1, 2. Kasi ntchinthu wuli chapadera icho chikachitika kuchanya kwambura ŵanthu pa charu chapasi kumanya, ndipo chifukwa wuli ntchakuzizika yayi kuti ŵanthu ŵakaleka kumanya?

TIYELEZGERE kuti mukaŵako apo chinthu chinyake chambura kuluwika chikachitika pa charu chapasi. Kasi mukughanaghana kuti mphanyi namwe mukawona icho chikachitiska kuti vinthu visinthe? Yayi. Chifukwa para ŵanthu ŵakukhumba kusintha vinthu mu charu, kanandi ŵakuchita ivi kwambura ŵanandi kumanya. Ŵangakumana kumphepete na kusintha vinthu. Ndipouli, ivyo ŵangachita vingakhwaska ŵanandi.

² Pa charu chapasi pakachitika chinthu chinyake icho chikaŵa chindachitikepo, kweni chili kukhwaska ŵanthu mamiliyoni ghanandi. Ndipouli, palije uyo wakamanya ivyo vikachitikanga. Apa tikuyowoya za kubabika kwa Ufumu wa Chiuta kuchanya. Ufumu uwu, Chiuta wakalayizga ni kale chomene ndipo sonosono apa uwuskengepo charu chiheni ichi. (Ŵerengani Daniyeli 2:34, 35, 44, 45.) Ŵanthu ŵakamanya chilichose yayi apo Ufumu uwu ukababikanga kuchanya. Kasi ndikuti Yehova wakakhumba yayi kuti ŵanthu ŵamanye? Panji kasi wakaŵaphalirapo kale ŵateŵeti ŵake? Tiyeni tiwone.

3-5. (a) Kasi “thenga la phangano” ilo lazunulika pa Malaki 3:1 ni njani? (b) Ntchivichi chikeneranga kuchitika pambere “thenga” ili lindize kuzakendera tempile lauzimu?

³ Kwamba kale, Yehova wakakhumbanga kuti ŵanthu ŵake ŵamanye vya kubabika kwa Ufumu wa Khristu. Wonani uchimi uwo uli pa Malaki 3:1. Uchimi uwu ukuti: “Wonani! Nkhutuma thenga lane, ndipo lizamunozga nthowa panthazi pane. Ndipo Fumu yanadi iyo mukupenja, yizamwiza ku tempile lake mwamabuchi. Ndipo thenga la phangano ilo mukukondwa nalo, lizamwiza.”

⁴ Kasi Yehova, “Fumu yanadi,” wakiza pawuli kuzakendera awo ŵakateŵeteranga mu tempile lauzimu pa charu chapasi? Uchimi uwu ukuti Yehova wizenge pamoza na “thenga la phangano.” Kasi thenga ili ni njani? Ni  Yesu Khristu. (Luka 1:68-73) Pakuŵa Themba lakusoleka, Yesu wakenera kuzakendera na kutozga ŵanthu ŵa Chiuta pano pasi.—1 Pet. 4:17.

⁵ Kasi “thenga” lakwamba ilo likuzunulika pa Malaki 3:1 ni njani? Uchimi uwu, ukeneranga kufiskika pambere Yesu wandaŵe Themba. Thenga linyake likeneranga kunozga dankha nthowa. Kasi walipo uyo ‘wakalinozgera nthowa’ Themba ili pambere chaka cha 1914 chindafike?

6. Kasi mbanjani awo ŵakaŵa nga ni “thenga” lakwamba, ndipo ŵakaŵa na ntchito wuli?

⁶ Mazgoro gha mafumbo agha ghakusangika mu buku ili, chifukwa likulongosora mdauko wa Ŵakaboni ŵa Yehova. Mdauko uwu ukulongora kuti m’ma 1800, pakaŵa gulu lichoko waka la Ŵakhristu ŵaunenesko. Gulu ili likamanyikwanga na zina lakuti Ŵasambiri ŵa Baibolo. Charles T. Russell na ŵanyake, ndiwo ŵakalongozganga gulu ili. Ndiwo ŵakaŵa nga ni “thenga” ilo likayowoyekerathu. Ŵakhristu aŵa ŵakapelekanga ulongozgi ku ŵanthu ŵa Chiuta kuti ŵanozgekere vyamunthazi. Kasi “thenga” ili likachita wuli? Tiyeni tiwone nthowa zinayi.

7, 8. (a) M’ma 1800, kasi mbanjani ŵakabowozga chisambizgo chautesi chakuti mzimu ukuleka kufwa? (b) Kasi ni visambizgo wuli vinyake vyautesi ivyo C. T. Russell na ŵanyake ŵakavumbura?

⁷ Ŵasambiri ŵa Baibolo ŵakasandanga Mazgu gha Chiuta, kulomba na kulemba mabuku. Visopa vyose Vyachikhristu, vikaŵa mu chisi chauzimu, chifukwa visambizgo vyawo vikaŵa vya mu Baibolo yayi. Visopa vikusambizga kuti mzimu ukufwa yayi. M’ma 1800, ŵasambiri ŵa Baibolo ŵakamanya kuti chisambizgo ichi mulije mu Baibolo. Henry Grew, George Stetson, na George Storrs, ŵakalemba mabuku na nkhani mu manyuzipepara, kusambizga ŵanthu mwachikanga kuti chisambizgo ichi ntchautesi. * C. T. Russell na ŵanyake, ŵakachontheka na ivyo ŵanthu aŵa ŵakalemba, ndipo ŵakamba kughanaghanirapo.

⁸ Ŵasambiri ŵa Baibolo aŵa ŵakabowozgaso visambizgo vinyake vyautesi. Pali chisambizgo chakuti ŵanthu wose ŵawemi ŵakuluta kuchanya na chakuti Chiuta wakulanga ŵanthu ku moto. Russell pamoza na ŵanyake, ŵakalemba mathirakiti, mabuku, na nkhani zinyake mu manyuzipepara, kususka visambizgo ivi.

9. Kasi magazini ya Zion’s Watch Tower yikati wuli pa chisambizgo chakuti kuli ŵachiuta ŵatatu?

⁹ Ŵasambiri ŵa Baibolo aŵa ŵakavumburaso kuti chisambizgo chakuti kuli ŵachiuta ŵatatu mwa yumoza, ntchautesi. Mu 1887, magazini ya Zion’s Watch Tower iyo sono ni Gongwe la Mulinda, yikati: “Malemba ghakulongosora mwakupulikikwa makora chomene kuti Yesu na Yehova mbakupambana.” Magazini iyi yikatiso chakuzizika  ntchakuti, “ŵanthu ŵanandi ŵakugomezga chisambizgo chakuti kuli ŵachiuta ŵatatu mwa yumoza. Uwu mbukaboni wakuti matchalitchi ghali mu wuzga wa visambizgo vyautesi.”

10. Kasi ŵakuphakazgika ŵakamanya kuti ntchivichi chizamuchitika mu 1914?

¹⁰ Chilato chikuru cha magazini ya Zion’s Watch Tower and Herald of Christ’s Presence, chikaŵa chakuti yilongosore mauchimi ghakuyowoya vya kuŵapo kwa Khristu. Ŵakhristu ŵakuphakazgika awo ŵakalembanga magazini iyi, ŵakamanya kuti pali kukolerana pakati pa uchimi wa Daniyeli wakuyowoya za “nyengo 7,” na kufiskika kwa khumbo la Chiuta lakukhwaskana na Ufumu wake. M’ma 1870, ŵakamanya kuti nyengo 7 zizamumalira mu 1914. (Dan. 4:25; Luka 21:24) Nangauli ŵabali ŵithu mu nyengo yira ŵakamanyanga vinandi yayi, kweni tikugomezga kuti ŵakayowoya unenesko.

11, 12. (a) Kasi Mubali Russell wakawonga njani chifukwa cha kubowozga unenesko? (b) Kasi ivyo Russell na ŵanyake ŵakachita, vikawovwira wuli ŵanthu?

¹¹ Russell pamoza na ŵanyake ŵakajilumbapo yayi chifukwa cha kubowozga unenesko. Ndipouli, Russell  wakawonga chomene ŵanyake awo ŵakaŵa ŵakwamba kubowozga unenesko. Kweni wakalumba chomene Yehova Chiuta uyo wakusambizga awo ŵakukhumba kumanya unenesko, ndipo wakuŵasambizga pa nyengo yakwenelera. Yehova wakatumbika nadi chitatata cha Mubali Russell pamoza na ŵanyake, chifukwa ŵakasuja viswaswa ku unenesko. Pamasinda, ŵakamba kupambana chomene na matchalitchi.

¹² Chikaŵa chakuzizika chomene kuti ŵanalume ŵakugomezgeka aŵa ŵakabowozga unenesko pambere chaka cha 1914 chindafike. Gongwe la Mulinda la Novembala 1, 1917, likati: “Ŵanthu ŵanandi ŵamanya unenesko ndipo ŵafwatuka ku chisambizgo chautesi chakuti Chiuta wakulanga ŵanthu ku moto na visambizgo vinyake. . . . Unenesko uwo ukamba vyaka 40 ivyo vyajumpha, ukulutilira kuthandazgika m’paka ukwane pa charu chose chapasi. Nangauli ŵalwani ŵanandi ŵakuyezga kuwujandizga, kweni palije icho ŵangachita.”

13, 14. (a) Kasi “thenga” likachita vichi kuti lijulire nthowa Khristu? (b) Kasi tikusambirako vichi ku ŵabali aŵa?

¹³ Ghanaghanirani fundo iyi: Kasi ŵanthu ŵa Chiuta ŵakate ŵamanyenge wuli kuti Khristu wamba kuwusa, kuŵenge kuti ŵakamanya yayi mphambano pakati pa Yesu na Yehova? Mphanyi chikaŵa chakusuzga. Ndiposo kuŵenge kuti ŵakagomezganga kuti ŵanthu wose ŵakuluta kuchanya, kweniso kuti Chiuta wakulanga ŵanthu ku moto, mphanyi ŵakanozgekera wuli kuŵapo kwa Khristu? Ndicho chifukwa pakakhumbikwanga “thenga” kuti lijulire nthowa Themba Khristu.

¹⁴ Ise ke, kasi tingasambirako vichi ku ŵabali aŵa? Nase tikwenera kusambira Mazgu gha Chiuta. (Yoh. 17:3) Mu charu ichi ŵanthu ŵanandi mtima wawo wose uli pa vinthu vyakuthupi. Ntheura mbalwari chifukwa ŵalije chakurya chauzimu. Kweni ise tikwenera kulutilira kutemwa Mazgu gha Chiuta.—Ŵerengani 1 Timote 4:15.

15. Kasi Ŵasambiri ŵa Baibolo ŵakamanya vichi? (Wonaniso mazgu ghamusi.)

¹⁵ Ŵasambiri ŵa Baibolo ŵakamba kusambizga ŵanthu kuti chingaŵa chiwemi kufumamo mu visopa vyautesi. Mu 1879, Gongwe la Mulinda likayowoyapo vya Babuloni Mukuru. Kasi ŵakanenanga tchalitchi la Katolika? Visopa ivyo vikafuma mu tchalitchi la Katolika, vikatenge tchalitchi ili ndilo ni Babuloni uyo wakuzunulika mu Baibolo. Kweni pachoko na pachoko Ŵasambiri ŵa Baibolo ŵakamanya kuti visopa vyose vyautesi ndiyo ni Babuloni. Chifukwa wuli? Chifukwa vyose vikasambizganga  mautesi agho tazunura. * Pamasinda, mabuku ghithu ghakalongosora ivyo ŵanthu ŵawemi mtima awo ŵakaŵa mu visopa vyautesi ŵakenera kuchita.

16, 17. (a) Kasi mu buku la Millennial Dawn na Zion’s Watch Tower mukaŵa chenjezgo wuli? (b) Kasi ntchivichi icho chikawovwira Ŵakhristu aŵa kuti ŵapulikire chenjezgo? (Wonani mazgu ghamusi.)

¹⁶ Mwachiyelezgero, mu 1891 buku linyake likati: “Yehova wakuvitinkha visopa vyose vyautesi. Ndipo wose awo ŵakukayikira visambizgo vya visopa ivi, ŵakwenera kufumamo.”—Millennial Dawn

¹⁷ Mu Janyuwale, 1900, Gongwe la Mulinda likachenjezga awo ŵakaŵa ŵandasisite mazina ghawo ku visopa kuti ŵaleke kujikhungurufya na kughanaghana kuti: “Nanjira kale mu chisopa chaunenesko, nakuti kunyake kura nga nkhulutako viŵi.” Mukaŵaso fumbo lakuti: “Kasi chingaŵa chakwenelera kuti lundi limoza tiŵe mu Babuloni, linyake mu chisopa chaunenesko? Kasi para munthu wangachita nthena, tingati wakupulikira Yehova na kumukondweska? Yayi. Para munthu wanjira chisopa ndikuti wachita nacho phangano ndipo wakwenera kupulikira na kulondezga fundo zose za chisopa icho m’paka apo . . . wazamuyowoyera kuti wafumamo.” Pamasinda, Ŵakhristu ŵakawona kuti ŵakenera kuchitapo kanthu mwaluŵiro. * Ŵakeneranga kulayira ku chisopa chautesi.

18. Chifukwa wuli chikaŵa chakwenelera kuti Ŵakhristu ŵafumemo mu “Babuloni Mukuru”?

¹⁸ Kasi ŵalekenge kupulikira chenjezgo lakuti ŵafumemo mu “Babuloni Mukuru,” mphanyi Yesu wakaŵa na Ŵakhristu ŵakuphakazgika pano pasi? Yayi. Chifukwa ŵekha awo ŵafumamo mu Babuloni ndiwo ŵangasopa Chiuta mu “mzimu na mu unenesko.” (Yoh. 4:24) Kasi nase tili kufumamo nadi mu chisopa chautesi? Tikwenera kupulikira chenjezgo lakuti: “Fumanimo mwa iyo, mwaŵanthu ŵane.”—Ŵerengani Chivumbuzi 18:4.

19, 20. Kasi Gongwe la Mulinda likachiska Ŵakhristu kuti ŵachitenge vichi?

¹⁹ Ŵasambiri ŵa Baibolo ŵakachiskanga Ŵakhristu ŵanyawo kuti ŵawunganenge. Kufuma mu chisopa chautesi, ndiko kuŵa Mkhristu wanadi yayi. Munthu wakwenera kukhozgera kusopa kwaunenesko. Kufuma pakwamba Gongwe la Mulinda likachiskanga ŵanthu kuti ŵawunganenge na kusopa Yehova. Mu Julayi 1880, Mubali Russell wakayowoya umo maungano ghakenderanga. Wakachiska ŵabali kuti ŵatumenge malipoti gha maungano. Ndipo wakati ghanyake ghaŵenge mu magazini. Chifukwa? Wakati: “Kuti tose timanye umo Fumu yikumutumbikirani . . . kweniso kuti timanye usange mukulutilira kuwungana na ŵabali ŵithu mu chipulikano.”

²⁰ Mu 1882, mu Gongwe la Mulinda mukaŵa nkhani ya mutu wakuti, “Kuwungana Pamoza.” Nkhani iyi yikati  Ŵakhristu ŵawunganenge kuti “ŵasambizgike na kukhozgana yumoza na munyake.” Yikatiso “kwali munthu wakumanya vinthu, kwali ngwakusambira, kweni waliyose wayeghenge Baibolo, pepara, chakulembera, na kusambira Malemba mwakukwana. . . . Sankhani mutu wakuti mudumbiskane, lombani mzimu wa Chiuta kuti umovwirani, Ŵerengani Baibolo na kughanaghanirapo, ndipo yaniskani malemba na ivyo malemba ghanyake ghakuyowoya. Para mwachita ivi, musangenge nadi unenesko.”

21. Longosorani umo vinthu vikaŵira mu mpingo wa ku America pa nkhani ya kuwungana kweniso kwendera ŵabali.

²¹ Ŵasambiri ŵa Baibolo, ŵakaŵa na ofesi yawo ku Allegheny Pennsylvania mu charu cha America. Uku ndiko ŵakawungananga, kupulikira ivyo lemba la Ŵahebere 10:24, 25, likuyowoya. (Ŵerengani.) Mubali munyake muchekuru zina lake Charles Capen, nayo wakalutanga ku maungano apo wakaŵa msepuka. Iyo wakati: “Nichali kukumbuka Mazgu agho ghakalembeka pa chiliŵa, uko tikawungananga. Pakalembeka kuti, ‘Msambizgi winu njumoza ndipo imwe mose muli ŵabali.’ Mu gulu la Yehova,  palije uyo ngwapachanya kuluska munyake.” (Mat. 23:8) Mubali uyu wakati wakakhozgekanga pa maungano, kweniso Mubali Russell wakenderanga waliyose na kumukhozga.

22. Kasi Ŵakhristu ŵakugomezgeka ŵakachita wuli ŵati ŵachiskika kuti ŵawunganenge, ndipo tikusambirapo vichi?

²² Awo ŵakaŵa ŵakugomezgeka ŵakasambirako kwa Russell ndipo ŵakapulikiranga ulongozgi. Ntheura mipingo yikambika mu vigaŵa vinandi ku America, nga nkhu Ohio na Michigan, kweniso charu chose cha America na vyaru vinyake. Ghanaghanirani fundo iyi: Kasi ŵanthu ŵakugomezgeka mphanyi ŵakanozgekera kuŵapo kwa Khristu, ŵalekenge kusambizgika kuti ŵawunganenge? Yayi. Kasi tikusambirapo vichi? Nase tikwenera kuŵikapo mtima kuwungana nyengo zose nangauli chingaŵa chakusuzga. Kweniso tikwenera kukhwimiskana.

23. Kasi Gongwe la Mulinda likati Ŵakhristu ŵakuphakazgika ŵali na mulimo wuli?

²³ Ŵasambiri ŵa Baibolo ŵakagomezganga kuti Ŵakhristu wose ŵakuphakazgika ŵakwenera kupharazga. Mu 1885, Gongwe la Mulinda likati: “Tingaluwanga yayi kuti tili kuphakazgika kuti tipharazgenge. (Yes. 61:1) Tili kuchemekera uteŵeti.” Gongwe la Mulinda la mu 1888 likati: “Tose tikumanya iyo ni ntchito yithu . . . Kweni para tikuzerezga na kujigowokera, ndikuti tili ŵakata, tikuchimanya yayi icho tili kuphakazgikira.”

24, 25. (a) Kasi Mubali Russell na ŵanyake ŵakachita wuli pa mulimo wa kupharazga? (b) Kasi mupayiniya munyake wakachitanga wuli kuti wafiske kupharazga chigaŵa chake?

 ²⁴ Mubali Russell pamoza na ŵanyake, ŵakayowoyanga waka pa mulomo yayi kuti waliyose wapharazgenge. Ntheura ŵakamba kulemba mathirakiti ghakuchemeka Bible Students’ Tracts. Mathirakiti agha ŵakagaŵiranga ŵanthu kwawanangwa.

²⁵ Awo ŵakamaliranga nyengo yitali mu upharazgi ŵakachemekanga makopotara, awo pasono tikuti ŵapayiniya. Charles Capen uyo tamuzunura mu nkhani iyi, nayo wakaŵa mupayiniya. Iyo wakati: “Nkhaŵa na mapu gha chigaŵa cha Pennsylvania. Ndigho ghakanovwira kuti nipharazge mu chigaŵa chose ichi. Ghakalongoranga misewu yose mu chigaŵa ichi, ndipo nkhendanga wapasi. Nyengo zinyake nkhendanga ulendo wa mazuŵa ghatatu, kuti nimanye awo ŵakukhumba mabuku, ndipo nkhachitanga hayara hachi na ngolo yake kukapelekera mabuku agha. Para kwafipa nkhapemphanga malo ghakugona ku ŵalimi. Nyengo iyo, magalimoto ghakasangikanga viŵi yayi.”

26. (a) Chifukwa wuli ŵanthu ŵa Chiuta ŵakeneranga kulimbikira kupharazga? (b) Kasi tikwenera kujifumba mafumbo wuli?

²⁶ Pakakhumbikwanga chikanga na kulimbikira kuti ŵabali aŵa ŵapharazge mwakukwana. Kasi Ŵakhristu aŵa mphanyi ŵakanozgekera kuŵapo kwa Yesu ŵalekenge kumanya kuzirwa kwa mulimo wa kupharazga? Yayi. Nakuti ntchito iyi nayo yikazakaŵa chimanyikwiro chakuti Yesu wamba kuwusa. (Mat. 24:14) Ŵateŵeti ŵa Chiuta ŵakeneranga kumanya kuti kupharazga ni mulimo wakuzirwa chomene chifukwa ngwakuponoska umoyo. Nase tikwenera kujifumba kuti: ‘Kasi nkhuwona kuti mulimo wa kupharazga ngwakuzirwa chomene? Kasi nane nkhupharazga mwakukwana?’

27, 28. Kasi mpositole Yohane wakawona mboniwoni wuli? Kasi Satana na viŵanda vyake ŵakachita wuli Ufumu wa Chiuta ukati wababika kuchanya?

²⁷ Paumaliro, chaka chakuzirwa chomene cha 1914 chikafika. Nga umo tayowoyera pakwamba, palije uyo wakamanya ivyo vikachitikanga kuchanya. Ndipouli, mpositole Yohane wakawona mboniwoni ya ivyo vikachitika kuchanya ndipo vili na ng’anamuro lapadera. Iyo wakawona “chimanyikwiro chikuru” kuchanya. Wakawona “mwanakazi” wa Chiuta wali na nthumbo ndipo wakababa mwana mwanalume. Mwanakazi uyu wakwimira gulu la Chiuta la vilengiwa vyauzimu kuchanya. Baibolo likuti sonosono apa, mwana uyu “wazamuliska mitundu yose na ndodo yachisulo.” Ndipo mwana uyu wakati wababika, “wakatolekera kwa Chiuta na ku chitengo chake.” Kuchanya kukapulikikwa mazgu ghankhongono ghakuti: “Sono chafika chiponosko na nkhongono na Ufumu vya Chiuta withu na mazaza gha Khristu wake.”—Chivu. 12:1, 5, 10.

 ²⁸ Tikumanya kuti apa Yohane wakawona mboniwoni ya kubabika kwa Ufumu wa Khristu. Ichi chikaŵa chakukondweska nadi, nangauli ni wose yayi awo ŵakakondwa. Satana na viŵanda vyake ŵakarwa nkhondo na Mikayeli panji kuti Khristu, pamoza na ŵangelo ŵakugomezgeka. Kasi vikamara wuli? Baibolo likuti: “Chinjoka chikuru chikaponyeka pasi, njoka ya papo kale, iyo yikuchemeka Dyabulosi na Satana, uyo wakupuluska charu chose; wakaponyeka pa charu chapasi, ndipo ŵangelo ŵake ŵakaponyeka pasi pamoza nayo.”—Chivu. 12:7, 9.

29, 30. Ufumu wa Chiuta wati wababika, kasi ntchivichi icho chikachitika (a) pa charu? (b) kuchanya?

²⁹ Vyaka vinandi pambere chaka cha 1914 chindafike, ŵasambiri ŵa Baibolo ŵakayowoyerathu kuti masuzgo ghazamwamba mu chaka ichi. Kweni ŵakamanyanga makora yayi umo vizamuchitikira. Ivyo Yohane wakawona mu mboniwoni, vikuvumbura kuti Satana wakamba kuvulunganya vinthu pa charu. Baibolo likuti: “Soka ku charu chapasi na nyanja, chifukwa Dyabulosi wakhilira pasi kwa imwe, wali na ukali ukuru, pakumanya kuti wali na nyengo yifupi.” (Chivu. 12:12) Mu 1914, Nkhondo Yakwamba ya Charu Chose yikamba, ndipo ichi chikaŵa chimanyikwiro chakuti Khristu wamba kuwusa. Kweniso “mazuŵa ghaumaliro” ghakamba.—2 Tim. 3:1.

³⁰ Kweni kukaŵa chimwemwe chikuru kuchanya. Satana na viŵanda vyake ŵakachimbizgika. Yohane wakati: “Pa chifukwa ichi, kondwani imwe machanya na imwe mukukhala mwenemumo!” (Chivu. 12:12) Pamasinda, Yesu wakapika mazaza kuŵa Themba, kweni sono wakulindilira kuti wambe kuwusa ŵanthu pa charu. Kasi wazamuchita vichi? Nga umo tawonera kale, Khristu uyo ni “thenga la phangano,” chakwamba wazamutozga ŵanthu ŵa Chiuta pano pasi. Kasi ivi vikung’anamurachi?

31. Kasi ni vichi ivyo Malaki wakayowoyerathu kuti vizamuchitika, ndipo uchimi uwu ukafiskika wuli? (Wonaniso mazgu ghamusi.)

³¹ Malaki wakayowoyerathu kuti mulimo wa kutozga uzamuŵa upusu yayi. Iyo wakati: “Kasi ni njani uyo wazamuzizipizga pa zuŵa ilo thenga ili likwizira, ndipo ni njani wazamwima para lazakawoneka? Chifukwa lizamuŵa nga ni moto wa munthu wakwenga ndiposo nga ni sopo ya uyo wakuchapa.” (Mal 3:2) Mazgu agha ghakafiskika nadi. Kwamba mu 1914, ŵanthu ŵa Chiuta ŵakumana na viyezgo vikuru. Apo Nkhondo Yakwamba ya Charu Chose yikaŵa mukati, Ŵasambiri ŵa Baibolo ŵanandi ŵakatambuzgika na kujalirika mu jele. *

32. Ntchivichi chikachitika mu 1916, ndipo ŵanthu ŵa Chiuta ŵakakhwaskika wuli?

³² Mu gulu mukaŵaso nthimbanizgo yikuru iyo yikananga vinthu. Mu 1916, Mubali Russell wakafwa apo wakaŵa  na vyaka 64, ndipo ŵanthu ŵa Chiuta nkhongono zikaŵamalira. Nyifwa iyi yikavumbura kuti ŵanyake chigomezgo chawo chose chikaŵa mwa mubali uyu. Nangauli mubali Russell wakakananga ntchindi zapadera, kweni vikuwoneka kuti ŵanji ŵakaŵa nga ŵakumusopa. Ŵanandi ŵakawonanga kuti umo iyo wafwira, ndikuti kusopa kwaunenesko kwamara. Kweni ŵanji ŵakawelera yayi. Ivi vikachitiska kuti paŵe kugaŵikana.

33. Kasi ŵanthu ŵa Chiuta ŵakachita wuli apo ivyo ŵakalindiliranga vikatondeka?

³³ Chiyezgo chinyake chikaŵa chakuti ivyo ŵakalindiliranga vikachitika yayi. Nangauli Gongwe la Mulinda likayowoyapo kuti mu 1914 nyengo za ŵamitundu zimarenge, kweni ŵabali ŵakamanyanga makora yayi icho chichitikenge. (Luka 21:24) Kweniso ŵakaghanaghananga kuti mu 1914, ŵakuphakazgika wose ŵalutenge kuchanya. Ivi vikachitika yayi. Kuumaliro wa 1917, Gongwe la Mulinda likayowoya kuti vuna yichitikenge vyaka 40, ndipo yimarenge mu 1918. Ndipouli, ntchito ya kupharazga yikamara yayi, m’malo mwake yikalutilira. Magazini iyi yikati nyengo ya kuvuna yili kumara nadi, kweni kukakhala nyengo ya kuvulura. Lekani ŵanandi ŵakakhuŵara na kuleka kuteŵetera Yehova.

34. Kasi ntchivichi icho chikachitika mu 1918, ndipo chifukwa wuli ŵavisopa ŵakatenge mulimo wa Ŵakaboni ulutilirenge yayi?

³⁴ Mu 1918, pakawukaso suzgo linyake. Mubali J. F Rutherford uyo wakanjira m’malo mwa C. T. Russell, kulongozga ŵanthu ŵa Chiuta, wakakakika pamoza na ŵabali ŵanyake 7. Khoti likati ŵagwire ukayidi vyaka vinandi, ndipo ŵakaŵajalira mu jele ku Georgia, U.S.A. Pa nyengo iyi mulimo wa kupharazga ukatimbanizgika. Ntheura ŵavisopa ŵanandi ŵakakondwa chomene. Ŵakatenge panji mulimo wa Ŵakaboni umalirenge penepapo, chifukwa ŵalara ŵawo ŵaŵajalira. Kweniso mu America na ku Europe ŵakaŵakanizga kupharazga, ntheura ŵakaŵa nga ŵafwa. (Chivu. 11:3, 7-10) Apa ŵakajipusikanga waka.

35. Chifukwa wuli Yesu wakazomerezga kuti ŵalondezgi ŵake ŵakumane na masuzgo, ndipo wakaŵawovwira wuli?

³⁵ Kweni ŵavisopa ŵakamanyanga yayi icho Yesu wakazomerezgera kuti ŵanthu ŵake ŵayezgeke. Iyo wakakhumbanga kuti Yehova waŵatozge “nga ni golide ndiposo nga ni siliva.” (Mal. 3:3) Yehova na Mwana wake ŵakamanyanga kuti pa ŵanthu aŵa paŵenge ŵanyake awo ŵatozgekenge na kuŵa ŵakwenelera kuzakaŵa Mathemba pamoza na Yesu. Kwamba mu 1919, vikawonekerathu kuti mzimu wa Chiuta ukafiska ivyo ŵalwani ŵakatenge vingachitika yayi. Ŵateŵeti ŵakugomezgeka ŵakawukaso. (Chivu. 11:11) Pa nyengo iyi, uchimi wakuyowoya za  mazuŵa ghaumaliro ukamba kufiskika. Yesu wakimika “muzga wakugomezgeka na wavinjeru,” awo Mbakhristu ŵakuphakazgika ŵachoko waka kuti ŵapelekenge chakurya chauzimu pa nyengo yake.—Mat. 24:45-47.

36. Kasi ni vichi ivyo vikulongora kuti ŵabali ŵakawelera yayi mwauzimu?

³⁶ Pa 26 Malichi, 1919, Mubali Rutherford pamoza na ŵanyake ŵakafuma mu jele. Pakajumpha myezi yichoko waka, mbwenu ungano wa chigaŵa ukachitika mu Seputembala. Ŵakamba kulemba magazini ya The Golden Age iyo sono ni Wukani! Magazini iyi nayo yikaŵa yakupharazgira. * Mu chaka chenechichi ŵakambaso kulemba Bulletin iyo sono tikuti Uteŵeti na Umoyo Wachikhristu. Kwamba pakwamba, chilato chake chikaŵa cha kutovwira umo tingachitira pakupharazga. Kwamba mu 1919, ŵabali ŵachiskika chomene kuti ŵapharazgenge nyumba na nyumba.

37. Kasi ŵanji ŵakalongora wuli kuti mbambura kugomezgeka?

³⁷ Chaka cha 1919 chati chajumpha, ntchito ya kupharazga yikalutilira. Ndipo ŵabali ŵakatozgeka na mulimo uwu. Awo ŵakajikuzga, wakakolerana nayo yayi fundo  yakuti ŵapharazgenge. Ntheura ŵakafumamo mu gulu la ŵabali ŵakugomezgeka. Pamasinda ŵakanyanyara na kwamba kukolerana na ŵachigaluka. Kweniso ŵakamba kutambuzga ŵateŵeti ŵakugomezgeka ŵa Yehova.

38. Kasi ivyo Chiuta wakachitira ŵalondezgi ŵa Yesu mbukaboni wakuti wuli?

³⁸ Nangauli ndimo vikaŵira, ŵalondezgi ŵa Yesu ŵakalutilira kuchita makora mwauzimu. Vyose ivyo Chiuta wakaŵachitira, mbukaboni wakuti Ufumu wa Chiuta ukuwusa. Tili ŵambura kufikapo ndipo tikulimbana na charu cha Satana ichi. Kweni tikumanya kuti tingatonda para Yehova wakutovwira na mzimu wake.—Ŵerengani Yesaya 54:17.

39, 40. (a) Kasi mu buku ili muli vichi? (b) Kasi buku ili litovwirenge wuli?

³⁹ Mu Mitu yakunthazi, tisambirenge ivyo vikuchitika pano pasi kwamba apo Ufumu wa Chiuta ukababikira. Chigaŵa chilichose cha buku ili, chilongosorenge ivyo Ufumu wa Chiuta uli kuchita pano pasi. Kuumaliro wa Mutu uliwose kuli mafumbo ghakuti tiweleremo. Mafumbo agha ghawovwirenge waliyose kuwona usange wakugomezga kuti Ufumu wa Chiuta ukuwusa. Mitu yaumaliro yilongosorenge ivyo Ufumu uwu uchitenge sonosono para wamba kuwusa pano pasi. Kasi buku ili limovwiraninge wuli?

⁴⁰ Satana wakukhumba kuti tileke kugomezga Ufumu wa Chiuta. Kweni Yehova wakukhumba kuti tiŵe na chipulikano chakukhora na kuŵa ŵankhongono. (Efe. 6:16) Ntheura tikumuchiskani kuti musambire buku ili na kulomba. Jifumbani kuti, ‘Kasi nkhugomezga kuti Ufumu wa Chiuta uliko?’ Para mukugomezga ndikuti mukukhumba kuzakawusika na Ufumu uwu. Usange tikuchitako mwakukwana ntchito ya Ufumu mazuŵa ghano, para wiza, tizamujiwonera tekha kuti ngwanadi.