1, 2. Oshiningwanima oshinenenene shini sha ningilwe mondjokonona yuuyuni, nomolwashike itaashi kumitha sho aantu inaaya mona sho tashi ningwa?

 MBELA owi ipula ngaa nale nkene onkalamwenyo pethimbo lyelunduluko enene mondjokonona hayi kala? Oyendji ohaye shi ipula. Ihe dhiladhila kwaashika: Ngele ando opo owa li pethimbo lya tya ngawo, mbela ando iiningwanima mbyoka iinene owa mono ngaa sho tayi ningwa? Otashi vulika ando inoo yi mona. Iiningwanima mbyoka yu umbitha ko omapangelo kiipundi noya nyolwa momambo ogendji gondjokonona olundji ihayi ningwa montaneho. Oyindji yomuyo oya ningwa meholamo, momitumba dhopashigwana nomoombelewa dhepangelo. Ihe nonando ongaaka, omalunduluko ngoka haga ningwa po ohaga gumu noonkondo onkalamwenyo yaantu omamiliyona.

² Ongiini kombinga yoshiningwanima oshinenenene shoka sha ningwa mondjokonona yuuyuni? Oshiningwanima shoka osha guma noonkondo onkalamwenyo yaantu omamiliyona. Ihe kapu na nando omuntu kombanda yevi a mono sho tashi ningwa. Mpaka otatu popi kombinga yokudhikwa po kwUukwaniilwa waKalunga megulu, epangelo lyopaMesiasa lyu uvanekwa okuza nale ndyoka masiku tali ka hulitha po uuyuni mbuka. (Lesha Daniel 2:34, 35, 44, 45.) Molwashoka inatu mona okudhikwa po kwawo, mbela otu na okutya Jehova okwa holeke aantu oshiningwanima shoka? Nenge pamwe okwa li a kwathele oshigwana she shi ilongekidhile okudhikwa po kwawo komeho yethimbo? Natu taleni.

3-5. (a) ‘Omutumwa ta popi ehangano’ ngoka a popiwa muMaleaki 3:⁠1 olye? (b) Oshike sha li tashi ka ningwa po manga ‘omutumwa ta popi ehangano’ inee ya kotempeli?

³ Okuza nale Jehova okwa kala a hala okukwathela oshigwana she shi kale shi ilongekidhila okudhikwa po kwUukwaniilwa wopaMesiasa. Pashiholelwa, natu taleni kehunganeko lyaMaleaki 3:1, tali ti: “Otandi ka tuma omutumwa gwandje okulongekidhila ndje ondjila. Nena OMUWA ngoka tamu mu kongo, ote ke ya ohaluka kotempeli ye. Omutumwa ngoka mwa yuulukwa, ote ke ya nota popi ehangano lyandje.”

⁴ Megwanitho lyokunena, “OMUWA,” sha hala okutya, Jehova, okwa li e ya uunake a konakone mboka taye mu longele  mehale lyotempeli ye yopambepo kombanda yevi? Ehunganeko otali yelitha kutya Jehova okwa li te ke ya pamwe ‘nomutumwa ngoka ta popi ehangano.’ Omutumwa ngoka olye? OJesus Kristus, Omukwaniilwa gwopaMesiasa. (Luk. 1:68-73) Okwa li ta ka konakona nokuyogola oshigwana shaKalunga kombanda yevi konima sho a langekwa po. —  1 Pet. 4:17.

⁵ Ihe “omutumwa” gwotango ngoka a popiwa muMaleaki 3:1 olye? Omutumwa nguka okwa li te ke ya, manga Omukwaniilwa gwopaMesiasa inaa langekwa po. Manga omumvo 1914 inaagu thika, mbela opwa li ngaa omuntu ngoka ta ‘longekidhile Omukwaniilwa gwopaMesiasa ondjila’?

6. Olye “omutumwa” a hunganekwa ngoka i ile tango okulongekidhila oshigwana shaKalunga iinima mbyoka tayi ka ningwa komeho?

⁶ Membo ndika otatu ka tala komayamukulo gomapulo ngoka ge na sha nondjokonona yituntula yoshigwana shaJehova shokunena. Ondjokonona otayi ulike kutya okuuka pehulilo lyomimvo 1800 nasha, mokati kAakriste yiifundja omwa li mwa zi okangundu kaantu aadhiginini mboka ya ningi Aakriste yashili. Okangundu hoka oka li haki ithanwa Aakonakoni yOmbiimbeli. Mboka ya li taya kwatele komeho, ngaashi Charles T. Russell pamwe naayakuli ye, oya li ya longo ‘ongomutumwa’ ngoka a hunganekwa, taya wilike oshigwana shaKalunga pambepo noku shi longekidhila shoka tashi ka ningwa komeho. Natu taleni omikalo ne moka “omutumwa” e shi ningi.

7, 8. (a) Oolye ya li ya aneke pomutenya elongo lyiifundja lyomwenyo ihaagu si moomvula dhe 1800 nasha? (b) C. T. Russell naayakuli ye oya li ya aneke pomutenya omalongo galwe geni giifundja?

⁷ Aakonakoni yOmbiimbeli oya li ya konakona pamwe negalikano e taya thiki pehulithodhiladhilo limwe noya nyanyangidha oshili ndjoka ya mono. Uule woomvula omathele oongeleka dhUukwakriste odha kala momilema, nomalongo gadho ogendji oga yama komalongo goshipagani. Oshiholelwa shi igalala shomalongo giifundja ooshoka shomwenyo ihaagu si. Ihe momimvo 1800 nasha, aakonakoni yamwe yOmbiimbeli oya li ya mono kutya elongo ndika itali tsu kumwe nOohapu dhaKalunga. Aalumentu ngaashi Henry Grew, George Stetson naGeorge Storrs oya li ya aneke pomutenya iifundja yaSatana miileshomwa yawo nomiipopiwa yawo sho taya longo aantu nuulaadhi. a Shika osha li sha nwetha mo C. T. Russell naayakuli ye noonkondo.

⁸ Okangundu kAakonakoni yOmbiimbeli oka mono kutya omalongo galwe ga pambathana nomwenyo ihaagu si nago oga puka notaga ngwangwaneke. Ngaashi elongo kutya aantu ayehe aawanawa ohaya yi megulu, nenge kutya Kalunga oha fike aakolokoshi momulilo gwoheli sigo aluhe. Russell naayakuli ye oya li ya aneke pomutenya omalongo ngoka miileshomwa yi ili noyi ili, ngaashi momambo, muufo nomiipopiwa.

9. Oshungolangelo oya li ya aneke ngiini pomutenya elongo lyiifundja lyUukwatatu?

⁹ Sha faathana, Aakonakoni yOmbiimbeli oya li ya aneke wo pomutenya elongo lyuukwatatu ndyoka lya simanekwa koyendji. Mo 1887, Oshungolangelo b oya tile: “Ombiimbeli otayi popi sha yela kutya Jehova nOmuwa gwetu Jesus aantu ya yoolokathana  notayi yelitha wo ekwatathano ndyoka li li pokati kawo.” Oya gwedha ko kutya otashi kumitha shili sho “elongo lyuukwatatu, ano kutya Kalunga oKalunga katatu gumwe ye ishewe oKalunga gumwe muyatatu, lya taambiwa ko koyendji. Shika otashi holola puuyelele kutya ongeleka oya pwile moomposi noye etha omutondi e yi pukithe.”

10. Oshungolangelo oya li ya popi ngiini kutya 1914 omumvo gwa simana?

¹⁰ Oshifo Zion’s Watch Tower and Herald of Christ’s Presence (Oshungolangelo) osha li hashi kundathana unene kombinga yomahunganeko ge na ko nasha nokukala po kwaKristus, ngaashi edhina lyasho tali ti. Aagwayekwa aadhiginini mboka ya li haya nyola oshifo shika oya li ya mono kutya ehunganeko lyaDaniel kombinga ‘yomimvo heyali,’ otali popi kutya elalakano lyaKalunga lyokudhika po Uukwaniilwa wopaMesiasa otali ka gwanithwa uunake. Mo 1870 nasha, oya mono kutya omimvo heyali odha li tadhi ka hula mo 1914. (Dan. 4:25; Luk. 21:24) Nonando aamwatate kaya li ye shi lela kutya oshike tashi ka ningwa momumvo ngoka, oya li yu uvitha apehe nuulaadhi kombinga yaashoka ya li ye shi pethimbo ndyoka.

11, 12. (a) Omumwatate Russell okwa li a pandula lye omolwoshili ndjoka a li ha longo aantu? (b) Oshilonga shoka Russell naayakuli ye ya longo moomvula ndhoka dha tetekele 1914 osha li sha simana shi thike peni?

¹¹ Russell naayakuli ye aadhiginini kaya li yi inomene oshili yOmbiimbeli ndjoka ya lesha noyu uvu ko. Russell okwa li a pandula yalwe mboka ye mu tetekele. Ihe unene okwa pandula  Jehova Kalunga ngoka a longo oshigwana She oshili ndjoka sha li sha pumbwa okutseya pethimbo lyo opala. Osha yela kutya Jehova okwa li a yambeke oonkambadhala dhaRussell naayakuli ye, sho taya yoolola oshili momalongo giifundja. Mokweendela ko kwethimbo, Aakonakoni yOmbiimbeli oya li ya yooloka ko thiluthilu koongeleka dhUukwakriste.

¹² Iilonga mbyoka yokuhumitha komeho omalongo gashili mbyoka aalumentu mbaka aadhiginini ya longo momimvo ndhoka dha tetekele 1914 oya dhenga mbanda shili! Oshungolangelo ye 1 Novomba 1917, oya tile: “Aantu omamiliyona kunena ihaya tila we oheli noya manguluka ko komalongo galwe giifundja . . . Oshili ndjoka ya tamekele okulongwa aantu omimvo omilongo ne dha piti, onkee ngaa tayi indjipala notayi ka tsikila okwiindjipala sigo yu udha evi alihe. Mboka ye tonde oshili nando naya kambadhale oku yi ya moshipala opo kaayi taandele muuyuni awuhe, oya fa owala omuntu ta kambadhala okukeelela omakuthikuthi gefuta noshikombe showala.”

13, 14. (a) “Omutumwa” okwa longekidhile ngiini Omukwaniilwa gwopaMesiasa ondjila? (b) Oshike tatu ilongo kaamwatate mboka ya li ko oomvula dhi vulithe pethele dha piti?

¹³ Dhiladhila kwaashika: Ngele ando aantu kaya li ye shi eyooloko pokati kaJesus naHe, Jehova, mbela ando oya kala ngaa yi ilongekidhila okukala po kwaKristus? Nandonando. Oshikwawo, kaya li taya ka kala yi ilongekidha, ngele ando oya li taya dhiladhila kutya ondjambi yokwaasa otayi ka pewa kehe gumwe, pehala lyokudhiladhila kutya oyi li omagano ngoka taga ka pewa owala aalanduli aashona yaKristus. Yo kaya li wo taya ka kala yi ilongekidha, ngele ando oya li taya dhiladhila kutya Kalunga oha hepeke aantu moheli sigo aluhe. Kape na nando omalimbililo kutya “omutumwa” okwa li shili a longekidhile Omukwaniilwa gwopaMesiasa ondjila.

¹⁴ Ongiini kombinga yetu kunena? Otatu ilongo ko shike kaamwatate mboka ya li ko oomvula dhi vulithe pethele dha piti? Natse wo otu na okukala tu hole okulesha nokukonakona Oohapu dhaKalunga nuudhiginini. (Joh. 17:3) Nonando uuyuni mbuka wu hole omaliko otawu ende tawu si kondjala yopambepo, tse otu na okukala tu hole iikulya yopambepo. —  Lesha 1 Timoteus 4:15.

15. Mokweendela ko kwethimbo Aakonakoni yOmbiimbeli oya dhimbulula shike? (Tala wo enyolo lyopevi.)

¹⁵ Aakonakoni yOmbiimbeli oya li ya longo aantu kutya oye na okuza mo moongeleka dhiifundja. Mo 1879, Oshungolangelo oya popi kombinga ‘yongeleka yaBabilona.’ Mbela oya li tayi popi kombinga yomupapa? Nenge okombinga yongeleka yaKatoolika kaRoma? Uule woomvula omathele Aaprotestande oya kala yi itaala kutya Babilona shoka sha popiwa mOmbiimbeli otashi ulike kongeleka yaKatoolika. Ihe mokweendela ko kwethimbo, Aakonakoni yOmbiimbeli oya li ya mono kutya oongeleka adhihe dhUukwakriste oshitopolwa ‘shaBabilona.’ Omolwashike mbela? Omolwashoka odha li tadhi longo aantu omalongo giifundja, ngaashi ngoka ga kundathanwa metetekelo. c  Mokweendela ko kwethimbo, iileshomwa yetu oye ende tayi tsu omuthindo shoka iilyo yoongeleka dhaBabilona mbyoka yi na omitima dhu uka yi na okuninga.

16, 17. (a) Embo 3 lyedhina Millennial Dawn nOshungolangelo oya li ya kumagidha ngiini aantu ya ze mo momalongelokalunga giifundja? (b) Oshike sha li sha ningitha aantu kaaya pulakene naanaa kelondodho ndyoka? (Tala enyolo lyopevi.)

¹⁶ Pashiholelwa, mo 1891, embo 3 lyedhina Millennial Dawn olya popi kutya Kalunga ina hokwa Babilona shokunena, e tali ti: “Oongeleka adhihe dhUukwakriste odhe ekelwahi kuKalunga.” Olya gwedha ko kutya ayehe mboka “itaaya tsu kumwe nomalongo gasho giifundja niilonga yasho oye na okuza mo musho nziya.”

¹⁷ MuJanuali 1900, Oshungolangelo oya li ya kumagidha mboka omadhina gawo ge li natango momambo guukwashilyo woongeleka dhiifundja naamboka tayi ipopile taya ti: “Ngame ohandi yambidhidha oshili noihandi yi naanaa kongeleka.” Oshifo osha pula sha ti: “Mbela oshi li ngaa mondjila okukala momalongelokalunga gaali? Mbela shika osho tuu Kalunga a hala . . . nokwe shi hokwa ngaa? Aawe. Omuntu ngele okwa ningi oshilyo shongeleka okwa ninga euvathano nayo, noku na okugwanitha po iitegelelwa ayihe nuudhiginini sigo . . . oosho a tseyitha montaneho kutya ke shi we oshilyo shayo.” Momukokomoko gwoomvula dha ka landula ko, etumwalaka ndyoka olya li lya tsuwa omuthindo. d Aapiya yaJehova ayehe oye na okweetha po ekwatathano nelongelokalunga lyiifundja.

18. Omolwashike aantu ya li ye na okuza mo muBabilona oshinene?

¹⁸ Ando kapwa li omalondodho ngoka ge na ko nasha nokuza mo ‘muBabilona oshinene,’ ando kombanda yevi Kristus okwa adha ko ngaa aagwayekwa yi ilongekidhila Uukwaniilwa konima sho a langekwa po e li Omukwaniilwa? Ando ine ya adha ko, oshoka Aakriste owala mboka ya za mo muBabilona taya vulu okulongela Jehova ‘mombepo nomoshili.’ (Joh. 4:24) Mbela natse otwa tokola ngaa toko okukala kokule nomalongelokalunga giifundja kunena? Natu tsikileni okuvulika kelombwelo ndyoka tali ti: “Zii mo mokati kawo, one aantu yandje!” — Lesha Ehololo 18:4.

19, 20. Oshungolangelo oya ladhipike ngiini oshigwana shaKalunga shi kale hashi gongala pamwe shi mu longele?

¹⁹ Aakonakoni yOmbiimbeli oya li ya longo ooitaali ooyakwawo kutya oye na okukala haya gongala pamwe uuna tashi vulika. Aakriste yashili kaye na owala okuza mo momalongelokalunga giifundja. Ihe osha simanenena wo okukutha ombinga melongelokalunga lyashili. Okuza petameko, Oshungolangelo oya kala hayi ladhipike aaleshi yayo ya kale haya longele Kalunga pamwe. Pashiholelwa, muJuli 1880, omumwatate Russell okwa popi kutya okwa li a tsuwa omukumo noonkondo pokugongala kehe a li sho tu uvithile momahala gi ili nogi ili. Okwa ladhipike aaleshi ya tume uuyelele kombinga yokugongala kwawo koshinyanyangidho. Wumwe womuuyelele mbuka owa li wa nyanyangidhwa moshifo shoka. Elalakano olya li lyashike? Oshifo osha tile: “Tu tseyithileni . . . nkene Omuwa te mu yambeke sho hamu gongala pamwe nooitaali ooyakweni.”

 ²⁰ Mo 1882, mOshungolangelo omwa li mwa holoka oshileshwa shi na oshipalanyolo “Okugongala pamwe.” Osha ladhipike Aakriste ya kale haya gongala pamwe, opo “ya tungathane, ya tsaathane omukumo nokunkondopekathana.” Osha gwedha ko: “Kashi na mbudhi kutya mokati keni omu na aantu ya longwa nenge inaaya longwa. Kehe gumwe ne etelele Ombiimbeli, opena nombapila nakehe shimwe tashi vulu oku mu kwathela ngaashi embo lyomusholondondo gwiitya yOmbiimbeli noovelise dhayo. Hogololeni shoka mwa hala okukundathana, puleni ewiliko lyombepo ondjapuki mu uve ko shoka tamu ka kundathana, opo ihe tamu lesha e tamu dhiladhila nokuyelekanitha omanyolo. Ngele omwa ningi ngeyi otamu ka mona oshili.”

21. Egongalo muAllegheny shomuPennsylvania olya tula po oshiholelwa shini oshiwanawa kombinga yokugongala nokulitha oonzi?

²¹ Oombelewa oonene dhAakonakoni yOmbiimbeli odha li moAllegheny, shaPennsylvania, moAmerika. Aamwatate oya li ya tula po oshiholelwa oshiwanawa shokugongala pamwe, metsokumwe nelombwelo ndyoka li li mAahebeli 10:24, 25. (Lesha.) Omumwatate omukokele, Charles Capen, ota dhimbulukwa a li pokugongala hoka sho a li okamatyona. Okwa nyola ta ti: “Otandi dhimbulukwa natango ovelise ndyoka ya li ya nyolwa  kekuma lyoshinyanga shiigongi. ‘Ne amuhe aamwayinathana nomu na Omulongi gumwe awike, Kristus.’ Ovelise ndjoka oya kala hayi dhimbulukitha ndje aluhe kutya moshigwana shaJehova kamu na aasitagongalo.” (Mat. 23:8) Tate Capen ota dhimbulukwa wo kutya okugongala okwa li haku kala okuwanawa notaku tungu, natate Russell okwa li ha kambadhala okupopya noshilyo kehe shegongalo.

22. Mboka aadhiginini oya li yi inyenge ngiini sho ya ladhipikwa ya kale haya yi kokugongala kwopaKriste, noshike tatu ilongo ko kuyo?

²² Oshiholelwa shoka nelongo ndyoka lya li hali gandjwa pokugongala kehe olyi inyengitha aanamitima omiwanawa. Omagongalo oga li ga totwa miitopolwa yilwe ngaashi moOhio, moMichigan nokonima omuAmerika alihe nomiilongo yilwe. Dhiladhila nduno: Mbela ando aanamitima omiwanawa oya adhika tuu yi ilongekidhila okuya kwaKristus, ando oya li inaaya longwa okuvulika komayele ngoka ga nwethwa mo kutya naya kale haya longele Kalunga pamwe? Hasho nando. Ongiini kutse kunena? Otwa pumbwa okukala twa tokola toko okukala hatu kala aluhe pokugongala kwopaKriste, hatu kongo ompito yokugongala pamwe nokutungathana pambepo.

23. Oshungolangelo oye shi yelitha ngiini kutya aagwayekwa ayehe oye na okuuvitha oshili?

²³ Aakonakoni yOmbiimbeli oya li ya longo aantu kutya aagwayekwa ayehe oye na okukala hayu uvitha oshili. Mo 1885, Oshungolangelo oya ti: “Inatu dhimbwa kutya oshilyo kehe shaagwayekwa osha gwayekwa opo shi kale tashi uvitha. (Jes. 61:1) Mo 1888 oya kumagidha aantu ya ti: “Oshilonga shetu otu shi shi . . . Ngele otwe shi idhimbike, nena tse aapiya  aananyalo notatu ulike kutya inatu gwana okukala aagwayekwa.”

24, 25. (a)  Russell naayakuli ye oya ningi po ishewe shike ya ladhipike aantu ya kale haya uvitha? (b) Omutaandelithi gumwe gwiileshomwa okwa hokolola ngiini iilonga ye pethimbo mpoka kaakwa li oohauto?

²⁴ Omumwatate Russell naayakuli ye inaya ladhipika owala aantu ya kale haya uvitha. Ihe oya li wo ya tameke okunyanyangidha okafo kedhina Bible Students’ Tracts (Uufo wAakonakoni yOmbiimbeli), hoka konima yethimbo ke ki ithanwa Old Theology Quarterly (Elongo lyonale). Aaleshi yOshungolangelo oya li haye wu pewa opo ye wu gandje kaantu oshali.

²⁵ Mboka yi iyamba ya kale aakalele yethimbo lyu udha oya li hayi ithanwa aataandelithi yiileshomwa. Charles Capen, ngoka a popiwa metetekelo naye okwa li gumwe gwomuyo. Okwa ti: “Opo ndi mane ko oshitopolwa shaPennsylvania shoka nda li handi longo, onda li nda longitha uualita mboka wa ningwa kOshikondo shokukonakona omamanya shepangelo lyaAmerika. Uualita mboka owa li wu na oondjila adhihe nowa li wa kwathele ndje ndi thike koshitopolwa kehe tandi ende kolupadhi. Onda li handi ende uule womasiku gatatu momikunda tandi nyolitha aantu mboka ya hala omambo gedhina Studies in the Scriptures. Nokonima, omathimbo gamwe onda li handi kongo okakambe nokatemba e tandi ka futile, opo ndi faalele aantu omambo gawo. Olundji onda li handi lala momagumbo gaanafaalama. Pethimbo mpoka kakwa li oohauto.”

26. (a) Omolwashike oshigwana shaKalunga sha li shi na okuuvitha, opo shi kale shi ilongekidhila elelo lyaKristus? (b) Omapulo geni tu na okwiipula?

²⁶ Nale opo omuntu a vule okuuvitha okwa li e na okukala e na omukumo nuulaadhi. Mbela ando Aakriste yashili oya kala ngaa yi ilongekidhila elelo lyaKristus, ngele ando oya li inaaya longwa kutya iilonga yokuuvitha oya simana? Hasho nando. Nokuli oshilonga shoka osha li endhindhiliko enene ndyoka tali ka ulika kutya Kristus ota pangele megulu. (Mat. 24:14) Oshigwana shaKalunga osha li shi na okukwathelwa shi kale sha pititha komeho monkalamwenyo yasho iilonga yokuhupitha oomwenyo. Kunena otu na okwiipula tatu ti: ‘Mbela iilonga yokuuvitha oya simana ngaa monkalamwenyo yandje? Mbela ohandi ningi ngaa omaiyambo opo ndi kuthe ombinga thiluthilu muukalele?’

27, 28. Omuyapostoli Johannes okwa li a mono shike? Satana noompwidhuli dhe oya li yi inyenge ngiini sho Uukwaniilwa wa dhikwa po?

²⁷ Hugunina, omumvo 1914 osho gwa thiki. Ngaashi twe shi kundathana petameko lyontopolwa ndjika, kapwa li omuntu a mono iiningwanima mbyoka yituntula sho tayi ningwa megulu. Ihe omuyapostoli Johannes okwa li a mono emoniko ndyoka tali yi hokolola pathaneko. Kala ando wa fa wu wete Johannes e wete “endhindhiliko enene” megulu. Okwa mono “omukiintu,” sha hala okutya, ehangano lyaKalunga lyiishitwa yopambepo yomegulu, e li metegelelo e ta vala okanona okamati. Otatu lombwelwa kutya okanona haka kopathaneko, oka li ke li ‘pokupangela iigwana ayihe nondhimbo yosheela.’ Ihe sho okanona hoka ka valwa “oka fegulwa po noka falwa puKalunga noposhipangelapundi she.” Ewi enene megulu olya ti: “Ngashingeyi ehupitho  lyaKalunga olye ya! Ngashingeyi Kalunga okwa holola oonkondo dhuukwaniilwa we. Ngashingeyi Kristus okwa holola oonkondo dhe dhokupangela.” —  Eh. 12:1, 5, 10.

²⁸ Osha yela kutya Johannes okwa li u ulukilwa memoniko Uukwaniilwa wopaMesiasa sho tawu dhikwa po. Oshiningwanima shika osha li shituntula shili, ihe opwa li yamwe mboka inaaye shi nyanyukilwa. Satana pamwe naayengeli ye oya kondjitha aayengeli aadhiginini mboka ya li taya wilikwa kuMikael, nenge tu tye, kuKristus. Oshizemo osha li shini? Ombiimbeli otayi ti: “Oshikoko oshinene oshu umbwa mo megulu. Osho eyoka ndyoka hali ithanwa omuhindadhi nenge Satana, ngoka ta pukitha uuyuni auhe. Osho oshu umbilwa kombanda yevi pamwe naayengeli yasho ayehe.” —  Eh. 12:7, 9.

29, 30. Okuza sho Uukwaniilwa wopaMesiasa wa dhikwa po, onkalo oya lunduluka ngiini (a) kombanda yevi? (b) megulu?

²⁹ Aakonakoni yOmbiimbeli oya li ya popi momimvo ndhoka dha tetekele 1914 kutya momumvo moka otamu ka holoka uupyakadhi. Ihe nayo otashi vulika ya li ya kumwa sho shoka ya popile sha gwanithwa po thiluthilu. Satana okwa li ta ka nwetha mo aantu nayi, ngaashi tashi hololwa memoniko lyaJohannes, tali ti: “Ihe iihuna otayi ka kala yi thike peni kombanda yevi nomefuta! Oshoka omuhindadhi okwa kulukile kune u udha ondjahi, sho e shi shi kutya oku na ko ashike okathimbo okafupi kowala.” (Eh. 12:12) Mo 1914, omwa holoka iita yotango yuuyuni, nendhindhiliko lyokuya kwaKristus e li omupangeli olya holoka. ‘Nomasiku gahugunina’ guuyuni mbuka oga tameke. —  2 Tim. 3:1, NW.

³⁰ Mepingathano naashoka, megulu omwa holoka enyanyu. Satana naayengeli ye oya li ya tidhwa mo megulu. Ehololo lyaJohannes otali ti: “Onkee ano nyanyukweni, ne omagulu naantu amuhe mboka mu li mo!” (Eh. 12:12) Okuza sho egulu lyo opalekwa naasho Jesus a langekwa po e li Omukwaniilwa, Uukwaniilwa wopaMesiasa owa li ngashingeyi tawu vulu okukwathela oshigwana shaKalunga kombanda yevi. Owa li tawu ka ninga po shike? Ngaashi twe shi mono petameko lyontopolwa, Kristus, ‘omutumwa ngoka ta popi ehangano,’ okwa li tango ta ka yogola aapiya yaKalunga yokombanda yevi. Okwa li te ke shi ninga ngiini?

31. Maleaki okwa li a hunganeke shike shi na sha neyogolo lyoshigwana shaKalunga, nehunganeko ndyoka olya gwanithwa ngiini? (Tala wo enyolo lyopevi.)

³¹ Maleaki okwa hunganeke kutya okuyogolwa hoka okwa li taku ka kala okudhigu. Okwa nyola a ti: “Olye ta vulu okwiidhidhimikila esiku ndyoka te ya? Olye ta vulu okukala ko, uuna ta holoka? Ota ka kala a fa othewa yekoha, a fa omulilo tagu hemuna uutale.” (Mal. 3:2) Oohapu ndhoka odha li dhoshili lela. Okuza mo 1914, oshigwana shaKalunga osha li sha yelekwa nokuhepekwa unene. Aakonakoni yOmbiimbeli oyendji oya tidhaganwa noya tulwa moondholongo sho Iita yoTango yUuyuni ya tameke. e

32. Okuza mo 1916, mehangano lyaJehova omwa holoka epiyagano lyashike?

³² Mehangano omwa li wo mwa holoka omapiyagano. Mo  1916, omumwatate Russell okwa hulitha, manga e na oomvula 64, shoka sha li sha halutha oyendji moshigwana shaKalunga. Peso lye osha li sha yele mo kutya aantu yamwe oya li taya gandja eitulomo lya pitilila kuye. Nonando omumwatate Russell ka li e shi hokwa, yamwe oya li ye mu simaneka sha pitilila. Oyendji oya li taya dhiladhila kutya kapu na we gulwe ta vulu okulonga aantu oshili, nayamwe oya tindi okuhuma komeho. Shika osha li she eta etopoko mehangano lyaJehova nuushunimonima.

33. Oshigwana shaKalunga osha li sha yelekwa ngiini sho shoka sha li sha tegelela inaashi gwanithwa?

³³ Oya li ya yelekwa ishewe sho shoka ya li ya tegelela inaashi gwanithwa. Nonando Oshungolangelo oya li ya popi kutya Omathimbo gAapagani nenge giigwana otaga ka hula mo 1914, aamwatate kaya li ye shi lela shoka tashi ka ningwa momumvo moka. (Luk. 21:24) Aamwatate oya li taya dhiladhila kutya mo 1914, Kristus okwa li te ki ila po omufuko gwe, nenge tu tye, ongundu yaagwayekwa, opo ya ka pangele pamwe naye megulu. Ihe shoka inashi ningwa. Lwopehulilo lyo 1917, Oshungolangelo oya li ya yelitha kutya omimvo 40 dheteyo odha li tadhi ka hula mo 1918. Ihe iilonga yokuuvitha kaya li ya hulu. Oya li tayi humu komeho neendelelo naasho esiku ndyoka lya piti. Oshifo osha li sha popi kutya eteyo olya hula, nethimbo lya hupu ko olya li lyokupupula. Ihe shika osha ningitha oyendji omwenyo omwiinayi e taye etha po okulongela Jehova.

34. Mo 1918 omwa li mwa holoka eyeleko lini, nomolwashike oongeleka dha li tadhi dhiladhila kutya oshigwana shaKalunga osha “sa”?

³⁴ Mo 1918 omwa li mwa holoka eyeleko enene. J. F. Rutherford, ngoka a pingene po C. T. Russell mokuwilika oshigwana shaKalunga, okwa li a kwatwa po pamwe nayakwawo yaheyali mboka ya li taya kwatele komeho. Oya pewa egeelo lyoomvula odhindji mondholongo yaAtlanta shaGeorgia muAmerika shaa li pauyuuki. Uule wokathimbo iilonga yoshigwana shaKalunga oya li ya fa ya yiwa moshipala. Aasita oyendji yoongeleka oya li ya nyanyukwa. Oya li taya dhiladhila kutya Aakonakoni yOmbiimbeli “oya sa” noitaye ya piyaganeke we, molwashoka “aawiliki” yawo oya tulwa mondholongo, oombelewa dhawo oonene moBrooklyn odha patwa niilonga yokuuvitha oya li tayi patanekwa moAmerika nomoEuropa. (Eh. 11:3, 7-10) Kaya li tuu ya puka!

35. Omolwashike Jesus e etha aalanduli ye ya patanekwe, nokwa li e ya kwathele ngiini?

³⁵ Aapataneki mbaka kaya li ye shi shi kutya Jesus okwa li a pitike aalanduli ye ya hepekwe, molwashoka Jehova okwa li te ya yogola “a fa omuhemuni ta yelitha oshisiliveli noshingoli.” (Mal. 3:3) Jehova nOmwana oya li ye shi shi kutya konima ngele aantu mboka aadhiginini ya piti mo momayeleko ngoka otaya ka kala ya yogolwa noya gwana okulongela Omukwaniilwa. Lwopetameko lyo 1919, ombepo ondjapuki yaKalunga oya ningi oshinima shoka aatondi inaaya tegelela shi ningwe. Oshigwana shaKalunga oshidhiginini osha li sha yumuka po. (Eh. 11:11) Pethimbo ndyoka, Kristus okwa li a gwanitha po endhindhiliko lya simana ndyoka tali ulike kutya omasiku gahugunina oge li metifa. Okwa li a langeke po “omupiya omudhiginini nomunandunge,”  (NW) okangundu kaamwatate aagwayekwa mboka taya ka wilika oshigwana she moku shi palutha pambepo pethimbo lyo opala. —  Mat. 24:45-47.

36. Oshike sha li shu ulike kutya oshigwana shaKalunga osha yumuka po pambepo?

³⁶ Omumwatate Rutherford naayakuli ye oya li ya pitithwa mo mondholongo mo 26 Maalitsa 1919. Nziya konima yaashoka oya li ya longekidha pu ka ningwe oshigongi muSeptemba. Oya tameke wo okuninga omalongekidho pu totwe oshifo oshipe shedhina The Golden Age. Osha li sha nuninwa okulongithwa momapya pamwe nOshungolangelo. f Omvula oyo tuu ndjoka oya tameke okunyanyangidha okafo kedhina Bulletin, hoka ngashingeyi haki ithanwa okafo kokulongithwa pokugongala kOnkalamwenyo yopaKriste niilonga yetu yokuuvitha. Okuza petameko oka kala haka kwathele aamwatate ya pondole momapya. Okuza mo 1919 iilonga yegumbo negumbo oya li ya tsuwa omuthindo.

37. Konima yo 1919, yamwe oya li yu ulike ngiini kutya kaye shi aadhiginini?

³⁷ Iilonga yokuuvitha oya tsikile okukutha omakunde mooshendje, ano okuyogola aalanduli yaKristus, oshoka aanuuntsa kaya li ya hala oku yi longa. Mboka ya li inaaya hala okuuvitha oya zi mo mehangano lyaJehova. Konima yo 1919, mboka kaaye shi aavuliki oya geye noonkondo noya tameke okulundila aapiya  yaJehova aadhiginini e taya ambidhidha nokuli aahepeki yawo.

38. Okupondola nokusindana kwaalanduli yaKristus kombanda yevi otaku tu ulukile shike?

³⁸ Nonando oya li taya hepekwa ngaaka, aalanduli yaKristus kombanda yevi oya tsikile oku shi enditha nawa pambepo. Okupondola kwawo otaku ulike kutya Uukwaniilwa waKalunga otawu pangele! Aantu inaaya gwanenena otaya vulu owala okusinda Satana nuuyuni we wa kolokosha kekwatho lyaKalunga, ndyoka ha gandja okupitila mOmwana nomUukwaniilwa wopaMesiasa. —  Lesha Jesaja 54:17.

39, 40. (a) Membo ndika omu na shike? (b) Okukonakona embo ndika otaku ke ku kwathela ngiini?

³⁹ Moontopolwa tadhi landula otatu ka kundathana shoka Uukwaniilwa waKalunga wa pondola kombanda yevi sho wa tameke okupangela megulu. Oshitopolwa kehe shembo ndika otashi ka kundathana kombinga yoshilonga shokondandalunde shoka Uukwaniilwa tawu ningi kombanda yevi. Montopolwa kehe, otamu ka kala oshimpungu sheendululo shoka tashi ke tu kwathela paumwene tu mone ngele Uukwaniilwa epangelo lyolela kutse. Oontopolwa dhahugunina, otadhi ka kundathana shoka Uukwaniilwa tawu ka ninga monakuyiwa yi li popepi sho tawu ke ya okuhanagula po aakolokoshi nokuninga evi oparadisa. Okukonakona embo ndika otaku ke ku kwathela ngiini?

⁴⁰ Satana okwa hala wu kanithe eitaalo lyoye mUukwaniilwa waKalunga. Ihe Jehova okwa hala oku li koleka, opo li ku gamene. (Ef. 6:16) Onkee ano, otatu ku ladhipike wu konakone embo ndika pamwe negalikano. Sho to shi ningi, ipula to ti: ‘Mbela Uukwaniilwa waKalunga epangelo ngaa lyolela kungame?’ Ngele owolela kungoye ngashingeyi, otashi ke ku kwathela wu kale to wu ambidhidha nuudhiginini, sigo esiku ndyoka ayehe taya ka mona kutya owolela notawu pangele!