ບົດທີ 2
ລາຊະອານາຈັກຂອງພະເຈົ້າສ້າງຕັ້ງໃນສະຫວັນ
1, 2. ເຫດການຄັ້ງສຳຄັນທີ່ສຸດໃນປະຫວັດສາດຄືອັນໃດ? ແລະເປັນຫຍັງເຮົາບໍ່ຄວນແປກໃຈທີ່ມະນຸດບໍ່ສາມາດເຫັນເຫດການນີ້?
ເຈົ້າເຄີຍສົງໄສບໍວ່າ ຖ້າເຈົ້າຢູ່ໃນໄລຍະຫົວລ້ຽວຫົວຕໍ່ຂອງປະຫວັດສາດຈະເປັນແນວໃດ? ຫຼາຍຄົນເຄີຍສົງໄສເລື່ອງນີ້. ແຕ່ເຖິງແມ່ນເຈົ້າຈະຢູ່ໃນໄລຍະທີ່ສຳຄັນນັ້ນແທ້ໆ ເຈົ້າຈະໄດ້ເຫັນເຫດການຕ່າງໆທີ່ເປັນຈຸດເລີ່ມຕົ້ນຂອງການປ່ຽນແປງດ້ວຍຕາຕົວເອງບໍ? ຄົງບໍ່ເປັນແບບນັ້ນ! ເຫດການສຳຄັນທີ່ປ່ຽນແປງປະຫວັດສາດເຊັ່ນ: ການລົບລ້າງການປົກຄອງເຊິ່ງມີການຕົກລົງກັນແບບລັບໆ ເຖິງແມ່ນຄົນສ່ວນໃຫຍ່ບໍ່ຮູ້ ແຕ່ກໍສົ່ງຜົນກະທົບຕໍ່ຫຼາຍລ້ານຄົນ.
2 ຈະວ່າແນວໃດກ່ຽວກັບເຫດການຄັ້ງສຳຄັນທີ່ສຸດໃນປະຫວັດສາດຂອງໂລກ? ເຫດການນັ້ນສົ່ງຜົນກະທົບຕໍ່ມະນຸດຫຼາຍລ້ານຄົນ ແຕ່ບໍ່ມີໃຜເຫັນຍ້ອນວ່າເຫດການນີ້ເກີດຂຶ້ນໃນສະຫວັນ ເຊິ່ງກໍຄືການສ້າງຕັ້ງລັດຖະບານເມຊີທີ່ພະເຈົ້າສັນຍາໄວ້ດົນແລ້ວ ລາຊະອານາຈັກນີ້ຈະທຳລາຍລະບົບໂລກທັງໝົດໃນອີກບໍ່ດົນ. (ອ່ານດານຽນ 2:34, 35, 44, 45) ເນື່ອງຈາກບໍ່ມີໃຜເຫັນການສ້າງຕັ້ງລາຊະອານາຈັກນີ້ ແຕ່ນີ້ໝາຍຄວາມວ່າພະເຢໂຫວາປິດບັງບໍ່ໃຫ້ມະນຸດຮູ້ບໍ? ຫຼືພະອົງກຽມປະຊາຊົນທີ່ສັດຊື່ໄວ້ໃຫ້ພ້ອມກ່ອນທີ່ເຫດການຈະເກີດຂຶ້ນ? ໃຫ້ເຮົາມາເບິ່ງນຳກັນ.
“ທູດຂອງເຮົາ . . . ຈະກຽມທາງໄວ້ສຳລັບເຮົາ”
3-5. (ກ) ໃຜຄື “ທູດຕາມສັນຍາ” ໃນມາລາກີ 3:1? (ຂ) ເກີດຫຍັງຂຶ້ນກ່ອນທີ່ “ທູດຕາມສັນຍາ” ຈະມາທີ່ວິຫານ?
3 ຕັ້ງແຕ່ສະໄໝບູຮານພະເຢໂຫວາຕັ້ງໃຈກຽມປະຊາຊົນຂອງພະອົງໃຫ້ພ້ອມສຳລັບການສ້າງຕັ້ງລາຊະອານາຈັກເມຊີ ຕົວຢ່າງເຊັ່ນ: ຄຳພະຍາກອນໃນມາລາກີ 3:1 (ລ.ມ.) ບອກວ່າ: “ຈົ່ງເບິ່ງ ເຮົາຈະສົ່ງທູດຂອງເຮົາໄປແລະເຂົາຈະກຽມທາງໄວ້ສຳລັບເຮົາ ແລ້ວຕອນທີ່ບໍ່ມີໃຜຄາດຄິດ ຜູ້ເປັນນາຍອົງສູງສຸດທີ່ພວກເຈົ້າຊອກຫາຢູ່ນັ້ນຈະມາທີ່ວິຫານຂອງພະອົງ ແລະທູດຕາມສັນຍາທີ່ເຈົ້າລໍຄອຍດ້ວຍຄວາມຍິນດີຈະມາດ້ວຍ.”
4 ຕອນທີ່ຄຳພະຍາກອນນີ້ສຳເລັດເປັນຈິງໃນປັດຈຸບັນ ພະເຢໂຫວາ “ຜູ້ເປັນນາຍອົງສູງສຸດ” ໄດ້ມາກວດເບິ່ງວິຫານຂອງພະອົງເມື່ອໃດ? ການກວດເບິ່ງນີ້ເລີ່ມຕົ້ນໃນປີ ຄ.ສ. 1914 ຄຳພະຍາກອນບອກວ່າຕອນນັ້ນພະເຢໂຫວາກັບ “ທູດຕາມສັນຍາ” ຈະມາທີ່ວິຫານ. ທູດນັ້ນແມ່ນໃຜ? ກະສັດເມຊີຫຼືພະເຍຊູຄລິດນັ້ນເອງ! (ລືກາ 1:68-73) ພະເຍຊູເປັນຜູ້ປົກຄອງທີ່ຫາກໍໄດ້ຮັບການແຕ່ງຕັ້ງ ເພິ່ນຈະມາກວດ ເບິ່ງແລະຫຼໍ່ຫຼອມຜູ້ຮັບໃຊ້ຂອງພະເຈົ້າທີ່ຢູ່ເທິງໂລກໃຫ້ບໍລິສຸດເຊິ່ງປຽບຄືກັບຢູ່ໃນລານວິຫານຂອງພະອົງ.—1 ເປ. 4:17
5 ໃຜຄື “ທູດ” ອີກຄົນໜຶ່ງໃນມາລາກີ 3:1? ທູດຄົນນີ້ຕ້ອງມາ “ກຽມທາງ” ໄວ້ກ່ອນທີ່ກະສັດເມຊີຈະກັບມາ. ໃນໄລຍະຫຼາຍສິບປີກ່ອນຈະເຖິງປີ 1914 ມີໃຜມາ “ກຽມທາງ” ໄວ້ແທ້ໆບໍ?
6. ໃຜຄື “ທູດ” ຕາມທີ່ບອກໄວ້ລ່ວງໜ້າ ເຊິ່ງມາເພື່ອກຽມປະຊາຊົນໄວ້ໃຫ້ພ້ອມສຳລັບເຫດການທີ່ຈະເກີດຂຶ້ນ?
6 ເມື່ອອ່ານປຶ້ມເຫຼັ້ມນີ້ເຮົາຈະໄດ້ຄຳຕອບສຳລັບຄຳຖາມຕ່າງໆກ່ຽວກັບລາຊະອານາຈັກຂອງພະເຈົ້າ. ໂດຍເບິ່ງຈາກປະຫວັດສາດທີ່ໜ້າຕື່ນເຕັ້ນຂອງປະຊາຊົນຂອງພະເຢໂຫວາ ໃນປາຍສະຕະວັດທີ 19 ມີຄົນສັດຊື່ກຸ່ມນ້ອຍໆທີ່ເປັນຄລິດສະຕຽນແທ້ກຸ່ມດຽວເຊິ່ງຢູ່ທ່າມກາງຄລິດສະຕຽນປອມ ຕໍ່ມາຄົນກຸ່ມນີ້ເປັນທີ່ຮູ້ຈັກໃນຊື່ ນັກສຶກສາຄຳພີໄບເບິນ ເຊິ່ງມີຜູ້ນຳຄື: ຊາລ ທີ. ຣັດເຊວ ແລະເພື່ອນຮ່ວມງານທີ່ໃກ້ຊິດຂອງລາວ. ເຂົາເຈົ້າເຮັດໜ້າທີ່ເປັນ “ທູດ” ຕາມທີ່ບອກໄວ້ລ່ວງໜ້າ ໂດຍຊີ້ນຳແລະກຽມປະຊາຊົນຂອງພະເຈົ້າໃຫ້ພ້ອມສຳລັບເຫດການທີ່ຈະເກີດຂຶ້ນ. ໃຫ້ເຮົາມາເບິ່ງນຳກັນວ່າ “ທູດ” ໄດ້ເຮັດສິ່ງທີ່ສຳຄັນ 4 ຢ່າງອັນໃດເພື່ອກຽມທາງໄວ້?
ນະມັດສະການດ້ວຍຄວາມຈິງ
7, 8. (ກ) ປະມານປີ 1850 ໃຜເລີ່ມເປີດໂປງຄຳສອນຕົວະເລື່ອງວິນຍານອະມະຕະ? (ຂ) ຊີ. ທີ. ຣັດເຊວແລະເພື່ອນຮ່ວມງານໄດ້ເປີດໂປງຄຳສອນຕົວະຫຍັງອີກ?
7 ນັກສຶກສາຄຳພີໄບເບິນໄດ້ອະທິດຖານເພື່ອຊ່ວຍເຂົາເຈົ້າໃຫ້ເຂົ້າໃຈເລື່ອງທີ່ຈະສຶກສາ ມີຄວາມເຫັນກົງກັນ ລວບລວມ ແລະຈັດພິມຫຼັກຄວາມຈິງທີ່ຊັດເຈນ. ເປັນເວລາຫຼາຍຮ້ອຍປີທີ່ຄລິດສາສະໜາຈັກຢູ່ໃນຄວາມມືດ ເຂົາເຈົ້າບໍ່ເຂົ້າໃຈຄວາມຈິງຂອງພະເຈົ້າ ຄຳສອນຫຼາຍຂໍ້ຂອງຄລິດສາສະໜາຈັກມີຕົ້ນກຳເນີດມາຈາກທຳນຽມນອກຮີດ. ຕົວຢ່າງໜຶ່ງທີ່ເຫັນໄດ້ແຈ້ງກໍຄືຄຳສອນເລື່ອງວິນຍານອະມະຕະ. ປະມານປີ 1850 ຄົນທີ່ຈິງໃຈເຊັ່ນ: ເຮັນຣີ ກຣິວກັບຈອດ ສະເຕັດສັນ ແລະຈອດ ສະຕໍຣ ໄດ້ສຶກສາຄຳພີໄບເບິນແລະພົບວ່າຄຳພີໄບເບິນບໍ່ໄດ້ສອນເລື່ອງວິນຍານອະມະຕະ ເຂົາເຈົ້າຈຶ່ງຂຽນແລະບັນລະຍາຍເລື່ອງນີ້ຢ່າງກ້າຫານ ເປີດໂປງຄຳຕົວະທີ່ມາຈາກຊາຕານ. a ສິ່ງທີ່ເຂົາເຈົ້າຂຽນໄດ້ຊ່ວຍໃຫ້ ຊີ. ທີ. ຣັດເຊວແລະເພື່ອນຮ່ວມງານເຂົ້າໃຈຂໍ້ພະຄຳພີຕ່າງໆຫຼາຍຂຶ້ນ.
8 ນັກສຶກສາຄຳພີໄບເບິນກຸ່ມນ້ອຍໆພົບວ່າຫຼັກຄຳສອນອື່ນທີ່ກ່ຽວຂ້ອງກັບເລື່ອງວິນຍານອະມະຕະກໍເປັນຄຳສອນຕົວະແລະເຮັດໃຫ້ຜູ້ຄົນສັບສົນນຳອີກ ເຊັ່ນ: ຄຳສອນທີ່ວ່າຄົນດີທຸກຄົນຈະໄປສະຫວັນ ຫຼືຄຳສອນທີ່ວ່າພະເຈົ້າທໍລະມານວິນຍານຊົ່ວໃນໄຟນະລົກຕະຫຼອດການ. ຣັດເຊວແລະເພື່ອນຮ່ວມງານໄດ້ເປີດໂປງຄຳສອນຕົວະເຫຼົ່ານີ້ໂດຍຈັດພິມບົດຄວາມ ປຶ້ມ ໃບປິວ ແຜ່ນພັບ ແລະຄຳເທດໃນໜັງສືພິມ.
9. ຫໍສັງເກດການ ໄດ້ເປີດໂປງຄຳສອນຕົວະເລື່ອງຕີເອການຸພາບແນວໃດ?
9 ນັກສຶກສາຄຳພີໄບເບິນໄດ້ເປີດໂປງຄຳສອນຕົວະເລື່ອງຕີເອການຸພາບທີ່ແຜ່ອອກໄປຢ່າງກວ້າງຂວາງ. ວາລະສານຫໍສັງເກດການແຫ່ງຊີໂອນ b ປີ 1887 ບອກວ່າ: “ຂໍ້ພະຄຳພີຕ່າງໆອະທິບາຍຢ່າງຈະແຈ້ງວ່າພະເຢໂຫວາແລະພະເຍຊູບໍ່ແມ່ນບຸກຄົນດຽວກັນ ພະເຢໂຫວາເປັນພໍ່ ແລະພະເຍຊູເປັນລູກ.” ຫຼັງຈາກນັ້ນ ບົດຄວາມນີ້ຍັງຊີ້ໃຫ້ເຫັນວ່າເປັນເລື່ອງແປກຫຼາຍທີ່ “ຄົນທົ່ວໄປຍອມຮັບແລະຖືວ່າແນວຄິດເລື່ອງພະເຈົ້າ 3 ອົງລວມເປັນອົງດຽວກັນເປັນເລື່ອງສຳຄັນ ທັງໆທີ່ຄຳສອນເລື່ອງນີ້ ບໍ່ມີໃນຄຳພີໄບເບິນເລີຍ ແຕ່ນັ້ນສະແດງໃຫ້ເຫັນວ່າພວກຄລິດສາສະໜາຈັກຫຼັບຫູຫຼັບຕາເຊື່ອໂດຍບໍ່ສົນໃຈຄຳຕົວະທີ່ຊາຕານເຜີຍແຜ່.”
10. ຫໍສັງເກດການ ຊີ້ໃຫ້ເຫັນວ່າປີ 1914 ສຳຄັນແນວໃດ?
10 ວາລະສານຫໍສັງເກດການແຫ່ງຊີໂອນ ມີຊື່ເຕັມວ່າ: ຫໍສັງເກດການແຫ່ງຊີໂອນແລະຜູ້ປ່າວປະກາດເຖິງສະໄໝທີ່ພະຄລິດກັບມາ. ວາລະສານນີ້ເນັ້ນເຖິງຄຳພະຍາກອນທີ່ກ່ຽວຂ້ອງກັບສະໄໝທີ່ພະຄລິດຈະກັບມາ ຜູ້ຂຽນວາລະສານເຊິ່ງເປັນຜູ້ຖືກເຈີມທີ່ສັດຊື່ເຂົ້າໃຈວ່າຄຳສອນຂອງດານຽນເລື່ອງ “ຍາມທັງເຈັດ” ໄດ້ຊີ້ເຖິງເວລາທີ່ພະເຈົ້າຈະຕັ້ງລາຊະອານາຈັກເມຊີ. ເມື່ອເຖິງປີ 1876 ກໍມີການລະບຸວ່າປີ 1914 ຈະເປັນປີທີ່ຍາມທັງເຈັດສິ້ນສຸດລົງ. (ດາ. 4:25; ລືກາ 21:24) ເຖິງແມ່ນວ່າພີ່ນ້ອງໃນສະໄໝນັ້ນຍັງບໍ່ເຂົ້າໃຈແທ້ໆວ່າປີນັ້ນຈະເກີດຫຍັງຂຶ້ນ ແຕ່ເຂົາເຈົ້າກໍປະກາດສິ່ງທີ່ໄດ້ຮູ້ອອກໄປຢ່າງກວ້າງຂວາງ ແລະຍັງສົ່ງຜົນຈົນເຖິງທຸກມື້ນີ້.
11, 12. (ກ) ພີ່ນ້ອງຣັດເຊວໃຫ້ກຽດໃຜໃນສິ່ງທີ່ລາວສອນ? (ຂ) ວຽກທີ່ພີ່ນ້ອງຣັດເຊວແລະເພື່ອນຮ່ວມງານໄດ້ເຮັດເພື່ອປົກປ້ອງຄວາມຈິງຕະຫຼອດຫຼາຍສິບປີກ່ອນຈະເຖິງປີ 1914 ສຳຄັນຂະໜາດໃດ?
11 ຣັດເຊວແລະເພື່ອນຮ່ວມງານທີ່ສັດຊື່ບໍ່ໄດ້ຍົກຍ້ອງຕົວເອງວ່າເປັນຄົນພົບຄວາມຈິງທີ່ສຳຄັນໃນຄຳພີໄບເບິນ. ສ່ວນຫຼາຍແລ້ວຣັດເຊວໃຫ້ກຽດຄົນທີ່ຄົ້ນຫາຄວາມຈິງກ່ອນໜ້າລາວ. ແຕ່ສຳຄັນທີ່ສຸດຄື ລາວໃຫ້ກຽດພະເຢໂຫວາພະເຈົ້າວ່າເປັນຜູ້ທີ່ສອນປະຊາຊົນຂອງພະອົງໃຫ້ຮູ້ສິ່ງທີ່ຄວນຮູ້ໃນເວລາທີ່ເໝາະສົມ. ເຫັນໄດ້ແຈ້ງວ່າ ພະເຢໂຫວາອວຍພອນຄວາມພະຍາຍາມຂອງຣັດເຊວແລະເພື່ອນຮ່ວມ ງານຂອງລາວໃນການແຍກຄຳສອນຈິງອອກຈາກຄຳສອນປອມ ຍິ່ງເວລາຜ່ານໄປເຂົາເຈົ້າກໍຍິ່ງແຕກຕ່າງແລະແຍກຕົວອອກຈາກຄລິດສາສະໜາຈັກຫຼາຍຂຶ້ນເທົ່ານັ້ນ.
ພີ່ນ້ອງຣັດເຊວແລະເພື່ອນຮ່ວມງານປົກປ້ອງຄວາມຈິງໃນຄຳພີໄບເບິນ
12 ເປັນຕາງຶດທີ່ຜູ້ສັດຊື່ເຫຼົ່ານີ້ໄດ້ປົກປ້ອງຄວາມຈິງມາຕະຫຼອດຫຼາຍສິບປີກ່ອນຈະເຖິງປີ 1914! ຫໍສັງເກດການ 1 ພະຈິກ 1917 ບອກວ່າ: “ຫຼາຍຄົນໃນທຸກມື້ນີ້ຫຼຸດພົ້ນຈາກຄວາມຢ້ານທີ່ເກີດຈາກຄຳສອນເລື່ອງໄຟນະລົກແລະຄຳສອນຕົວະອື່ນໆ . . . ຄວາມຈິງເປັນຄືກັບຄື້ນໃນທະເລທີ່ເລີ່ມກໍ່ຕົວຂຶ້ນເມື່ອ 40 ກວ່າປີກ່ອນ ຄື້ນນີ້ສູງຂຶ້ນເລື້ອຍໆແລະຈະສູງຂຶ້ນຈົນເຕັມໂລກ ສັດຕູຂອງຄວາມຈິງບໍ່ສາມາດຢຸດຢັ້ງຄື້ນຍັກນີ້ໄດ້ ຄວາມຈິງຈະຕ້ອງແຜ່ອອກໄປທົ່ວທຸກບ່ອນຂອງໂລກ.”
13, 14. (ກ) “ທູດ” ໄດ້ມາກຽມທາງໄວ້ໃຫ້ກະສັດເມຊີແນວໃດ? (ຂ) ເຮົາຈະຮຽນອັນໃດໄດ້ຈາກພີ່ນ້ອງຂອງເຮົາທີ່ມີຊີວິດຢູ່ເມື່ອ 100 ກວ່າປີກ່ອນ?
13 ລອງຄິດເບິ່ງ ຖ້າປະຊາຊົນຂອງພະເຈົ້າແຍກບໍ່ອອກວ່າພະເຍຊູເປັນລູກແລະພະເຢໂຫວາເປັນພໍ່ ເຂົາເຈົ້າຈະກຽມພ້ອມໃນຕອນທີ່ພະຄລິດກັບມາໄດ້ແນວໃດ? ຖ້າເຂົາເຈົ້າຄິດວ່າຊີວິດອະມະຕະເປັນສິ່ງທີ່ທຸກຄົນຕ້ອງໄດ້ຮັບຢູ່ແລ້ວ ບໍ່ແມ່ນຂອງຂວັນທີ່ພະເຈົ້າຈະມອບໃຫ້ສະເພາະຄົນຈຳນວນໜ້ອຍທີ່ຕິດຕາມພະເຍຊູ ຫຼືຖ້າເຂົາເຈົ້າຄິດວ່າພະເຈົ້າທໍລະມານຜູ້ຄົນຕະຫຼອດການໃນໄຟນະລົກ ເຂົາເຈົ້າຈະກຽມພ້ອມໄດ້ບໍ? ບໍ່ໄດ້ແທ້ໆ! ເຫັນໄດ້ແຈ້ງວ່າ “ທູດ” ໄດ້ມາກຽມທາງໄວ້ສຳລັບກະສັດເມຊີ!
14 ແລ້ວພວກເຮົາໃນທຸກມື້ນີ້ເດ? ເຮົາຈະຮຽນຫຍັງໄດ້ຈາກພີ່ນ້ອງຂອງເຮົາທີ່ມີຊີວິດຢູ່ເມື່ອ 100 ກວ່າປີທີ່ຜ່ານມາ? ເຮົາຕ້ອງໝັ່ນອ່ານແລະສຶກສາຄຳສອນຂອງພະເຈົ້າຄືກັບເຂົ້າເຈົ້າ. (ໂຢ. 17:3) ໃນຂະນະທີ່ໂລກນີ້ມີແຕ່ຄົນທີ່ນິຍົມວັດຖຸແລະບໍ່ສົນໃຈຄວາມຮູ້ຂອງພະເຈົ້າ ຂໍໃຫ້ເຮົາເປັນຄົນທີ່ຫິວກະຫາຍຢາກໄດ້ຄວາມຮູ້ຂອງພະອົງຫຼາຍຂຶ້ນເລື້ອຍໆ!—ອ່ານ 1 ຕີໂມເຕ 4:15
“ພວກຂອງເຮົາເອີຍ ຈົ່ງອອກມາຈາກເມືອງນັ້ນເຖີ້ນ”
15. ນັກສຶກສາຄຳພີໄບເບິນຄ່ອຍໆເຂົ້າໃຈເລື່ອງຫຍັງ? (ເບິ່ງໄຂເງື່ອນ.)
15 ນັກສຶກສາຄຳພີໄບເບິນສອນວ່າຕ້ອງອອກຈາກຄລິດສາສະໜາຈັກ. ຫໍສັງເກດການ ປີ 1879 ເວົ້າເຖິງ “ສາສະໜານິກາຍຕ່າງໆຂອງໂລກ” ນີ້ໝາຍເຖິງອຳນາດຂອງສັນຕະປາປາບໍ? ຫຼືຄລິດຕະຈັກກາໂຕລິກບໍ? ຄົນທີ່ເປັນໂປຣແຕສະຕັງບອກວ່າ: ຄຳວ່າບາບີໂລນມີຄວາມໝາຍແບບນັ້ນ ແຕ່ນັກສຶກສາຄຳພີໄບເບິນຄ່ອຍໆເຂົ້າໃຈວ່າ: “ບາບີໂລນ” ໃນສະໄໝປັດຈຸບັນກໍຄືຄລິດສາສະໜາຈັກທຸກນິກາຍ ເປັນຫຍັງຈຶ່ງເວົ້າແບບນັ້ນ? ຍ້ອນວ່າເຂົາເຈົ້າສອນເລື່ອງທີ່ບໍ່ເປັນຄວາມຈິງເຊິ່ງເຮົາກໍໄດ້ອ່ານໄປແລ້ວ. c ຕໍ່ມາປຶ້ມຂອງເຮົາກໍໄດ້ອະທິບາຍຢ່າງຈະແຈ້ງຂຶ້ນເລື້ອຍໆວ່າຄົນທີ່ຈິງໃຈຄວນລາອອກຈາກການເປັນສະມາຊິກຂອງສາສະໜາທີ່ມາຈາກບາບີໂລນ.
16, 17. (ກ) ປຶ້ມຮຸ່ງອະລຸນແຫ່ງລັດສະໄໝພັນປີ ເຫຼັ້ມ 3 ແລະຫໍສັງເກດການ ສະໜັບສະໜູນຄົນທີ່ເປັນສະມາຊິກຂອງສາສະໜາປອມໃຫ້ເຮັດຫຍັງ? (ຂ) ອັນໃດເຮັດໃຫ້ຄຳເຕືອນໃນສະໄໝນັ້ນບໍ່ຄ່ອຍໄດ້ຜົນ? (ເບິ່ງໄຂເງື່ອນ)
16 ຕົວຢ່າງເຊັ່ນ: ໃນປີ 1891 ປຶ້ມຮຸ່ງອະລຸນແຫ່ງລັດສະໄໝພັນປີເຫຼັ້ມ 3 (ພາສາອັງກິດ) ບອກວ່າ: ພະເຈົ້າບໍ່ຍອມຮັບບາບີໂລນໃນສະໄໝປັດຈຸບັນ ແຕ່ຈະເອີ້ນຄົນທີ່ ‘ບໍ່ເຫັນດີກັບຄຳສອນປອມແລະພິທີທາງສາສະໜາຂອງບາບີໂລນໃຫ້ອອກມາ.’
17 ເພື່ອຊ່ວຍຄົນທີ່ຍັງບໍ່ໄດ້ລາອອກຈາກການເປັນສະມາຊິກຂອງຄລິດສາສະໜາຈັກແລະຍັງແກ້ຕົວໂດຍອ້າງວ່າ: “ຂ້ອຍຮູ້ວ່ານີ້ເປັນຄວາມຈິງ ແລະຂ້ອຍກໍເກືອບຈະ ບໍ່ໄດ້ໄປໂບດເລີຍ.” ຫໍສັງເກດການ ມັງກອນ 1900 ຈຶ່ງຕັ້ງຄຳຖາມວ່າ: ‘ຖືກຕ້ອງບໍທີ່ຈະມົວແຕ່ຢຽບເຮືອສອງແຄມບໍ່ຍອມອອກຈາກບາບີໂລນ? ພະເຈົ້າພໍໃຈ ຍອມຮັບ ແລະຮຽກຮ້ອງການເຊື່ອຟັງແບບນັ້ນບໍ? ບໍ່ເລີຍ! ຄົນ [ທີ່ເປັນສະມາຊິກຂອງໂບດ] ໄດ້ເຮັດສັນຍາຢ່າງເປັນທາງການວ່າເຂົາເຈົ້າຈະເປັນສະມາຊິກ ແລະຕ້ອງການເຮັດຕາມເງື່ອນໄຂຕ່າງໆໃນສັນຍານັ້ນຢ່າງສັດຊື່ຈົນກວ່າຈະ . . . ປະກາດຍົກເລີກການເປັນສະມາຊິກຢ່າງເປັນທາງການ.’ ເມື່ອເວລາຜ່ານໄປ ຄຳແນະນຳກໍຈະແຈ້ງຂຶ້ນ. d ຜູ້ຮັບໃຊ້ຂອງພະເຢໂຫວາຕ້ອງລາອອກແລະບໍ່ຫຍຸ້ງກ່ຽວກັບສາສະໜາປອມຢ່າງເດັດຂາດ.
18. ເປັນຫຍັງຜູ້ຄົນຕ້ອງອອກມາຈາກບາບີໂລນໃຫຍ່?
18 ຖ້າບໍ່ໄດ້ຮັບຄຳເຕືອນເປັນປະຈຳວ່າໃຫ້ອອກຈາກບາບີໂລນໃຫຍ່ ກຸ່ມຜູ້ຮັບໃຊ້ທີ່ເປັນຜູ້ຖືກເຈີມທີ່ຢູ່ເທິງໂລກຄົງຈະບໍ່ພ້ອມໃນຕອນທີ່ພະຄລິດໄດ້ຮັບການແຕ່ງຕັ້ງໃຫ້ເປັນກະສັດ. ສະເພາະຄລິດສະຕຽນທີ່ບໍ່ກ່ຽວຂ້ອງກັບບາບີໂລນໃຫຍ່ເທົ່ານັ້ນທີ່ສາມາດນະມັດສະການພະເຢໂຫວາດ້ວຍ ‘ວິນຍານແລະຄວາມຈິງ.’ (ໂຢ. 4:24) ພວກເຮົາໃນທຸກມື້ນີ້ໄດ້ຕັ້ງໃຈທີ່ຈະບໍ່ກ່ຽວຂ້ອງກັບສາສະໜາປອມຄືກັບເຂົາເຈົ້າບໍ? ຂໍໃຫ້ເຮົາເຊື່ອຟັງຄຳສອນຂອງພະເຈົ້າຕໍ່ໆໄປທີ່ບອກວ່າ: “ພວກຂອງເຮົາເອີຍ ຈົ່ງອອກມາຈາກເມືອງນັ້ນເຖີ້ນ”!—ອ່ານຄຳປາກົດ 18:4
ນະມັດສະການຮ່ວມກັນ
19, 20. ຫໍສັງເກດການ ໄດ້ສະໜັບສະໜູນແນວໃດເພື່ອໃຫ້ປະຊາຊົນຂອງພະເຈົ້າມານະມັດສະການຮ່ວມກັນ?
19 ນັກສຶກສາຄຳພີໄບເບິນສອນວ່າທຸກຄົນທີ່ມີຄວາມເຊື່ອຄວນນະມັດສະການຮ່ວມກັນໃນທຸກບ່ອນທີ່ສາມາດເຮັດໄດ້. ສຳລັບຄລິດສະຕຽນແທ້ ພຽງແຕ່ອອກຈາກສາສະໜາປອມກໍຍັງບໍ່ພໍ ເຂົາເຈົ້າຕ້ອງເຂົ້າຮ່ວມການນະມັດສະການແທ້. ຕັ້ງແຕ່ຫໍສັງເກດການສະບັບທຳອິດກໍໄດ້ສະໜັບສະໜູນຜູ້ອ່ານໃຫ້ນະມັດສະການຮ່ວມກັນ ຕົວຢ່າງເຊັ່ນ: ໃນເດືອນກໍລະກົດ ປີ 1880 ພີ່ນ້ອງຣັດເຊວ ລາຍງານວ່າ: ຕອນທີ່ເດີນທາງໄປບັນລະຍາຍຢູ່ສະຖານທີ່ຕ່າງໆລາວໄດ້ຮັບກຳລັງໃຈຫຼາຍເມື່ອເຂົ້າຮ່ວມການປະຊຸມ. ລາວໄດ້ກະຕຸ້ນຜູ້ອ່ານໃຫ້ຂຽນຂໍ້ຄວາມສັ້ນໆເພື່ອເລົ່າວ່າເຂົາເຈົ້າກ້າວໜ້າໄປຮອດຂັ້ນໃດແລ້ວ ພີ່ນ້ອງຣັດເຊວໄດ້ເລືອກປະສົບການຂອງບາງຄົນມາລົງໃນວາລະສານເພື່ອ “ເຮົາທຸກຄົນຈະໄດ້ຮູ້ວ່າ . . . ພະເຈົ້າອວຍພອນເຈົ້າແນວໃດ ແລະເຈົ້າໄດ້ໄປປະຊຸມກັບຄົນທີ່ມີຄວາມເຊື່ອທີ່ເຂັ້ມແຂງເປັນປະຈຳຫຼືບໍ.”
ຊາລ ຣັດເຊວ ແລະກຸ່ມນັກສຶກສາຄຳພີໄບເບິນໃນສະໄໝທຳອິດ ທີ່ເມືອງ ໂຄເປນຮາເກນ ປະເທດແດນມາກໃນປີ 1909
20 ໃນຫໍສັງເກດການ ປີ 1882 ໄດ້ລົງບົດຄວາມເລື່ອງ “ມາປະຊຸມຮ່ວມກັນ” ເຊິ່ງແນະນຳໃຫ້ຄລິດສະຕຽນມາປະຊຸມກັນ “ເພື່ອໃຫ້ກຳລັງໃຈ ຊ່ວຍເສີມຄວາມເຊື່ອໃຫ້ເຂັ້ມແຂງ ແລະເປັນຕົວຢ່າງທີ່ດີໃຫ້ກັນແລະກັນ.” ບົດຄວາມນັ້ນຍັງບອກອີກວ່າ: “ບໍ່ສຳຄັນວ່າໃຜຈະມີຄວາມຮູ້ຄວາມສາມາດຫຼາຍໜ້ອຍສ່ຳໃດ ຂໍພຽງເຮົາແຕ່ລະຄົນເອົາຄຳພີໄບເບິນຂອງຕົວເອງມາ ເອົາເຈ້ຍແລະເອົາສໍມາແລ້ວພະຍາຍາມໃຊ້ປຶ້ມສັບສຳພັນຂອງຄຳພີໄບເບິນໃຫ້ຫຼາຍທີ່ສຸດ . . . ເທົ່າທີ່ຈະເຮັດໄດ້. ເລືອກຫົວຂໍ້ທີ່ເຈົ້າສົນໃຈ ອະທິດຖານຂໍພະລັງບໍລິສຸດເພື່ອຊ່ວຍໃຫ້ເຈົ້າເຂົ້າໃຈ. ຈາກນັ້ນກໍອ່ານ ຄິດ ແລ້ວເອົາຂໍ້ພະຄຳພີຕ່າງໆມາທຽບກັນ ແລະເຈົ້າກໍຈະໄດ້ພົບຄວາມຈິງ.”
21. ນັກສຶກສາຄຳພີໄບເບິນຢູ່ເມືອງແອນເລເກນີ ລັດເພນຊິລເວເນຍໄດ້ວາງແບບຢ່າງທີ່ດີໃນການປະຊຸມແລະການບຳລຸງລ້ຽງແນວໃດ?
21 ນັກສຶກສາຄຳພີໄບເບິນມີສຳນັກງານໃຫຍ່ຢູ່ທີ່ເມືອງແອນເລເກນີ ລັດເພນຊິລເວເນຍ ສະຫະລັດອາເມຣິກາ. ເຂົາເຈົ້າໄດ້ວາງແບບຢ່າງທີ່ດີໂດຍປະຊຸມຮ່ວມກັນໃນທີ່ນັ້ນຕາມຄຳແນະນຳທີ່ພະເຈົ້າດົນໃຈໃຫ້ບັນທຶກໄວ້ທີ່ເຫບເລີ 10:24, 25 (ອ່ານ). ຫຼາຍສິບປີຜ່ານໄປ ພີ່ນ້ອງສູງອາຍຸຄົນໜຶ່ງທີ່ຊື່ ຊາລ ເຄເປິນ ໄດ້ເລົ່າເຖິງຄວາມຮູ້ສຶກຂອງລາວເມື່ອເຂົ້າຮ່ວມການປະຊຸມຕອນເປັນເດັກນ້ອຍວ່າ: “ຂ້ອຍບໍ່ລືມພະຄຳພີຂໍ້ໜຶ່ງທີ່ຂຽນໄວ້ເທິງຝາຫໍປະຊຸມໃຫຍ່ທີ່ວ່າ: ‘ພະຄລິດແມ່ນຜູ້ໜຶ່ງຜູ້ດຽວເປັນອາຈານຂອງທ່ານທັງຫຼາຍ ແລະທ່ານທັງຫຼາຍເປັນພີ່ນ້ອງກັນທຸກຄົນ.’ ຂ້ອຍມັກຂໍ້ພະຄຳພີນີ້ຫຼາຍ ໃນທ່າມກາງປະຊາຊົນຂອງພະເຢໂຫວາບໍ່ມີການແບ່ງຊົນຊັ້ນວັນນະລະຫວ່າງນັກບວດກັບຄົນທຳມະດາ.” (ມັດ. 23:8) ພີ່ນ້ອງເຄເປິນຍັງເລົ່າອີກວ່າ ການປະຊຸມນັ້ນເຮັດໃຫ້ສົດຊື່ນ ອົບອຸ່ນ ແລະມີກຳລັງໃຈ ລາວຈື່ໄດ້ວ່າພີ່ນ້ອງຣັດເຊວບຳລຸງລ້ຽງພີ່ນ້ອງແຕ່ລະຄົນໃນປະຊາຄົມເປັນຢ່າງດີ.
22. ເມື່ອມີການສະໜັບສະໜູນໃຫ້ເຂົ້າຮ່ວມການປະຊຸມຄລິດສະຕຽນ ຄົນທີ່ສັດຊື່ຕອບຮັບແນວໃດ? ແລະເຮົາຮຽນຫຍັງໄດ້ຈາກເຂົາເຈົ້າ?
22 ເມື່ອໄດ້ເຫັນຕົວຢ່າງທີ່ດີ ຄົນທີ່ສັດຊື່ກໍເຮັດຕາມຄຳແນະນຳທີ່ໄດ້ຮັບ. ໄດ້ມີການກໍ່ຕັ້ງປະຊາຄົມຂຶ້ນໃນເມືອງອື່ນໆເຊັ່ນ: ໂອຮາຍໂອແລະມິຊິແກນ ຕໍ່ມາກໍທົ່ວອາເມຣິກາເໜືອແລະໃນປະເທດອື່ນໆອີກ. ລອງນຶກພາບເບິ່ງວ່າຄົນທີ່ສັດຊື່ເຫຼົ່ານີ້ ຈະພ້ອມບໍເມື່ອພະຄລິດກັບມາ ຖ້າເຂົາເຈົ້າບໍ່ຖືກຝຶກສອນໃຫ້ເຊື່ອຟັງຄຳແນະນຳຈາກພະເຈົ້າທີ່ໃຫ້ມາປະຊຸມເພື່ອນະມັດສະການຮ່ວມກັນ? ຄົງຈະບໍ່ພ້ອມແທ້ໆ! ແລ້ວພວກເຮົາໃນທຸກມື້ນີ້ເດ? ເຮົາກໍຕ້ອງຕັ້ງໃຈເຂົ້າຮ່ວມການປະຊຸມຄລິດສະຕຽນເປັນປະຈຳ ຫາໂອກາດນະມັດສະການຮ່ວມກັນເປັນປະຈຳ ແລະເວົ້າໃຫ້ກຳລັງໃຈກັນເພື່ອເຮັດໃຫ້ຄວາມເຊື່ອເຂັ້ມແຂງຂຶ້ນ.
ກະຕືລືລົ້ນໃນການປະກາດ
23. ຫໍສັງເກດການບອກວ່າຜູ້ຖືກເຈີມທຸກຄົນຕ້ອງເຮັດຫຍັງ?
23 ນັກສຶກສາຄຳພີໄບເບິນສອນວ່າຜູ້ຖືກເຈີມທຸກຄົນຕ້ອງເປັນຜູ້ປະກາດຄວາມຈິງ. ໃນປີ 1885 ຫໍສັງເກດການ ບອກວ່າ: “ເຮົາບໍ່ຄວນລືມວ່າຜູ້ຖືກເຈີມທຸກຄົນໄດ້ຮັບການແຕ່ງຕັ້ງໃຫ້ເປັນຜູ້ປະກາດ (ເອຊາ. 61:1) ເຂົາເຈົ້າຖືກເອີ້ນໃຫ້ມາເຮັດວຽກຮັບໃຊ້.” ໃນສະບັບປີ 1888 ມີຂໍ້ຄວາມທີ່ກະຕຸ້ນໃຈວ່າ: “ເຮົາໄດ້ຮັບຄຳສັ່ງຊັດເຈນ . . . ຖ້າເຮົາບໍ່ສົນໃຈແລະບໍ່ຢາກເຮັດວຽກນີ້ ເຮົາກໍເປັນຄົນຮັບໃຊ້ທີ່ຂີ້ຄ້ານແທ້ໆ ແລະເຮົາກໍບໍ່ຄູ່ຄວນທີ່ຈະເປັນຜູ້ຖືກເຈີມ.”
24, 25. (ກ) ນອກຈາກສະໜັບສະໜູນທຸກຄົນໃຫ້ປະກາດແລ້ວ ພີ່ນ້ອງຣັດເຊວແລະເພື່ອນຮ່ວມງານຍັງເຮັດຫຍັງອີກ? (ຂ) ເຄາະພໍເທີຄົນໜຶ່ງເລົ່າວ່າການປະກາດໃນສະໄໝຂອງລາວເປັນແນວໃດ?
24 ພີ່ນ້ອງຣັດເຊວແລະເພື່ອນຮ່ວມງານບໍ່ພຽງແຕ່ສະໜັບສະໜູນໃຫ້ທຸກຄົນເຮັດວຽກປະກາດ ແຕ່ເຂົາເຈົ້າຍັງເລີ່ມພິມແຜ່ນພັບທີ່ຊື່ວ່າ: ແຜ່ນພັບຂອງນັກສຶກສາຄຳພີໄບເບິນ (ພາສາອັງກິດ) ຕໍ່ມາໄດ້ປ່ຽນຊື່ເປັນຄຳສອນດັ້ງເດີມທາງສາສະໜາ. ຜູ້ອ່ານຫໍສັງເກດການ ຈະໄດ້ຮັບແຜ່ນພັບນີ້ແລະເຂົາເຈົ້າກໍແຈກຢາຍໃຫ້ຄົນອື່ນອ່ານຟຣີ.
ເຮົາຄວນຖາມຕົວເອງວ່າ ‘ວຽກປະກາດສຳຄັນທີ່ສຸດໃນຊີວິດຂອງຂ້ອຍບໍ?’
25 ຄົນທີ່ທຸ່ມເທຕົວເອງໃນການເຮັດວຽກຮັບໃຊ້ເຕັມເວລາເອີ້ນວ່າ: ເຄາະພໍເທີ (Colporteurs) ປັດຈຸບັນເອີ້ນວ່າໄພໂອເນຍ. ຊາລ ເຄເປິນທີ່ກ່າວເຖິງກ່ອນໜ້ານີ້ກໍເປັນເຄາະພໍເທີຄືກັນ ລາວເລົ່າວ່າ: “ຂ້ອຍໃຊ້ແຜນທີ່ຂອງສຳນັກງານທໍລະນີ ວິທະຍາຂອງປະເທດສະຫະລັດເພື່ອປະກາດໃຫ້ທົ່ວເຂດໃນເພນຊິລເວເນຍ. ແຜນທີ່ນີ້ລະອຽດຫຼາຍຈົນເຮັດໃຫ້ຂ້ອຍຍ່າງຊອດຫົນທາງທຸກເສັ້ນໃນເຂດນັ້ນ. ບາງເທື່ອຫຼັງຈາກເດີນທາງໄປໃນເຂດຊົນນະບົດ 3 ມື້ ຂ້ອຍຈະໄດ້ຍອດສັ່ງຈອງປຶ້ມການສຶກສາຄຳພີໄບເບິນ (ພາສາອັງກິດ) ຫຼາຍຊຸດ ແລ້ວຂ້ອຍກໍຈ້າງລົດມ້າຄັນນ້ອຍໆເພື່ອໄປສົ່ງປຶ້ມ ຂ້ອຍມັກຈະພັກຄ້າງຄືນກັບຊາວນາ ເພາະສະໄໝນັ້ນບໍ່ຄ່ອຍມີລົດໃຫຍ່ໃຊ້.”
ຮູບຂອງເຄາະພໍເທີຄົນໜຶ່ງ ຂໍສັງເກດເບິ່ງ “ແຜນພູມກ່ຽວກັບຍຸກຕ່າງໆ” ທີ່ແຕ້ມຢູ່ຂ້າງລົດມ້າ
26. (ກ) ເປັນຫຍັງປະຊາຊົນຂອງພະເຈົ້າຕ້ອງມີສ່ວນຮ່ວມໃນວຽກປະກາດ? (ຂ) ເຮົາຄວນຖາມຕົວເອງແນວໃດ?
26 ຄົນທີ່ພະຍາຍາມປະກາດໃນໄລຍະທຳອິດນັ້ນຕ້ອງມີຄວາມກ້າຫານແລະດຸໝັ່ນຫຼາຍ. ຖ້າບໍ່ມີໃຜສອນໃຫ້ເຂົ້າໃຈເລື່ອງຄວາມສຳຄັນຂອງການປະກາດ ຄລິດສະຕຽນແທ້ຈະກຽມພ້ອມສຳລັບການປົກຄອງຂອງພະຄລິດໄດ້ບໍ? ບໍ່ໄດ້ແທ້ໆ! ວຽກປະກາດທົ່ວໂລກເປັນສັນຍານວ່າພະຄລິດກັບມາແລ້ວ. (ມັດ. 24:14) ປະຊາຊົນຂອງພະເຈົ້າຕ້ອງກຽມຕົວໃຫ້ພ້ອມ ເພື່ອເຮັດໃຫ້ວຽກຊ່ວຍຊີວິດນີ້ເປັນວຽກທີ່ສຳຄັນທີ່ສຸດໃນຊີວິດຂອງເຂົາເຈົ້າ. ດັ່ງນັ້ນ ພວກເຮົາຄວນຖາມຕົວເອງວ່າ: ‘ວຽກປະກາດສຳຄັນທີ່ສຸດໃນຊີວິດຂອງຂ້ອຍບໍ? ເພື່ອຈະມີສ່ວນຮ່ວມໃນວຽກນີ້ຢ່າງເຕັມທີຂ້ອຍຕ້ອງເສຍສະລະຫຍັງແດ່?’
ລາຊະອານາຈັກຂອງພະເຈົ້າສ້າງຕັ້ງຂຶ້ນແລ້ວ!
27, 28. (ກ) ອັກຄະສາວົກໂຢຮັນເຫັນຫຍັງໃນນິມິດ? (ຂ) ເມື່ອລາຊະອານາຈັກຂອງພະເຈົ້າສ້າງຕັ້ງຂຶ້ນ ຊາຕານກັບຜີປີສາດພັກພວກຂອງມັນໄດ້ເຮັດຫຍັງ?
27 ໃນທີ່ສຸດ ປີ 1914 ເຊິ່ງເປັນປີທີ່ສຳຄັນກໍມາເຖິງ. ດັ່ງທີ່ກ່າວໃນຕອນຕົ້ນຂອງບົດນີ້ ບໍ່ມີມະນຸດຄົນໃດເຫັນເຫດການທີ່ຍິ່ງໃຫຍ່ໃນສະຫວັນ. ແຕ່ອັກຄະສາວົກໂຢຮັນໄດ້ຮັບນິມິດທີ່ສະແດງເຖິງເຫດການທີ່ເກີດຂຶ້ນໃນສະຫວັນ. ລອງນຶກພາບເບິ່ງວ່າໂຢຮັນໄດ້ເຫັນ “ເຫດການສຳຄັນຢ່າງໜຶ່ງ, ລ.ມ.” ໃນສະຫວັນ. “ຜູ້ຍິງ” ຂອງພະເຈົ້າຖືພາແລະເກີດລູກຊາຍ. “ຜູ້ຍິງ” ໝາຍເຖິງອົງການຂອງພະອົງທີ່ມີທູດສະຫວັນຈຳນວນຫຼາຍ. ຄຳພີໄບເບິນບອກວ່າອີກບໍ່ດົນເດັກນ້ອຍຄົນນັ້ນຈະ “ປົກຄອງເໜືອທຸກຊົນຊາດດ້ວຍຄ້ອນເຫຼັກ, ທ.ປ.” ແຕ່ຕອນທີ່ເກີດອອກມາລາວຈະຖືກ “ຍົກຂຶ້ນໄປເຖິງພະເຈົ້າແລະເຖິງທີ່ພະທີ່ນັ່ງຂອງພະອົງ” ແລ້ວມີສຽງດັງໃນສະຫວັນແລະກ່າວວ່າ: “ບັດນີ້ຄວາມພົ້ນແລະລິດເດດແລະແຜ່ນດິນ [ລາຊະອານາຈັກ] ແຫ່ງພະເຈົ້າຂອງເຮົາທັງຫຼາຍໄດ້ມາແລ້ວ.”—ຄຳປ. 12:1, 5, 10
28 ແນ່ນອນວ່າສິ່ງທີ່ໂຢຮັນເຫັນໃນນິມິດຄືການເກີດຫຼືການສ້າງຕັ້ງລາຊະອານາຈັກເມຊີເຊິ່ງເຫດການນັ້ນສຳຄັນແລະຍິ່ງໃຫຍ່ຫຼາຍແທ້ໆ ແຕ່ບໍ່ແມ່ນທຸກຄົນຈະພໍໃຈ. ຊາຕານແລະຜີປີສາດພັກພວກຂອງມັນໄດ້ເຮັດສົງຄາມກັບພວກທູດສະຫວັນທີ່ສັດຊື່ ເຊິ່ງມີຄາເອນຫຼືພະເຍຊູຄລິດເປັນຜູ້ນຳ. ຜົນເປັນແນວໃດ? ຄຳພີໄບເບິນບອກວ່າ: “ມັງກອນໃຫຍ່ນັ້ນເປັນທີ່ຖິ້ມລົງເສຍ ເປັນງູບູຮານນັ້ນທີ່ເຂົາເອີ້ນຊື່ວ່າເດຍໂບໂລ ແລະຊາຕານທີ່ລໍ້ລວງທົ່ວແຜ່ນດິນໂລກທີ່ຄົນອາໄສ ມັນເປັນທີ່ຖິ້ມລົງທີ່ແຜ່ນດິນໂລກ ແລະພວກທູດແຫ່ງຕົນເປັນທີ່ຖິ້ມດ້ວຍກັນ.”—ຄຳປ. 12:7, 9
ໃນປີ 1914 ນັກສຶກສາຄຳພີໄບເບິນຫາກໍເລີ່ມເຂົ້າໃຈສັນຍານທີ່ສະແດງວ່າພະຄລິດກັບມາແລ້ວ
29, 30. ຫຼັງຈາກລາຊະອານາຈັກເມຊີສ້າງຕັ້ງຂຶ້ນ ສະພາບການປ່ຽນໄປແນວໃດ (ກ) ເທິງໂລກ? (ຂ) ເທິງສະຫວັນ?
29 ນັກສຶກສາຄຳພີໄບເບິນບອກລ່ວງໜ້າມາດົນແລ້ວວ່າປີ 1914 ຈະເປັນຈຸດເລີ່ມຕົ້ນຂອງຄວາມທຸກລຳບາກ. ແຕ່ເຂົາເຈົ້າກໍນຶກພາບບໍ່ອອກວ່າຄຳພະຍາກອນຂໍ້ນັ້ນ ຈະເກີດຂຶ້ນແນວໃດແລະຖືກຕ້ອງສ່ຳໃດ. ໃນນິມິດຂອງໂຢຮັນສະແດງໃຫ້ເຫັນວ່າ: “ວິບາກແກ່ແຜ່ນດິນໂລກແລະແກ່ນ້ຳທະເລ ເຫດວ່າພະຍາມານໄດ້ລົງມາເຖິງທ່ານທັງຫຼາຍມີຄວາມຄຽດຮ້າຍນັກ ເພາະຮູ້ຈັກວ່າເວລາແຫ່ງຕົນຍັງແຕ່ໜ້ອຍດຽວ.” (ຄຳປ. 12:12) ນີ້ໝາຍຄວາມວ່າ ເມື່ອເຖິງຕອນນັ້ນຊາຕານຈະສ້າງຄວາມເດືອດຮ້ອນໃຫ້ກັບມະນຸດຫຼາຍຂຶ້ນ ແລ້ວໃນປີ 1914 ສົງຄາມໂລກຄັ້ງທີ 1 ກໍເລີ່ມຕົ້ນຂຶ້ນ. ເຫດການຕ່າງໆທີ່ເກີດຂຶ້ນທົ່ວໂລກຕາມຄຳພະຍາກອນສະແດງໃຫ້ເຫັນວ່າພະຄລິດກັບມາແລ້ວແລະປົກຄອງເປັນກະສັດ ນັ້ນສະແດງວ່າ “ສະໄໝສຸດທ້າຍ” ຂອງລະບົບນີ້ເລີ່ມຂຶ້ນແລ້ວ.—2 ຕີໂມ. 3:1, ລ.ມ.
30 ແຕ່ໃນສະຫວັນມີຄວາມຊື່ນຊົມຍິນດີ ຍ້ອນວ່າຊາຕານແລະພວກຜີປີສາດຖືກຂັບໄລ່ແລະກັບໄປສະຫວັນບໍ່ໄດ້ອີກຕໍ່ໄປ. ບັນທຶກຂອງໂຢຮັນບອກວ່າ: “ເພາະເຫດນັ້ນ ໂອ້ຟ້າສະຫວັນທັງຫຼາຍກັບທັງຜູ້ທີ່ຢູ່ໃນສະຫວັນນັ້ນຈົ່ງຊົມຊື່ນຍິນດີເຖີ້ນ!” (ຄຳປ. 12:12) ເມື່ອສະຫວັນບໍລິສຸດສະອາດແລະມີພະເຍຊູເປັນກະສັດ ລາຊະອານາຈັກເມຊີກໍພ້ອມແລ້ວທີ່ຈະລົງມືເຮັດເພື່ອປະຊາຊົນຂອງພະເຈົ້າທີ່ຢູ່ໃນໂລກ. ແຕ່ລາຊະອານາຈັກນີ້ຈະເຮັດຫຍັງ? ໃນຕອນຕົ້ນຂອງບົດນີ້ບອກວ່າ: ສິ່ງທຳອິດທີ່ພະຄລິດເຊິ່ງເປັນ “ທູດຕາມສັນຍາ” ຈະເຮັດກໍຄື ການຫຼອມຫຼືຊຳຮະຜູ້ຮັບໃຊ້ຂອງພະເຈົ້າທີ່ຢູ່ເທິງໂລກໃຫ້ສະອາດ ນີ້ໝາຍຄວາມວ່າແນວໃດ?
ເວລາແຫ່ງການທົດສອບ
31. ມາລາກີບອກລ່ວງໜ້າແນວໃດກ່ຽວກັບໄລຍະການຫຼອມ ແລະເລື່ອງນີ້ເກີດຂຶ້ນຈິງແນວໃດ? (ເບິ່ງໄຂເງື່ອນ)
31 ມາລາກີບອກລ່ວງໜ້າວ່າຂັ້ນຕອນການຫຼອມນີ້ບໍ່ແມ່ນເລື່ອງງ່າຍ. ລາວຂຽນວ່າ: “ໃຜຈະອົດທົນວັນທີ່ພະອົງມານັ້ນໄດ້ ແລະໃຜຈະຢັ້ງຢືນໄດ້ເມື່ອພະອົງຈະປາກົດມາ? ເຫດວ່າພະອົງແມ່ນຄືໄຟຂອງຜູ້ຊ່າງຫຼອມໂລຫະທາດແລະຄືເກືອດັ່ງຂອງຜູ້ຊ່າງຟອກຜ້າ.” (ມລກີ. 3:2) ແລ້ວກໍເປັນແບບນັ້ນແທ້ໆ! ເລີ່ມແຕ່ປີ 1914 ປະຊາຊົນຂອງພະເຈົ້າປະສົບກັບຄວາມຍາກລຳບາກແລະການທົດສອບຄວາມເຊື່ອທີ່ໜັກໜາສາຫັດຫຼາຍຄັ້ງ. ເມື່ອສົງຄາມໂລກຄັ້ງທີ 1 ເລີ່ມຕົ້ນຂຶ້ນ ນັກສຶກສາຄຳພີໄບເບິນຫຼາຍຄົນຖືກຂົ່ມເຫງຢ່າງຮຸນແຮງແລະຖືກຂັງຄຸກ. e
32. ໃນປີ 1916 ມີບັນຫາຫຍັງເກີດຂຶ້ນພາຍໃນອົງການ?
32 ໃນປີ 1916 ໄດ້ມີບັນຫາເກີດຂຶ້ນພາຍໃນອົງການຄືກັນ ພີ່ນ້ອງຣັດເຊວເສຍຊີວິດຕອນອາຍຸ 64 ປີ ເຊິ່ງເຮັດໃຫ້ປະຊາຊົນຂອງພະເຈົ້າຫຼາຍຄົນຕົກໃຈແລະບໍ່ຮູ້ຈະເຮັດແນວໃດ. ມີບາງຄົນຍົກຍ້ອງພີ່ນ້ອງຣັດເຊວຫຼາຍເກີນໄປເຊິ່ງລາວເອງບໍ່ເຄີຍຄິດທີ່ຈະໃຫ້ໃຜມາເຄົາລົບນັບຖືລາວແບບນັ້ນ ຫຼາຍຄົນຄິດວ່າຄົງຈະບໍ່ມີໃຜອີກແລ້ວທີ່ຈະເປີດເຜີຍຄວາມຈິງໃນຄຳພີໄບເບິນໄດ້ ແລະບາງຄົນເຖິງຂັ້ນຂັດຂວາງບໍ່ໃຫ້ວຽກຂອງອົງການເດີນໜ້າໄປ ຄວາມຄິດແບບນີ້ເຮັດໃຫ້ບາງຄົນປະຖິ້ມຄວາມເຊື່ອແລະກາຍເປັນຜູ້ອອກຫາກເຊິ່ງເຮັດໃຫ້ອົງການແຕກແຍກ.
33. ປະຊາຊົນຂອງພະເຈົ້າຖືກທົດສອບແນວໃດ ເມື່ອເຫດການບໍ່ໄດ້ເປັນໄປຕາມທີ່ເຂົາເຈົ້າຄາດຫວັງໄວ້?
33 ການທົດສອບອີກຢ່າງໜຶ່ງກໍຄືເຫດການບໍ່ໄດ້ເປັນໄປຕາມທີ່ຄາດຫວັງໄວ້. ເຖິງແມ່ນຫໍສັງເກດການ ໄດ້ລະບຸຢ່າງຊັດເຈນວ່າປີ 1914 ເປັນປີທີ່ເວລາກຳນົດຂອງຄົນຕ່າງປະເທດສິ້ນສຸດລົງ ແຕ່ພີ່ນ້ອງກໍຍັງບໍ່ເຂົ້າໃຈເຕັມທີວ່າຈະມີຫຍັງເກີດຂຶ້ນໃນປີນັ້ນ. (ລືກາ 21:24) ເຂົາເຈົ້າຄິດວ່າປີ 1914 ພະເຍຊູຄລິດຈະຮັບເຈົ້າສາວທີ່ຖືກ ເຈີມຂຶ້ນໄປສະຫວັນເພື່ອປົກຄອງຮ່ວມກັບເພິ່ນ ແຕ່ກໍບໍ່ໄດ້ເປັນໄປຕາມທີ່ເຂົາເຈົ້າຄິດ. ໃນຕອນທ້າຍຂອງປີ 1917 ຫໍສັງເກດການ ປະກາດວ່າລະດູເກັບກ່ຽວທີ່ຍາວນານ 40 ປີຈະສິ້ນສຸດລົງໃນລະດູໃບໄມ້ປົ່ງປີ 1918. ແຕ່ເມື່ອເຖິງເວລານັ້ນ ແທນທີ່ວຽກຈະສຳເລັດ ພັດມີການປະກາດຕໍ່ໄປເລື້ອຍໆ. ວາລະສານນັ້ນບອກວ່າລະດູເກັບກ່ຽວໄດ້ສິ້ນສຸດລົງແລ້ວແທ້ໆ ແຕ່ຍັງມີໄລຍະເວລາຂອງການເກັບກ່ຽວເຂົ້າທີ່ເຫຼືອຢູ່ໃນທົ່ງນາ ເລື່ອງນີ້ເຮັດໃຫ້ຫຼາຍຄົນຮູ້ສຶກຜິດຫວັງຈົນເຖິງຂັ້ນເຊົາຮັບໃຊ້ພະເຢໂຫວາ.
34. ໃນປີ 1918 ມີການທົດສອບທີ່ເປັນຕາຢ້ານແນວໃດ ແລະເປັນຫຍັງຄລິດສາສະໜາຈັກຈຶ່ງຄິດວ່າປະຊາຊົນຂອງພະເຈົ້າ “ຕາຍແລ້ວ”?
34 ການທົດສອບທີ່ເປັນຕາຢ້ານເກີດຂຶ້ນໃນປີ 1918 ເມື່ອພີ່ນ້ອງເຈ. ເອັບຟ. ຣັດເທີຝອດ ເຊິ່ງນຳໜ້າປະຊາຊົນຂອງພະເຈົ້າຕໍ່ຈາກພີ່ນ້ອງຊີ. ທີ. ຣັດເຊວ ຖືກຈັບພ້ອມກັບພີ່ນ້ອງຊາຍທີ່ເບິ່ງແຍງວຽກຕ່າງໆອີກ 7 ຄົນ. ເຂົາເຈົ້າຖືກຕັດສິນໃຫ້ຕິດຄຸກຫຼາຍປີແບບບໍ່ຍຸຕິທຳທີ່ເມືອງອັດລັງຕາ ລັດຈໍເຈຍ ສະຫະລັດອາເມຣິກາ. ເບິ່ງຄືວ່າວຽກຂອງປະຊາຊົນຂອງພະເຈົ້າຢຸດສະຫງັດໄປໄລຍະໜຶ່ງ ພວກນັກເທດນັກບວດຂອງຄລິດສາສະໜາຈັກພາກັນດີໃຈເມື່ອເຫັນຄົນທີ່ນຳໜ້າປະຊາຊົນຂອງພະເຈົ້າຕິດຄຸກ ສຳນັກງານໃຫຍ່ທີ່ບຸກລິນກໍຖືກປິດ ແລະວຽກປະກາດກໍຖືກຕໍ່ຕ້ານທັງໃນທະວີບອາເມຣິກາແລະເອີຣົບ ພວກນັກເທດຄິດໄປເອງວ່າ ນັກສຶກສາຄຳພີໄບເບິນທີ່ໜ້າລຳຄານ “ຕາຍແລ້ວ, ລ.ມ.” ແລະຈະບໍ່ສ້າງບັນຫາໃຫ້ກັບເຂົາເຈົ້າອີກຕໍ່ໄປ. (ຄຳປ. 11:3, 7-10) ແຕ່ເຂົາເຈົ້າຄິດຜິດ!
ເວລາຂອງການຟື້ນຟູ!
35. ເປັນຫຍັງພະເຍຊູຈຶ່ງຍອມໃຫ້ປະຊາຊົນຂອງເພິ່ນປະສົບກັບຄວາມຍາກລຳບາກ ແລະເພິ່ນໄດ້ເຮັດຫຍັງເພື່ອຊ່ວຍເຂົາເຈົ້າ?
35 ພວກສັດຕູບໍ່ຮູ້ໂຕວ່າເຂົາເຈົ້າເຂົ້າໃຈຜິດ ຄວາມຈິງແລ້ວການທີ່ພະເຍຊູປ່ອຍໃຫ້ປະຊາຊົນຂອງເພິ່ນປະສົບກັບຄວາມຍາກລຳບາກກໍຍ້ອນວ່າຕອນນັ້ນພະເຢໂຫວາກຳລັງຫຼໍ່ຫຼອມປະຊາຊົນຂອງພະອົງຄື ‘ຊ່າງຫຼອມເງິນໃຫ້ບໍລິສຸດ.’ (ມລກີ. 3:3) ພະເຢໂຫວາແລະລູກຂອງພະອົງໝັ້ນໃຈວ່າຄົນທີ່ສັດຊື່ຈະຜ່ານການທົດສອບທີ່ຮຸນແຮງຄືກັບໄຟ ເຂົາເຈົ້າຈະຖືກຫຼອມ ຊຳຮະໃຫ້ບໍລິສຸດ ແລະມີຄຸນສົມບັດທີ່ຈະຮັບໃຊ້ກະສັດຫຼາຍຂຶ້ນກວ່າແຕ່ກ່ອນ. ຕັ້ງແຕ່ຕົ້ນປີ 1919 ມີຫຼັກຖານທີ່ຊັດເຈນຫຼາຍຢ່າງວ່າພະລັງບໍລິສຸດໄດ້ເຮັດສິ່ງທີ່ພວກສັດຕູຄິດວ່າເປັນໄປບໍ່ໄດ້ຄື: ເຮັດໃຫ້ກຸ່ມຄົນທີ່ສັດຊື່ເບິ່ງຄືວ່າຕາຍໄປແລ້ວໃຫ້ຟື້ນກັບມາອີກຄັ້ງ! (ຄຳປ. 11:11) ໃນຕອນນັ້ນ ພະຄລິດໄດ້ເຮັດໃຫ້ສັນຍານສຳຄັນຂອງສະໄໝສຸດທ້າຍເກີດຂຶ້ນແທ້ຕາມຄຳພະຍາກອນ ເພິ່ນໄດ້ແຕ່ງຕັ້ງ “ທາດທີ່ສັດຊື່ແລະສຸຂຸມ, ລ.ມ.” ເຊິ່ງກໍຄືຜູ້ຖືກເຈີມກຸ່ມນ້ອຍໆທີ່ຈະນຳໜ້າປະຊາຊົນຂອງເພິ່ນ ໂດຍການໃຫ້ອາຫານທີ່ເປັນຄວາມຮູ້ແລະຄວາມຈິງກ່ຽວກັບພະເຈົ້າຕາມເວລາທີ່ເໝາະສົມ.—ມັດ. 24:45-47
36. ສິ່ງໃດສະແດງວ່າປະຊາຊົນຂອງພະເຈົ້າໄດ້ຮັບການຟື້ນຟູ?
36 ພີ່ນ້ອງຣັດເທີຝອດແລະເພື່ອນຮ່ວມງານຖືກປ່ອຍຕົວໃນວັນທີ 26 ມີນາ 1919 ເຂົາເຈົ້າກຳນົດວ່າຈະຈັດການປະຊຸມໃຫຍ່ຂຶ້ນໃນເດືອນກັນຍາປີນັ້ນເລີຍ. ມີການເຮັດວຽກຫຼາຍຢ່າງເພື່ອຈັດພິມວາລະສານອີກສະບັບໜຶ່ງເພື່ອໃຊ້ໃນວຽກປະກາດ. f ວາລະສານນີ້ຊື່ວ່າ: ເດິ ໂກເດິນ ເອດຈ (The Golden Age) ປັດຈຸບັນເອີ້ນວ່າ ຕື່ນເຖີດ! ເຊິ່ງຈະອອກຄູ່ກັບຫໍສັງເກດການ ແລະໃນປີດຽວກັນນັ້ນກໍມີການພິມຈົດ ໝາຍຂ່າວ (Bulletin) ສະບັບທຳອິດ ປັດຈຸບັນເອີ້ນວ່າ: ຊີວິດຄລິດສະຕຽນແລະວຽກຮັບໃຊ້—ຄູ່ມືການປະຊຸມ ເຊິ່ງເປັນສິ່ງພິມເພື່ອສະໜັບສະໜູນວຽກປະກາດມາແຕ່ຕອນທຳອິດ. ດັ່ງນັ້ນ ຕັ້ງແຕ່ປີ 1919 ເປັນຕົ້ນມາ ການປະກາດຕາມບ້ານເຮືອນກໍມີຄວາມສຳຄັນຫຼາຍຂຶ້ນເລື້ອຍໆ.
37. ຫຼັງຈາກປີ 1919 ບາງຄົນສະແດງໃຫ້ເຫັນແນວໃດວ່າບໍ່ສັດຊື່?
37 ວຽກປະກາດຊ່ວຍຫຼໍ່ຫຼອມຜູ້ຮັບໃຊ້ຂອງພະຄລິດຕໍ່ໆໄປ ວຽກນີ້ຕ້ອງໃຊ້ຄວາມຖ່ອມໃຈ ດັ່ງນັ້ນ ຄົນຍິ່ງຈຶ່ງບໍ່ເຕັມໃຈເຮັດວຽກນີ້ ຄົນທີ່ບໍ່ຍອມຮ່ວມມືກໍເຊົາຄົບຫາກັບຜູ້ຮັບໃຊ້ທີ່ສັດຊື່. ຫຼັງປີ 1919 ມີຢູ່ໄລຍະໜຶ່ງທີ່ຄົນບໍ່ສັດຊື່ບາງຄົນຫັນມາໂຈມຕີຜູ້ຮັບໃຊ້ພະເຈົ້າດ້ວຍຄວາມຄຽດແຄ້ນ ເຂົ້າເຈົ້າເວົ້າໃສ່ຮ້າຍ ໝິ່ນປະໝາດ ແລະເຖິງກັບສະໜັບສະໜູນກຸ່ມຄົນທີ່ຂົ່ມເຫງຜູ້ຮັບໃຊ້ທີ່ສັດຊື່ຂອງພະເຢໂຫວາ.
38. ຄວາມສຳເລັດແລະໄຊຊະນະທຸກຢ່າງຂອງຜູ້ຕິດຕາມພະຄລິດທີ່ຢູ່ເທິງໂລກເຮັດໃຫ້ເຮົາໝັ້ນໃຈໃນເລື່ອງໃດ?
38 ທັງໆທີ່ມີການຕໍ່ຕ້ານຂະໜາດນັ້ນ ແຕ່ຜູ້ຕິດຕາມພະຄລິດທີ່ຢູ່ເທິງໂລກກໍຍິ່ງເຕີບໂຕແລະເຂັ້ມແຂງຂຶ້ນເລື້ອຍໆ. ຄວາມສຳເລັດແລະໄຊຊະນະທຸກຢ່າງຂອງເຂົາເຈົ້າຕັ້ງແຕ່ຕອນນັ້ນເປັນຫຼັກຖານທີ່ເຮັດໃຫ້ໝັ້ນໃຈວ່າລາຊະອານາຈັກຂອງພະເຈົ້າປົກຄອງແລ້ວ! ຖ້າບໍ່ໄດ້ຮັບການສະໜັບສະໜູນແລະການອວຍພອນຈາກພະເຈົ້າຜ່ານທາງລູກຂອງພະອົງແລະລາຊະອານາຈັກເມຊີ ມະນຸດທີ່ບໍ່ສົມບູນແບບກຸ່ມໜຶ່ງ ຄົງບໍ່ມີທາງໄດ້ໄຊຊະນະຫຼາຍຄັ້ງເໜືອຊາຕານແລະລະບົບຊົ່ວນີ້!—ອ່ານເອຊາອີ 54:17
ບໍ່ເທົ່າໃດເດືອນຫຼັງຈາກຖືກປ່ອຍຕົວອອກຈາກຄຸກ ພີ່ນ້ອງຣັດເທີຝອດບັນລະຍາຍເລື່ອງທີ່ໜ້າຕື່ນເຕັ້ນໃນການປະຊຸມໃຫຍ່
39, 40. (ກ) ປຶ້ມຫົວນີ້ມີຈຸດເດັ່ນຫຍັງແດ່? (ຂ) ເຈົ້າຈະໄດ້ຮັບປະໂຫຍດຫຍັງຈາກການສຶກສາປຶ້ມຫົວນີ້?
39 ໃນບົດຕໍ່ໆໄປເຮົາຈະຮຽນຮູ້ວ່າ ລາຊະອານາຈັກຂອງພະເຈົ້າທີ່ສ້າງຕັ້ງຂຶ້ນເມື່ອ 100 ປີກ່ອນໄດ້ເຮັດຫຍັງສຳເລັດໄປແດ່ແລ້ວຢູ່ເທິງໂລກ. ໃນແຕ່ລະຕອນຂອງປຶ້ມນີ້ ເຮົາຈະພິຈາລະນາວຽກໃນດ້ານຕ່າງໆທີ່ລາຊະອານາຈັກນີ້ໄດ້ເຮັດຢູ່ເທິງໂລກ. ທຸກບົດມີຂອບຄຳຖາມທົບທວນເຊິ່ງຈະຊ່ວຍເຮົາແຕ່ລະຄົນໃຫ້ກວດສອບຫຼັກຖານທີ່ຈະເຮັດໃຫ້ເຮົາໝັ້ນໃຈວ່າລາຊະອານາຈັກຂອງພະເຈົ້າມີຢູ່ແທ້. ໃນຕອນສຸດທ້າຍຂອງປຶ້ມຫົວນີ້ເຮົາຈະຮຽນຮູ້ວ່າມີສິ່ງດີໆຫຍັງແດ່ຄອຍຖ້າຢູ່ໃນອະນາຄົດອັນໃກ້ນີ້ເມື່ອລາຊະອານາຈັກມາປົກຄອງ ທຳລາຍຄົນຊົ່ວ ແລະປ່ຽນໂລກໃຫ້ເປັນອຸທິຍານ. ແຕ່ຕອນນີ້ໃຫ້ເຮົາມາເບິ່ງນຳກັນວ່າເຈົ້າຈະໄດ້ຮັບປະໂຫຍດຫຍັງຈາກການສຶກສາປຶ້ມຫົວນີ້?
40 ຊາຕານຢາກເຮັດໃຫ້ຄວາມເຊື່ອທີ່ເຈົ້າມີໃນລາຊະອານາຈັກຂອງພະເຈົ້າຄ່ອຍໆອ່ອນແອລົງ. ແຕ່ພະເຢໂຫວາຢາກເສີມຄວາມເຊື່ອຂອງເຈົ້າ ເຊິ່ງຈະປົກປ້ອງແລະຊ່ວຍເຈົ້າໃຫ້ເຂັ້ມແຂງຕໍ່ໆໄປ. (ເອເຟ. 6:16) ດັ່ງນັ້ນ ເຮົາຂໍສະໜັບສະໜູນເຈົ້າໃຫ້ຕັ້ງໃຈອ່ານແລະຮຽນຮູ້ຈາກປຶ້ມຫົວນີ້ ອະທິດຖານຂໍພະເຢໂຫວາໃຫ້ຊ່ວຍເຈົ້າ ຖາມຕົວເອງຢູ່ເລື້ອຍໆວ່າ: ‘ຂ້ອຍໝັ້ນໃຈບໍວ່າລາຊະອານາຈັກຂອງພະເຈົ້າມີຢູ່ແທ້?’ ຍິ່ງເຮົາໝັ້ນໃຈໃນລາຊະອານາຈັກນີ້ຫຼາຍສ່ຳໃດ ເຮົາກໍມີໂອກາດຫຼາຍຂຶ້ນທີ່ຈະໄດ້ຢູ່ໃນໂລກໃໝ່ ແລະໄດ້ສະໜັບສະໜູນການປົກຄອງຂອງພະເຈົ້າຢ່າງສັດຊື່ ຕອນນັ້ນທຸກຄົນທີ່ມີຊີວິດຢູ່ຈະໄດ້ເຫັນກັບຕາວ່າລາຊະອານາຈັກຂອງພະເຈົ້າມີຢູ່ແທ້ແລະກຳລັງປົກຄອງຢູ່!
a ຮຽນຮູ້ຫຼາຍຂຶ້ນກ່ຽວກັບ ກຣິວ ສະເຕັດສັນ ແລະສະຕໍຣ ຈາກປຶ້ມພະຍານພະເຢໂຫວາ—ຜູ້ປະກາດລາຊະອານາຈັກຂອງພະເຈົ້າ (ພາສາອັງກິດ) ໜ້າ 45-46.
b ວາລະສານຫໍສັງເກດການແຫ່ງຊີໂອນ (Zion’s Watch Tower) ປັດຈຸບັນຊື່ຫໍສັງເກດການ (The Watchtower) ໃນປຶ້ມຫົວນີ້ເຮົາຈະໃຊ້ຊື່ຫໍສັງເກດການ ໝົດຫົວ.
c ເຖິງແມ່ນນັກສຶກສາຄຳພີໄບເບິນຮູ້ວ່າເຂົາເຈົ້າຕ້ອງອອກຈາກອົງການສາສະໜາທັງໝົດທີ່ເປັນສ່ວນໜຶ່ງຂອງລະບົບໂລກນີ້ ແຕ່ຕະຫຼອດຫຼາຍປີເຂົາເຈົ້າກໍເບິ່ງຄົນທີ່ບອກວ່າເຊື່ອໃນຄ່າໄຖ່ແລະອຸທິດຕົວແກ່ພະເຈົ້າເປັນພີ່ນ້ອງຄລິດສະຕຽນ ເຖິງແມ່ນຄົນເຫຼົ່ານັ້ນຈະບໍ່ແມ່ນນັກສຶກສາຄຳພີໄບເບິນກໍຕາມ.
d ເຫດຜົນໜຶ່ງທີ່ເຮັດໃຫ້ຄຳເຕືອນນັ້ນບໍ່ຄ່ອຍໄດ້ຜົນໃນຕອນທຳອິດກໍຄື ນັກສຶກສາຄຳພີໄບເບິນຄິດວ່າຄຳເຕືອນນັ້ນໃຊ້ກັບ 144.000 ຄົນເປັນຫຼັກ. ໃນບົດທີ 5 ຂອງປຶ້ມຫົວນີ້ຈະອະທິບາຍວ່າ ກ່ອນປີ 1935 ເຂົາເຈົ້າເຊື່ອວ່າ: “ຄົນຈຳນວນຫຼາຍ” ທີ່ກ່າວເຖິງໃນຄຳປາກົດ 7:9, 10, ສະບັບຄິງເຈມ ໝາຍເຖິງສະມາຊິກຈຳນວນຫຼາຍຂອງຄລິດສາສະໜາຈັກນຳອີກ. ເຂົາເຈົ້າເຊື່ອວ່າ ສະມາຊິກເຫຼົ່ານັ້ນກໍຈະຖືກແຕ່ງຕັ້ງໃຫ້ເປັນຊົນຝ່າຍສະຫວັນເຊິ່ງເປັນອັນດັບຮອງ ເພາະໃນທີ່ສຸດເຂົາເຈົ້າກໍປ່ຽນມາຢູ່ຝ່າຍພະຄລິດ.
e ວາລະສານເດິ ໂກເດິນ ເອດຈ ໃນເດືອນກັນຍາ ປີ 1920 ເປັນສະບັບພິເສດທີ່ເລົ່າເຖິງການຂົ່ມເຫງໃນໄລຍະສົງຄາມຢ່າງລະອຽດໃນການາດາ ອັງກິດ ເຢຍລະມັນ ແລະສະຫະລັດ. ບາງເລື່ອງກໍເປັນຕາຢ້ານຫຼາຍ ແຕ່ໃນໄລຍະຫຼາຍສິບປີກ່ອນທີ່ຈະເກີດສົງຄາມໂລກຄັ້ງທີ 1 ເກືອບຈະບໍ່ມີການຂົ່ມເຫງແບບນັ້ນເລີຍ.
f ເປັນເວລາຫຼາຍປີທີ່ຫໍສັງເກດການ ເຮັດຂຶ້ນເພື່ອສອນສະມາຊິກຂອງແກະຝູງນ້ອຍໂດຍສະເພາະ.