1, 2. Ano an ginsiring ni Jehova mismo nga hinbatian han tulo nga apostol ni Jesus, ngan paonan-o hira ginios?

KON may isugo hi Jehova nga Dios ha imo, ano an imo hihimoon? Sigurado nga masugot ka ha iya, anoman ito!

² Sugad hito an naeksperyensyahan han tulo nga apostol ni Jesus—hira Pedro, Santiago, ngan Juan—katapos han Paskua han 32 C.E. (Basaha an Mateo 17:1-5.) Upod han ira Agaron ha “hitaas nga bukid,” nakita nira ha bisyon hi Jesus sugad nga mahimayaon nga langitnon nga Hadi. Baga hin tinuod adto nga bisyon salit nagsari hi Pedro nga makigbahin hito. Samtang nagyayakan pa hi Pedro, may dampog nga naglandong ha ira. Kahuman, hinbatian niya ngan han iya mga kaupod an tingog nga pipira la ka tawo an nakapribilehiyo makabati—an tingog ni Jehova mismo. Katapos magsiring nga Anak niya hi Jesus, hi Jehova nagsugo: “Pamati kamo ha iya.” Ginsunod ito han mga apostol. Namati hira ha katutdoan ni Jesus, ngan gin-aghat an iba nga buhaton an pariho.—Buh. 3:19-23; 4:18-20.

3. Kay ano nga karuyag ni Jehova nga mamati kita ha iya Anak, ngan ano nga topiko an maopay nga usisahon naton?

³ An mga pulong nga “Pamati kamo ha iya” iginrekord ha Biblia basi mapahimulsan naton. (Roma 15:4) Kay ano? Tungod kay hi Jesus an tagapagyakan ni Jehova ngan ha kada pagtutdo ni Jesus, iginsusumat niya an karuyag han iya Amay nga hibaroan naton. (Juan 1:1, 14) Tungod kay an Ginhadian han Dios—an langitnon nga Mesianiko nga gobyerno nga ginkukompwesto ni Kristo Jesus ngan han 144,000 nga iya igkasi-magmarando—an agsob paghisgotan ni Jesus kay han iba nga butang, maopay nga usisahon gud naton inin importante nga topiko. (Pah. 5:9, 10; 14:1-3; 20:6) Kondi, aton anay usisahon kon kay ano nga agsob niya paghisgotan ito.

4. Paonan-o iginpakita ni Jesus nga an Ginhadian duok ha iya kasingkasing?

⁴ An Ginhadian duok ha kasingkasing ni Jesus. Kay ano nga masisiring naton ito? Kay an mga pulong nagpapakita kon ano an aada ha sulod han kasingkasing—karuyag sidngon, mahibabaroan ha aton mga pulong kon ano an importante ha aton. Hi Jesus nagsiring: “Kon ano an aada ha kasingkasing amo an nagawas ha baba.” (Mat. 12:34) Ha kada pagtutdo ni Jesus,  naghihisgot hiya mahitungod han Ginhadian. Ngani, ha sobra 100 ka beses nga pag-unabi han Ginhadian ha upat nga Ebanghelyo, kadam-an hiya mismo an nag-unabi. Ito an tema han iya ministeryo: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.” (Luc. 4:43) Bisan katapos pagbanhawa ha iya, an Ginhadian la gihap an iya ginhisgotan ha iya sumurunod. (Buh. 1:3) Tungod kay an iya kasingkasing puno hin apresasyon ha Ginhadian, napagios hiya pag-inistorya mahitungod hito.

5-7. (a) Paonan-o naton mahibabaroan nga an Ginhadian duok ha kasingkasing ni Jehova? Iilustrar. (b) Paonan-o naton maipapakita nga an Ginhadian duok ha aton kasingkasing?

⁵ An Ginhadian duok gihap ha kasingkasing ni Jehova. Paonan-o naton nahibabaroan ito? Hinumdumi nga ginsugo ni Jehova an iya bugtong nga Anak nganhi ha tuna; hiya an gintitikangan han ngatanan nga iginsiring ngan igintutdo han iya Anak. (Juan 7:16; 12:49, 50) Hiya liwat an gintitikangan han ngatanan nga asoy mahitungod han kinabuhi ngan ministeryo ni Jesus nga mababasa ha upat nga Ebanghelyo. Kondi, ano an iginpapasabot hito?

⁶ Pananglitan, naghihimo ka hin photo album. Damu nga retrato an imo pipilian. Pero diri ito masakto ha album. Ano an imo bubuhaton? Pipilion mo an imo ibubutang. Ha pariho nga paagi, an mga Ebanghelyo sugad hito nga album. Waray giyahi ni Jehova an mga nagsurat hito nga irekord an tanan nga ginsiring ngan ginbuhat ni Jesus dinhi ha tuna. (Juan 20:30; 21:25) Lugod, gin-giyahan hira han espiritu ni Jehova nga irekord an mga pulong ngan mga buhat ni Jesus nga mabulig basi masabtan an katuyoan han iya ministeryo ngan kon ano an pinakaimportante kan Jehova. (2 Tim. 3:16, 17; 2 Ped. 1:21) Tungod kay an mga Ebanghelyo puno han katutdoan ni Jesus mahitungod han Ginhadian, husto an pagsiring nga an Ginhadian duok ha kasingkasing ni Jehova. Hunahunaa la, karuyag ni Jehova hibaroan naton kon ano gud an iya Ginhadian!

⁷ Maopay nga pakianhan naton an aton kalugaringon, ‘Duok ba ha akon kasingkasing an Ginhadian han Dios?’ Kon oo, mamamati gud kita ha iginsiring ngan igintutdo ni Jesus mahitungod han Ginhadian—kon kay ano nga importante ito, ngan ha ano nga paagi ngan kon san-o ito maabot.

8. Paonan-o iginpakita ni Jesus an bili han Ginhadian?

⁸ Tagda an modelo nga pag-ampo. Ha simple kondi makapabantad nga mga pulong, iginsumat ni Jesus an bili han Ginhadian pinaagi ha pagsumat kon ano an pagbubuhaton hito. Ito nga pag-ampo may pito nga hangyo. An siyahan nga tulo may kalabotan ha mga katuyoan ni Jehova—an pagbaraan han iya ngaran, an pag-abot han iya Ginhadian, ngan an pagkatuman han iya kaburut-on ha tuna sugad man ha langit. (Basaha an Mateo 6:9, 10.) Iton tulo nga hangyo konektado gud ha kada  tagsa. An Mesianiko nga Ginhadian amo an gagamiton ni Jehova ha pagbaraan han iya ngaran ngan ha pagtuman han iya kaburut-on.

9, 10. (a) Ha ano nga paagi makanhi an Ginhadian han Dios? (b) Ano nga saad han Biblia an hingyap mo nga matuman?

⁹ Ha ano nga paagi makanhi an Ginhadian? Kon nag-aampo kita nga “Kumanhi unta an imo Ginhadian,” naghahangyo kita nga gumios na an Ginhadian. Kon umabot na ito, gagamiton hito an bug-os nga gahum hito dinhi ha tuna. Pupoohon hito an presente nga maraot nga sistema, upod na an ngatanan nga gobyerno han tawo, ngan papahinaboon hito an matadong nga bag-o nga kalibotan. (Dan. 2:44; 2 Ped. 3:13) Katapos, ilarom ha pagmando hito, magigin paraiso an tuna. (Luc. 23:43) An mga patay nga aada ha panumdoman han Dios babanhawon ngan makakaupod utro han ira mga hinigugma. (Juan 5:28, 29) An masinugtanon nga mga tawo magkakaada hingpit ngan dayon nga kinabuhi. (Pah. 21:3-5) Dida hito, matutuman na hin bug-os an kaburut-on ni Jehova dinhi ha tuna, pariho ha langit! Hingyap mo ba matuman ito nga mga saad han Biblia? Hinumdumi nga ha kada mo pag-aampo nga umabot an Ginhadian, igin-aampo mo an katumanan hiton presyoso nga mga saad.

¹⁰ Klaro nga waray pa “kumanhi” an Ginhadian han Dios sugad nga katumanan han modelo nga pag-ampo. Ngani, nagmamando pa an mga gobyerno han tawo ngan waray pa an matadong nga kalibotan. Kondi may-ada maopay nga sumat. Naestablisar na an Ginhadian han Dios, sugad han aton paghihisgotan ha sunod nga kapitulo. Aton usisahon an ginsiring ni Jesus kon san-o maiestablisar an Ginhadian ngan kon san-o ito maabot.

11. Ano an ginsiring ni Jesus mahitungod ha kaestablisar han Ginhadian?

¹¹ Hi Jesus nagsiring nga an Ginhadian diri maiestablisar ha siyahan nga siglo C.E., bisan pa han mga ginlalaoman han pipira han iya disipulo. (Buh. 1:6) Tagda an duha nga ilustrasyon nga iya igin-istorya nga may haros duha ka tuig an lat-ang.

12. Paonan-o iginpapakita han ilustrasyon han trigo ngan banwa nga waray maestablisar an Ginhadian han siyahan nga siglo C.E.?

¹² An ilustrasyon han trigo ngan banwa. (Basaha an Mateo 13:24-30.) Katapos iasoy an ilustrasyon, bangin ha katsaringsing han 31 C.E., ginklaro ini ni Jesus ha iya mga disipulo. (Mat. 13:36-43) Iini an detalye ngan kahulogan hito: Kamatay han mga apostol, an Yawa magsasabwag hin banwa (diri tinuod nga mga Kristiano) ha butnga han trigo (“mga anak han Ginhadian,” o dinihogan nga mga Kristiano). An trigo ngan banwa tutugotan nga urosa nga tumubo ha panahon han pagtubo tubtob ha panahon han pag-ani, nga amo an “ikatarapos hini nga sistema.” Ha tinikangan han panahon han pag-ani, titirukon an banwa. Katapos, masunod an pagtirok han trigo. Kon sugad, iginpapakita han ilustrasyon nga an Ginhadian maiestablisar, diri ha siyahan nga  siglo C.E., kondi katapos han panahon han pagtubo. Sugad han nahitabo, han 1914 natapos an panahon han pagtubo ngan nagtikang an panahon han pag-ani.

13. Paonan-o igin-ilustrar ni Jesus nga diri dayon hiya magigin Mesianiko nga Hadi pagbalik niya ha langit?

¹³ An ilustrasyon han mga mina. (Basaha an Lucas 19:11-13.) Igin-asoy ni Jesus ini nga ilustrasyon han 33 C.E. han tikadto hiya ha Jerusalem ha ultimo nga higayon. Kahuna han pipira han iya mamarati nga iya ig-iestablisar an iya Ginhadian pag-abot nira didto. Basi tadungon hira ngan ipakita nga maiha pa maestablisar an Ginhadian, iginpariho ni Jesus an iya kalugaringon ha “tawo tikang ha hadianon nga pamilya” nga kinahanglan magbiyahe “ha hirayo nga nasud basi makarawat gud niya an pagkahadi.” * Ha bahin ni Jesus, an “hirayo nga nasud” amo an langit, diin makakarawat niya tikang ha iya Amay an pagkahadi. Kondi maaram hi Jesus nga diri dayon hiya magigin Mesianiko nga Hadi pagbalik niya ha langit. Lugod, malingkod hiya ha too nga kamot han Dios ngan maghuhulat ha itinanda nga panahon. Ngan inabot hin damu ka siglo an iya paghulat.—Sal. 110:1, 2; Mat. 22:43, 44; Heb. 10:12, 13.

14. (a) Paonan-o ginbaton ni Jesus an pakiana han upat han iya mga apostol? (b) Ano an iginpapasabot han katumanan han tagna ni Jesus may kalabotan han iya presensya ngan han Ginhadian?

¹⁴ Pipira ka adlaw antes patayon hi Jesus, upat han iya apostol an nagpakiana ha iya: “Ano an magigin tigaman han imo presensya ngan han ikatarapos hini nga sistema?” (Mat. 24:3; Mar. 13:4) Ha pagbaton, ginhisgotan ni Jesus an detalyado nga tagna  ha Mateo kapitulo 24 ngan 25. Iya gin-unabi an magkalain-lain nga panhitabo ha kalibotan nga magigin pangirilal-an han usa ka peryodo han panahon nga gintatawag nga iya “presensya.” An pagtikang han iya presensya amo liwat an pagkaestablisar han Ginhadian; ngan an pagkatapos han iya presensya amo liwat an pag-abot han Ginhadian. Damu an ebidensya nga an tagna ni Jesus natutuman na tikang pa han 1914. * Salit, hito nga tuig nagtikang an iya presensya ngan naestablisar an Ginhadian.

15, 16. Kan kanay nagtutudlok an mga pulong nga “ini nga henerasyon”?

¹⁵ Kondi, san-o maabot an Ginhadian han Dios? Waray magsiring hi Jesus kon san-o ito eksakto nga maabot. (Mat. 24:36) Pero may ginsiring hiya nga magpapasarig ha aton nga hirani na gud ito. Hiya nagsiring nga an Ginhadian maabot katapos “ini nga henerasyon” kumita han katumanan han tagna. (Basaha an Mateo 24:32-34.) Kan kanay nagtutudlok an mga pulong nga “ini nga henerasyon”? Aton usisahon an ginsiring ni Jesus.

¹⁶ “Ini nga henerasyon.” Mga diri-tumuroo ba an ginhisgotan dinhi ni Jesus? Diri. Tagda kon hin-o an iya mga kaistorya. Igin-asoy ni Jesus ini nga tagna ha pipira han iya apostol nga ‘dinaop ha iya nga hira la.’ (Mat. 24:3) Diri na la maiha an mga apostol pagdidihogan han baraan nga espiritu. Tigamni liwat an konteksto. Antes niya unabihon “ini nga henerasyon,” hiya nagsiring: “Sugad nga ehemplo, tagda an kahoy nga igera: Kon tumubo na an mga sanga hito ngan manaringsing an mga dahon, maaram kamo nga hirani na an katpaso. Sugad man, kon makita na niyo ini ngatanan nga butang, makakasiguro kamo nga hirani na hiya ha mga purtahan.” An dinihogan nga mga sumurunod ni Jesus—diri an mga diri-tumuroo—an makakakita han katumanan han iya tagna ngan makakasabot han kahulogan hito, nga hi Jesus ‘hirani na ha mga purtahan.’ Salit han naghisgot hi Jesus han, “ini nga henerasyon,” an iya dinihogan nga mga sumurunod an aada ha iya hunahuna.

17. Ano an kahulogan han mga pulong nga “henerasyon” ngan “ini ngatanan”?

¹⁷ “Diri gud malabay . . . tubtob nga mahitabo ini ngatanan.” Paonan-o matutuman ini? Basi mabaton ito, sadang naton hibaroan an kahulogan han “henerasyon” ngan han “ini ngatanan.” An “henerasyon” agsob nagtutudlok ha mga tawo nga iba-iba an pangidaron ngan an kinabuhi nag-ábot durante hin usa ka panahon. An henerasyon diri hilawig hinduro, ngan may kataposan. (Eks. 1:6) An mga pulong nga “ini ngatanan” nag-uupod han tanan nga igintagna nga panhitabo durante han presensya ni Jesus, tikang ha pagtikang hito han 1914 tubtob ha pagkatapos hito ha “daku nga kasakitan.”—Mat. 24:21.

18, 19. Paonan-o naton sasabuton an mga pulong ni Jesus nga “ini nga henerasyon,” ngan ano an mahimo naton magin konklusyon?

¹⁸ Kon sugad, paonan-o naton sasabuton an mga pulong ni Jesus nga, “ini nga henerasyon”? An henerasyon nag-uupod han duha nga nag-ábot nga grupo han mga dinihogan—siyahan, an mga dinihogan nga nakakita han pagtikang han katumanan han pangirilal-an han 1914, ikaduha an mga dinihogan nga  nakahigayon nga makaupod an siyahan nga grupo. An pipira han ikaduha nga grupo makakakita han pagtikang han tiarabot nga kasakitan. Iton duha nga grupo masisiring nga usa nga henerasyon tungod kay nag-ábot an ira kinabuhi sugad nga dinihogan nga mga Kristiano. *

¹⁹ Kon sugad, ano an aton mahuhunahuna? Aw, matin-aw nga an pangirilal-an han presensya ni Jesus sugad nga Hadi nakikita na ha bug-os nga kalibotan. Nakikita liwat naton nga an mga dinihogan nga buhi pa ngan bahin “[hini] nga henerasyon” nagtitikalagas na; kondi diri hira ngatanan mamamatay antes magtikang an daku nga kasakitan. Salit, makakasiring kita nga an Ginhadian han Dios hirani na gud umabot ngan magmando ha tuna! Makalilipay nga makita an katumanan han pag-ampo nga igintutdo ni Jesus: “Kumanhi unta an imo Ginhadian”!

20. Ano nga importante nga topiko an paghihisgotan hini nga libro, ngan ano an aton tatagdon ha sunod nga kapitulo?

²⁰ Ayaw gud kalimti an ginyakan mismo ni Jehova tikang ha langit mahitungod han iya Anak: “Pamati kamo ha iya.” Sugad nga tinuod nga mga Kristiano, andam kita sumunod hito nga sugo. Interesado gud kita ha ngatanan nga iginsiring ngan igintutdo ni Jesus mahitungod han Ginhadian han Dios. An nabuhat na ngan pagbubuhaton pa hito nga Ginhadian amo an importante nga topiko nga paghihisgotan hini nga libro. Tatagdon ha sunod nga kapitulo an makapainteres nga mga panhitabo han naestablisar an Ginhadian han Dios ha langit.