1, 2. Masu xeeni Yehova mwaneene aalavunle awe yaawiriyaniwe ni arummwa araru a Yesu, nto awo yoonela sai?

VAAKHANLE wira Yehova muneene ohoorumani ovara etthu, mwaarowa woonela sai? Niireke khimwaarowa omananiha wiiwelela, voohicikha etthu sa ele eniruma awe? Tthiri mwaarowa wiiwelela!

² Okathi vakhaani nuumala Paasikha a 33 EC, arummwa araru a Yesu: Pedru, Yakobo ni Yohani, yahiwiiraneela etthu ntoko eyo. (Mmusome Matheyo 17:​1-5.) Athukumanne ene ni Pwiya aya Yesu, ‘vamwako worekama’ awosa yahoonihiwa, Yesu oryeene Mwene oovuwa a wiirimu. Yowoonihiwa ele yaakhala ntoko yiireya okathi ene yoole, tivonto Pedru aaphavela awe wiirela mpantta. Pedru olavulaka, neeku nahaakhuruwelasa vasulu vaya. Nto Pedru vamosa ni ale yaarina awe, yaahikhalana eparakha yeele yaarina atthu vakhaani paahi: omwiiwa mwaneene Yehova alavulaka. Nuumala ottittimiherya wira Yesu aari tthiri Mwanawe, mowiiweya Yehova aahimyale so: “Mmwiweleleke”. Arummwa yahiiwelela yooruma ele ya Muluku. Nto yaneettela itthu seiye Yesu aaxuttihale awe, nave yahaatumererya akina opaka etthu emosaru.​—Mit. 3:19-23; 4:18-20.

3. Xeeni Yehova oniphavela awe wira hiyo ninwiriyaneke Mwanawe, nave mwaha xeeni onitthuneya ahu othokorerya?

³ Moolumo ale oowi “Mmwiweleleke”, yaahilempwa mBiibiliyani wira hiyo nittottele mureerelo. (aRom. 15:4) Mwaha wa xeeni? Nthowa noowi Yesu ti namitthaka a Yehova, nave khuta okathi Yesu aatthukula awe eyano wira aaxuttihe atthu, aanilavula itthu seiye Tiithi awe saaphavela awe wira nisuwele. (Yoh. 1:​1, 14)) Okhala wira Yesu aamakela olavula sa Omwene wa Muluku, eguvernu ya wiirimu ya oMesiya yeeyo eneettihiwa ni Kristu Yesu vamosa ni anamalamulela akhwaawe 144.000, nto nihaana ovarerya saana mwaha ola wootepexa otthuneya ovikana itthu sikina. (Wis. 5:​9, 10; 14:​1-3; 20:6) Wanipacerya nrowe niwehe etthu yaamwiiriha Yesu omakelaka olavula sa Omwene wa Muluku.

4. Moota xeeni Yesu oonihenrye awe wira Omwene ti etthu yaari vamurimani vawe?

⁴ Omwene ti etthu eri vakhiviru ni murima wa Yesu. Exeeni enniiriha ohimyaka siiso? Okhala wira moolumo ari ntoko exanela ya murima, nihimye so, moolumo ahu annooniherya ele tthiri eri yootthuneya wa hiyo. Yesu aahimyale so: ‘Tthiri eyano enilavula itthu sisanrye mmurimani’. (Math. 12:​34) Khuta okathi oonaawe oreerela Yesu aanitthukula eyano awe, onalavula sa Omwene. Mwa ivangeelyo xexe, Moolumo oowi Omwene annikhumelela etthu yowiiraka 100; ikwaha sinceene ari moolumo yaalavuliwe ni Yesu. Owo aahiiriha nuulumo na Omwene okhala muru wa olaleerya wawe, maana aahimmye so: “Kihana olaleya ehapari yorera y’omwene wa Muluku mittetthe sikina-tho, p’ itthu kirwenlyaka”. (Luka 4:​43) Hata nuumala ohihimuwa, Yesu aahivikaniha olavula sa Omwene ni awiixutti awe. (Mit. 1:3) Tthiri murima wa Yesu waahisareya osiveliwa ni Omwene, tivonto vaamakela awe olavula sa Omwene.

5-7. (a) Ninsuwela sai wira Omwene ori vamurimani va Yehova? Nvahe ntakiheryo. (b) Ninrowa wooniherya sai wira Omwene ori vamurimani vahu?

⁵ Omwene ti etthu eri vakhiviru-tho ni murima wa Yehova. Ninsuwela sai? Muupuweleke wira Yehova aahimurumiha Mwanawe mmoseene valaponi; tivonto Yehova tori mwaneene, mwa itthu sotheene saaxuttihiwe ni mwanawe. (Yoh. 7:​16; 12:​49, 50) Ohiya-vo, Yehova tori mwaneene wa etthu ti etthu elempwale ni ivangeelyu xexe voohimya sa okumi ni muteko wa Yesu valaponi. Vano, nkuupuwelani vakhaani ele enitaphulela aya wa nyuwo.

⁶ Nitakiherye so, nyuwo muhaana album a ifootu, oniphavela anyu ohela ifootu sa emusi. Masi ifootu siniphavela anyu othanla khasireere, nto album orina anyu onikela-mo ifootu vakhaani paahi. Mwaarowa opaka exeeni? Nyuwo mwaarowa othanla ifootu sootepa woosivelani. Vamosaru, ivangelyu pooti olikanyihiwa ni album oniheliwa ifootu, yoowo onnooniherya elatarato ya Yesu. Yehova khawiirinhe alipa oolepa ivangelyu, olepa itthu sotheene; sowiira ni sowiixuttiha sa Yesu. (Yoh. 20:​30; 21:​25) Munepa wa Yehova, waahiwiiriha olepa moolumo ni sowiira sa Yesu onnikhaliherya wiiwexexa etthu yamwiirinhe Yesu orwa olaleerya valaponi, ni etthu eri yootthuneya wa Yehova. (2 Tim. 3:​16, 17; 2 Ped. 1:​21) Okhala wira ivangeelyu soosareya sowiixuttiha sa Yesu voohimya sa Omwene, nto ti vookhalela hiyo ohimyaka wira Omwene ti etthu eri vakhiviru ni murima wa Yehova. Nkahaya muupuwele ela: Yehova oniphavela wira nisuweleke ele Omwene awe enitaphulela aya wa hiyo!

⁷ Khula mmosa a hiyo onimwiira saana wiikoha so: ‘Kiireke Omwene wa Muluku ti etthu eri vakhiviru ni murima aka? Akhala wira ori vakhiviru, ninrowa ophavelaka wiiwa ele Yesu yaahimyale awe ni wiixuttiha voohimya sa Omwene owo, eyo piiyo, efaita ya Omwene, moota ni okathi ene onirwa awe!

8. Yesu oonihenrye sai otthuneya wa Omwene?

⁸ Nkathokoreryani nivekelo na ntakiheryo. Yesu aahirumeela moolumo okhweya masi owiiweya saana wira ooniherye efaita erina aya Omwene ni ele enrowa awe waakhwaniherya. Nivekelo nlo nookhalana itthu 7 sinivekiwa. Sooveka tthaaru soopacerya sinivarihana ni soolakela sa Yehova, eyo piiyo, otteelihiwa wa nsina nawe, orwa wa Omwene awe, ni wiiraneya wa otthuna wawe valaponi ntoko siniireya aya wiirimu. (Mmusome Matheyo 6:​9, 10.) Sooveka iyo tthaaru sinnivarihana. Maana Omwene wa Muluku eri ekaruma Yehova enrowa awe orumeela wira nsina nawe nitteelihiwe ni otthuna wawe wiireye.

9, 10. (a) Omwene wa Muluku onirwa sai? (b) Yoolaiherya xeeni ya mBiibiliyani eniphavela anyu woona waakhwanela waya?

 ⁹ Omwene wa Muluku onrowa orwa sai? Okathi onivekela ahu nriki ‘Omwene anyu orwe’, ninveka wira Omwene owo opake etthu enooneya. Nuumala Omwene orwa, onrowa wooniherya saana owerya wawe valaponi votheene. Onrowa opwetexa makhalelo ala ootakhala a vano, ohela muhina iguvernu sotheene sa apinaatamu, nto oruuhe elapo esya ya exariya. (Dan. 2:​44; 2 Ped. 3:​13) Nto okathi owo, elapo yotheene enrowa okhala eparayiisu. (Luka 23:​43) Ale akhwiiye masi anuupuweliwa ni Muluku anrowa ohihimuxiwa wira akhaleke vamosa ni amusi aya. (Yoh. 5:​28, 29) Apinaatamu owiiwelela anrowa ophwanya erutthu ni muupuwelelo woomalela nto akhaleke mahiku otheene. (Wis. 21:​3-5) Wuukiseryani waya elapo enrowa okhala yowiiraana ni wiirimu, wira yooniherye otthuna wa mwaneene Yehova Muluku! Niireke murima anyu khoniphavela woona soolaiherya iyo siireyaka? Muhaana wuupuwela wira okathi ti okathi onivekela anyu wira Omwene wa Muluku orwe, nyuwo muniveka wira soolaiherya iyo sotheene siireye.

¹⁰ Ekeekhai wira Omwene wa Muluku khonatthi waakhwaniherya sooveka saahimmwale ni nivekelo na ntakiheryo. Maana iguvernu sa apinaatamu nlelo sinnilamulela, nave elapo esya ya exariya khenatthi okhumelela. Masi sihaavo ihapari sooreera. Omwene wa Muluku ookhalihiwa wiirimu ntoko sinrowa ahu woona muru onittharelana. Masi vano nrowe nivarerye ele Yesu yaahimyale awe sa okathi ene Omwene owo waarowa awe okhalihiwa ni liini onirwa awe.

11. Exeeni Yesu aixuttinhe awe voohimya sa okhalihiwa wa Omwene wa Muluku?

¹¹ Yesu aahooniherya wira Omwene khiwaarowa okhalihiwa eseekulu yoopacerya EC, nnaamwi awiixutti akina yuupuwela siiso. (Mit. 1:6) Nkawehani ele yaahimyale awe wa malikanyiho awe manli oovirikana, yaalavunle awe ikwaha soorakamelana etthu yowiiraka iyaakha piili.

12. Moota xeeni nlikanyiho na etrigu ni nthakathaka nnooniherya aya wira Omwene khiwaakhalihiwe eseekulu yoopacerya EC?

¹² Nlikanyiho na etrigu ni nthakathaka. (Mmusome Matheyo 13:​24-​30.) Nuumala ohimya ntakiheryo nla, woonasa wene elimwe ya 33 EC, Yesu aahaataphulela awiixutti awe. (Math. 13:​36-​43) Mmasu vakhaani, ntakiheryo na Yesu nintaphulela ela: Nuumala okhwa arummwa a Yesu, Diabo aarowa waala nthakathaka (maKristau oowootha) eriyari ya etrigu (‘ana a Muluku’, wala maKristau owoottihiwa). Okathi wowunnuwa etrigu ni nthakathaka saarowa ohiiwa sinnuwaka vamosa, eyo yaarowa wiiraneya mpakha okathi woohepha, eyo piiyo, ‘wanimala’ wa mukhalelo ola wa itthu. Nuumala opacerya okathi woohepha, nthakathaka naarowa ottotteliwa. Nto ethukumanyiwe etrigu. Tivonto nlikanyiho nle nnooniherya wira Omwene waarowa okhalihiwa muhoolo nuumala okathi wowunnuwa, ohiya eseekulu yoopacerya EC. Tthiri waahimala okathi wowunnuwa nto khupacerya okathi woohepha mwaakha wa 1914.

13. Yesu oonihenrye sai wira owo khaarowa opacerya olamulela ntoko Mesiya ophiyakaru wiirimu?

 ¹³ Ntakiheryo na imina sa musurukhu. (Mmusome Luka 19:​11-​13.) Yesu aahilavula ntakiheryo nla mwaakha wa 33 EC, arowaka oYerusalemu mukwaha awe wookiserya. Atthu akina yaanwiriyana yuupuwela wira Yesu aarowa okhaliha Omwene awe okathi ene yoole aaphiyale awe oYerusalemu. Wira olokiherye muupuwelo aya ni owooniherya wira okhalihiwa wa Omwene waarowa wiiraneya muhoolo woorakamela, Yesu aahiilikanyiha ni “mulopwana mmosá ètthoko yosuwanyeya” aavennye “arowaka elapo y’ ottaiwene, wira aheliwe emwene”. * Voohimya sa Yesu, “elapo y’ottaiwene” wathoonyerya orowa wawe wiirimu wira Tiithi awe anvahe owerya ntoko Mwene. Masi Yesu aanisuwela wira khaarowa okhalihiwa Mwene Mesiya omalakaru otthikela wiirimu. Owo aahaana okilaathi moono woolopwana wa Muluku wira owehereryeke okathi woothanliwa. Ntoko sooneyale aya, owehererya iwo waarowa wiiraneya mpakha ovira iseekulu sinceene.​Esal. 110:1, 2; Math. 22:43, 44; aHéb. 10:12, 13.

14. (a) Yesu aakhunle sai makoho aakohiwe awe ni arumeyi awe axexe? (b) Onniixuttiha exeeni wiiraneya wa iprofesia sa Yesu voohimya sa orwa wawe, vamosa ni Omwene?

¹⁴ Mahiku vakhaani ohinatthi Yesu wiiviwa, awiixutti awe axexe yaahimukoha ariki: “Ethonyeryo ya y’orwa wanyu ni y’omala wa olumwenku t’ivi?” (Math. 24:3; Mar. 13:4) Wira owaakhule, Yesu aahihimya eprofesia yowaatta itthu, elempwale va Matheyo muru 24 ni 25. Aahihimya kamosa-kamosa sowiiraneya sinci sa mulaponi saarowa okhala ethoonyeryo, yaarowa wooniherya okathi oniitthaniwa ‘okhala-vo’ wa Yesu. Mapacereryo ala a okhala-vo wa Yesu, yaarowa olikanela ni okhalihiwa wa Omwene; nave yowiiraneya yuulupale ya okhala wawe yaarowa okhala orwa wa Omwene. Nihaana itthu sinnaaminiha wira eprofesia ya Yesu yaahipacerya wiiraneya okhuma mwaakha wa 1914. * Tivonto, mwaakha ole ti waari mapacereryo a okhala wawe wohooneya ni otikitheriwa wa Omwene.

15, 16. Moolumo oowi ‘nloko nla’ anaahimya aani?

¹⁵ Nto, vano, Omwene wa Muluku onirwa liini? Yesu khaahimyale okathi ene eyo enrowa aya wiiraneya. (Math. 24:​36) Masi owo aahihimya etthu ekhanle oonilipiherya wira eyo enrowa wiiraneya moohipisa. Yesu aahoniherya wira Omwene waarwa nuumala atthu a ‘nloko nla’, woona wiiraneya wa itthu saahimmwale ni eprofesia. (Mmusome Matheyo 24:​32-​34, Tradução do Novo Mundo.) Nto moolumo oowi ‘nloko nla’ anihimmwa aani? Nrowe nivarerye saana moolumo ala a Yesu.

¹⁶ ‘Nloko nla.’ Niireke Yesu aahimya atthu oohaamini? Nnaari. Nkahaya nwuupuwele atthu yanwiriyana. Okathi Yesu aahimyale awe eprofesia ela, aalavula ni arummwa vakhaani ‘yamuthukumanenle okhwipi’. (Math. 24:⁠3) Moohipisa arummwa ale yaarowa okhala owoottihiwa ni munepa wootteela. Nwehe-tho makhalelo yaari-vo. Yesu ohinatthi olavula sa atthu a ‘nloko nla’, owo aahimyale so: ‘Mupuwele etthu enixuttiha aya mwiri wa ifigu: Iritta saya sapacerya ovaruwa nuphuwela makukhu, munnisuwela wira eyita eri vakhiviru. Siso-tho, monakaru sikhumelelaka itthu iya sothene, musuwele sana wira owo ori vakhiviru, vamukhora’. Moone wira awiixutti oowoottihiwa a Yesu, ohiya atthu ahinikupali, ti yaarowa woona itthu Yesu aahimyale awe vahinatthi ni ti yaarowa osuwela saana yootaphulela aya, niire so, wira Yesu “ori vakhiviru, vamukhora”. Tivonto, okathi Yesu aalavula awe sa ‘nloko nla’ owo aahimya atthareli awe owoottihiwa.

17. Anitaphulelani moolumo oowi ‘nloko nla’ ni ‘itthu iya sotheene’?

¹⁷ ‘Nloko nla khanimmala mpakha itthu iya sotheene wiiraneya’. Masu ala anrowa waakhwanela sai? Wira naakhule nihaana osuwela itthu piili: ele enitaphulela aya moolumo oowi ‘nloko nla’ ni ‘itthu iya sothene’. Nuulumo noowi ‘nloko nla’ ikwaha sinci anihimmwa atthu yaale okathi onikhala aya onilikanela ni wa atthu akina, masi arina iyaakha soovirikana. Okathi ene khonitepa orakamexa ni onnimala. (Okhum. 1:6) Nuulumo noowi ‘itthu iya sotheene’ ninhimya itthu sotheene saahimmwale vahinatthi saarowa okhumelela okathi wa okhala-vo wa Yesu, okhuma mwaakha wa 1914 mpakha omala waya okathi wa “maxakha malupale”.​—Math. 24:21.

18, 19. Ninrowa osuwela sai yootaphulela ya masu a Yesu oowi ‘nloko nla’ nave nniixutta exeeni?

¹⁸ Nto, vano, niiweke sai moolumo a Yesu voohimya sa atthu a ‘nloko nla’? Moolumo oowi atthu a nloko nla, anaahimya atthu a igrupu piili sinilikanela, sa anna oowoottihiwa; egrupu yoopacerya, ari anna oowoottihiwa yoonale opacerya waya wiiraneya wa ithoonyeryo sa 1914; egrupu ya nenli enaahimya anna oowoottihiwa yaale anikhala okathi onilikanela ni wa egrupu yoopacerya. Woonasa wene anna akina mwa ale ari a egrupu ya nenli anrowa okhala akumi wira yoone opacerya wa maxakha maalupale. Igrupu iya piili sinnikhala nloko nimosa mwaha woowi okumi aya ntoko maKristau oowoottihiwa onnilikanela mwa okathi vakhaani. *

¹⁹ Nto nihimyeke exeeni nuumala ovarerya itthu iya? Vano hiyo noosuwela wira mwa olumwenku wotheene, ennooneya saana ethoonyeryo ya okhala-vo wa Yesu ni owerya wawe wa Omwene. Nave ninnoona wira anna oowoottihiwa yaale nlelo ari akumi ni aniirela mpantta wa ‘nloko nla’, annuuluvala; masi awosa khanrowa okhwa otheene aya maxakha maalupale ahipacenrye. Tivonto, nikhanle ahu oohimyaka wira tthiri moohipisa Omwene wa Muluku, onimoorwa wira olamulele elapo yotheene ya vathi! Tthiri vanrowa okhala voohakalaliha woona wiiraneya wa nivekelo nenle Yesu naaxuttihale awe oriki: ‘Omwene anyu orwe’!

20. Myaha xeeni sinireerela osoma sinrowa othokoreriwa eliivuru ela, nto muru onittharelana ninrowa othokorerya exeeni?

²⁰ Masi nihiliyale moolumo yaalavuliwe ni mwaneene Yehova oryeene wiirimu, voohimya sa Mwana awe, oriki: “Mmwiweleleke”. Ntoko maKristau ekeekhai, ninniphavela tthiri wiiwelela yoolopola eyo ya Muluku. Murima ahu onnipavelexa khuta etthu Yesu yaahimyale awe ni wiixuttiha voohimya sa Omwene wa Muluku. Mwa itthu saakhwaniheriwe ni Omwene owo vamosa ni ele enrowa awe opaka muhoolo, ti etthu enitthuneya ahu otokosa saana, tivonto ti mwaha onrowa ahu othokorerya mwa eliivuru ela. Muru onittharelana onrowa ovarerya itthu sookuxa murima siniiraneya okathi oniyariwa aya Omwene wa Muluku wiirimu.