1, 2. Ne a muna ne fai atu ne Ieova ki apositolo e tokotolu a Iesu, kae ne ‵saga atu pefea latou ki ei?

MOI ne fakatonu atu eiloa a Ieova te Atua ke fai ne koe se mea, ne a au mea ka fai? Faitalia me se a te mea e fakatonu atu ne ia, e mata, ka loto fiafia eiloa koe o fakalogo ki tena fakatonuga? E mautinoa eiloa me ka fai eiloa koe penā!

² I se taimi mai tua o te Paseka i te 32 T.A., e tokotolu a soko o Iesu​—Petelu, Iakopo, mo Ioane​—ne maua ne latou se vaegā fakatonuga penā. (Faitau te Mataio 17:1-5.) Ne ‵nofo fakatasi atu latou mo te lotou Pule “i se mauga maluga ‵ki,” ne lavea ei ne latou i se fakaasiga se tamā ata o Iesu i tena ‵malu e pelā me ko te Tupu faka-te-lagi. Ne foliga mai te fakaasiga me se mea tonu eiloa telā ne taumafai a Petelu ke aofia foki a ia i ei. I te taimi koi faipati atu ei a Petelu, ne fanaifo se kaumana ki luga i a latou. I konā ne lagona faka‵lei atu eiloa ne Petelu mo ana taugasoa se mea telā ne taulia fua a nai tino ke lagona ne latou​—ko te leo eiloa o Ieova. Mai tua o te fakamaoni atu me i a Iesu ko tena Tama, ne fai ‵tonu atu a Ieova: “Faka‵logo ki a ia.” Ne faka‵logo eiloa a apositolo ki te fakatonuga tenā mai te Atua. Ne faka‵logo latou ki mea ne akoako atu ne Iesu, kae ne fakamalosi foki ne latou a nisi tino ke fai penā.​—Galu. 3:19-23; 4:18-20.

3. Kaia e manako ei a Ieova ke faka‵logo tatou ki tena Tama, kae se a te mataupu e ‵lei ke iloilo aka ne tatou?

³ A pati konā​—“Faka‵logo ki a ia”​—ne fakamau i te Tusi Tapu ke maua ne tatou a mea aoga mai i ei. (Loma 15:4) Kaia? Me i a Iesu ko te tukumuna a Ieova kae so se taimi ne ‵tala atu ei te gutu o Iesu o akoako, ne fakaasi atu ne ia a mea e manako tena Tamana ke iloa ne tatou. (Ioa. 1:1, 14) Ona ko te mea ne faipati mai a Iesu i taimi e uke e uiga ki te Malo o te Atua, te pulega faka-Mesia i te lagi telā e aofia i ei a Keliso Iesu mo ana pule lagolago e toko 144,000, i lō so se isi mataupu, se mea ‵lei ke iloilo faka‵lei aka ne tatou a te mataupu tāua tenei. (Faka. 5:9, 10; 14:1-3; 20:6) Muamua la, ke iloilo aka ne tatou a te pogai ne uke ei a muna a Iesu e uiga ki te Malo o te Atua.

4. Ne fakaasi mai pefea ne Iesu me e tāua ‵ki eiloa ki tena loto a te Malo?

⁴ Ne tāua ‵ki eiloa ki te loto o Iesu a te Malo. Kaia e mafai ei o fai atu tatou penā? Me i pati ko te mataloa ki te loto​—⁠ko tena  uiga, e fakaasi atu i ‵tou pati a mea kolā e fakatāua tonu ne tatou. Ne fai mai eiloa a Iesu: “Me e faipati mai ne te gutu a mea kolā e ‵fonu i te loto.” (Mata. 12:34) I so se avanoaga, ne ‵tala te gutu o Iesu ke faipati atu e uiga ki te Malo. E silia atu i te 100 o taimi ne fakasino atu ei ki te Malo a tusi Evagelia e fa, a te ukega o taimi konā e aofia eiloa i pati ne fai ne Iesu. Ne fai ne ia te Malo mo fai te matua o tena galuega talai, ana muna: “E ‵tau foki o folafola atu ne au te tala ‵lei o te Malo o te Atua ki nisi fa‵kai, me tenā eiloa te mea ne uga mai ei au.” (Luka 4:43) Mai tua foki eiloa o tena toetuga, ne tumau eiloa a Iesu i te faipati atu e uiga ki te Malo ki ana soko. (Galu. 1:3) E mautinoa eiloa me ne fakatāua malosi ne Iesu i tena loto a te Malo, telā e fakamalosi aka ei a ia ke faipati atu e uiga ki ei.

5-7. (a) E iloa pefea ne tatou me e tāua ‵ki eiloa ki te loto o Ieova a te Malo? Fakamatala mai. (e) E mafai pefea o fakaasi atu ne tatou me i te Malo e tāua ‵ki ki ‵tou loto?

⁵ E tāua ‵ki foki eiloa ki te loto o Ieova a te Malo. E iloa pefea ne tatou te mea tenā? Masaua, ne uga mai ne Ieova tena Tama fagasele eiloa ki te lalolagi; a Ieova ko te pogai o mea katoa kolā ne faipati kae akoako mai ne tena Tama. (Ioa. 7:16; 12:49, 50) A Ieova ko te pogai foki o mea katoa ne fakamau i tala e uiga ki te olaga mo te galuega a Iesu i tusi Evagelia e fa. Mafaufau malie aka ki te uiga o te mea tenā.

⁶ Mafaufau me ko tuku fakatasi ne koe a ata o se kāiga i se tusi ‵teu ata. E uke ‵ki a ata e mafai o filifili mai i ei, kae e se ofi katoa i te tusi tenā. Ne a au mea ka fai? E filifili ne koe a ata ke tuku ki loto. I se auala tai ‵pau, a tusi Evagelia e pelā mo se tusi ‵teu ata telā e tuku mai ne ia se ata manino e uiga ki a Iesu. Ne seki fakaosofia ne Ieova a tino tusitala o tusi Evagelia ke fakamau ki lalo a mea katoa ne faipati kae fai ne Iesu i te taimi ne nofo ei i te lalolagi. (Ioa. 20:30; 21:25) I lō te fai penā, ne takitaki ne te agaga o Ieova a latou i te fakamauga o pati mo faifaiga kolā e fesoasoani mai ke malama‵lama tatou i te pogai o te galuega talai a Iesu mo te ‵toe mea tāua ki a Ieova. (2 Timo. 3:16, 17; 2 Pe. 1:21) Ona ko te ‵fonu o tusi Evagelia i akoakoga a Iesu e uiga ki te Malo o te Atua, e mafai eiloa o fakaiku aka ne tatou mo te loto tali‵tonu me i te Malo se mea tāua ‵ki ki te loto o Ieova. Mafaufau ki te mea tenei​—e manako a Ieova ke iloa ne tatou a mea katoa e uiga ki tena Malo!

⁷ Se mea ‵lei ke fesili ifo tatou, ‘E mata, e tāua ki toku loto a te Malo o te Atua?’ Kafai e penā loa, ka loto fia‵fia eiloa tatou o faka‵logo ki mea ne faipati kae akoako mai ne Iesu e uiga ki te Malo tenā​—tena tāua mo te auala ka oko mai ei.

8. Ne fakatoetoe aka pefea ne Iesu te tāua o te Malo?

⁸ Mafaufau ki te ‵talo fakaakoako. Mai te fakaaogaga o pati ‵lei kae faigofie, ne fakatoetoe aka ne Iesu te tāua o te Malo, mai te fakaasi atu o mea ka fakataunu mai i ei. E aofia i te ‵talo tenā a fakamolemole e fitu. A fakamolemole muamua e tolu e fakauiga loa ki fuafuaga a Ieova​—te faka‵maluga o tena igoa, te oko  mai o tena Malo, mo te faiga o tena loto i te lalolagi e pelā mo te faiga i te lagi. (Faitau te Mataio 6:9, 10.) E fetaui ‵lei eiloa a fakamolemole e tolu konā. A te Malo faka-Mesia ko te mea faigaluega telā ka fakaaoga ne Ieova ke faka‵malu tena igoa kae fai tena loto.

9, 10. (a) Ka oko mai pefea te Malo o te Atua? (e) Se a te folafolaga i te Tusi Tapu ko leva ne ma‵nako tatou ke fakataunu?

⁹ Ka oko mai pefea te Malo o te Atua? Kafai e ‵talo atu tatou, “Ke oko mai tou Malo,” e akai atu tatou ke na gasuesue a te Malo. Kafai e oko mai te Malo, ka pule katoatoa mai a ia ki te lalolagi. Ka ave keatea i ei a te olaga masei tenei, e aofia i ei a malo o tāgata, kae aumai i ei te lalolagi fou kae amiotonu. (Tani. 2:44; 2 Pe. 3:13) Tenā la, mai lalo i te pulega a te Malo, ka fai ei te lalolagi kātoa mo fai se palataiso. (Luka 23:43) A latou kolā e masaua ne te Atua ka toe fakaola mai kae toe ‵kau fakatasi mo olotou tino pele. (Ioa. 5:28, 29) Ka toe maua ne tino faka‵logo a te tulaga ‵lei katoatoa mo te ola se-gata-mai. (Faka. 21:3-5) Tenā la te taimi ka ‵pau katoatoa ei te tulaga i te lalolagi mo te lagi, telā ko lavea atu i ei te loto o Ieova te Atua! E a, e se olioli koe ki te taimi e fakataunu ei a folafolaga konā a te Tusi Tapu? Masaua me i so se taimi e ‵talo atu ei ke oko mai te Malo o te Atua, ko ‵talo atu eiloa koe ke na fakataunu a folafolaga ‵gali konā.

¹⁰ E manino ‵lei me e seki “oko mai” te Malo o te Atua ke fakataunu a te ‵talo fakaakoako tenā. Koi pule mai eiloa a malo o tāgata kae e seki oko mai foki te lalolagi fou kae amiotonu. Kae e isi eiloa se tala ‵lei. Ko oti eiloa ne fakatu te Malo o te Atua, e pelā mo te mea ka sau‵tala ki ei i te suā mataupu. Ke na iloilo aka nei ne tatou a pati a Iesu ki te taimi ne fakatu aka ei te Malo mo te taimi ka oko mai.

11. Se a te mea ne fakaasi mai ne Iesu e uiga ki te fakatuakaga o te Malo o te Atua?

¹¹ Ne fakaasi mai ne Iesu me ne seki fakatu te Malo i te senitenali muamua T.A., faitalia a mea ne fakamoe‵moe ki ei ana nisi soko. (Galu. 1:6) Mafaufau ki ana pati i tala fakatusa kese‵kese e lua kolā ne tuku mai ne ia i taimi kese‵kese i loto i se lua tausaga.

12. E fakaasi mai pefea ne te tala fakatusa o saito mo mouku me ne seki fakatu aka te Malo i te senitenali muamua T.A.?

¹² Ko te tala fakatusa e uiga ki saito mo mouku. (Faitau te Mataio 13:24-30.) Mai tua o te taimi ne taku atu ei te tala fakatusa tenei, kāti i te ‵tau mafanafana i te 31 T.A., ne fakamatala atu ei ne Iesu a te uiga ki ana soko. (Mata. 13:36-43) Tenei la te manatu tāua o te tala fakatusa mo tena uiga: Mai tua o te taimi ne ‵mate ei a te kau apositolo, ne ‵toki ne te Tiapolo a mouku (Kelisiano ‵loi) i va o saito (“tama o te Malo,” io me ko Kelisiano fakaekegina). Ne talia ke ‵tupu tasi aka a saito mo mouku ke oko ki te taimi e ‵kati ei te saito, telā ko te “vaitaimi o te gataga o te olaga tenei.” Mai tua o te kamataga o te ‵katiga o saito, ka fakamaopoopo aka ei a mouku. Ko tuku fakatasi ei a saito. E fakaasi mai i te tala fakatusa me ne seki fakatu aka te Malo i te senitenali muamua T.A., kae mai tua o te taimi ne oti atu ei te vaitaimi e ‵tupu aka ei a lakau. E pelā mo te mea ne  fakagalue aka, ne gata atu te ‵tupuakaga o lakau kae kamata te ‵katiga o saito i te 1914.

13. Ne fakaasi mai pefea ne Iesu, me ne seki fakasopo fakavave aka a ia mo fai te Tupu faka-Mesia, mai tua o tena toe fokiatuga ki te lagi?

¹³ Te tala fakatusa e uiga ki mina. (Faitau te Luka 19:11-13.) Ne fai atu ne Iesu te tala fakatusa tenei i te 33 T.A. i tena auala ki Ielusalema mō te ‵toe taimi. Ne mafau‵fau a nisi o ana tino fakalogo‵logo me ka fakatu aka ne ia tena Malo i te taimi eiloa e oko atu ei latou ki Ielusalema. Ke faka‵tonu aka a te manatu tenei kae ke fakaasi atu me e seki tāitāi eiloa te taimi e fakatu aka ei te Malo, ne fakatusa ne Iesu a ia ki “se tagata mai se kaigā aliki” telā ne faimalaga atu “ki se fenua ‵mao ke fakamautinoa aka i ei tena pulega fakatupu.” * I te tulaga o Iesu, a te “fenua ‵mao” ko te lagi, telā e maua ei ne ia te malosi pule e pelā me ko te Tupu mai tena Tamana. Kae ne iloa ne Iesu me ka se fakasopo fakavave aka a ia e pelā me ko te Tupu faka-Mesia mai tua o tena fokiatuga ki te lagi. I lō te fai penā, ne sagasaga a ia i te feitu fakaatamai o te Atua kae faka‵tali ki te taimi e fakasopo aka ei a ia. Ne ‵tau eiloa o faka‵tali a ia i te fia o senitenali.​—Sala. 110:1, 2; Mata. 22:43, 44; Epe. 10:12, 13.

14. (a) Ne tali atu pefea ne Iesu a te fesili ne ‵sili atu ne ana apositolo e tokofa? (e) Se a te mea e fakaasi mai ne te fakataunuga o te valoaga a Iesu e uiga ki tena fakatasi mai mo te Malo?

¹⁴ I nai aso mai mua o tamate a Iesu, ne fesili atu ana apositolo e tokofa ki a ia: “Se a foki te fakailoga o tou fakatasi mai mo te taimi o te gataga o te olaga tenei?” (Mata. 24:3; Male. 13:4) Ne tali atu a Iesu mai te fakamatalaatuga o se valoaga lasi telā ne fakamau i te Mataio mataupu e 24 mo te 25. Ne fakamatala  fakalikiliki mai a mea kese‵kese e ‵tau o ‵tupu i te lalolagi kātoa kolā ka fai mo fai se fakailoga e iloa ei a te vaitaimi telā e taku ki tena “fakatasi mai.” A te taimi o te kamataga o tena fakatasi mai e ‵tau o ‵pau mo te fakatuakaga o te Malo; kae e penā foki loa te taimi o te fakaotiga o tena fakatasi mai, mo te okomaiga o te Malo. E maua ne tatou a fakamaoniga e lava kae ‵toe me ne kamata o fakataunu mai a te valoaga a Iesu talu mai te 1914. * Tela la, ne fakamailoga eiloa te tausaga tenā ki te kamataga o tena fakatasi mai mo te fakatuakaga o te Malo.

15, 16. E fakasino atu ki a ai a pati konei “te kautama tenei”?

¹⁵ Se a la te taimi ka oko mai ei te Malo o te Atua? Ne seki fakaasi mai ne Iesu te taimi tonu ka tupu ei te mea tenā. (Mata. 24:36) Kae e isi ne ana pati kolā e ‵tau ei o iloa ne tatou me ko pili ‵ki mai eiloa. Ne fakaasi mai ne Iesu me ka oko mai te Malo mai tua o te taimi ne lavea ei ne te “kautama tenei” a te fakataunuga o te fakailoga fakavaloaga tenā. (Faitau te Mataio 24:32-34.) E fakasino atu ki a ai a pati konei “te kautama tenei”? Ke na onoono faka‵lei aka eiloa tatou ki pati a Iesu.

¹⁶ “Te kautama tenei.” E mata, ne mafaufau a Iesu ki tino sē tali‵tonu? Ikai. Mafaufau ki ana tino fakalogo‵logo. Ne fakamatala atu ne ia a te valoaga tenei ki nai apositolo kolā ne “olo atu” ki a ia. (Mata. 24:3) E seki leva kae ne fakaekegina a te kau apositolo ki te agaga tapu. Onoono foki ki te mataupu kātoa. A koi tuai o faipati atu a ia e uiga ki “te kautama tenei,” ne fai atu a Iesu: “Ke mafaufau ki te akoakoga mai te tala fakatusa e uiga ki te lakau ko te mati: I te taimi e toe ola aka ei ana kaula kae ko kamata o ‵somo aka ana lau, ko iloa ei ne koutou me ko pili mai te ‵tau ‵vela. Kafai foki ko lavea ne koutou a mea katoa konei, ko iloa ei ne koutou me ko tu pili atu a ia ki otou mataloa.” A soko fakaekegina o Iesu​—⁠e se ko tino sē tali‵tonu​—⁠ka lavea ne latou a mea kolā ne ‵valo mai ne ia kae ka malamalama i olotou uiga, me i a Iesu “ko pili atu ki otou mataloa.” Tela la, i te taimi ne faipati ei a Iesu e uiga ki “te kautama tenei,” ne mafaufau a ia ki ana soko fakaekegina.

17. Se a te uiga o te tugapati “kautama” mo “mea katoa konei”?

¹⁷ “Ka se Palele Atu te Kautama Tenei Seiloga ke Fakataunu a Mea Katoa Konei.” Ka fakataunu tonu mai pefea a pati konā? Ke tali aka te fesili tenā, e ‵tau o iloa ne tatou a mea e lua: te uiga o te “kautama” mo “mea katoa konei.” A te tugapati ko te “kautama” e fakasino sāle atu ki tino o kautama kese‵kese kolā ne ola fakatasi i se vaitaimi. E se mafai o ola leva se kautama, kae e isi foki sena gataga. (Eso. 1:6) A te tugapati “mea katoa konei” e aofia i ei a mea katoa kolā e ‵tau o ‵tupu i te vaitaimi o te fakatasi mai o Iesu, mai i tena kamataga i te 1914 ki tena fakaotiga i “te fakalavelave lasi.”​—Mata. 24:21.

18, 19. Se a te ‵tou mainaga i pati a Iesu e uiga ki “te kautama tenei,” kae se a te mea e mafai o fakaiku aka ne tatou?

¹⁸ E mafai la pefea o malamalama tatou i pati a Iesu e uiga ki “te kautama tenei”? E aofia i te kautama a potukau e lua o te kau fakaekegina kolā ne ola fakatasi i se vaitaimi e tasi​—⁠muamua la, ko te kau fakaekegina kolā ne lavea ne latou te kamataga o te fakataunuga o te fakailoga i te 1914 kae ko te lua, ko  te kau fakaekegina kolā ne ola fakatasi mō se vaitaimi mo nisi tino i te potukau muamua. Kae se mea ‵lei me e isi ne tino mai i te lua o potukau ka ola ke lavea ne latou te kamataga o te fakalavelave telā ko pili o oko mai. E aofia eiloa a potukau e lua i konā i se kautama e tasi telā ne fakatasi latou e pelā me ne Kelisiano fakaekegina mō se vaitaimi. *

¹⁹ Se a te mea e mafai o fakaiku aka ne tatou? Ia, ko iloa ne tatou me i te fakailoga o te fakatasi mai o Iesu i te pulega o te Malo ko lavea faka‵lei atu eiloa i te lalolagi kātoa. E mafai foki o lavea ne tatou me i te kau fakaekegina kolā koi ola i te lalolagi kae fai mo fai ne vaega o “te kautama tenei” ko ma‵tua ‵ki; kae ka se ‵mate atu latou a koi tuai o kamata te fakalavelave lasi. Tela la, e mafai o fakaiku aka ne tatou me ko pili eiloa o oko mai te Malo o te Atua kae ka pule atu ki te lalolagi kātoa! Ko oko eiloa i te fakafiafia ke molimau atu ki te fakataunuga o te ‵talo telā ne fakaakoako mai ne Iesu ki a tatou: “Ke oko mai tou Malo”!

20. Se a te vaega tāua o te sukesukega ka fakamatala mai i te tusi tenei, kae se a te mea ka suke‵suke ki ei i te suā mataupu?

²⁰ Ke mo a ma puli i a tatou a pati foki eiloa ne fai ne Ieova mai te lagi e uiga ki tena Tama: “Fakalogo ki a ia.” E pelā me ne Kelisiano ‵tonu, e loto fia‵fia eiloa tatou ke faka‵logo ki te fakatonuga tenā mai te Atua. E ‵saga malosi atu tatou ki mea ne faipati kae akoako mai ne Iesu e uiga ki te Malo o te Atua. A mea kolā ko oti ne fakataunu ne te Malo mo mea ka fai ne ia i aso mai mua ko vaega tāua eiloa o te mataupu telā ka fakamatala mai i te tusi tenei. Ka fakamatala mai i te suā mataupu a mea fakaofoofogia ne ‵tupu i te vaitaimi ne fanau mai ei te Malo o te Atua i te lagi.