1, 2. Kiko tabata e suseso di mas grandi ku a yega di tuma lugá den historia di mundu, i dikon hende no a mira esei?

 BO A yega di puntra bo mes kon lo bo a sinti bo si bo tabata na bida durante un tempu den historia kaminda un kambio grandi a tuma lugá? Hopi hende sa puntra nan mes esei. Pero pensa un ratu: Si bo tabata na bida den un tempu históriko asina, bo ta kere ku abo lo a mira e susesonan klave ku lo a trese e kambio? Kisas nò. Hopi biaha, susesonan ku a marka kaida di régimennan bieu i ku a yena páginanan di historia a tuma lugá fuera di bista públiko. Den un sentido, gran parti di historia a desaroyá tras di porta será: den palasio real, den sala privá di konseho òf den ofisina di gobièrnu. Apesar di esaki, e kambionan ei a afektá bida di miónes di hende.

² Kiko di e suseso di mas grandi ku a yega di tuma lugá den historia di mundu? E suseso ei a toka bida di miónes di hende. Sinembargo, el a tuma lugá fuera di bista humano. Naturalmente, nos ta referí na nasementu di e Reino di Dios den shelu, esta, e dia ku e gobièrnu Mesiániko a kuminsá reina. E gobièrnu akí, primintí for di basta tempu pasá, pronto lo trese un fin na henter e mundu di maldat akí. (Lesa Daniel 2:34, 35, 44, 45.) Niun hende no a mira e nasementu históriko ei tuma lugá. Akaso nos tin ku konkluí ku Yehova a skonde e suseso akí pa humanidat? Òf, mas bien, el a prepará su pueblo leal pa esei for di antemano? Laga nos wak.

3-5. (a) Ken tabata “e mensahero di e aliansa” menshoná na Malakías 3:1? (b) Kiko lo a pasa promé ku “e mensahero di e aliansa” bini na e tèmpel?

³ For di antigwedat, Yehova su propósito tabata pa prepará su pueblo pa nasementu di e Reino Mesiániko. Por ehèmpel, konsiderá e profesia di Malakías 3:1: “Mira, mi ta bai manda mi mensahero, i e lo prepará e kaminda mi dilanti. I e Señor, kende boso ta buska, diripiente lo bini na su tèmpel; i e mensahero di e aliansa, den kende boso tin delisia, at’é ta bini.”

⁴ E profesia ei tin un kumplimentu den nos tempu. Pues, ki dia Yehova, “e Señor,” a bin inspekshoná su tèmpel? E profesia ta indiká ku Yehova lo a bini huntu ku “e mensahero di e  aliansa.” Ken esei tabata? Ken mas ku no ta e Rei Mesiániko, Hesukristu? (Luk. 1:68-73) Komo e Gobernante resien koroná, lo el a inspekshoná i refiná e pueblo di Dios riba tera ku ta sirbi den e patio terenal di su tèmpel spiritual.—1 Ped. 4:17.

⁵ Pero ken tabata e otro “mensahero,” esun menshoná promé na Malakías 3:1? E personahe profétiko akí lo tabata riba esenario basta promé ku presensia di e Rei Mesiániko. Akaso tabatin un persona ku a “prepará e kaminda” pa e Rei Mesiániko den e dékadanan promé ku 1914?

6. Segun profesia, ken a aktua komo e “mensahero” ku a bini promé pa prepará e pueblo di Dios pa e susesonan ku tabata na kaminda?

⁶ E buki ku bo ta lesando akí lo kontestá e preguntanan ei kontando e historia emoshonante di e pueblo di Yehova di nos tempu. E historia akí ta mustra ku den e último parti di siglo 19, un grupo chikitu di hende sinsero a kuminsá destaká—den e kunuku grandi di kristiannan falsu—komo e úniko kuerpo di kristiannan berdadero. E grupo ei a bira konosí komo Studiantenan di Beibel. E rumannan ku tabata dirigí e grupo ei—Charles T. Russell ku su kolaboradónan—en bèrdat a aktua komo e “mensahero” profetisá, ya ku nan a duna guia spiritual na e pueblo di Dios i a prepar’é pa e susesonan ku tabata na kaminda. Laga nos analisá kuater manera ku e “mensahero” a hasi esei.

7, 8. (a) Durante siglo 19, ken a kuminsá saka na kla ku e doktrina di alma inmortal no ta kuadra ku bèrdat? (b) Menshoná algun otro siñansa falsu ku C. T. Russell ku su kolaboradónan a saka na kla.

⁷ Segun ku e “mensahero” di tempu moderno tabata studia e Palabra di Dios, nan a pidié su guia; nan a kompilá e bèrdatnan bíbliko ku tabata masha kla, i ku nan tur tabata di akuerdo kuné, i a publiká nan. Pa siglonan largu, mundu di kristiandat tabata kompletamente den skuridat spiritual; hopi di su siñansanan tabata ankrá den paganismo. Un bon ehèmpel di esaki ta e doktrina ku alma ta inmortal. Rònt di aña 1850, un par di studiante sinsero di Beibel a analisá e siñansa ei, i nan a mira ku e no tabatin apoyo di Beibel. Ku kurashi, Henry Grew, George Stetson i George Storrs a skirbi artíkulonan tokante esei i tambe a tene charlanan ku a saka e mentira satániko ei na kla. a Nan obra, na su turno, a yuda C. T. Russell ku su kolaboradónan haña un mihó komprondementu di e Skritura.

⁸ E grupo chikitu ei di Studiante di Beibel a deskubrí ku otro doktrinanan konektá ku e siñansa di alma inmortal tambe tabata konfuso i no a kuadra ku bèrdat, entre nan, e siñansa ku tur bon hende ta bai shelu i ku Dios ta tormentá alma di hende malbado den kandela eterno di fièrnu. Ku kurashi, Russell ku su kolaboradónan a saka e mentiranan ei na kla den kantidat di artíkulo, buki, pamfleta, tratado i sermon ku nan a publiká den korant.

9. Kon e revista E Toren di Vigilansia a mustra ku e doktrina di Trinidat ta falsu?

⁹ E Studiantenan di Beibel a mustra bon kla tambe ku e siñansa di Trinidat, un doktrina masha respetá tur kaminda, no  a kuadra ku bèrdat. Na 1887, e revista Zion’s Watch Tower a komentá: ‘E Skritura ta mustra bon kla ku Yehova i nos Señor Hesus no ta e mesun persona i ku kada un ta un; un ta e Tata i e otro ta e Yu.’ b Anto e artíkulo a sigui bisa ku tabata masha remarkabel mes ku e idea di un Dios triuno, es desir, tres Dios den un i a la bes un Dios den tres, a logra bira asina prominente i haña aseptashon general. Pero e solo echo ku esei a sosodé ta un prueba mas ku e iglesianan tabata morto na soño i Satanas a haña chèns di plama e siñansa falsu akí.

10. Kon E Toren di Vigilansia a indiká ku 1914 tabata un aña marká?

¹⁰ Manera e título kompleto di e revista Toren di Vigilansia di Sion i Anunsiadó di e Presensia di Kristu ta indiká, e revista akí tabata masha interesá den e profesianan relashoná ku e presensia di Kristu. E fiel redaktornan ungí ku tabata skirbi pa e revista a ripará ku e profesia di Daniel tokante e “shete periodo di tempu” tabatin di haber ku e tempu ku Dios su propósito lo a kumpli en konekshon ku e Reino Mesiániko. For di dékada di 1870, nan a señalá 1914 komo e aña ku e shete periodo di tempu akí lo a terminá. (Dan. 4:25; Luk. 21:24) Aunke nos rumannan di e  époka ei no a kapta e pleno nifikashon di e aña marká akí, nan a proklamá den tur skina loke nan tabata sa tokante bèrdatnan bíbliko i te awe nos ta sinti e efekto di nan proklamashon.

11, 12. (a) Na ken Ruman Russell a duna krédito pa loke e tabata siña hende? (b) Kon importante e trabou ku Russell ku su kolaboradónan a hasi den e dékadanan promé ku 1914 tabata?

¹¹ Ni Russell ni su fiel kolaboradónan no a tuma e krédito pa e bèrdatnan spiritual importante ei ku nan a saka na kla i komprondé. Russell a duna hopi krédito na otro hende ku tabat’ei promé kuné. Pero el a duna krédito prinsipalmente na Yehova Dios, Esun responsabel pa siña Su pueblo loke nan mester sa i na e tempu ku nan mester sa esei. Ta bisto ku Yehova a bendishoná e esfuerso ku Russell ku su kolaboradónan a hasi pa separá bèrdat for di mentira. Segun ku añanan a pasa, e diferensia entre nan i kristiandat a bira mas i mas bisto.

¹² E trabou ku e hòmbernan fiel ei a hasi di sali na defensa di bèrdatnan bíbliko den e dékadanan promé ku 1914 tabata simplemente asombroso! Mirando atras, e edishon di 1 di novèmber 1917 di E Toren di Vigilansia a komentá esaki: “Awe, miónes di hende a ser librá di e peso di miedu, imponé riba nan dor di e siñansa di fièrnu di kandela i otro doktrina falsu . . . E ola di Bèrdat, ku a kuminsá mas ku 40 aña pasá, ta kresiendo ketu bai i lo sigui krese te ora ku e tapa henter e tera; na lugá di oponentenan purba di stroba e Bèrdat di plama rònt mundu, nan por bien purba di usa un basora pa wanta e olanan di un oséano poderoso.”

13, 14. (a) Kon e “mensahero” a yuda prepará kaminda pa e Rei Mesiániko? (b) Kiko nos por siña for di nos rumannan ku a biba mas ku un siglo pasá?

¹³ Pensa un ratu: Akaso e pueblo di Dios lo tabata prepará pa e kuminsamentu di e presensia di Kristu si nan no por a distinguí Hesus for di su Tata, Yehova? Klaru ku nò! Tampoko nan lo no tabata prepará si nan a kere ku inmortalidat ta algu ku tur hende tin i no un regalo presioso ku Dios ta duna solamente un kantidat relativamente chikitu di siguidó di Kristu. Ni nan lo no tabata prepará tampoko si nan a kere ku Dios ta tormentá hende den fièrnu di kandela pa tur eternidat! Pues, no tin duda ku e “mensahero” a prepará kaminda pa e Rei Mesiániko!

¹⁴ Kiko di nos awe? Kiko nos por siña for di nos rumannan ku a biba mas ku un siglo pasá? Wèl, nos tambe mester ta bon lesadó i studiante di e Palabra di Dios. (Huan 17:3) Laga nos apetit pa kuminda spiritual sigui krese, segun ku e mundu materialista akí ta para seka den sentido spiritual!—Lesa 1 Timoteo 4:15.

15. Kiko e Studiantenan di Beibel a bin komprondé gradualmente? (Wak tambe e nota.)

¹⁵ E Studiantenan di Beibel tabata siña hende ku nan mester kibra tur laso ku iglesia mundano. Na 1879, E Toren di Vigilansia a menshoná e “iglesianan di Babilonia.” Na kiko e revista tabata referí? Na e funshon di papa? Na Iglesia Katóliko Romano? Wèl, pa hopi siglo gruponan protestant tabata bisa  ku ta asina. Pero e Studiantenan di Beibel a bin komprondé gradualmente ku e “Babilonia” di tempu aktual ta inkluí tur iglesia di kristiandat. Dikon? Pasobra nan tur ta siña doktrinanan falsu manera esnan ku nos a trata mas promé. c Ku tempu, nos publikashonnan a kuminsá bisa mas i mas dirèkt ki paso miembronan sinsero di e iglesianan di Babilonia mester tuma.

16, 17. (a) Kon Tomo 3 di Ourora di Milenio i E Toren di Vigilansia a urgi hende pa sali for di religion falsu? (b) Ki faktor a suak e spièrtamentunan di e tempu ei un tiki? (Wak nota.)

¹⁶ Por ehèmpel, na 1891, Tomo 3 di Ourora di Milenio a analisá kon Dios a rechasá Babilonia di nos tempu i a komentá: “Henter e sistema—un sistema di sistemanan—a ser rechasá,” sí, tur iglesia di kristiandat! E revista a agregá ku ‘awor nos ta hasi un yamada riba tur hende ku no ta simpatisá ku e doktrina- i práktikanan falsu di Babilonia pa separá nan mes for di dje.’

¹⁷ Pero ainda tabatin hende ku no a kita nan nòmber komo miembro di e iglesianan di kristiandat i ku a hustifiká esei, bisando: “Mi ta simpatisá kompletamente ku e bèrdat, i masha poko biaha mi ta asistí na otro reunion [religioso].” Pues, E Toren di Vigilansia di yanüari 1900 a duna un konseho na e hendenan ei. E artíkulo a puntra: ‘Akaso esaki ta korekto? Un hende por ta mitar den Babilonia i mitar pafó? Ta esaki ta e obedensia ku Dios ta rekerí i ku ta agradabel i aseptabel p’e? Klaru ku nò. Ora ku e miembro di e iglesia a djòin e denominashon ei, e miembro a drenta públikamente den un kombenio kuné, i e mester kumpli fielmente ku tur e kondishonnan di e kombenio ei te ora ku e renunsiá òf kanselá su membresia ofisialmente.’ Atraves di añanan, e mensahe ei a bira mas i mas fuerte. d Un sirbidó di Yehova mester kibra tur laso ku religion falsu.

18. Dikon hende mester a sali for di Babilonia e Grandi?

¹⁸ Pensa un ratu: Kristu lo tabatin un kuerpo di sirbidó prepará i ungí riba tera ora el a keda koroná komo Rei si e Studiantenan di Beibel no a proklamá ku regularidat e spièrtamentu pa sali for di Babilonia e Grandi? Naturalmente ku nò, pasobra ta solamente kristiannan ku no ta den gara di Babilonia por adorá Yehova “ku spiritu i ku bèrdat.” (Huan 4:24) Kiko di nos awe? Nos tambe ta determiná pa keda leu for di religion falsu? Si ta asina, laga nos sigui obedesé e mandamentu pa “sali for di dje, mi pueblo”!—Lesa Revelashon 18:4.

19, 20. Kon E Toren di Vigilansia a animá e pueblo di Dios pa reuní huntu pa adorá Dios?

¹⁹ E Studiantenan di Beibel tabata siña hende ku, kaminda ta posibel, rumannan den fe mester reuní huntu pa adorá Dios. Kristiannan berdadero no mester djis sali for di religion falsu. Ta masha importante tambe pa nan partisipá den adorashon berdadero. E Toren di Vigilansia, for di su promé edishonnan, a animá su lektornan pa reuní huntu pa adorá Dios. Por ehèmpel, den e edishon di yüli 1880, Ruman Russell a konta di un gira ku el a hasi komo diskursante. El a komentá ki un gran  animashon tur e reunionnan ei tabata, i el a urgi e lektornan pa manda karchi ku un informe di nan progreso i a primintí ku lo e publiká algun di nan. Ku ki meta? ‘Pa laga nos tur sa kon Señor ta bendishoná boso, i pa nos sa si boso ta sigui reuní huntu ku esnan ku ta kompartí boso fe presioso.’

²⁰ Na 1882, E Toren di Vigilansia tabatin un artíkulo titulá “Kristiannan Ta Reuní Huntu.” E artíkulo a animá kristiannan pa tene reunion pa asina nan “por edifiká, animá i fortalesé otro.” E artíkulo a sigui bisa: “No ta importá si tin hende siñá òf talentoso entre boso òf nò. Laga kada ken bini ku su mes Beibel, papel i pòtlot, i hasi mas tantu uso posibel di tur yudansa ku tin, manera por ehèmpel, un indèks alfabétiko . . . Skohe boso tópiko; pidi e guia di spiritu santu pa komprond’é; kaba lesa, pensa, kompará teksto bíbliko ku teksto bíbliko, i sigur spiritu santu lo guia boso na e bèrdat.”

21. E kongregashon di Allegheny, na Pennsylvania, a pone ki bon ehèmpel relashoná ku e trabou di pastoreo i asistensia na reunion?

²¹ E sede prinsipal di e Studiantenan di Beibel tabata na Merka, na e stat Allegheny, Pennsylvania. Einan e Studiantenan tabata  reuní huntu. Nan a pone un bon ehèmpel den esei, siguiendo e konseho inspirá ku ta pará na Hebreonan 10:24 i 25. (Les’é.) Hopi tempu despues, Charles Capen, un ruman di edat avansá, a konta kon e tabata asistí na e reunionnan ei na mucha. El a skirbi: “Ainda mi ta kòrda un di e tekstonan di Beibel pintá riba muraya di e salòn di asamblea di e Sosiedat ku a bisa: ‘Ún ta boso Maestro, sí Kristu; i boso tur ta ruman.’ Semper e teksto ei a keda grabá den mi mente, pasobra el a mustra ku no tin un distinshon di klero ku laiko entre e pueblo di Yehova.” (Mat. 23:8) Ruman Capen ta kòrda tambe e reunionnan stimulante, e animashon kaluroso i e esfuerso diligente di Ruman Russell pa pastoriá tur miembro di e kongregashon personalmente.

22. Kon hende fiel a reakshoná riba e animashon pa asistí na reunionnan kristian, i ki lès nos por siña for di nan?

²² Personanan fiel a reakshoná bon riba e ehèmpel akí i riba e instrukshon ku nan tabata risibí. Kongregashonnan a keda formá den otro estadonan, manera Ohio i Michigan, i despues den henter Norteamérika i otro paisnan. Pensa un ratu: Hende fiel lo tabata realmente prepará pa e presensia di Kristu si no a siña nan obedesé e konseho inspirá di reuní huntu pa adorá Dios? Klaru ku nò! Kiko di nos awe? Meskos ku e rumannan ei, nos mester ta determiná pa asistí regularmente na nos reunionnan kristian, buskando asina tur oportunidat pa adorá Dios huntu ku nos rumannan i pa nos ta un animashon spiritual pa otro.

23. Kon E Toren di Vigilansia a mustra bon kla ku tur ruman ungí mester prediká e bèrdat?

²³ E Studiantenan di Beibel tabata siña hende ku tur ruman ungí mester prediká e bèrdat. Na 1885, E Toren di Vigilansia a komentá: “Nos no mester lubidá ku tur miembro di e kuerpo ungí ta ungí pa prediká (Isa. 61:1), yamá pa e ministerio.” Un edishon di e revista di 1888 tabatin e animashon akí: “Nos enkargo ta masha kla . . . Un kos ta sigur, si nos ignor’é i bula pipa p’e, nos ta demostrá ku nos ta sirbidónan floho ku no meresé e yamada ku nos a haña pa e posishon elevá akí [komo ungí].”

24, 25. (a) Kon Russell ku su kolaboradónan a hasi mas ku djis animá hende pa prediká? (b) Kon un kòlportùr a deskribí su trabou den ‘e tempu ku no tabatin masha outo’?

²⁴ Ruman Russell ku su kolaboradónan a hasi mas ku djis animá e hendenan pa prediká. Tambe nan a kuminsá publiká un seri di tratado na ingles titulá Tratado pa Studiantenan di Beibel. Despues e nòmber a bira Teologia Antiguo—Publikashon Trimestral. Lektornan di E Toren di Vigilansia a risibí e tratadonan akí pa parti grátis pa públiko.

²⁵ E rumannan ku tabata dediká nan mes fultaim na sirbishi di vèlt—ku awe nos ta yama nan pionero—nan tabata yama kòlportùr. Un di nan tabata Charles Capen, menshoná anteriormente. Despues el a konta: “Mi tabata usa mapa di Departamento di Investigashon Geológiko di Merka pa yuda mi kubri e teritorio na Pennsylvania. Riba e mapanan akí tabatin tur kaya i kaminda, i esei a hasi posibel ku mi por a bai tur sekshon di kada region na pia. Tabatin biaha ku despues di pasa tres dia den áreanan di kunuku tumando pedido pa e seri di buki Estudio di e Skritura, mi tabata hür un kitoki pa entregá e bukinan. Hopi biaha, mi tabata pasa anochi serka e kunukeronan. E tempu ei no tabatin masha outo.”

26. (a) Dikon e pueblo di Dios mester a partisipá den e trabou di prediká pa nan por tabata prepará pa e reinado di Kristu? (b) Kiko ta bon pa nos puntra nos mes?

²⁶ E rumannan di e tempu ei mester tabatin hopi kurashi i entusiasmo pa sali bai prediká. Akaso kristiannan berdadero lo tabata prepará pa e reinado di Kristu si nan no a siña e importansia di e trabou di prediká? Nò, tòg? Bon mirá, e trabou ei lo mester a bira un rasgo importante di e presensia di Kristu. (Mat. 24:14) Lo mester a prepará e pueblo di Dios pa nan hasi e trabou ei e rasgo prinsipal di nan bida, ya ku esaki ta un obra ku lo salba bida di hopi hende. Ta bon pa nos awe puntra nos mes: ‘E trabou di prediká ta e rasgo prinsipal di mi bida? Mi ta hasi sakrifisio pa mi por partisipá plenamente den e aktividat ei?’

27, 28. Kiko apòstel Huan a mira den vishon, i kon Satanas ku su demoñonan a reakshoná riba nasementu di e Reino?

²⁷ Por fin e aña históriko a yega: 1914. Manera nos a konsiderá na prinsipio di e kapítulo akí, niun hende no tabata testigu di e susesonan glorioso ku a tuma lugá den shelu. Pero Yehova a duna apòstel Huan un vishon ku a deskribí esei ku palabranan simbóliko. Purba imaginá esaki: Huan a “mira un señal grandi den shelu.” E “muhé” di Dios, esta, su organisashon  di kriaturanan spiritual den shelu, tabata na estado i a duna lus na un yu hòmber. Beibel ta bisa nos ku pronto e yu simbóliko akí lo “goberná tur nashon ku un bara di heru.” Pero asina ku e yu a nase, el a “ser hibá lihé serka Dios i su trono.” Un stèm duru den shelu a bisa: “Nos Dios a trese salbashon pa hende, su poder a keda revelá, su Reino a keda establesé i su Kristu a kuminsá usa su outoridat.”—Rev. 12:1, 5, 10.

²⁸ No tin duda ku loke Huan a mira den e vishon ei tabata nasementu di e Reino Mesiániko. Esei sigur tabata un suseso glorioso, pero no ta tur persona a keda kontentu ku esaki. Satanas ku su demoñonan a bringa kontra e angelnan fiel, kendenan tabata bou di e liderato di Miguel, esta, Kristu. Kiko tabata e resultado? Nos ta lesa: “E dragon grandi, e kolebra original, esun ku yama Diabel i Satanas, ku ta gaña henter e tera habitá a ser bentá abou; el a ser bentá abou riba tera i su angelnan a ser bentá abou huntu kuné.”—Rev. 12:7, 9.

29, 30. Despues ku e Reino Mesiániko a nase, ki kambio a tuma lugá (a) riba tera i (b) den shelu?

²⁹ Hopi promé ku 1914, e Studiantenan di Beibel a bisa ku un tempu di problema lo a kuminsá na e aña ei. Pero nan mes no por a imaginá kon eksakto e pronóstiko ei lo a resultá di ta. Manera e vishon di Huan a revelá, awor Satanas lo tabatin un influensia hopi mas grandi riba humanidat: “Ai di tera i di laman, ya ku Diabel a baha bini serka boso yen di rabia, pasobra e sa ku a ked’é masha poko tempu.” (Rev. 12:12) Na 1914, e promé guera mundial a start i e señal ku a indiká Kristu su presensia komo Rei koroná a kuminsá kumpli mundialmente. E “último dianan” di e mundu malbado akí a kuminsá.—2 Tim. 3:1.

³⁰ Ma den shelu tabatin alegria. Hesus a saka Satanas ku su demoñonan for di einan pa semper. E relato di Huan ta bisa: “P’esei alegrá, shelu, i boso ku ta biba den dje!” (Rev. 12:12) Awor ku shelu tabata limpi i Hesus a keda koroná komo Rei, e Reino Mesiániko tabata kla pa sali na interes di e pueblo di Dios riba tera. Kiko tabata e promé kos ku e Reino lo a hasi? Manera nos a mira na prinsipio di e kapítulo akí, Kristu, komo e “mensahero di e aliansa,” lo a kuminsá na refiná e sirbidónan di Dios riba tera. Kiko esei a nifiká?

31. Kiko Malakías a profetisá tokante e periodo di refinamentu, i kon esei a kuminsá kumpli? (Wak tambe e nota.)

³¹ Malakías a profetisá ku e proseso di refinamentu lo no tabata fásil. El a skirbi: “Ken por soportá e dia di su binida? I ken por para ora ku e aparesé? Pasobra e ta manera kandela di un refinadó i manera habon di un labadó di paña.” (Mal. 3:2) E palabranan ei a resultá masha sierto. Kuminsando na 1914, e pueblo di Dios riba tera a konfrontá un seri di prueba i difikultat. Den e kayente di Promé Guera Mundial, hopi Studiante di Beibel a ser enkarselá i persiguí kruelmente. e

32. Ki turbulensia tabatin den e pueblo di Dios despues di 1916?

 ³² Den e organisashon mes tambe tabatin turbulensia. Na 1916, Ruman Russell a muri ku apénas 64 aña di edat, lagando hopi ruman den shòk. Su morto a saka na kla ku algun ruman tabata konsentrá muchu riba un solo hende. E echo ku Ruman Russell tabata un hòmber asina ehemplar a pone ku nan tabata kasi ador’é, apesar ku e mes no tabata ke esei. Hopi hende a kere ku e morto di Russell a nifiká ku e revelashon progresivo di e bèrdat a yega na un fin. P’esei algun di nan a resistí fuertemente kontra e esfuersonan pa sigui padilanti. E aktitut ei a kousa un apostasia ku a dividí e organisashon.

33. Kon e ekspektativanan ku no a kumpli a pone e fe di e pueblo di Dios na prueba?

³³ Un otro prueba difísil tabata e ekspektativanan ku no a kumpli. E Toren di Vigilansia a señalá korektamente ku 1914 tabata e aña ku e Tempu di e Paganonan lo a terminá, pero ainda e rumannan no a komprondé kiko presis lo a bai tuma lugá e aña ei. (Luk. 21:24) Nan a pensa ku na 1914 Kristu lo a hiba su brùit—ku a konsistí di rumannan ungí—shelu pa goberná huntu kuné einan. E speransa ei no a kristalisá. Na final di 1917, E Toren di Vigilansia a anunsiá ku un periodo di kosecha di 40 aña lo a terminá na kuminsamentu di aña 1918. Pero e trabou di prediká no a terminá. Despues ku e fecha ei a pasa, e predikashon a sigui prosperá. E revista a indiká e ora ei ku posiblemente e kosecha general a terminá, ma ku awor tabatin un periodo pa piki òf rekohé loke a keda atras. Tòg hopi hende a stòp di sirbi Yehova pasobra nan a keda desepshoná.

34. Ki prueba desalentador a surgi na 1918, i dikon kristiandat a kere ku e pueblo di Dios tabata “morto”?

³⁴ J. F. Rutherford a tuma e trabou di C. T. Russell over i a kuminsá dirigí e pueblo di Dios. Pero na 1918 a surgi un prueba desalentador. Polis a arestá Ruman Rutherford huntu ku 7 ruman hòmber responsabel. Korte a kondená nan inhustamente na kastigunan largu di prizòn i a enkarselá nan na Atlanta, Georgia. Pa un tempu a parse ku e trabou di e pueblo di Dios a paralisá. Hopi pastor di kristiandat a alegrá. Segun nan, e Studiantenan di Beibel molestioso ei tabata “morto.” Nan lo no a forma un menasa mas, ya ku nan “lidernan” tabata den prizòn, e sede na Brooklyn a sera i e trabou di prediká tabata bou di atake na Merka i Europa. (Rev. 11:3, 7-10) Ma e pastornan tabata mal kiboká!

35. Dikon Hesus a permití difikultat asotá su siguidónan, i kiko el a hasi pa yuda nan?

³⁵ Enemigunan di e bèrdat no tabata sa ku e úniko motibu pakiko Hesus a permití e difikultatnan akí asotá su pueblo ta pasobra e tempu ei Yehova tabata sintá komo “un refinadó i purifikadó di plata.” (Mal. 3:3) Yehova ku su Yu tabatin sigur ku e rumannan fiel lo a sali for di e pruebanan intenso ei bon refiná, purifiká i mihó prepará ku nunka pa traha den sirbishi di e Rei. Na prinsipio di 1919 a bira bisto ku e spiritu di Dios a  hasi nèt loke e enemigunan di su pueblo a kere tabata imposibel: El a rebibá e kristiannan fiel! (Rev. 11:11) Kristu a kumpli na e tempu ei ku un rasgo klave di e señal di e último dianan: El a nombra “e esklabo fiel i prudente,” esta, un grupo chikitu di hòmber ungí ku lo a dirigí su pueblo dor di distribuí kuminda spiritual na e debido tempu.—Mat. 24:45-47.

36. Kiko a demostrá ku e pueblo di Dios a kuminsá rebibá spiritualmente?

³⁶ Dia 26 di mart 1919, ofisialnan a laga Ruman Rutherford ku su kolaboradónan sali for di prizòn. Djis despues, nan a programá un kongreso pa sèptèmber di e aña ei. Nan a kuminsá traha plan pa publiká un di dos revista, ku lo a haña e nòmber The Golden Age (E Époka di Oro). E revista ei lo a kompañá E Toren di Vigilansia, i e intenshon tabata pa us’é den sirbishi di vèlt. f E mesun aña ei nan a publiká e promé edishon di Bulletin (Boletin), ku awe a bira e material i tarea pa e reunion Nos Bida i Sirbishi Kristian. For di prinsipio, e publikashon ei a stimulá partisipashon den e predikashon. Sin duda, di 1919 padilanti e sirbishi di kas pa kas a haña mas prioridat.

37. Den e añanan despues di 1919, kon algun kristian a resultá di ta infiel?

³⁷ E trabou di prediká a sigui refiná e sirbidónan di Kristu,  pasobra esnan ku tabata orguyoso i arogante no tabata dispuesto pa hasi un trabou humilde asina. Esnan ku no kier a partisipá den e trabou di prediká ei a separá nan mes for di e rumannan fiel. Den e añanan despues di 1919, algun kristian infiel a bira amargá i a kuminsá kalumniá i difamá fiel sirbidónan di Yehova i asta a djòin nan persiguidónan.

38. E éksito- i viktorianan di e siguidónan di Kristu riba tera ta duna nos prueba di kiko?

³⁸ Pero, apesar di e atakenan ei, e siguidónan di Kristu riba tera a sigui bona i prosperá spiritualmente. Kada un éksito i kada un viktoria ku nan tabatin di e tempu ei en adelante ta konvensé nos ku e Reino di Dios ta goberná! Kon un grupo di simpel hende imperfekto por tabatin viktoria tras di viktoria riba Satanas i e mundu malbado akí? Esei tabata posibel solamente ku e sosten i bendishon di Dios, ku e ta perkurá mediante su Yu i e Reino Mesiániko!—Lesa Isaías 54:17.

39, 40. (a) Kiko ta algun rasgo di e buki akí? (b) Ki benefisio bo por saka ora bo studia e buki akí?

³⁹ Den e kapítulonan ku lo sigui den e buki akí, nos lo analisá loke e Reino di Dios a logra riba tera durante e 100 añanan ku a pasa desde ku el a nase den shelu. Kada sekshon di e buki akí ta trata un otro aspekto di e trabou di Reino aki riba tera. Kada kapítulo tin un kuadro di repaso pa yuda nos kada un determiná kon real e Reino ta pa nos. Den e kapítulonan di konklushon, nos lo konsiderá kiko nos por ferwagt den futuro serkano ora ku e Reino bini pa destruí e malbadonan i introdusí e paradeis riba tera. Ki benefisio lo bo saka ora bo studia e buki akí?

⁴⁰ Satanas ke kaba ku bo fe den e Reino di Dios. Pero Yehova ke fortalesé bo fe pa asina bo fe por protehá bo i tene bo fuerte. (Efe. 6:16) Pues, nos ke animá bo pa studia e buki akí diligentemente. Keda puntra bo mes: ‘Mi ta mira e Reino di Dios komo algu real?’ Mas fuerte bo fe ta den e Reino, mas grandi e chèns ta ku lo bo t’ei dia ku tur hende lo mira ku e ta real i ku e ta goberná. Lo bo ta entre nan, apoyando e Reino di Dios akí fielmente i aktivamente!