1, 2. Ginipai Yekova agumbaha ku tu ga Yesu amokedi yo biata, na ginipai i amangihe sa ni?

KA Si du nga Yekova Mbori fu sunge foro mo mangihe, ginipai ka mo mangihe? Ka si vurangia kina gini ngbatungapai du, mo du nga na nyemu ka mangaha te? Zanga kapa, mo mangihe amanga!

² Kusa, fuo gu Pumbo Susiri naadu rogo gu garã nangia 32 Fuo Batikayo Kristo, pai wakina gure amangi ga Yesu amokedi biata nga Petero, Yakoba, na Yoane. (Oni gedi Matayo 17:1-5.) Ho i adu ni na Baira yo “ri bagangara yo,” i abi yuguyugupai tipa gu taarimo Yesu nika du na ni rogo gako zogarago ngbangbaturũ yo ni Bakindo. Gu yuguyugupai re adu wakina boro ndikidipai na Petero ki asadi ka mangapai sa ni. Ho Petero aafura ni, dubo ki du bariyo. Sidu, aPetero na abakureako agi gu fugo dungu aboro aagianga ha ya nga fugo Yekova nitiko. Fuo Yekova yuguhe nga Yesu nga Wiriko, ko aya: “Oni gí pa ko.” Amokedi aima dia gupai Mbori apehe re kugume. I adegetuyo kuti gupai Yesu ayuguhe, na ki ngarasi kura aboro i mangi kinawo a.​—Amo. 3:19-23; 4:18-20.

3. Tipagine Yekova aida ani degeturani ti ni fu Wiriko, na ginipai si aida ani wisigihe wenengai?

³ Agu afugo nga “oni gí pa ko” i akehe ku rogo Baibiri yo re, si tipa kina gaani undo. (Rom. 15:4) Tipagine? Bambiko Yesu nga ga Mbori bangbasia bagumbapai na agu aregbo dunduko ko anaayugopai, ko aayugo gupai Bako aida ani inihe. (Yo. 1:1, 14) Wa duhe nga Yesu afura gbe tipa ga Mbori Kindo nga gu ga Masiya zogarago du ngbangbaturũ yo nakoda Kristo Yesu na gako abadia zogarago nga 144,000, si naida ani wisigi gu nyanyakipa pai re sirisiri. (Yugo. 5:9, 10; 14:1-3; 20:6) Ni bambatapai, ani wisigingo ndu gupai Yesu afura ti ni gbe tipa ga Mbori Kindo.

4. Wai du Yesu ayuguhe nga Kindo adu na nyanyakipaha ngbaduko yo?

⁴ Kindo nga gu nyanyakipa pai paha adu ngbadu Yesu yo. Tipagine rengbe ani ti ni ka pehe wo? Bambiko agu apai nakura ngbarani yo nayugo gupai du kpotoraniyo, na afugo rani nayugo gupai nyakipaha tirani. Yesu nitiko aya: “Ngba boro nagumba gu pai du kpotoni yo.” (Mt. 12:34) Ho Yesu anigbia momu ni, ko anaafura tipa Kindo. AKitabu Wene Pangbanga biama ima fura susi 100 tipa Kindo, na Yesu naafura tipaha  gbe. Kindo nangia gu memepai ko aatungusapai tipaha niya: “Mi nandu ka tungusa gu wene pangbanga nga ga ga Mbori ngbi [Kindo] rogo kura akporo a; bambiko si du i akedi re tipa ha.” (Rk. 4:43) Zavura fuo zinga Yesu be kpio, ko aafura kindi tipa Kindo fu gako abawiriki. (Amo. 1:3) Nirengo, Yesu aima du na bakere tambuahe tipa Kindo kpotokoyo, si kini fõngbadukoyo ko nifura tipaha.

5-7. (a) Wai du ini ani he nga Yekova nabi Kindo na nyanyakipaha? Oni funga kpiapai. (b) Wai du rengbe ani ka yugoho nga ani nabi Kindo na nyanyakipaha?

⁵ Kindo na nyanyakipaha fu Yekova a. Ani nainoho wai? Oni tingidi gupai nga, Yekova du nakedi bangisa Wiriko ku rogo zegino; Yekova nga mburu agu apai dunduko Wiriko anaagumbaha na kini yuguhe. (Yo. 7:16; 12:49, 50) Yekova a nga mburu agu apai dunduko du ni kekehe rogo agu aKitabu Wene Pangbanga du biama nafura tipa ga Yesu raka na tungusapai. Ani bingo gupai gipai re ayugoho.

⁶ Mo berẽnga gupai nga mo nandu nunguro. Aroko ima nge si aida mo siaha, ono gamo mangu ni kina umbaha. Ginipai rengbe mo ka mangaha? Mo sia kina gu mo aida na ni. Wakina gure a, aKitabu Wene Pangbanga wakina gu mangu hi be agu apai du tipa Yesu. Anga ga Yekova toro adu kugii abakeke aKitabu Wene Pangbanga i keke agu apai dunduko Yesu amangihe na ki gumbaha auru kpotosende ane te. (Yo. 20:30; 21:25) Kuba gure, ga Yekova toro angbe fuyo kumbatayo i ke afugo Yesu na gu mangaapai naundo rani ani rugutirani na pa ga Yesu tungusapai gbiati gupai nyakipaha fu Yekova. (2 Tim. 3:16, 17; 2 Pet. 1:21) Wa duhe nga aKitabu Wene Pangbanga hi be agu apai Yesu ayuguhe tipa ga Mbori Kindo, ani rengbe ka ya Kindo na nyanyakipaha fu Yekova. Oni berẽnga kurii gipai re, Yekova naida ani ini agu apai gako Kindo nika mangaha naabaha!

⁷ Si naida ani sana tirani ni basasa nga, ‘Ya mo mi nabi ga Mbori Kindo na nyanyakipaha?’ Kangia wo duhe, ani nika duadu na nyemu ka gia gupai Yesu apehe na ki yuguhe tipa Kindo, pa nyakaha, wai si nika manga na gu regbo si nika ye ti ni.

8. Wai du Yesu ayugupa nyaka agu apai nga ga Kindo ni wiri guruhe?

⁸ Ani bingo kpia kparakpee. Yesu amangisunge na agu afugo du taata tipa ka fura ni guruhe tipa wai du Kindo na nyanyakipaha, na ki yugu gupai si nika mangaha. Gu kparakpee re na azungodi he rogoho saba. Gu bambataha du biata nabipa ga Yekova aringbisapai, nga pa ziasi rimoko, pa ye gako Kindo, na pa manga gupai ko akpinyemuhe auru kpotosende a wa du he ngbangbaturũ yo. (Oni gedi Matayo 6:​9, 10.) Agi azungodihe du biata re na ngbanya dagba tihe. Ga Masiya Kindo nga gu he Yekova nika mangasunge na ni tipa ka ziasi rimoko na ka manga gupai ko akpinyemuhe.

9, 10. (a) Wai du ga Mbori Kindo nika ye? (b) Gini sangbanebi nga ga Baibiri mo aida ka bihe si nidigisitihe?

 ⁹ Wai du ga Mbori Kindo nika ye? Ho ani akpara ni nga, “Ga ngbi [Kindo] yé,” gure nga ani nasanahe nga Kindo mangi ariapai. Ho Kindo nika ye ni, si nika yugo gu ome du ti ni auru kpotosende dunduko. Si nika nyasariipa gu gbegberẽ zegino du awere kusayo, kodihe na ga aboro zogarago, na ki ye na ruru zogarago kubaha. (Dan. 2:44; 2 Pet. 3:13) Fuo gure, tii gu zogarago nga ga Kindo, zegino naabaha nika da ni paradizo. (Rk. 23:43) Agu aboro du rogo ga Mbori berãpai yo i nika da ni ungayo na ki koditiyo berewe na gayo aboro. (Yo. 5:28, 29) Aboro giasangba nika da ni rengberengbeyo na ki raki nyeanye kindi. (Yugo. 21:3-5) Niyangaraha, kpotosende nika du na ngbanya dagbaha na ngbangbaturũ, nga gu nikaa yugo gupai Yekova Mbori aidaha! Ya mo oni akpingo nyemu ka bi agi akidohe nga ga Baibiri re si nida ti rengo te? Oni tingidi gupai nga, agu aregbo dunduko oni akpara tipa ga Mbori Kindo ye, gure nga oni nakpara tipa gu wene akidohe re digisitihe.

¹⁰ Kina rengo ngaha nga ga Mbori Kindo ata ‘yengo’ tipa ka digiso agu apai du rogo kpia kparakpee yo te. Gu kurapai berewe nga, aboro nazogarago kindi, na ruru zegino ata danga a te. Ono wene pangbanga kinaho. I ima sigira ga Mbori Kindo, a wa ani ka wisigoho rogo gu kapita ngbefuo gere. Ani makianga pai awere tie tipa gu regbo Yesu aya i nika sigira Kindo ti ni na gu regbo si nika ye ti ni.

11. Ginipai Yesu ayuguhe tipa pa sigira ga Mbori Kindo?

¹¹ Yesu aima yugoho nga i asigiranga Kindo rogo bambata sa kama agarã te, wa si avura du vurũ nga dungu gako abawiriki naadu na gu bipai re. (Amo. 1:6) Ani bingo agu asanza ue ko apehe, nga gu ko ape bambataha agarã ki mangi ue ko ki pe gu kuraha.

12. Wai du gu sanza nga ga rende na morũ ayugo gupai nga i aasigiranga Kindo rogo bambata sa kama agarã te?

¹² Sanza rende na morũ. (Oni gedi Matayo 13:24-30.) Fuo Yesu pe gi sanza re, isoke bara rogo Marungu watadu Zerekpe rogo 31 Fuo Batikayo Kristo, ko asakirogoyo fu gako abawiriki. (Mt. 13:36-43) Rogo gu sanza re yo du re: Fuo kpio amokedi, Bakitingbanga nika mi rende (ziree aKristano) dagba morũ (“awiri ngbi [Kindo],” watadu mbedimbedi aKristano). Si adu nga i nika mbu rende na morũ si sono kina sa da ti regbo keahe, “nga ho zegino ka nyasa ni.” Fuo tona regbo keahe, i nika dungura rende kusayo. Fuani, i ki dungura morũ. Gu sanza re ayuguhe nga i nika sigira Kindo asigira, angianga rogo bambata sa kama agarã ya, ono tingbafuo regbo sona ahe digi. A wa apai aye ka yugo tihe, regbo sona ahe adigi na regbo keahe ki tona rogo 1914.

13. Wai du Yesu ayuguhe nga i amaanga ko ni Bakindo gu Kindo nga ga Masiya nibasa fuo ga ko ku ngbangbaturũ yo te?

¹³ Gu sanza nga ga marã. (Oni gedi Ruka 19:​11-​13.) Yesu ape gi sanza re rogo 33 F.B.K., ho ko aandu ni niyangaraha  ku Yerusarema yo. Bete agu aboro naadegatuyo fuko aberẽhe tigayo nga ko nika sigira gako Kindo nibasa fuo da yo Yerusarema yo. Tipa ka ruga gipai re riyo yo na ka yugoho fuyo nga pa sigira Kindo adu kindi tuturũ, Yesu aringbisipa tiko kuti ‘gu gbia ndu ku rogo gu ringara du tuturũ, ka dia ngbi ni gako. *’ Tipa Yesu tigako, gu ‘ringara du tuturũ’ re angia ngbangbaturũ yo, nga gu ba si adu nga Bako nika fu pagbia fuko ni Bakindo rogoho. Ono Yesu aima inoho nga ko adanga ni Bakindo nibasa fuo ga ko ku ngbangbaturũ yo te. Kuba gure, si adu nga ko nika sungo ku kumbabee Mbori yo daho regbo siako nika da ni. A wa si amangi, ko asungudi he tipa dungu akama agarã.​—Tam. 110:1, 2; Mt. 22:43, 44; Eb. 10:12, 13.

14. (a) Wai du Yesu akaragapai kuti gu sanahe gako amokedi biama asana ko na ni? (b) Ginipai pa digiso ga Yesu sangbanebi ayugoho furani tipa padu ko na ome Kindo beko gbiati Kindo?

¹⁴ Bete aˈuru mbata fu Yesu kpi, gako amokedi biama asanako nga: “Ni gini rago agi apai ka manga re? gine i ka ina pa ga ye ti ni, na pa digida rago?” (Mt. 24:3; Mk. 13:4) Yesu akaragapai fuyo nipe ko gu sangbanebi du na dungu apai rogoho du rogo Matayo kapita 24 na 25. Yesu apeke agu akpiapai nika manga rogo zegino dunduko nga gu i nika ino ‘pa gako ye’ ti ni watadu padu ko na ome Kindo beko. Si adu nga tonatona padu ko na ome Kindo beko gbiati pa sigira Kindo nika du ti bangisa regbo sa; na digido padu ko na ome kindo beko adu  sa na paye Kindo. Ani na nyanyaki gopai berani nayugo na ni nga ga Yesu sangbanebi aima tona nidigisitihe tona rogo 1914. * Sidu, gu garã re du ko agbia ome Kindo na i asigira Kindo ti ni a.

15, 16. Ada nga “gi rika aboro re”?

¹⁵ Ono gini regbo tie nzunzu ga Mbori Kindo nika ye ti ni? Yesu aayugongo gu regbo nzunzu si nika manga ti ni te. (Mt. 24:36) Ono ko aima pe gupai rengbe ka kido rani nga si ima mbeda ka da nirengo. Yesu ayugu gupai nga gu Kindo re nika ye fuo “gi rika aboro re” bi gu digisidigisi akpiapai nga ga gu sangbanebi re. (Oni gedi Matayo 24:32-34.) Ada du i ayamba yo nga “gi rika aboro re”? Ani wisigingo afugo Yesu sirisiri.

¹⁶ ‘Gi rikaaboro re.’ Ya mo Yesu aafura tipa azangaidapase? Oó. Oni bingo agu aboro ko aafura fuyo. Yesu ape gi sangbanebi re fu gu bete amokedi ‘naye koyo du ko ni ni rondo.’ (Mt. 24:3) Si adu nga amokedi nika gbia ziazia toro barambeda. Ani bingo gupai ko apehe mbata fu gure. Mbata fu Yesu fura tipa “gi rika aboro re,” ko aya: “Were oni wíriki sanza ti vurumo: ni gu rago behe narungbura ki moi kpehe amaa, oni ki ini ya [kito] nambeda; a wo oni a, ni gu rago oni ka bi agi apai re, oni ki ini ya ko mbedi, ko ngbadimo.” Si adu nga agu apefuo Yesu naadu ni mbedimbedi yo ni ziazia toro re, i du nika bi agu apai ko afura tipaha kumbatayo na ki rugutiyo na pa nyakapaha, nga Yesu ima ‘mbeda, ko ngbadimo,’ angianga azangaidapase ya. Sidu tie, ho Yesu aafura ni tipa “gi rika aboro re,” agu aboro naadu berãko yo angia agu apefuoko i ambedi yo ni ziazia toro.

17. Rogo gu fugo nga “rika aboro” na ‘agi apai re dunduko’ nga gine?

¹⁷ ‘I agónga daho agi apai ka díga ni dunduko te re.’ Wai du agi afugo re nika da ti rengo? Tipa ani karagapai kuti gipai re, si naida ani ini apai ue: ginihe nga “rika aboro” gbiati ‘agi apai re dunduko.’ Gu fugo nga “rikaaboro,” dedede si nafura tipa agu aboro du agarãyo ni bakiakia raki ti bangisa regbo sa. Rikaaboro sa arengbanga ka raka tipa gbanga regbo gbe te, si ki digi. (Gate 1:6) Gu fugo nga ‘agi apai re dunduko’ nakoda agu apai dunduko si adu nga si nika manga ho Yesu nika du ni na ome Kindo beko naatona rogo 1914 daho si nika digo ni rogo “bakere gberãngbi.”​—Mt. 24:21.

18, 19. Wai du rengbe ani ka rugatirani na gu ga Yesu afugo du tipa “gi rika aboro re,” na gini digisopai da ani kutini?

¹⁸ Wai du tie rengbe ani ka rugatirani na gu fugo Yesu du tipa “gi rika aboro re”? Gu rikaaboro re nakoda gu raka nga ga mbedimbedi aKristano ue naagbia tihe, gu bambata badona nga gu mbedimbedi aKristano naabi tonatona gu kpiapai naayugo padu Yesu na ome Kindo beko rogo 1914, na gu ue badona nga gu mbedimbedi aKristano naagbia gayo yambahe ti gu regbo gu bambata yo re adu kindi ti unga. Bete aguyo  kinaho du rogo gu ue badona re nika raka berewe ka bi tonatona bakere gberãngbi. Agi abadona du ue re nakusa badona sa nga ga rikaaboro bambiko gayo raka nga ga mbedimbedi aKristano agbiatihe tipa bete regbo. *

¹⁹ Gini digisopai rengbe ani ka da kutini? Sidu, ani ima inoho nga gu kpiapai nayugo padu Yesu na ome Kindo beko ni yuguyuguhe rogo zegino dunduko. Ani nabi gupai a nga gu mbedimbedi aKristano du ni ungayo nga papara “gi rika aboro re” i nagbinza wa pai; wa vura duhe wo, i akpikongo dunduko mbata fu bakere gberãngbi tona te. Sidu tie, gere naye na ani kuti gu digisopai nga, barambeda, ga Mbori Kindo nika ye na ki tona ka zogarago auru kpotosende ane! Nairiwo wai ani kadu na ngbarago ka bi gu kparakpee Yesu ayuguhe furani si nidigisitihe nga: “Ga ngbi [Kindo] yé”!

20. Gini nyanyakipa pai ani ka sakapai tipaha rogo gi buku re, na ginipai ani ka sakapai tipaha rogo gu kapita ngbefuo gere?

²⁰ Ka bangirani gonga ti gu fugo Yekova apehe ngbangbaturũ yo tipa Wiriko ya nga: “Oni gí pa ko.” Wangia ani ndikidi aKristano, ani na nyemu ka mangapai kuti gu ga Mbori rugute re. Ani na nyemu agu apai dunduko Yesu apehe na ki yuguhe tipa ga Mbori Kindo. Gupai gu Kindo re namangihe na gu si nika mangaha kumbatayo nga gu nyanyakipa pai ani ka sakapai tipaha rogo gi buku re. Gu kapita ngbefuo gere nika sakapai tipa gu weneapai namangi ti regbo vunga ga Mbori Kindo ngbangbaturũ yo.