1,2． （甲）耶穌嘅三位使徒親耳聽到耶和華講咗啲乜嘢？（乙）佢哋有乜嘢反應呢？

 如果耶和華上帝吩咐你做一啲事，你會有乜嘢反應呢？無論上帝要你做乜嘢，你都樂意照佢講嘅去做，係咪呢？當然係啦！

² 公元32年逾越節結束冇幾耐，彼得、雅各同埋約翰三位使徒就有過噉嘅經歷。（請讀馬太福音17:1-5）佢哋同主耶穌一齊“上咗一座高山”。三位使徒喺異象裏面睇到耶穌將來喺天上作王嘅輝煌景象。異象睇嚟好真實，彼得提出要幫異象裏面嘅人搭帳幕。但佢嘅話都未講完，就有雲遮住佢哋。跟住，彼得同另外兩位使徒清晰噉聽到耶和華同佢哋講話，呢個係幾咁難得嘅殊榮！世上冇幾多個人可以好似佢哋噉，親耳聽到耶和華嘅聲音。耶和華明確表示耶穌係佢嘅兒子，然後吩咐三位使徒：“要聽從佢”。使徒就照住做嘞。佢哋唔單止自己聽從耶穌嘅教導，仲勸其他人都噉樣做。（使徒行傳3:19-23；4:18-20）

3． （甲）點解耶和華要我哋聽從耶穌？（乙）我哋會探討乜嘢題目？

³ 聖經將“要聽從佢”呢句話記錄落嚟，係為咗令我哋得益。（羅馬書15:4）點解噉講呢？因為耶穌係耶和華嘅代言人。耶穌每次教導人，講嘅都係天父想我哋知道嘅事。（約翰福音1:1,14）耶穌經常傳講上帝嘅王國，亦即係彌賽亞所領導嘅天上政府（彌賽亞王國）。喺呢個政府裏面，除咗君王耶穌基督之外，仲有14萬4000人同耶穌一齊作王。既然耶穌講論上帝嘅王國比任何話題都要多，我哋唔係好應該仔細探討吓呢個重要嘅題目咩？（啟示錄5:9,10；14:1-3；20:6）等我哋嚟睇吓耶穌點解經常傳講上帝嘅王國。

4． 我哋點樣睇得出上帝嘅王國喺耶穌心目中非常重要？

⁴ 喺耶穌心裏面，上帝嘅王國非常重要。我哋點知呢？言談就好似一扇窗噉，可以將人内心嘅諗法顯露出嚟。換 句話嚟講，通過我哋嘅言談，其他人可以睇出我哋心裏面重視嘅係乜嘢。耶穌話：“心所充滿嘅，口就講出嚟。”（馬太福音12:34）耶穌一有機會就傳講上帝嘅王國。喺四福音原文裏面，譯做“王國”嘅呢個詞出現咗百幾次，其中大部分都係耶穌講嘅。耶穌傳道嘅主題就係上帝嘅王國，佢話：“我亦要喺其他城宣揚上帝王國嘅好消息，因為我係為呢件事奉差而嚟嘅。”（路加福音4:43）耶穌復活之後，繼續向門徒講論上帝嘅王國。（使徒行傳1:3）從呢一點睇出，耶穌好重視上帝嘅王國。佢心裏面充滿嘅，一定要講。

5-7． （甲）我哋點知道，喺耶和華心裏面佢嘅王國非常重要？請解釋。（乙）我哋點樣做，就表明自己重視上帝嘅王國呢？

⁵ 喺耶和華心裏面，王國非常重要。點解噉講呢？耶和華差派佢嘅獨生子耶穌嚟到地上，耶穌所講所教嘅，全部都嚟自耶和華。（約翰福音7:16；12:49,50）福音書記述咗耶穌嘅生平事跡同埋傳道工作，四位執筆者所寫嘅，亦都出於耶和華。不妨諗吓，呢個意味住乜嘢呢？

⁶ 假設你正喺度準備緊一本家庭相簿，你想放入去嘅相太多，相簿放唔落。你會點做呢？你一定會精心挑選，淨係將自己覺得重要嘅相放入去。喺某種意義上嚟講，四福音就好似一本相簿，等我哋可以清楚認識耶穌。耶和華冇啟示四福音嘅執筆者將耶穌喺地上嘅一切言行都寫落嚟。（約翰福音20:30；21:25）喺耶和華嘅聖靈引導下，四位執筆者只係將重要嘅細節記錄喺福音書裏面，可以令我哋明白耶穌嚟到地上傳道嘅目的，亦都俾我哋知道耶和華最重視嘅係乜嘢。（提摩太後書3:16,17；彼得後書1:21）既然福音書記載嘅，大部分都係耶穌教導嘅王國真理，噉樣可以睇出喺耶和華心裏面，佢嘅王國非常重要。耶和華係幾咁希望我哋全面認識佢嘅王國呢！

⁷ 每個人都應該問吓自己：“喺我心裏面，上帝嘅王國有幾重要呢？”如果我哋重視上帝嘅王國，就會樂意學習耶穌所教嘅王國真理，努力了解下面問題嘅答案：上帝嘅王國點解非常重要？王國嘅來臨意味住乜嘢？王國幾時來臨呢？

8． 耶穌喺模範禱告當中，概述咗上帝會通過王國成就邊啲重要嘅事？

⁸ 喺模範禱告裏面，耶穌簡潔有力噉概述咗上帝王國要成就嘅事，等我哋明白呢個王國有幾咁重要。耶穌喺禱告裏面祈求嘅七件事，頭三件係同耶和華嘅旨意有關嘅：願 上帝嘅名彰顯為聖；願上帝嘅王國來臨；願上帝嘅旨意喺地上實現，好似喺天上一樣。（請讀馬太福音6:9,10）呢三件事密切相關。耶和華會通過彌賽亞所統治嘅王國嚟彰顯自己嘅聖名，同埋實現自己嘅旨意。

9,10． （甲）上帝嘅王國來臨意味住乜嘢？（乙）你期待聖經嘅邊個應許實現？

⁹ 上帝嘅王國來臨意味住乜嘢？我哋祈求上帝嘅王國來臨，就等於求呢個王國採取行動，解決一切問題。上帝嘅王國一到，就會鏟除目前嘅邪惡制度，包括世上嘅所有政府，而且全權接管大地，帶嚟正義嘅新世界。（但以理書2:44；彼得後書3:13）喺上帝王國嘅統治之下，全球會變成樂園。（路加福音23:43）凡係蒙上帝記念嘅人，都會復活，同親友重聚。（約翰福音5:28,29）服從上帝嘅人會恢復完美，得享永生。（啟示錄21:3-5）最終，地上嘅一切會同天上嘅完全配合，徹底實現耶和華上帝嘅旨意。你係咪好期待聖經嘅應許實現呢？請記住，你每次祈求上帝嘅王國來臨，就等於喺度求呢啲應許實現嘞。

¹⁰ 好明顯，模範禱告當中“願你嘅王國來臨”呢句話仲未完全實現。世上嘅政府依然喺度統治緊，正義嘅新世界仲未嚟到。不過好消息係，上帝嘅王國已經建立咗嘞，呢本書第2章會討論呢一點。噉樣，上帝嘅王國係幾時建立嘅呢？會喺幾時來臨呢？等我哋嚟睇吓耶穌點講。

11． 關於上帝王國幾時建立，耶穌嘅話表明乜嘢？

¹¹ 耶穌表明，上帝嘅王國唔會喺公元1世紀建立，呢個同當時門徒所期待嘅唔一樣。（使徒行傳1:6）下面會分析兩個比喻，耶穌講出呢兩個比喻嘅時間相隔唔到兩年。

12． 小麥同毒麥嘅比喻點樣表明，上帝嘅王國唔會喺公元1世紀建立？

¹² 小麥同毒麥嘅比喻 （請讀馬太福音13:24-30）公元31年春天，耶穌對群衆講咗小麥同毒麥嘅比喻。後來，佢對門徒解釋比喻嘅含意。（馬太福音13:36-43）下面係呢個比喻嘅要點同含意：使徒去世之後，魔鬼就喺小麥（“王國之子”，即受膏基督徒）當中撒落毒麥（假基督徒）。小麥同毒麥會一齊成長，直到收割嘅時候，亦即係“呢個制度嘅末期”。收割時期開始之後，首先會將毒麥收集起嚟，然後再將小麥收入倉庫裏面。呢個比喻表明，上帝嘅王國唔會喺公元1世紀建立，而係喺成長嘅時期結束之後先至會建立。事情嘅發展顯示，1914年莊稼已經成熟，收割時期開始嘞。

13． 耶穌用乜嘢比喻講明，佢返翻天上之後唔會馬上登基成為彌賽亞王國嘅君王？

 ¹³ 銀元嘅比喻 （請讀路加福音19:11-13）公元33年，耶穌最後一次去耶路撒冷，喺途中講咗銀元嘅比喻。聽耶穌講話嘅人當中，有啲人以為耶穌一到耶路撒冷就會建立王國。為咗糾正呢個錯誤嘅觀點，耶穌用比喻解釋，仲有一段好長嘅時間上帝嘅王國先至會建立。佢將自己比喻成一個要去遠方“執掌王權”嘅“貴族”。 a耶穌所講嘅“遠方”係指天上，意思係佢會到天父嗰度領受王權。不過，耶穌知道自己返到天上之後，唔會即刻登基做彌賽亞王國嘅君王，而係會坐喺上帝嘅右邊，直到指定嘅時候。事實表明，耶穌等咗千幾年。（詩篇110:1,2；馬太福音22:43,44；希伯來書10:12,13）

14． （甲）耶穌點樣回答四位使徒嘅問題呢？（乙）關於耶穌嘅臨在同埋上帝嘅王國，我哋睇到預言陸續應驗，可以明白啲乜嘢呢？

¹⁴ 耶穌俾人處死嘅前幾日，四位使徒嚟問佢：“你嘅臨在同呢個制度嘅末期，有咩徵象呢？”（馬太福音24:3；馬可福音13:4）為咗回答佢哋嘅問題，耶穌講咗個預言。呢個預言包含好多細節，記載喺馬太福音24同25章。耶穌詳細噉描述咗末期嗰時地上會有乜嘢大事發生，呢啲事構成咗 佢“臨在”嘅綜合徵象。喺耶穌臨在嘅開始，上帝嘅王國就會建立；到佢臨在嘅高潮，上帝嘅王國就會來臨。有大量嘅證據顯示，自從1914年以來，耶穌預告嘅事正喺度陸續應驗。 b所以，1914年係耶穌臨在嘅開始，亦都係上帝王國建立嘅年份。

15,16． “呢一代人”係指邊啲人呢？

¹⁵ 噉上帝嘅王國幾時會來臨呢？耶穌並冇透露具體嘅時間。（馬太福音24:36）不過，佢嘅話令我哋深信，上帝嘅王國好快就會來臨。耶穌表明，“呢一代人”一定會先睇到末世嘅徵象應驗，然後上帝嘅王國先至會來臨。（請讀馬太福音24:32-34）“呢一代人”係指邊啲人呢？等我哋嚟仔細睇吓耶穌點樣講。

¹⁶ “呢一代人” 耶穌提到“呢一代人”嗰時，諗到嘅係唔係嗰啲仲未歸信嘅人呢？唔係。當時聽耶穌講話嘅係邊啲人呢？係幾位使徒。佢哋私底下嚟見耶穌，耶穌就講咗關於末世徵象嘅預言。（馬太福音24:3）之後冇幾耐，使徒就要受聖靈膏立。請再留意經文嘅上下文。耶穌提到“呢一代人”之前，話：“你哋要從無花果樹嘅比喻學個道理：樹嘅新枝一發嫩長葉，你哋就知道夏天近嘞。照樣，你哋睇見呢一切事，就應該知道佢近在門口嘞。”既然係噉，邊啲人會睇到耶穌預告嘅事，明白其中嘅含意，又知道耶穌“近在門口”呢？就係耶穌嘅受膏門徒，而唔係嗰啲仲未歸信嘅人。所以，耶穌提到“呢一代人”嗰時，諗到嘅係佢嘅受膏門徒。

17． “一代人”同“呢一切”係指乜嘢？

¹⁷ “呢一切必定先發生，呢一代人先至會消逝。” 呢句話會點樣實現呢？要回答呢個問題，我哋就需要明白“一代人”同“呢一切”係指乜嘢。喺聖經裏面，“一代人”通常係指某個時期唔同日子出生嘅人，佢哋雖然年紀唔一樣，不過就有一段時間同時存在。“一代人”存在時間唔會延續太耐，一定會結束。（出埃及記1:6）經文講嘅“呢一切”，係指耶穌預告佢臨在期間所發生嘅一切事，就係從佢臨在嘅開始（1914年）到佢臨在嘅高潮（“大患難”）呢段時間之内發生嘅事。（馬太福音24:21）

18,19． （甲）我哋應該點樣理解耶穌所講嘅“呢一代人”呢？（乙）我哋可以得出乜嘢結論？

¹⁸ 噉我哋應該點樣理解耶穌所講嘅“呢一代人”呢？“呢一代人”包括兩群受膏基督徒。第一群受膏基督徒睇到末世徵象喺1914年開始應驗。第二群受膏基督徒同第一群喺末 世嘅一段時間同時存在，係同時代嘅人。大患難爆發嗰時，第二群受膏基督徒當中仲會有啲人喺地上。呢兩群基督徒都屬於“呢一代人”，佢哋受膏之後，有一段時間同時喺地上生活。 c

¹⁹ 我哋可以得出乜嘢結論呢？表明耶穌臨在執掌王權嘅徵象，喺世界各地都已經清楚睇得出嚟。“呢一代人”當中，仲喺地上嘅受膏基督徒都已經上咗年紀。大患難爆發嗰時，佢哋當中有啲人仲會喺地上。所以，我哋可以肯定，上帝嘅王國好快就會來臨，統治全地。到時，模範禱告裏面“願你嘅王國來臨”呢句話就會完全實現。將來可以親眼睇見呢件事發生，係幾咁振奮人心呢！

20． （甲）呢本書主要論述乜嘢？（乙）下一章會講乜嘢？

²⁰ 千祈唔好忘記耶和華嘅吩咐。乜嘢吩咐呢？就係要聽從耶穌。耶和華從天上表明耶穌係佢嘅兒子之後，就吩咐話：“要聽從佢”。身為真基督徒，我哋樂意按照耶和華嘅指示去做。關於上帝王國嘅真理，耶穌所講所教嘅到底係乜嘢，我哋唔係好想知道咩？呢本書主要論述上帝嘅王國已經成就同埋將要成就嘅事。下一章會講吓，上帝嘅王國喺天上建立前後有乜嘢事發生。