1, 2. Ano ang pinakadaku nga hitabo sa kasaysayan sang kalibutan, kag ngaa indi kita matingala nga wala ini nasaksihan sang mga tawo?

 NAHUNAHUNA mo bala kon daw ano ayhan kon nagkabuhi ka sa isa ka importante nga hitabo sa kasaysayan? Madamo ang nakaeksperiensia sini. Pero binagbinaga: Kon nagkabuhi ka sadto nga tion, nasaksihan mo gid ayhan ang mga hitabo nga nagpabag-o sang kasaysayan? Basi wala man. Kay sa masami, ang mga hitabo nga nagpukan sa mga rehimen kag narekord sa mga libro sang kasaysayan wala masaksihan sang publiko. Nagakatabo ini sa sulod sang mga palasyo, korte, kag mga opisina sang gobierno. Apang, ini nga mga pagbag-o nagaapektar sa kabuhi sang minilyon.

² Kamusta naman ang pinakadaku nga hitabo sa kasaysayan sang kalibutan? Ginbag-o sini ang kabuhi sang minilyon. Pero natabo ini lipod sa ihibalo sang mga tawo. Amo ini ang pagkabun-ag sang Ginharian sang Dios sa langit, ang madugay na nga ginsaad nga Mesianikong gobierno nga madali na lang magalaglag sa bug-os nga sistema sang kalibutan. (Basaha ang Daniel 2:34, 35, 44, 45.) Masiling bala naton nga gintago ni Jehova ini nga hitabo sa katawhan bangod wala ini nasaksihan sang mga tawo? Ukon, ginhanda bala niya ang iya mainunungon nga katawhan antes sini? Tan-awon naton.

3-5. (a) Sin-o “ang mensahero sang katipan” nga ginsambit sa Malaquias 3:1? (b) Ano ang matabo antes magkari “ang mensahero sang katipan” sa templo?

³ Halin pa sang una, ginahanda na ni Jehova ang iya katawhan sa pagkabun-ag sang Mesianikong Ginharian. Halimbawa, binagbinaga ang tagna sa Malaquias 3:1: “Ipadala ko ang akon mensahero kag ihanda niya ang dalan para sa akon. Hinali nga magaabot sa Iya templo ang matuod nga Ginuo nga ginapangita ninyo; kag ang mensahero sang katipan nga nahamut-an ninyo, pat-od gid nga magaabot.”

⁴ Sa moderno nga katumanan, san-o nagkari “ang matuod nga Ginuo” nga si Jehova, sa pag-usisa sa mga nagaalagad sa dutan-on nga luwang sang iya espirituwal nga templo? Ginpaathag sang tagna nga si Jehova magakari upod sa “mensahero sang katipan.” Sin-o ini? Wala sing iban kundi ang Mesianikong Hari  nga si Jesucristo! (Luc. 1:68-73) Subong bag-o nga ginpapungko nga Manuggahom, usisaon kag puruhon niya ang katawhan sang Dios sa duta.—1 Ped. 4:17.

⁵ Apang sin-o ang isa pa ka “mensahero,” nga una nga ginsambit sa Malaquias 3:1? Ginapakita sang tagna nga ining “mensahero” magaabot antes sang presensia sang Mesianikong Hari. May ara bala ‘naghanda sang dalan’ sa mga tinuig antes sang pag-abot sang Mesianikong Hari sang 1914?

6. Sin-o ang nagpanghikot subong ang gintagna nga “mensahero” nga una nga nag-abot para ihanda ang katawhan sang Dios sa matabo sa palaabuton?

⁶ Sa sini nga libro, makita naton ang sabat sa sina nga mga pamangkot sa makakulunyag nga kasaysayan sang katawhan ni Jehova sa moderno nga tion. Makita naton nga sa ulihi nga bahin sang ika-19 nga siglo, may nagluntad nga isa ka gamay nga grupo sang mga matutom nga amo lang ang matuod nga mga Cristiano sa tunga sang mga butig. Ini nga grupo nakilal-an subong mga Estudyante sang Biblia. Ang nagapanguna sa ila, nga si Charles T. Russell kag ang iya kaupdanan, amo gid ang nagpanghikot subong ang gintagna nga “mensahero,” nga nagahatag sing espirituwal nga mga instruksion sa katawhan sang Dios kag naghanda sa ila sa matabo sa palaabuton. Binagbinagon naton ang apat ka paagi nga nahimo ini sang “mensahero.”

7, 8. (a) Sang katuigan 1800, sin-o ang nagbuyagyag nga sala ang doktrina nga imortal ang kalag? (b) Ano pa nga mga panudlo ang ginbuyagyag nga sala ni C. T. Russell kag sang iya kaupdanan?

⁷ Ining mga Estudyante sang Biblia mapinangamuyuon nga nagtuon, nagbinagbinag, nagtipon, kag nagbalhag sang maathag nga mga doktrina sang kamatuoran. Sa sulod sang ginatos ka tuig, ang Cristiandad ginlikupan sang espirituwal nga kadulom; madamo sa ila mga panudlo ang naghalin sa paganismo. Ang panguna nga halimbawa sini amo ang doktrina nga ang kalag imortal. Pero sang katuigan 1800, gin-usisa sing maayo sang pila ka sinsero nga estudyante sang Biblia ina nga panudlo kag nakita nila nga wala ini ginasuportahan sang Pulong sang Dios. Sanday Henry Grew, George Stetson, kag George Storrs nagsulat kag maisog nga nagbuyagyag sining yawan-on nga kabutigan. a Ang ila mga sinulatan may daku nga epekto kay C. T. Russell kag sa iya kaupdanan.

⁸ Nakita sang gamay nga grupo sang mga Estudyante sang Biblia nga makalilibog man kag sala ang iban nga doktrina nga may labot sa panudlo nga imortal ang kalag. Ang halimbawa sini amo ang panudlo nga ang tanan nga maayo nga tawo mapalangit ukon ginasilutan sang Dios sa impierno ang imortal nga kalag sang mga malaut. Ginbuyagyag ni Russell kag sang iya kaupdanan ining mga kabutigan sa madamo nga artikulo, libro, pulyeto, tract, kag nabalhag nga mga sermon.

9. Paano ginbuyagyag sang Zion’s Watch Tower nga sala ang doktrina sang Trinidad?

⁹ Ginbuyagyag man sang mga Estudyante sang Biblia nga sala ang doktrina sang Trinidad. Sang 1887, ang Zion’s Watch Tower nagsiling: “Maathag nga ginapakita sang Kasulatan ang kinatuhayan kag kaangtanan ni Jehova kag sang aton Ginuo nga si Jesus.”  Ginsambit man sa artikulo nga makatilingala gid nga “ang ideya nga trinidad ang Dios—tatlo ka Dios sa isa, kag sa amo man nga tion, isa ka Dios sa tatlo—nangin lapnag kag ginbaton sang mga tawo. Pero ang matuod, ginapakita lamang sini nga mahamuok gid ang tulog sang simbahan samtang ginagapos sia sang kaaway sang kadena sang kabutigan.”

10. Paano ginpaathag sang Watch Tower nga ang 1914 isa ka pinasahi nga tuig?

¹⁰ Subong sang ginapakita sang ngalan sini, ang magasin nga Zion’s Watch Tower and Herald of Christ’s Presence interesado gid sa mga tagna parte sa presensia sang Cristo. Nahangpan sang matutom nga mga hinaplas nga nagsulat sini nga magasin ang tagna ni Daniel parte sa “pito ka tion.” Naintiendihan nila nga may kaangtanan ini sa tayming sang katumanan sang katuyuan sang Dios parte sa Mesianikong Ginharian. Sang dekada 1870 nakita na nila nga sa 1914 matapos ining pito ka tion. (Dan. 4:25; Luc. 21:24) Bisan wala pa sadto nahangpan sing bug-os sang aton mga kauturan ang kahulugan sinang pinasahi nga tuig, ginpahibalo nila sing lapnag ang ila nahibaluan, kag nakita naton asta sa karon ang epekto sang ila panikasog.

11, 12. (a) Sin-o ang ginpadunggan ni Brother Russell sang iya mga gintudlo? (b) Daw ano ka importante ang mga ginhimo ni Russell kag sang iya kaupdanan sang mga tinuig antes sang 1914?

 ¹¹ Wala gin-angkon ni Russell ukon sang iya matutom nga kaupdanan nga sila gid ang nakatukib sining espirituwal nga mga kamatuoran nga ila natun-an. Nagsiling sia nga natun-an niya ini sa mga nauna sa iya. Labaw sa tanan, ginpadunggan niya si Jehova nga Dios, ang isa nga nagatudlo sa Iya katawhan sang ila kinahanglan mahibaluan sa nagakaigo nga tion. Maathag nga ginpakamaayo gid ni Jehova ang mga panikasog ni Russell kag sang iya kaupdanan nga salaon ang kamatuoran gikan sa kabutigan. Pagligad sang mga tinuig, labi nga nangin hayag ang kinatuhayan nila sa Cristiandad.

¹² Ang ginhimo sining matutom nga mga lalaki sa pagsakdag sang kamatuoran sa mga tinuig antes sang 1914 dalayawon gid! Ang The Watch Tower and Herald of Christ’s Presence sang Nobiembre 1, 1917, nagsiling anay: “Minilyon subong ang nahilway na sa kahadlok sa panudlo nga may kalayuhon nga impierno, kag sa iban pa nga sala nga doktrina . . . Ang paglapnag sang Kamatuoran sang nagligad nga kuarenta ka tuig kaangay sang balod nga padayon nga nagataas asta malikop sini ang bilog nga duta; kag ang pagtinguha sang kaaway nga punggan ini daw kaangay lamang sa pagtinguha nga silhigon ang isa ka mataas nga balod pabalik sa daku nga dagat.”

13, 14. (a) Paano ginhanda sang “mensahero” ang dalan para sa Mesianikong Hari? (b) Ano ang matun-an naton sa aton kauturan sang nagligad nga sobra sa isa ka gatos ka tuig?

¹³ Binagbinaga ini: Nangin handa ayhan ang mga tawo sa pagsugod sang presensia sang Cristo kon indi maathag sa ila ang kinatuhayan ni Jesus sa iya Amay nga si Jehova? Indi gid! Sigurado nga wala gid sila nakahanda kon nagapati sila nga ang tanan nga tawo may imortal nga kabuhi kag indi ini isa ka hamili nga regalo nga para lamang sa pila ka sumulunod sang Cristo; ukon kon nagapati sila nga ginasilutan sang Dios ang mga tawo sa kalayuhon nga impierno asta san-o kag wala na sing paglaum! Wala sing duhaduha nga ginhanda gid sang “mensahero” ang dalan para sa Mesianikong Hari!

¹⁴ Kamusta naman kita karon? Ano ang matun-an naton sa aton mga kauturan sang nagligad nga sobra sa isa ka gatos ka tuig? Kinahanglan mangin maukod man kita nga bumalasa kag estudyante sang Pulong sang Dios. (Juan 17:3) Samtang ining materyalistiko nga kalibutan ginagutom sa espirituwal, kabay nga labi naton nga pauswagon ang aton gana para sa espirituwal nga pagkaon!—Basaha ang 1 Timoteo 4:15.

15. Ano ang amat-amat nga nahangpan sang mga Estudyante sang Biblia? (Tan-awa man ang footnote.)

¹⁵ Gintudlo sang mga Estudyante sang Biblia nga kinahanglan magbiya sa kalibutanon nga mga simbahan. Sang 1879, ginsambit sang Watch Tower ang parte sa “Babilonianhon nga simbahan.” Ginpatuhuyan bala sini ang mga Papa? Ang Iglesia Katolika Romana? Ginatos ka tuig nga amo sina ang pagpati sang Protestante nga mga sekta sa gintagna nga Babilonia sa Kasulatan. Pero, amat-amat nga nahangpan sang mga Estudyante  sang Biblia nga nalakip sa moderno nga “Babilonia” ang tanan nga simbahan sang Cristiandad. Ngaa? Bangod tanan sila nagatudlo sang butig nga mga doktrina subong sang nasambit na. b Sang ulihi, labi nga nangin prangka ang aton mga publikasyon kon ano ang dapat himuon sang bunayag sing tagipusuon nga miembro sang Babilonianhon nga mga simbahan.

16, 17. (a) Paano ginpalig-on sang Volume III sang Millennial Dawn kag sang Watch Tower ang mga tawo nga magbiya sa butig nga relihion? (b) Ano ang nagpahuyang sa sini nga paandam? (Tan-awa ang footnote.)

¹⁶ Halimbawa, sang 1891, ginbinagbinag sa Volume III sang Millennial Dawn ang pagsikway sang Dios sa moderno nga Babilonia nga nagasiling: “Ang tanan nga simbahan sang Cristiandad ginsikway.” Nagdugang pa gid ini nga “ang tanan nga wala nagaugyon sa iya butig nga doktrina kag mga buhat ginasilingan subong nga magbulag na sa iya.”

¹⁷ Sang Enero 1900, ang mga may ngalan gihapon sa listahan sang mga simbahan sang Cristiandad kag nagarason nga, “Nagapati ako sa kamatuoran, kag talagsa na lang ako nagasimba,” ginlaygayan sang Watch Tower. Ang artikulo namangkot: “Husto bala nga ang isa mo ka bahin ara sa gua pero ang pihak ara sa Babilonia? Amo bala ini nga pagkamatinumanon ang ginapatuman . . . kag ginakahamut-an kag ginabaton sang Dios? Indi gid! Sia [ang miembro sang simbahan] hayag nga nakigkatipan sa sina nga sekta sang nag-entra sia sa sini, kag dapat niya sundon ang tanan nga kondisyon sini nga katipan asta nga . . . hayag niya nga biyaan ukon kanselahon ang iya pagkamiembro.” Pagligad sang mga tinuig, ini nga mensahe labi nga nangin mabaskog. c Dapat bugrason sang mga alagad ni Jehova ang tanan nila nga kaangtanan sa butig nga relihion.

18. Ngaa kinahanglan nga maggua ang katawhan sa Babilonia nga Daku?

¹⁸ Kon indi sigesige ang paandam nga maggua sa Babilonia nga Daku, may ara ayhan sing nakahanda nga hubon sang mga hinaplas sa duta ang Cristo, ang bag-o ginpapungko nga Hari? Sigurado nga wala gid, kay ang mga Cristiano lamang nga nahilway sa Babilonia ang makasimba kay Jehova “sa espiritu kag kamatuoran.” (Juan 4:24) Determinado man bala kita nga magpabilin nga nahamulag sa butig nga relihion? Kabay nga padayon naton nga tumanon ang sugo: “Gua kamo sa iya, katawhan ko”!—Basaha ang Bugna 18:4.

19, 20. Paano ginpalig-on sang Watch Tower ang katawhan sang Dios nga magtipon para magsimba?

¹⁹ Gintudlo sang mga Estudyante sang Biblia nga ang mga masigkatumuluo dapat magtipon para magsimba, tubtob posible. Para sa matuod nga mga Cristiano, indi bastante ang basta lang paggua sa butig nga relihion. Kinahanglan ang pagpakigbahin sa putli nga pagsimba. Sa una pa lang sini nga mga gua, ginpalig-on na sang Watch Tower ang mga bumalasa sini nga magtipon para magsimba. Halimbawa sang Hulyo 1880, sang nagreport si Brother Russell parte sa iya paglakbay para magpamulongpulong, nagkomento sia nga napalig-on gid sia sa madamo nga miting. Dayon ginpalig-on niya ang mga bumalasa nga  magpadala sing kard parte sa ila pag-uswag kag ang pila sini ginbalhag sa magasin. Ano ang katuyuan sini? “Pahibalua kami tanan . . . kon paano kamo ginapakamaayo sang Ginuo; kon bala padayon ninyo nga ginahiwat ang miting upod sa inyo mga masigkatumuluo.”

²⁰ Sang 1882, isa ka artikulo nga “Pagtililipon” ang naggua sa Watch Tower. Ginpalig-on sini ang mga Cristiano nga maghiwat sing mga miting “para magtuon, magpalig-unanay, kag magpabakuray.” Nagsiling ini: “Indi kinahanglan nga may isa gid nga may tinun-an sa inyo. Basta magdala lang kamo sang inyo Biblia, papel, kag lapis, kag gamita ninyo ang Concordance, . . . tubtob posible. Magpili kamo sing topiko; mangayo sing panuytoy sang Espiritu para mahangpan ini; dayon basaha, pamensara, ikumparar ang kasulatan sa kasulatan kag makasalig kamo nga magiyahan kamo sini sa kamatuoran.”

21. Ano nga halimbawa ang ginpakita sang kongregasyon sa Allegheny, Pennsylvania, parte sa miting kag pag-shepherding?

²¹ Ang mga Estudyante sang Biblia may ulong talatapan sa Allegheny, Pennsylvania, U.S.A. Nagpakita sila sing maayo nga halimbawa sa pagtipon didto bilang pagtuman sang ginasiling  sa Hebreo 10:24, 25. (Basaha.) Nadumduman sang tigulang nga si Charles Capen sang nagtambong sia sa sining mga miting sang gamay pa sia. Nagsulat sia: “Madumduman ko pa gihapon ang teksto nga nasulat sa pader sang assembly hall sang Sosiedad. ‘Isa lang ang inyo Agalon, ang Cristo, kag kamo tanan mag-ulutod.’ Indi ko gid malipatan ina nga teksto—maathag nga wala sing ginakabig nga mas mataas sa katawhan ni Jehova.” (Mat. 23:8) Nadumduman man ni Brother Capen ang makapahulag nga mga miting, ang pagpalig-on, kag ang kapisan ni Brother Russell sa pag-shepherding sa kada miembro sang kongregasyon.

22. Ano ang reaksion sang mga matutom sa pagpalig-on nga magtambong sa Cristianong mga miting, kag ano ang matun-an naton sa ila?

²² Ginsunod sang mga matutom ini nga halimbawa kag ang mga instruksion. May mga kongregasyon nga ginporma sa iban pa nga estado, subong sang Ohio kag Michigan, kag dayon sa bilog nga North America kag sa iban pa nga lugar. Binagbinaga: Nakahanda ayhan ang mga matutom sa presensia sang Cristo kon wala sila ginhanas nga magsunod sa laygay sang Biblia nga magtipon para magsimba? Sigurado nga wala gid! Ti, kamusta naman kita? Dapat determinado man kita nga mangin regular sa pagtambong sa mga miting, kag manikasog gid nga palig-unon ang isa kag isa.

23. Paano ginpaathag sang Watch Tower nga ang tanan nga hinaplas dapat mga manugbantala sang kamatuoran?

²³ Ang mga Estudyante sang Biblia gintudluan nga ang tanan nga hinaplas dapat mga manugbantala sang kamatuoran. Sang 1885, ang Watch Tower nagkomento: “Indi naton dapat  pagkalimtan nga ang tanan nga hinaplas ginhaplasan para magbantala (Isa. 61:1), kag gintawag sa ministeryo.” Ang 1888 nga gua nagsiling: “Maathag ang sugo sa aton . . . Kon indi naton ini pagtumanon kag mamalibad kita, makabig kita nga tamaran nga mga alagad, kag indi takus sa pagtawag sa aton sa mataas nga posisyon.”

24, 25. (a) Ano ang ginhimo ni Russell kag sang iya kaupdanan luwas sa pagpalig-on sa mga tawo nga magbantala? (b) Ano ang ginsugid sang isa ka colporteur parte sa iya ginahimo sang indi pa uso ang salakyan?

²⁴ Si Brother Russell kag ang iya kaupdanan wala lamang nagpalig-on sa mga tawo nga magbantala. Nagbalhag man sila sing tract nga gintawag Bible Students’ Tracts, nga sang ulihi gintawag man nga Old Theology Quarterly. Ang mga bumalasa sang Watch Tower ginpadal-an sining mga tract para ipanagtag sing libre sa publiko.

²⁵ Ang mga nakigbahin sing bug-os tion sa ministeryo gintawag nga mga colporteur. Isa sa ila si Charles Capen, nga ginsambit kaina. Nagsiling sia: “Gingamit ko sadto ang mapa nga ginhimo sang United States Government Geological Survey para may giya ako sa pagkobre sang teritoryo sa Pennsylvania. Makita sa mapa ang tanan nga dalan amo nga puede makadtuan ang tanan nga bahin sang probinsia bisan lakton lang. Kon kaisa, pagkatapos sang tatlo ka adlaw nga paglakbay sa mga kaumhan kag pagpanguha sing order para sa mga libro nga Studies in the Scriptures, nagaarkila ako sing kabayo kag kalesa sa pagdeliber. Pirme ako nagatulog upod sa mga mangunguma. Amo sini ang amon ginahimo sang indi pa uso ang salakyan.”

26. (a) Ngaa kinahanglan sang katawhan sang Dios nga makigbahin sa pagbantala agod mangin handa sa paggahom sang Cristo? (b) Ano ang maayo nga ipamangkot naton sa aton kaugalingon?

²⁶ Ang pagbantala sadto nagakinahanglan gid sing kaisog kag kakugi. Mangin handa ayhan ang matuod nga mga Cristiano sa paggahom sang Cristo kon wala sila gintudluan nga importante gid ang pagbantala? Sigurado nga indi gid! Kay man, ang pagbantala mangin isa ka daku nga pamatuod sang presensia sang Cristo. (Mat. 24:14) Dapat mangin handa gid ang katawhan sang Dios nga unahon ining nagaluwas-kabuhi nga hilikuton. Maayo nga pamangkuton naton ang aton kaugalingon: ‘Ang pagbantala bala panguna nga bahin sang akon kabuhi? Nagahimo bala ako sing mga sakripisyo para makapakigbahin sing bug-os sa sini?’

27, 28. Ano ang nasaksihan ni apostol Juan sa palanan-awon, kag ano ang reaksion ni Satanas kag sang iya mga demonyo sa pagkabun-ag sang Ginharian?

²⁷ Sa katapusan, nag-abot gid man ang 1914! Subong sang ginbinagbinag sa umpisa sining kapitulo, wala sing tawo nga nakasaksi sa mahimayaon nga mga hitabo sa langit. Apang, may ginhatag kay apostol Juan nga palanan-awon. Handurawa ini: Nasaksihan ni Juan ang “isa ka daku nga tanda” sa langit. Ang “babayi”—organisasyon sang Dios sang espiritu nga mga tinuga sa langit—nagbusong kag nagbun-ag sing bata nga lalaki. Ginasugiran kita nga ining simbuliko nga bata “magabantay sa tanan nga pungsod paagi sa bilugon nga salsalon.” Pero sang ginbun-ag ini, ang bata “ginsabnit pakadto sa Dios kag sa iya trono.”  Ang isa ka mabaskog nga tingog sa langit nagsiling: “Karon nag-abot na ang kaluwasan kag ang gahom kag ang Ginharian sang aton Dios kag ang awtoridad sang iya Cristo.”—Bug. 12:1, 5, 10.

²⁸ Wala sing duhaduha nga ang nakita ni Juan sa palanan-awon amo ang pagkabun-ag sang Mesianikong Ginharian. Sigurado nga mahimayaon ini pero wala nalipay ang tanan. Si Satanas kag ang iya mga demonyo nakig-away batok sa matutom nga mga anghel nga ginapangunahan ni Miguel, ukon Cristo. Ano ang resulta? Mabasa naton: “Gintagbong ang daku nga dragon, ang orihinal nga man-ug, ang isa nga ginatawag Yawa kag Satanas, nga nagapatalang sa bug-os napuy-an nga duta; gintagbong sia sa duta upod ang iya mga anghel.”—Bug. 12:7, 9.

29, 30. Sang nabun-ag ang Mesianikong Ginharian, ano ang nagbag-o (a) sa duta? (b) sa langit?

²⁹ Madugay na antes pa sang 1914, ginasiling na sang mga Estudyante sang Biblia nga isa ini ka pinasahi nga tuig sang kagamo pero bisan sila wala nagpaabot nga sibu gid ini nga prediksion. Subong sang makita sa palanan-awon ni Juan, daku ang mangin epekto ni Satanas sa katawhan: “Makaluluoy ang duta kag ang dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.” (Bug. 12:12) Sang 1914, nag-abot ang una nga bug-os kalibutan nga inaway kag amat-amat na nga nakita sa bilog nga kalibutan ang tanda sang presensia sang paggahom sang Cristo. Nagsugod na ang “katapusan nga mga adlaw” sining sistema sang mga butang.—2 Tim. 3:1.

³⁰ Pero masadya sa langit. Wala na didto si Satanas kag ang iya mga demonyo. Ang rekord ni Juan nagasiling: “Bangod sini magkalipay kamo nga mga langit kag kamo nga nagaistar sa sini!” (Bug. 12:12) Bangod natinluan na ang langit kag nangin Hari na si Jesus, makapanghikot na karon ang Mesianikong Ginharian para sa katawhan sang Dios sa duta. Ano ang pagahimuon sini? Suno sa nakita naton sa umpisa sining kapitulo, ang Cristo subong “mensahero sang katipan,” magapanghikot anay subong manugpuro sang katawhan sang Dios sa duta. Ano ang buot silingon sini?

31. Ano ang gintagna ni Malaquias parte sa tion sang pagpapuro, kag paano ini natuman? (Tan-awa man ang footnote.)

³¹ Gintagna ni Malaquias nga ang pagpapuro indi mahapos. Nagsulat sia: “Apang sin-o ang makabatas sa adlaw sang iya pag-abot kag sin-o ang makatindog kon magpakita na sia? Kay pareho sia sang kalayo sang manugpuro sang metal kag sang habon sang mga manuglaba.” (Mal. 3:2) Nangin matuod gid ina nga tagna! Sugod sang 1914, grabe nga mga pagtilaw kag kabudlayan ang sagunson nga naagihan sang katawhan sang Dios. Samtang nagadabdab ang Bug-os Kalibutan nga Inaway I, madamo nga Estudyante sang Biblia ang mapintas nga ginhingabot kag ginpriso. d

32. Ano nga kagamo sa sulod sang organisasyon ang natabo sang 1916?

 ³² Bisan sa sulod sang organisasyon may kagamo man. Sang 1916, si Brother Russell napatay sa edad nga 64. Nakibot gid ang katawhan sang Dios. Sang napatay sia nakita nga sobra gid ang pagpadaku sang iban sa iya. Bisan pa indi ini gusto ni Brother Russell, daw ginasimba na nila sia. Abi sang iban ang pagpahayag sang kamatuoran nag-untat na sang napatay sia, kag ginapamatukan nila ang mga gusto magpadayon. Nangin isa ini ka kabangdanan sang apostasya nga nagbahinbahin sa organisasyon.

33. Ano nga mga pagpaabot nga wala natuman ang nagtilaw sa katawhan sang Dios?

³³ Nangin pagtilaw man ang mga pagpaabot nga wala natuman. Bisan pa husto ang Watch Tower sang nagsiling ini nga ang 1914 amo ang katapusan sang Panag-on sang mga Gentil, wala pa nahangpan sang mga kauturan kon ano ang matabo sa sina nga tuig. (Luc. 21:24) Abi nila, ang hinaplas nga nobya nga grupo dalhon na sang Cristo sa langit sang 1914 para maggahom kaupod niya didto. Pero wala ini natuman. Sa ulihi nga bahin sang 1917, ginpahibalo sang Watch Tower nga ang 40 ka tuig nga pag-ani matapos sa tigpamulak sang 1918. Pero ang pagbantala wala pa matapos. Padayon gihapon ini nga nagauswag pagligad sina nga petsa. Suno sa Watch Tower, natapos na gid man ang pag-ani pero padayon gihapon ang pagpanaghaw. Apang bangod sini, madamo ang nag-untat sa pag-alagad kay Jehova.

34. Ano nga makapaluya nga pagtilaw ang natabo sang 1918, kag ngaa naghunahuna ang Cristiandad nga “patay na” ang katawhan sang Dios?

³⁴ Isa ka makapaluya nga pagtilaw ang natabo sang 1918. Si J. F. Rutherford, nga nagbulos kay C. T. Russell sa pagpanguna sa katawhan sang Dios, gindakop upod sa pito pa ka responsable nga utod. Indi makatarunganon sila nga ginsentensiahan sing madamo nga tuig nga pagkabilanggo sa Atlanta, Georgia, U.S.A. Sa sina nga tion, daw nag-untat na ang hilikuton sang katawhan sang Dios. Madamo nga lider sang Cristiandad ang nagkalipay. Naghunahuna sila nga bangod ang “mga lider” ara sa prisuhan, sirado ang ulong talatapan sa Brooklyn, kag ang pagbantala ginahingabot sa America kag Europe, ining makaulugot nga mga Estudyante sang Biblia “patay na”—wala na sing mahimo. (Bug. 11:3, 7-10) Nagsala gid sila!

35. Ngaa ginpahanugutan ni Jesus ang mga kabudlayan sa iya mga sumulunod, kag ano ang ginhimo niya para buligan sila?

³⁵ Wala gid narealisar sang mga kaaway sang kamatuoran nga ginpahanugutan lang ni Jesus ining mga kabudlayan sa iya katawhan bangod si Jehova nagapungko “subong manugpuro kag manugtinlo sang pilak.” (Mal. 3:3) Sigurado si Jehova kag ang iya Anak nga ang mga matutom maluwas sa kalayuhon nga mga pagtilaw nga mas puro, mas putli, kag mas takus sa pag-alagad sa Hari. Halin pa sang 1919, maathag nga nahimo sang espiritu sang Dios ang isa ka butang nga abi sang mga kaaway imposible. Ang mga matutom napasag-uli! (Bug. 11:11) Sa sina nga tion, maathag nga natuman sang Cristo ang importante nga tanda sang katapusan nga mga adlaw. Gintangdo niya “ang matutom  kag mainandamon nga ulipon,” isa ka gamay nga grupo sang hinaplas nga mga lalaki, nga magapanguna sa iya katawhan paagi sa pag-aman sing espirituwal nga pagkaon sa nagakaigo nga tion.—Mat. 24:45-47.

36. Ano ang nagapakita nga ang katawhan sang Dios napasag-uli na sa espirituwal?

³⁶ Si Brother Rutherford kag ang iya kaupdanan ginpagua sa prisuhan sang Marso 26, 1919. May gin-iskedyul dayon nga kombension sang Septiembre. May mga plano nga sugdan ang ikaduha nga magasin nga pagatawgon The Golden Age. Mangin kaupod ini sang The Watch Tower, kag gindesinyo para gamiton sa pagbantala. e Sa sina man nga tuig naggua ang una nga isyu sang Bulletin, nga amo na subong ang workbook para sa Ang Aton Cristianong Pagkabuhi kag Pagministeryo nga miting. Halin pa sang umpisa, daku na ini nga pagpalig-on sa pagbantala. Wala sing duhaduha nga sugod pa sang 1919, ang personal nga pamalaybalay amo na ang nangin prioridad.

37. Paano nangin indi matutom ang iban sa mga tinuig pagligad sang 1919?

³⁷ Ang pagbantala padayon nga nagpapuro sa mga alagad sang Cristo, kay ang mga bugalon kag arogante indi makaagwanta sa sini nga hilikuton. Ang mga indi gusto magbantala nagabiya. Sa mga tinuig pagligad sang 1919, ang pila nga indi matutom  naakig, nagpasipala kag nag-akusar, kag nagdampig pa gani sa mga nagahingabot sa matutom nga mga alagad ni Jehova.

38. Ano ang ginapamatud-an sa aton sang mga kadalag-an sang mga sumulunod sang Cristo sa duta?

³⁸ Apang walay sapayan sini nga mga pag-atake, ang mga sumulunod sang Cristo padayon gihapon nga nag-uswag sa espirituwal. Ang tanan nila nga kadalag-an sugod sadto, daku nga pamatuod sa aton nga ang Ginharian sang Dios nagagahom! Aktibo gid sila nga ginsakdag kag ginpakamaayo sang Dios, paagi sa iya Anak kag sa Mesianikong Ginharian. Kon wala ini, indi gid makadaug kay Satanas kag sa sining malaut nga sistema sang mga butang ining grupo sang indi himpit nga mga tawo!—Basaha ang Isaias 54:17.

39, 40. (a) Ano ang pila ka importante nga bahin sini nga libro? (b) Ano ang mabenepisyo mo sa pagtuon sa sini nga libro?

³⁹ Usisaon naton sa masunod nga mga kapitulo kon ano na ang nahimo sang Ginharian sang Dios sa duta mga tinuig pagkabun-ag sini sa langit. Kobrehan sang kada seksion sini nga libro ang isa ka aspekto sang hilikuton sang Ginharian diri sa duta. Sa kada kapitulo, may kahon sa repaso nga magabulig sa tagsa sa aton nga makita kon daw ano ka matuod sa aton ang Ginharian. Sa katapusan nga mga kapitulo, binagbinagon naton kon ano ang mapaabot naton kon mag-abot na ang Ginharian sa paglaglag sa mga malaut kag sa pagpaluntad sang paraiso nga duta. Ano ang mabenepisyo mo sa pagtuon sa sini nga libro?

⁴⁰ Luyag gub-on ni Satanas ang imo pagtuo sa Ginharian sang Dios. Pero gusto ni Jehova nga pabakuron ang imo pagtuo agod mag-amlig ini kag magpalig-on sa imo. (Efe. 6:16) Gani, ginapalig-on ka namon nga tun-an sing mapinangamuyuon ini nga libro. Pamangkuta pirme ang imo kaugalingon, ‘Matuod gid bala sa akon ang Ginharian sang Dios?’ Samtang labi ini nga mangin matuod sa imo, mas sigurado man nga ato ka didto, matutom kag aktibo nga nagasakdag sa sina nga Ginharian, kon makita na sang tanan nga nagakabuhi nga matuod kag nagagahom ang Ginharian sang Dios!