50) Jehova kambe hi yena mutumbuluxi wa zontlhe lezi zi tsalilweko lomu ka mitlhatlhambutelo ya mune ya tiIvangeli xungetano hi wutomi ni wutireli ga Jesu. Alakanyela ku zi wula yini lezo.
A munwe ni munwani wa hina i maha khwatsi loku a ti wutisa lezi, ‘Xana nza khatala hi Mufumo wa Nungungulu ke?’
6 Ti alakanyele na u chetela zithombe ka albu ya mifota. U na ni nyanza ya mifota, kanilezi lomu ka albu ku nghena yitsongwani basi. Xini u mahako? U hlawula yokari ntsena. Hi ndlela yo kari, a tiIvangeli ti fana ni albu ya mifota leyi yi hi kombako khwatsi a matshamela ya Jesu. Jehova a nga pimiselangi a vatsali va tiIvangeli lezaku va tsala zontlhe lezi Jesu a zi wulileko ni ku zi maha a xikhati a nga hi misaveni. (Joh. 20:30; 21:25) Kanilezi, a moya wa Jehova wu lo va susumetela ku tsala a magezu ni mitiro yi hi vunako ku zwisisa a kungo ga wutireli ga Jesu ni lezi zi nga za lisima nguvu ka Jehova. (2 Tim. 3:16, 17; 2 Ped. 1:21) Kota lezi a tiIvangeli ti teleko hi tigonzo ta Jesu xungetano hi Mufumo wa Nungungulu, hi nga chikelela magumo yo tiya ya lezaku Jehova wa khatala nguvu hi Mufumo. Handle ko kanakana, Jehova i lava lezaku hi tiva zontlhe xungetano hi Mufumo!
7 A munwe ni munwani wa hina i maha khwatsi loku a ti wutisa lezi, ‘Xana nza khatala hi Mufumo wa Nungungulu ke?’ Loku zi hi tano, hi ta xuva ku ingisa lezi Jesu a zi wulileko ni ku zi gonzisa xungetano hi Mufumo lowo — ku nga lisima la wona, lezi wu to tisa zona, ni xikhati lexi wu to chikela hi xona.
“A wute mufumo wa wena” — Hi ndlela muni?
8. Xana Jesu i li songisile kuyini a lisima la Mufumo?
8 Ehleketa hi mukhongelo wa xikombiso. Hi magezu ya ntamu, kanilezi na ma hi yo olova, Jesu i lo songa a lisima la Mufumo hi ku komba lezi wu to zi maha. A mukhongelo lowo wu na ni ntlhanu wa zikombelo ni zimbiri. A zikombelo zinharu zo ranga zi yelana ni kungo ga Jehova — ku nga kubasiswa ka vito gakwe, kuta ka Mufumo, ni lezaku a kuranza kakwe ku mahiwa misaveni ni le tilweni. (Gonza Mateu 6:9, 10.) A zikombelo lezo za zinharu za yelana nguvu. Jehova i ta tirisa a Mufumo wa wuMessia lezaku a basisa a vito gakwe a tlhela a maha a kuranza kakwe.
9, 10. a) Xana wu ta tisa kuyini a Mufumo wa Nungungulu? b) Hi xihi a xitsumbiso xa Biblia lexi u xuvako nguvu a ku xi wona na xi tatiseka?
9 Xana wu ta tisa kuyini a Mufumo wa Nungungulu? A xikhati lexi hi khongelako hiku, “a wute mufumo wa wena,” ho kombela lezaku a Mufumo wu maha xokari. Loku a Mufumo wuta, wu ta fumela misava hi kumbhelela. Wu ta fuvisa a mafambisela ya zilo yo biha lawa ma nga kona zezi, a ku patsa ni mifumo yontlhe ya vanhu, wu tlhela wu neha mafambisela maswa yo lulama. (Dan. 2:44; 2 Ped. 3:13) Zonake loku a Mufumo wu kari wu fuma, a misava yontlhe yi ta maha paradise. (Luka 23:43) Lava va nga maalakanyweni ya Nungungulu va ta vuxiwa hi ka vafileko lezaku va hanya zinwe ni varanzekako vabye. (Joh. 5:28, 29) A vanhu va ingisako va ta maha vo mbhelela va tlhela va hanya kala kupinzuka. (Kuv. 21:3-5) Hi kumaha loko, a misava yi ta zwanana khwatsi ni matilo hakuva a kuranza ka Nungungulu ku ta ngha ku mahiwa ni ka yonawu! Xana a wu xuvi ku wona a kutatiseka ka zitsumbiso lezo za Biblia? Alakanya lezaku a khati ni khati u khongelako lezaku a Mufumo wa Nungungulu wuta, wo khongelela a kutatiseka ka zitsumbiso lezo zo tsakisa.
10 Zi te dlunya lezaku a Mufumo wa Nungungulu a wu seta kasi ku ta tatisa a mukhongelo wa xikombiso. Zi tano hakuva a mifumo ya vanhu ya ha fuma, niku a misava yiswa a yi se chikela. Kanilezi ku na ni mahungu yo saseka. A Mufumo wa Nungungulu wu sina wu yimisilwe, kota lezi hi to wulawula hi zona ka xipimo xi lanzelako. Zalezi a hi kambisiseni lezi Jesu a nga zi wula xungetano hi xikhati xa kuyimiswa ka Mufumo ni xikhati xa kuta ka wona.
Xana a Mufumo wa Nungungulu wu wa ta yimiswa rini?
11. Zini lezi Jesu a nga zi komba xungetano hi kuyimiswa ka Mufumo wa Nungungulu?
11 Jesu i kombile a vapizani vakwe lezaku a Mufumo wu wa nga ta yimiswa masikwini yakwe, hambu lezi a vapizani vo kari va nga rinzela lezo. (Miti. 1:6) Wona lezi a zi wulileko ka mifananiso yimbiri, a wunwe a wu hlawuteleko hi lembe ga 31 Nguveni ya hina ni wunwani hi 33 Nguveni ya hina.
12. Xana a mufananiso wa mavele ni nyasavari wu kombisa kuyini lezaku a Mufumo a wu yimiswangi xikhatini lexi Jesu a nga hi misaveni?
12 A mufananiso wa mavele ni nyasavari. (Gonza Mateu 13:24-30.) Anzhako ka ku hlawutela a mufananiso lowu, kuzilava kusanguleni ka ximumu xa lembe ga 31 Nguveni ya hina, Jesu i lo wu tlhamusela ka vapizani vakwe. (Mat. 13:36-43) A tshinya ga mufananiso ni tlhamuselo wa kona hi lowu: Anzhako ka kufa ka vapostoli, Diabolus i wa ta byala nyasavari (maKristu ya mawunwa) xikari ka mavele (“vana va Mufumo,” kutani maKristu ma totilweko). A mavele ni nyasavari zi wa ta tsikiwa zi kula zinwe kala kutshoveleni, ku nga ‘kugumesa ka tiko.’ Anzhako ka kusangula ka xikhati xa kutshovela, a nyasavari i wa ta hlengeletelwa, zonake a mavele ma wungeletelwa. Hizalezo, a mufananiso lowu wu komba lezaku a Mufumo wu wa nga ta yimiswa masikwini ya Jesu, kanilezi wu wa ta yimiswa ntsena kumbheleni ka nguva ya kukula ka zona. Kota kutatiseka ka zona, a nguva ya kukula ka zona yi gumesile zonake ku sangula a xikhati xa kutshovela hi 1914.
13. Mufananiso muni lowu Jesu a nga wu tirisa kasi ku komba lezaku i wa nga ta tekela ku yimiswa kota Hosi ya wuMessia zalezo a nga tlhelela tilweni?
13 A mufananiso wa tipondo. (Gonza Luka 19:11-13.) Jesu i hlawutele a mufananiso lowu hi lembe ga 33 Nguveni ya Hina, na a hi ndleleni ya kuya Jerusalema hi khati go gumesa. A vokari xikari ka lava va nga muzwa va alakanyile lezaku i wa ta yimisa a Mufumo wakwe zalezo va nga wa ta chikela Jerusalema. Kasi ku lulamisa a mawonela lawo ni ku komba lezaku a Mufumo wu wa ha hi kule nguvu ni ku yimiswa, Jesu i lo ti fananisa ni “munhu wa hombe” loyi a nga enza aya “matiko wundle, ku ya amukela wuhosi a wuya.” * Ka Jesu, a “matiko wundle” ku wa hi tilweni, laha a nga wa ta ya amukela kona a wuhosi hi ka Dadani wakwe. Kanilezi Jesu i wa zi tiva lezaku i wa nga ta tekela ku yimisiwa kota Hosi ya wuMessia zalezo a nga wa ta chikela tilweni. Yena i wa ta ranga hi ku tshama reveni ga xinene ga Nungungulu a rinzela kala xikhatini xi yimisilweko. Kota kutatiseka ka zona, a kurinzela loko ku tekile mazana yo tala ya malembe.— Tis. 110:1, 2; Mat. 22:43, 44; Maheb. 10:12, 13.
Xana a Mufumo wa Nungungulu wu wa tata rini?
14. a) Xana Jesu i hlamulisile kuyini a xiwutiso lexi a nga mahiwa hi mune wa vapostoli vakwe? b) Xana a kutatiseka ka xiprofeto xa Jesu ku hi byela yini xungetano hi Mufumo ni kuvakona kakwe?
14 Masikwanyana mahlweni ka kudawa ka Jesu, a mune wa vapostoli vakwe va mu wutisile lezi: “Hi byele a xikhati zi ta nga maheka ha xona lezi zilo, u hi tivisa ni xiwoniso xa kuvakona ka wena ni xa kugumesa ka tiko.” (Mat. 24:3, Tradução do Novo Mundo; Mar. 13:4) Jesu i lo va hlamula hi ku hlawutela a xiprofeto xo leha xi tsalilweko ka Mateu zipimo 24 ni 25. Yena i lo tlhatlhambutela a zimaho zo hambanahambana zi khumbako misava yontlhe lezi zi nga wa ta tira kota xikombiso xa xikhati xi vitwako “kuvakona” kakwe. A kusangula ka kuvakona kakwe ku wa ta kotlana ni kuyimiswa ka Mufumo; niku a kugumesa ka kuvakona kakwe ku wa ta kotlana ni kuta ka Mufumo. Hi na ni kutiyiseka ka hombe ka lezaku a xiprofeto lexi xa Jesu xa tatiseka kusukela 1914. * Hikwalaho, a lembe lego give masangulo ya kuvakona kakwe, niku a Mufumo wu yimisilwe hi lembe galego.
15, 16. A magezu “lexi xizukulwana” ma wula vamani ke?
15 Kanilezi, xana a Mufumo wa Nungungulu wu wa tata rini? Jesu a nga kombangi hi kukongoma a xikhati lexi zi nga wa ta maheka hi xona. (Mat. 24:36) Hambulezo, i wulile zokari lezi zi faneleko ku hi tiyisekisa lezaku a kuta ka Mufumo ku kusuhani nguvu. Jesu i kombile lezaku a Mufumo wu wa tata anzhako ka ku ngha “lexi xizukulwana” xi wonile a kutatiseka ka xiwoniso lexi xa wuprofeti. (Gonza Mateu 24:32-34.) Xana a magezu “lexi xizukulwana” ma wula vamani? A hi kambisiseni hi wukheta a magezu lawa ya Jesu.
16 “Lexi xizukulwana.” Xana Jesu i wa wula a vangakholwiko? Ahihi. Alakanya a vanhu lava va nga kari va mu ingisela. Jesu i lo hlawutela a xiprofeto lexi ka vapostoli vo kari ntsena lava va nga ‘tile kakwe na va hi voce.’ (Mat. 24:3) Na ku nga hi kale, a vapostoli va wa ta totiwa hi moya wa ku basa. Alakanya a xiyimo xa kona kambe. Na a nga se wulawula hi “lexi xizukulwana,” Jesu i te ngalo: “Makunu gonzani hi sinya ya nkuwu a mufananiso wa wona: Loku a ravi ga wona gi nyuka, gi hluka matluka, ma zi tiva lezaku a ximumu xi le kusuhi; hizalezo na nwina, laha na mu wona zontlhe lezi, zi tiveni lezaku N’wana wa munhu i le kusuhi, kona tinyangweni.” A valanzeli va totilweko va Jesu — na ku nga hi vangakholwiko — hi vona va nga wa ta wona a zilo lezi zi profetilweko va tlhela va zwisisa a tlhamuselo wa zona, ku nga lezaku, Jesu “i le kusuhi, kona tinyangweni.” Hikwalaho, a xikhati lexi Jesu a nga wulawula hi “lexi xizukulwana,” i wa wula a valanzeli vakwe va totilweko.
17. Hi wihi a tlhamuselo wa magezu “xizukulwana” ni “lezi zilo zontlhe”?
17 “Xi nga ta hunza, na zi nga se ku maheka lezi zilo zontlhe.” Xana a magezu lawa ma ta tatisekisa kuyini? Kasi ku tiva a hlamulo hi fanele ku tiva zilo zimbiri: a tlhamuselo wa “xizukulwana” ni tlhamuselo wa “lezi zilo zontlhe.” A gezu “xizukulwana” gi wula vanhu va titanga to hambanahambana, lava va hanyako ka nguva yinwe hi xikhati xo kari. A xizukulwana a xi hanyi xikhati xo leha nguvu, niku xa mbhela. (Ekso. 1:6) A magezu “lezi zilo zontlhe” ma patsa a zilo zontlhe zi profetilweko lezi zi mahekako xikhatini xa kuvakona ka Jesu, kusukela kusanguleni ka kuvakona kakwe hi 1914 kala magumo ya kona ‘kuxanisekeni ka hombe.’ — Mat. 24:21.
18, 19. Hi nga ma zwisisa kuyini a magezu ya Jesu xungetano hi “lexi xizukulwana,” niku hi nga chikelela magumo muni?
18 Makunu-ke, hi fanele ku ma zwisisa kuyini a magezu ya Jesu xungetano hi “lexi xizukulwana”? A xizukulwana lexi xi wumbiwa hi mitlawa yimbiri ya vatotilweko — a wa kusangula wu wumbiwa hi vatotilweko lava va wonileko a kusangula ka kutatiseka ka xiwoniso hi 1914 niku, a wa wumbiri wu wumbiwa hi vatotilweko lava va hanyileko xikhati xo kari ni ntlawa wo sangula. A vokari va lava va ntlawa wa wumbiri va ta wona a kusangula ka kuxaniseka loku ku tako. A mitlawa leyi ya yimbiri yi wumba a xizukulwana xinwe hakuva va hanya ka nguva yinwe hi xikhati xo kari na va hi maKristu ma totilweko. *
19 Xana lezo zi hi chiketa ka magumo muni? Ha zi tiva lezaku a xiwoniso xa kuvakona ka Jesu kota Hosi ya Mufumo xa woneka xiku dlunya misaveni yontlhe. Ha zi wona kambe lezaku a vatotilweko lava va ha hanyako misaveni na va hi xipanze xa “lexi xizukulwana” vaya va khosahala; kanilezi va nga ta mbhela vontlhe hi kufa na ku nga se sangula a kuxaniseka ka hombe. Hikwalaho, hi nga chikelela a magumo yaku zezanyana a Mufumo wa Nungungulu wu tata wu ta fumela a misava yontlhe hi kumbhelela! Handle ko kanakana, zi ta tsakisa nguvu ku wona a kutatiseka ka mukhongelo lowu Jesu a hi gonzisileko waku: “A wute mufumo wa wena”!
20. I mhaka muni ya lisima yi to kambisiswa lomu ka bhuku legi, niku zini hi to wulawula hi zona ka xipimo xi lanzelako?
20 Hi nga tshuki hi rivala a magezu lawa Jehova a ma wulileko hi le tilweni xungetano hi N’wana wakwe: “Mu ingiseni.” Kota maKristu ya lisine, ha xuva ku ingisa a wurangeli ga Nungungulu. Ha tsakela nguvu ku tiva zontlhe lezi Jesu a zi wulileko ni ku zi gonzisa xungetano hi Mufumo wa Nungungulu. Lezi a Mufumo wa Nungungulu wu sinako wu zi maha ni lezi wu to zi maha xikhatini xi tako i mhaka ya lisima leyi yi to kambisiswa ka bhuku legi. Ka xipimo xi lanzelako hi ta wulawula hi zimaho zo tsakisa lezi zi humeleleko xikhatini xa kuyimiswa ka Mufumo wa Nungungulu le tilweni.
^ nzi. 13 Kuzilava a mufananiso wa Jesu wu mahile a vaingiseli vakwe va alakanya Arkelau, a n’wana wa Herodi loyi wa Hombe. Na Herodi a nga sefa, i yimisile Arkelau kota xiga-tshomba ya mufumo tikweni ga Juda ni ka manwani matshamu. Kanilezi na a nga se sangula ku fuma, Arkelau i lo maha lienzo la hombe loya Roma lezaku a ya tiyiselwa a mufumo wakwe hi Kesari Augustu.
^ nzi. 14 Kasi ku kuma manwani mahungu, wona a xipimo 9 xa bhuku Zini Lezi A Biblia Gi Zi Gonzisako Hakunene?
