1, 2. Aha do peristiwa na hea masa di tano on, jala boasa ndang adong jolma na mangida i?

 HEA do dipingkirhon hamu songon dia mangolu di tingki na bersejarah na parohon godang hamubaon? Godang do halak na mamingkirhon i. Alai rimangi ma: Molo mangolu hita di tingki sisongon i, boi do taboto angka na masa na mambahen hamubaon i? Ra ndang boi. Umpamana, molo marganti sada pamarentaon ndang godang na mamboto boasa masa i. Ala godang sian i, masa di istana manang di kantor ni angka pejabat. Nang pe songon i, jotjot do na masa on mangkorhon tu parngoluon ni godang halak.

² Adong na masa na so diida jolma na parohon hamubaon na balga di tano on, jala mangkorhon tu ngolu ni godang halak. Tingki i, jongjong ma Harajaon ni Debata di surgo, i ma Pamarentaon ni Messias na laho mangaripashon hajahaton sian tano on. (Jaha Daniel 2:34, 35, 44, 45.) Boasa ndang adong na mangida i masa? Na buni do i dibahen Jahowa sian jolma? Manang, adong do diparade naposoNa tu parjongjong ni Harajaon i? Taparrohahon ma alusna.

3-5. (a) Ise do ”suruan parpadanan” na dipaboa di Maleaki 3:1? (b) Aha do na laho masa andorang so ro ”suruan parpadanan” i tu bagas joro di tano on?

³ Sian najolo, nunga diparade Jahowa naposoNa tu parjongjong ni Pamarentaon ni Messias. Umpamana, surirang na disurat di Maleaki 3:1, na mandok, ”Ida ma, suruanku ma suruanku, asa dipadiri [paradehon] dalan di jolongku. Dung i tompu ma ro tumopot jorona Tuhan, na niluluanmuna dohot suruan ni parpadanan na hinalungunhonmuna.”

⁴ Alai di zaman modern, nandigan do ”Tuhan” Jahowa ro mamareso naposoNa na marhobas di alaman ni joroNa? Dipaboa di surirang i, ro do Jahowa rap dohot ”suruan ni parpadanan”. Ise do suruan i? Jesus Kristus, Raja Messias! (Luk. 1:68-73) Dung jongjong ibana gabe Raja,  dipareso jala dipabadia ma naposo ni Debata di tano on.​—1 Ptr. 4:17.

⁵ Alai, ise do ’suruan’ na parjolo na dipaboa di Maleaki 3:1? Nunga adong suruan i andorang so ro dope Raja Messias. Alai, ise do na ’paradehon dalan’ tu Raja Messias andorang so taon 1914?

6. Ise do ’suruan’ na parjolo na paradehon naposo ni Debata tu angka na laho masa?

⁶ Dapot ma alus ni sungkunsungkun i di buku on, na paboahon songon dia sejarah ni naposo ni Jahowa na tongtong diingot sahat tu saonari. Sejarah i, dipungka di ujung ni abad 19, di tingki i adong sada punguan na mangalului hasintongan di tongatonga ni agama palsu. Di pudian ni ari, digoari ma punguan on Parsiajar Bibel. Na manguluhon punguan on, i ma si Charles T. Russell dohot angka donganna, jala nasida ma ’suruan’ naung disurirangkon i. Diparade nasida do sipanganon partondion, na mangurupi naposo ni Debata tu angka na laho masa. Taparrohahon ma opat cara na diulahon suruan i.

7, 8. (a) Taon 1800-an, ise do na paboahon na so sintong ajaran taringot tu tondi ni na mate na tongtong mangolu? (b) Ajaran dia do na so sintong na dipaboa ni si C. T. Russell dohot angka donganna?

⁷ Parsiajar Bibel i parjolo martangiang; manulingkiti isi ni Bibel, dung sapandapot, disurat jala dipabinsar nasida ma. Saleleng marratus taon, ajaran ni angka gareja nunga dao sian hasintongan; godang ajaran i marharoroan sian hasomalan ni sipelebegu. Umpamana, ajaran taringot tu tondi ni halak na mate na tongtong mangolu. Alai, taon 1800-an, adong ma na manulingkiti isi ni Bibel jala diboto nasida ma ajaran i ndang hombar tu Hata ni Debata. Barani do si Henry Grew, si George Stetson, dohot si George Storrs pasahathon jamita jala pabinsarhon sijahaon na paboahon na so sintong ajaran i. a Pangantusion ni nasida mangkorhon do tu si C. T. Russell dohot angka donganna.

⁸ Adong dope muse ajaran na so sintong na hombar tu tondi ni halak na mate na dipapatar punguan ni Parsiajar Bibel. Umpamana, ajaran na mandok sude halak na burju tu surgo, manang na jahat disiksa di api na roko salelenglelengna. Dipaboa si Russell dohot angka donganna do muse na so sintong ajaran i marhite buku, pamflet, risalah, dohot jamita na dipabinsar di koran.

9. Songon dia do Zion’s Watch Tower paboahon molo ajaran Debata Sitolu Sada ndang sintong?

⁹ Dipaboa Parsiajar Bibel i do muse taringot tu ajaran na so sintong na godang dihaporseai halak, i ma ajaran Debata Sitolu Sada. Taon 1887, Zion’s Watch Tower mandok, ”Tangkas do dipaboa di Bibel molo Jesus Anak ni Jahowa.” Didok muse di majalah i, ”Songgot do roha mangida ajaran taringot tu Debata Sitolu Sada, na mandok tolu Debata di bagasan sada, jala sada di bagasan tolu. Ajaran on  patuduhon naung tarpodom do angka ruas ni gareja di partondion hape nunga dipalilu Sibolis nasida marhite ajaran na so sintong.”

10. Songon dia do Watch Tower patuduhon na ringkot do taon 1914?

¹⁰ Surirang taringot tu haroro ni Kristus ma na dipatorang di majalah Zion’s Watch Tower and Herald of Christ’s Presence. Halak Kristen na miniahan na manurat majalah on paboahon, surirang ni si Daniel taringot tu ”pitu taon” hombar do i tu tingki ni Debata manggohi sangkapNa taringot tu Pamarentaon ni Messias. Nunga dipaboa nasida sian taon 1870-an molo ujung ni pitu taon i, i ma taon 1914. (Dan. 4:22; Luk. 21:24) Nang pe sasintongna ndang tangkas dope diboto angka dongan sahaporseaonta aha na laho masa taon 1914, alai nunga dibaritahon nasida molo taon 1914, i ma taon na ringkot. Tahaporseai do hasintongan on sahat tu saonari.

11, 12. (a) Ise do na dipuji donganta si Russell alani hasintongan na pinaboana? (b) Aha do pangkorhon ni ulaon ni si Russell dohot donganna saleleng marpulu taon andorang so taon 1914?

¹¹ Ndang lomo roha ni si Russell dohot angka donganna dipuji, alani hasintongan i. Gariada, na dipuji si Russell, i ma angka halak na parjolo sian nasida. Tarlumobi dipuji nasida do Jahowa ala dipaboa hasintongan i tu naposoNa  di tingkina. Dipasupasu Jahowa do ulaon ni si Russell dohot angka donganna laho paimbarhon hasintongan sian ajaran palsu. Lam leleng, lam tangkas ma tarida molo hasintongan i, marimbar sian angka ajaran ni gareja.

¹² Las do roha mangida angka donganta on. Dilehon nasida do tingki dohot gogona mangalului hasintongan saleleng marpulu taon, andorang so taon 1914! The Watch Tower and Herald of Christ’s Presence 1 November 1917 mandok, ”Saonari marjuta halak nunga dipalua sian biar ni roha alani ajaran api na roko dohot ajaran palsu na asing . . . Di tingki i, lam patar ma hasintongan naung dipataridahon lobi sian opat pulu taon naung salpu di liat portibi on. Alani i, halak na mangambati tarsar Hasintongan i, dipatudos ma songon halak na mangalo halisungsung.”

13, 14. (a) Songon dia do ’suruan’ i paradehon dalan tu Raja Messias? (b) Aha do na boi taparsiajari sian angka donganta na mangolu hirahira 100 taon naung salpu?

¹³ Pingkirhon ma: Boi do naposo ni Debata mangarade tu haroro ni Kristus molo ndang diboto nasida imbar ni Jahowa dohot Jesus? Ndang boi! Molo porsea nasida hangongolu na manongtong i dilehon tu sude jolma ndang holan tu na marsihohot mangihuthon Jesus, manang molo porsea do nasida disiksa Debata jolma di api na roko salelengna, tontu ndang taronjar roha ni nasida laho mangarade tu haroro ni Kristus! Tangkas ma tarida na diparade ’suruan’ i do dalan tu Raja Messias!

¹⁴ Songon dia do hita saonari? Aha do na boi taparsiajari sian angka donganta na mangolu hirahira 100 taon naung salpu? Songon nasida, ringgas ma hita manjaha jala marsiajar Bibel. (Joh. 17:3) Anggiat ma sai taharingkothon sipanganon partondion, ndang songon portibi on na so mangargai hasintongan!​—Jaha 1 Timoteus 4:15.

15. Aha do ujungna na diantusi Parsiajar Bibel? (Ida surat na di toru.)

¹⁵ Parsiajar Bibel manjujui halak na mangalului hasintongan asa ruar sian gareja. Taon 1879, majalah Watch Tower paboahon taringot tu ”gareja Babel”. Saleleng marratus taon, gareja protestan mandok gareja Babel, i ma gareja Katolik dohot paus. Alai diboto Parsiajar Bibel ma na nidokna ”Babel”, i ma sude gareja. Boasa songon i? Ala, sude gareja mangajarhon ajaran palsu songon naung taparsiajari di buku on. b Di pudian ni ari, dipaboa ma di angka bukunta, ingkon ruar do sude halak na marsitutu mananda hasintongan sian gareja Babel.

16, 17. (a) Songon dia do Jilid III buku Millennial Dawn dohot Watch Tower manjujui halak asa ruar sian agama palsu? (b) Aha do na mambahen sipasingot i ndang pintor dioloi? (Ida surat na di toru.)

¹⁶ Umpamana taon 1891, dipatorang do di Jilid III buku Millennial Dawn na so dijangkon Debata ulaon ni gareja Babel. Jala didok, ”Ndang lomo roha ni Debata tu sude ulaon ni gareja.” Dung i didok muse di buku i, ”Sude na  so manjalo ajaran palsu dohot hasomalan na so sintong ingkon ruar sian Babel.”

¹⁷ Bulan Januari taon 1900, dipaingot majalah Watch Tower do halak na tarsurat dope goarna di gareja na sai mangalului sidalian huhut mandok, ”Lomo do rohangku tu hasintongan, jala ndang jotjot ahu laho tu gareja.” Majalah i mandok, ”Sintong do molo sasahalak jongjong di hasintongan alai laho dope tu gareja? Songon i do lomo ni roha ni Debata . . . jala na pinangido ni rohaNa? Ndang songon i. Molo ibana [anggota gareja] mangihuthon sada gareja, nunga mambahen parjanjian ibana dohot gareja. Jala ingkon ihuthononna do sude aturan na adong di parjanjian i. Alai, ndang parsidohot be ibana tu parjanjian i molo dung . . . ruar ibana sian gareja jala diboto angka anggota ni gareja.” Lam leleng, lam tangkas do sipasingot on dipaboa. c Sude naposo ni Jahowa ingkon ruar jala ndang boi parsidohot tu agama palsu.

18. Boasa ingkon ruar naposo ni Debata sian Babel na Balga?

¹⁸ Molo ndang tongtong dijujui naposo ni Debata asa ruar sian Babel na balga, adong do naposo na miniahan na rade manjangkon Jesus gabe Raja? Ndang adong. Alana, saleleng marsaor nasida dohot Babel na balga ndang boi nasida manomba Jahowa ”di bagasan Tondi dohot hasintongan”. (Joh. 4:24) Marsitutu do hita asa unang parsidohot tu ulaon ni agama palsu? Anggiat ma sai taoloi parenta na mandok, ”Laho ma hamu, ale bangsongku, ruar sian i!”​—Jaha Pangungkapon 18:4.

19, 20. Songon dia do Watch Tower mangonjar roha ni naposo ni Debata asa rap marpungu?

¹⁹ Parsiajar Bibel paboahon tu dongan sahaporseaonna asa rap marpungu nasida manomba Debata. Ndang holan manadingkon agama palsu, alai halak Kristen na sintong ingkon parsidohot do manomba Debata di bagasan hasintongan. Sian mulai dipabinsar Watch Tower nunga dijujui sude na manjaha asa rap marpungu. Umpamana, bulan Juli 1880 dipaboa donganta si Russell do taringot tu pardalananna pasahathon jamita. Di tingki i, diida ibana do songon dia parpunguan boi patoguhon angka na ro. Dijujui ma angka na manjaha asa manongos kartu na paboahon laba na dapot ni nasida tingki rap marpungu, jala deba sian kartu i adong diparade di majalah i. Didok ibana, ”Anggiat ma taboto . . . na disarihon Tuan do asa togu partondionta tingki rap hita marpungu dohot dongan sahaporseaon.”

²⁰ Taon 1882, sada artikel judulna ”Rap Marpungu” adong di majalah Watch Tower. Artikel i mangonjar roha  ni halak Kristen asa ro marpungu jala ”masiantoan, masipajujuan tu haholongon jala masipaingotan”. Didok muse, ”Nang pe ndang adong di tongatongamu parsingkola na timbo manang na malo, boan hamu ma Bibel, harotas dohot pitolot. Jala pangke hamu ma Konkordansi laho mangurupi hamu marsiajar Bibel. Pillit ma na laho diulas, pangido ma pangurupion ni tondi, jaha, pingkirhon, jala parrohahon ma sada ayat tu ayat na asing. Pos ma rohamu urupan ni tondi parbadia do hamu laho mananda hasintongan.”

21. Aha do sitiruon na tadapot sian huria Allegheny, Pennsylvania, taringot tu parpunguan dohot mangurupi donganta ganup marsadasada?

²¹ Kantor pusat ni Parsiajar Bibel i adong di Allegheny, Pennsylvania, AS. Tadapot do sitiruon na denggan sian huria na adong dison, rap marpungu do nasida songon na diparentahon di Heber 10:24, 25. (Jaha.) Sahalak donganta, na margoar si Charles Capen, na ro tu parpunguan sian na gelleng manurat, ”Huingot do ayat na dilukis di tembok ni balai parpunguan ni Lembaga. ’Sada  do gurumuna; saluhutna hamu, marhahamaranggi.’ Tongtong do huingot ayat on. Di parpunguan ni naposo ni Debata, ndang dipaimbar ruas dohot na manguluhon.” (Mat. 23:8) Diingot donganta si Capen do muse haporseaon ni nasida dipatogu marhite angka parpunguan dohot ulaon ni si Russell na mangurupi donganta ganup marsadasada.

22. Songon dia do pangkilalaan ni halak Kristen na marsihohot mangihuthon tudutudu laho marpungu, aha do na boi tatiru sian nasida?

²² Diihuthon halak Kristen do sitiruon dohot tudutudu na dilehon tu nasida. Dipungka ma muse parpunguan di Ohio, di Michigan, di Amerika Utara dohot di angka negara na asing. Pingkirhon ma: Boi do rade naposo ni Debata tu haroro ni Kristus molo ndang diurupi asa rap marpungu nasida? Ndang boi! Songon dia do hita saonari? Ingkon marsitutu do hita ro tu ganup parpunguan jala masipajujuan tu ulaon na denggan.

23. Songon dia do majalah Watch Tower manjujui sude na miniahan asa mamaritahon hasintongan?

²³ Parsiajar Bibel paboahon asa sude halak na miniahan mamaritahon hasintongan. Taon 1885, majalah Watch Tower mandok, ”Sude halak Kristen na miniahan ndang boi lupa mamaritahon hasintongan (Jes. 61:1), ingot ma nunga dijou hita tu ulaon na badia on.” Majalah Watch Tower taon 1888 mandok, ”Nunga taantusi aha na ingkon taulahon . . . Molo marsidalian hita jala ndang taharingkothon i, dos ma hita songon naposo na losok na so tama manjalo pasupasu naung diparade tu hita.”

24, 25. (a) Aha do muse na diparade si Russell dohot donganna? (b) Songon dia do sahalak kolportir mangulahon parbaritaon tingki ndang godang dope motor?

 ²⁴ Si Russell dohot angka donganna ndang holan manjujui na asing laho marbarita, alai diparade nasida do risalah songon Bible Students’ Tracts, jala di pudian ni ari digoari Old Theology Quarterly. Dijalo na manjaha majalah Watch Tower do angka risalah on asa disarhon nasida tu godang halak jala ndang pola manggarar.

²⁵ Halak Kristen na mangalehon gok tingkina laho marbarita digoari kolportir. Si Charles Capen na dipaboa di parsiajaran on ma sahalak sian i. Ibana mandok, ”Hupangke do peta sian Lembaga Survei Geologis Amerika Serikat asa boi ahu laho tu sude inganan di Pennsylvania. Di peta on tarida do sude dalan, alani i boi ma ahu mardalan pat tu sude inganan. Sipata, dung marbarita tolu ari di angka huta na dao laho manungkun angka jolma olo manang ndang nasida manjalo angka buku sian seri Studies in the Scriptures, husewa ma kereta hoda laho manaruhon angka buku i. Jotjot do ahu marborngin di jabu ni angka partani. Di tingki i, ndang godang dope motor.”

26. (a) Boasa naposo ni Debata ingkon marsitutu marbarita? (b) Aha do na porlu tasungkun tu dirinta?

²⁶ Porlu halak Kristen marhiras ni roha jala marsitutu marbarita di tingki i. Alana, ulaon marbarita do sada sian tanda haroro ni Kristus. (Mat. 24:14) Boi do rade nasida tu pamarentaon ni Kristus molo ndang diajari nasida marbarita na uli? Ndang boi! Ingkon diurupi do naposo ni Debata asa patujolohon ulaon marbarita di ngolu ni nasida. Saonari tasungkun ma dirinta, ’Hupatujolohon do ulaon marbarita di ngolungku? Hulehon do gogo dohot tingkingku tu ulaon i?’

27, 28. Aha do na niida ni apostel Johannes, jala aha do dibahen Sibolis dohot surusuruanna dung jongjong Harajaon i?

²⁷ Ujungna, jumpang ma tingki na dipaimaima, i ma taon 1914. Songon na dipaboa di mula ni parsiajaran on, ndang adong jolma na mangida Harajaon ni Debata jongjong di surgo. Alai, parnidaan ni apostel Johannes manggombarhon angka na masa i. Pingkirhon ma: Diida si Johannes do ”partinandaan na balga” di surgo. Diida ibana ma sada ”boruboru” na manggombarhon organisasi ni Debata di surgo. Boruboru on, gabegabean jala manubuhon anak baoa. Anak on ma na laho ”marmahanhon sogot nasa bangso marhitehite tungkot bosi”. Alai dung tubu, ”tarhinsat [diboan] ma anakna i tu adopan ni Debata dohot tu habangsana”. Adong ma soara na gogo sian surgo na mandok, ”Nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristusna.”​—Pgk. 12:1, 5, 10.

 ²⁸ Marhite parnidaan i, diida si Johannes ma jongjong Pamarentaon ni Messias na sangap situtu, alai ndang sude na marlas ni roha. Diporangi Sibolis dohot na mangihuthon ibana do si Mikhael manang Kristus dohot surusuruanna. Songon dia do ujungna? Bibel mandok, ”Jadi dipabali ma naga na balga i, ulok na robi i, na margoar sibolis dohot setan, na paotootohon liat portibi on, dipabali ma ibana tu tano i, dipabali ma nang angka surusuruanna raphon ibana.”​—Pgk. 12:7, 9.

29, 30. Dung jongjong Pamarentaon ni Messias, aha do na masa (a) di tano on? (b) di surgo?

²⁹ Leleng andorang so taon 1914, nunga dipaboa Parsiajar Bibel laho masa hasusaan taon i. Jala masa do sude na nidok ni nasida. Songon na niida ni apostel Johannes, tarrimas ma Sibolis alani i, diparo ma hasusaan tu jolma. Disurat di Bibel, ”Marjea ma tano i dohot laut, ai nunga tuat sibolis i tu hamu, marrimas situtu; ai diboto, otik nama tingkina.” (Pgk. 12:12) Taon 1914, masa ma porang dunia parjolo jala tarida ma di liat portibi on tanda haroro ni Kristus na marhuaso gabe Raja. Jala dipungka ma ”angka tingki parpudi”.​—2 Tim. 3:1.

³⁰ Alai, marlas ni roha ma surgo, ala Sibolis nunga didabu tu tano on. Songon na disurat si Johannes, ”Dibahen i marlas ni roha ma hamu, angka banua ginjang dohot pangisina!” (Pgk. 12:12) Dung didabu Sibolis, jala Jesus gabe Raja di surgo, rade ma Pamarentaon ni Messias mangurupi naposo ni Debata di tano on. Aha do na diulahon? Nunga taparsiajari di mula ni pasal on, Kristus ”suruan parpadanan” jumolo pabadiahon naposo ni Debata di tano on. Aha do lapatanna?

31. Aha do na disurirangkon si Maleaki taringot tu ulaon pabadiahon, jala songon dia do i masa? (Ida surat na di toru.)

³¹ Songon na disurirangkon si Maleaki, diuji do naposo ni Debata tingki dipabadia nasida. Si Maleaki manurat, ”Alai tung ise ma manahan di ari harorona i? Jala tung ise ma manahan jongjong, molo dipataridahon ibana dirina? Ai songon api na panopa do ibana, jala songon sabun ni panunsi.” (Mal. 3:2) Tutu do masa hata on! Marragam do hasusaan na masa tu naposo ni Debata sian taon 1914. Godang do Parsiajar Bibel na marsitaonon jala dipenjara tingki masa Porang Dunia I. d

32. Aha do hasusaan na masa tu naposo ni Debata dung taon 1916?

³² Dung i, songgot do roha ni angka donganta ala mate si Russell taon 1916, tingki marumur 64 taon. Diuji ma muse organisasi ni Jahowa di tingki i. Nang pe ndang lomo roha ni si Russell umsangap ibana dibahen sian na asing. Alai adong do donganta mambahen songon i. Tarida ma i dung mate si Russell. Didok rohanasida holan si Russell do  na boi papatarhon hasintongan i. Dung i, adong muse na so olo mangihuthon hamajuon ni organisasi. On ma mulana na mambahen adong na manimbil jala gabe ndang marsada organisasi.

33. Songon dia do masa hasusaan tu naposo ni Debata ala ndang saut na hinirim ni nasida?

³³ Diuji do muse naposo ni Debata ala ndang saut na hinirim ni nasida. Di tingki i, nunga dipaboa di Watch Tower molo taon 1914, i ma ujung ni Zaman ni Sipelebegu, alai godang dope angka donganta ndang mangantusi aha na laho masa. (Luk. 21:24) Dihirim rohanasida do taon 1914 boanon ni Kristus nasida asa rap mamarenta di surgo. Dung i, di ujung ni taon 1917 dipaboa di majalah Watch Tower, taon 1918 ma ujung ni 40 taon tingki gotilon (panen). Alai, lam tu balgana do ulaon marbarita dung salpu taon 1918. Majalah i muse paboahon, nunga salpu tingki gotilon alai, ingkon papunguon ni nasida dope angka eme na tading. Nang pe songon i, godang do na gabe mandele jala manadingkon Jahowa.

34. Aha do hasusaan na balga na masa taon 1918, jala boasa didok roha ni pamimpin ni gareja nunga ”mate” naposo ni Debata?

³⁴ Hasusaan na umbalga masa taon 1918. Si J. F. Rutherford na manggantihon si C. T. Russell, ditangkup rap dohot pitu halak donganna na mangurupi ibana. Dung i, ditontuhon ma uhum tu nasida asa leleng dipenjarahon di penjara federal di Atlanta, Georgia, AS. Di tingki i, so ma ulaon marbarita. Nunga dipenjarahon na manguluhon organisasi jala kantor pusat di Brooklyn nunga ditutup. Dung i, diorai do muse ulaon marbarita di Amerika dohot Eropa. Godang ma pamimpin ni gareja na marlas ni roha ala dirimpu nasida Parsiajar Bibel nunga ”mate” jala ndang susaanna be nasida. (Pgk. 11:3, 7-10) Alai, ndang songon i na masa!

35. Boasa dipaloas Jesus masa hasusaan tu siihuthon ibana, aha do dibahen laho mangurupi nasida?

³⁵ Ndang diboto musu aha na masa. Diloas Jesus do di tingki i siihuthon ibana diuji, ala ro Jahowa songon ”sipangalala dohot sipapita perak”. (Mal. 3:3) Pos do roha ni Jahowa dohot Jesus ndang gabe mago halak na marsihohot alani api i, alai gabe badia do nasida jala lam denggan marhobas tu Raja i. Sian mulai taon 1919, diurupi tondi ni Debata do naposoNa na mambahen longang musu ni angka hasintongan. Naposo ni Jahowa dipargogoi muse! (Pgk. 11:11) Di tingki i, nunga dipillit Jesus ”naposo haposan jala na marroha”. Laos i ma sada na patuduhon naung digohi tanda ni tingki parpudi. Punguan on, i ma angka baoa na miniahan na mangaradoti jala paradehon sipanganon partondion tu naposo ni Debata di tingkina.​—Mat. 24:45-47.

36. Aha do na patuduhon molo naposo ni Debata dipargogoi muse di partondion?

 ³⁶ Tanggal 26 Maret 1919, nunga ruar sian penjara si Rutherford dohot angka donganna. Diatur nasida ma asa dibahen kebaktian bulan September. Diatur nasida ma muse, asa dipabinsar majalah na asing na margoar The Golden Age. Majalah on dipabinsar rap dohot The Watch Tower na dipangke tu ulaon marbarita. e Jala taon i muse, dibahen ma Bulletin na parjolo, jala saonari goarna Hangoluan dohot Pangkobasion ni Halak Kristen. Sian mulana, Bulletin on mangurupi ulaon marbarita. Sian taon 1919, dijujui do nasida asa marsitutu marbarita sian jabu tu jabu.

37. Dung taon 1919, songon dia do halak Kristen di tingki i ndang marsihohot tu Jahowa?

³⁷ Ingkon dipatuduhon sasahalak do serep ni roha tingki marbarita. Ulaon marbarita mambahen siihuthon Kristus lam badia. Alai, halak Kristen na so marserep ni roha, ndang olo nasida marbarita jala ditadingkon nasida do halak Kristen na marsihohot. Ala hansit roha ni halak Kristen na manadingkon organisasi, didok ma na so tutu taringot tu siihuthon Kristus jala mamihak ma nasida tu na  marsogo ni roha tu naposo ni Jahowa. On masa dung taon 1919.

38. Aha do na pinatudu ni haluaon dohot hamonangan ni siihuthon Jesus?

³⁸ Nang pe godang na mangambati ulaon marbarita, alai lam tamba do torop ni siihuthon Kristus jala lam togu haporseaon ni nasida. Haluaon dohot hamonangan ni nasida paposhon rohanta molo Harajaon ni Debata nunga mamarenta! Pasupasu dohot pangurupion ni Jahowa marhite AnakNa dohot Pamarentaon ni Messias do na mambahen monang punguan on sian Sibolis dohot sian portibina!​—Jaha Jesaya 54:17.

39, 40. (a) Aha do na laho taparsiajari sian buku on? (b) Songon dia do asa marlaba buku on di hita?

³⁹ Di angka pasal na mangihut, taparsiajari ma na diulahon ni Harajaon ni Debata di tano on, dung 100 taon mamarenta sian surgo. Sude pasal na adong di buku on, mangulas taringot tu aha naung diulahon Harajaon ni Debata di tano on. Adong do muse kotak di ganup pasal na mangurupi hita mangida sadia pos do rohanta tu Harajaon ni Debata. Di angka pasal na parpudi, taparsiajari ma aha na laho masa tingki ro Harajaon ni Debata mangaripashon angka parjahat, jala mambahen paradeiso di tano on. Songon dia do hita boi mandapot laba sian buku on?

⁴⁰ Lomo roha ni Sibolis asa gale haporseaonta tu Harajaon ni Debata. Alai, las do roha ni Jahowa mangurupi jala mangondingi hita asa tongtong togu haporseaonta. (Eps. 6:16) Alani i, tapangido ma pangurupion ni Jahowa tingki marsiajar mamangke buku on. Tasungkun ma dirinta, ’Pos do rohangku na tutu Harajaon ni Debata?’ Molo pos do rohanta saonari na tutu Harajaon ni Debata, lam taronjar ma rohanta asa tongtong mamaritahon Harajaon i sahat tu na ro tingkina diida sude na mangolu di tano on Harajaon i mamarenta!