1, 2. Ano an pinakaimportante nga panhitabo nga mahitatabo ha kasaysayan han kalibotan, ngan kay ano nga diri urusahon nga waray nakakita hito?

NAHUNAHUNA mo na ba kon mationan-o an pagkinabuhi durante han pipira nga panhitabo nga nakagbag-o han kasaysayan? Kon buhi ka na hito nga panahon, makikita mo daw la an importante nga panhitabo? Posible nga diri. An mga panhitabo nga nagpoo han naglabay nga mga pan-gobyernohan ngan nahisurat ha mga libro han kasaysayan agsob nga waray makita han publiko. Ha pagkatinuod, kadak-an nga bahin han kasaysayan nahitabo ha diri panpubliko nga lugar—palasyo, pribado nga katirokan han konseho, o opisina han gobyerno. Kondi, minilyon an naapektohan hito.

² Kumusta man an pinakaimportante nga panhitabo nga mahitatabo ha kasaysayan han kalibotan? Ito nga panhitabo nakakaapekto ha minilyon nga mga tawo. Kondi, waray nakakita hito. Ito amo an kaestablisar han Ginhadian han Dios ha langit, an maiha na nga iginsaad nga Mesianiko nga gobyerno nga magtatapos hinin sistema han kalibotan ha diri na maiha. (Basaha an Daniel 2:34, 35, 44, 45.) Tungod kay waray nakakita han kaestablisar hito, masisiring ba naton nga igintago ito ni Jehova ha aton? O, iya ba lugod igin-aandam an iya maunungon nga katawohan ha pag-abot hito? Aton usisahon.

3-5. (a) Hin-o “an sinugo han kauyonan” nga gin-unabi ha Malakias 3:1? (b) Ano an mahitatabo antes “an sinugo han kauyonan” umabot ha templo?

³ Tikang pa ha kadaan nga panahon, katuyoan ni Jehova nga iandam an iya katawohan para ha kaestablisar han Mesianiko nga Ginhadian. Pananglitan, tagda an tagna ha Malakias 3:1: “Kitaa, ako nagpadara han akon sinugo, ngan hiya mag-aandam han dalan ha akon atubangan: ngan an Ginoo, nga iyo pinangingita, maabot ha hinanali ngada ha iya templo; ngan an sinugo han kauyonan, nga iyo ginhihingyap.”

⁴ Ha moderno nga panahon nga katumanan, kakan-o inabot hi Jehova, “an Ginoo,” basi usisahon an mga nag-aalagad ha bungsaran han iya espirituwal nga templo ha tuna? An tagna nasiring nga hi Jehova maabot upod “an sinugo han kauyonan.” Hin-o ito?  An Mesianiko nga Hadi, hi Jesu-Kristo! (Luc. 1:68-73) Sugad nga an bag-o nga Magmarando, hiya mag-uusisa ngan mag-uuray han katawohan han Dios dinhi ha tuna.—1 Ped. 4:17.

⁵ Pero, hin-o an usa pa nga “sinugo,” an siyahan nga gin-unabi ha Malakias 3:1? An igintagna nga sinugo maabot antes han presensya han Mesianiko nga Hadi. Ha mga dekada antes han 1914, may-ada ba ‘nag-andam han dalan’ para ha Mesianiko nga Hadi?

6. Hin-o an ginios sugad nga an igintagna nga “sinugo” nga siyahan nga inabot ha pag-andam ha katawohan han Dios para ha mga mahitatabo ha tidaraon?

⁶ Dinhi hini nga libro, mabibilngan naton an mga baton hito nga mga pakiana pinaagi han makapainteres nga kasaysayan han katawohan ni Jehova ha moderno nga panahon. Makikita hini nga kasaysayan nga ha urhi nga bahin han ika-19 ka siglo, may gutiay nga grupo han matinumanon nga katawohan nga binangon sugad nga an amo la nga grupo han tinuod nga sumurunod han Kristo ha kalibotan nga puno hin buwa nga Kristiano. Ito nga grupo nakilala sugad nga an mga Estudyante han Biblia. An mga nangunguna ha ira—hi Charles T. Russell ngan an iya mga kaupod—ginios sugad nga an igintagna nga “sinugo.” Hira naghatag hin espirituwal nga giya ngan nag-andam ha katawohan han Dios ha tiarabot nga mga panhitabo. Aton paghisgotan an upat nga paagi kon paonan-o ito ginbuhat han “sinugo.”

7, 8. (a) Hin-o an nagbuhayhag nga buwa an doktrina han pagin diri-mamaratyon han kalag ha dekada han 1800? (b) Ano nga iba pa nga katutdoan an iginbuhayhag nga buwa nira C. T. Russell ngan han iya mga kaupod?

⁷ An mga Estudyante han Biblia mainampoon nga nag-aram; ira ginkauruyonan, gintirok, ngan iginpublikar an matin-aw nga kamatuoran han Biblia. Ha damu ka siglo, an Kakristianohan naputos han espirituwal nga kasisidman; damu han doktrina hito an tikang ha paganismo. Usa hini an doktrina han pagin diri-mamaratyon han kalag. Kondi ha dekada han 1800, gin-usisa ito han pipira nga sinsero nga estudyante han Biblia ngan nakita nga diri ito uyon ha Pulong han Dios. Hira Henry Grew, George Stetson, ngan George Storrs maisugon nga nagsurat ngan nagdiskurso basi maibuhayhag iton sataniko nga buwa. * An ira mga ginbuhat nakaapekto gud kan C. T. Russell ngan han iya mga kaupod.

⁸ Hinbaroan liwat han mga Estudyante han Biblia nga nakakagupong ngan buwa an iba nga doktrina may kalabotan ha pagin diri-mamaratyon han kalag—pananglitan, an katutdoan nga an mag-opay nga tawo mapalangit o ginsasakit han Dios an diri-mamaratyon nga kalag han magraot nga tawo ha waray kataposan nga naglalaga nga impyerno. Ito nga kabuwaan maisugon nga iginbuhayhag ni Russell ngan han iya mga kaupod ha mga artikulo, libro, pampleta, tract, ngan napublikar nga sermon.

9. Paonan-o iginbuhayhag han Zion’s Watch Tower nga buwa an doktrina han Trinidad?

⁹ Iginbuhayhag liwat han mga Estudyante han Biblia nga buwa an kalyap nga gintotoohan nga doktrina han Trinidad. Han 1887, an Zion’s Watch Tower nagsiring: “Matin-aw nga iginpapakita han Kasuratan an pagkaiba han persona ni Jehova ngan han  aton Ginoo nga hi Jesus, ngan an ira eksakto nga relasyon.” Ito nagdugang liwat nga urusahon gud nga “an ideya han trinidad nga Dios—tulo nga Dios ha uusa nga persona, ngan usa nga Dios ha tulo nga persona—nagin popular ngan ginkarawat han publiko. Kondi tungod kay ito an nahitatabo, klaro la nga nahingaturog an singbahan samtang gin-gagapos han kaaway ha kadena han kasaypanan.”

10. Paonan-o nakahimo hin konklusyon an Watch Tower nga an tuig han 1914 importante nga tuig?

¹⁰ Sugad han iginpapasabot han ulohan hito, ginpapabilhan han Zion’s Watch Tower and Herald of Christ’s Presence an mga tagna may kalabotan ha presensya han Kristo. Nasabtan han matinumanon nga mga dinihogan nga nagsurat hito nga magasin nga an tagna ni Daniel mahitungod han “pito nga panahon” may-ada kalabotan ha katumanan han mga katuyoan han Dios ha Mesianiko nga Ginhadian. Bisan ha dekada han 1870 pa la, hira nasiring nga ha 1914 matatapos iton pito nga panahon. (Dan. 4:25; Luc. 21:24) Bisan kon waray bug-os nga hisabti han aton kabugtoan an kahulogan hiton importante nga tuig, ira iginpasamwak an ira hinbaroan, ngan dayag an resulta hito tubtob yana.

11, 12. (a) Hin-o an ginpasidunggan ni Bugto Russell ha mga butang nga iya igintutdo? (b) Mationan-o kaimportante an nahimo ni Russell ngan han iya mga kaupod mga dekada antes han 1914?

 ¹¹ Waray hunahunaa ni Russell ngan han iya matinumanon nga mga kaupod nga sadang hira pasidunggan kay hira an nakahibaro ngan nakasabot hiton importante nga mga kamatuoran. Ginpasidunggan ni Russell an mga nahiuna ha iya, ngan labaw ha ngatanan ginpasidunggan niya hi Jehova nga Dios ha pagtutdo ha Iya katawohan han angay nira hibaroan ha panahon nga kinahanglan nira hibaroan ito. Klaro nga ginbendisyonan ni Jehova an pangalimbasog ni Russell ngan han iya mga kaupod basi makilala an kamatuoran tikang ha buwa. Ha paglabay han katuigan, nagin mas klaro nga bulag ngan naiiba hira ha Kakristianohan.

¹² Ha mga dekada antes han 1914, urusahon gud an nahimo hiton magtinumanon nga kalalakin-an ha pagpasarang han kamatuoran! An The Watch Tower and Herald of Christ’s Presence han Nobyembre 1, 1917, nagsiring: “Minilyon yana an nakagawas na tikang ha kahadlok ha mga katutdoan han naglalaga nga impyerno ngan iba nga buwa nga doktrina . . . An agos han Kamatuoran, nga nagtikang sobra kwarenta ka tuig na an naglabay, makusog la gihapon ngan padayon nga naagos tubtob nga mapuno hito an bug-os nga tuna; ngan an mga kaaway hito diri makakapugong han pagsarang han Kamatuoran ha bug-os nga tuna, sugad la nga an ordinaryo nga silhig diri nakakapugong han dagku nga mga balud.”

13, 14. (a) Paonan-o igin-andam han “sinugo” an dalan para ha Mesianiko nga Hadi? (b) Ano an aton mahibabaroan ha aton kabugtoan ha sobra usa ka siglo na an naglabay?

¹³ Tagda ini: Magigin andam ba an mga tawo ha pagtikang han presensya han Kristo kon waray nira masabti an kaibahan ni Jesus ha iya Amay, hi Jehova? Diri gud! Diri liwat hira magigin andam kon natoo hira nga an ngatanan nga tawo awtomatiko nga makarawat hin pagkadiri-mamaratyon, ngan diri ito usa nga birilhon nga regalo para la ha pipira nga sumurunod han Kristo; ngan diri liwat hira magigin andam kon para ha ira ginpapasakitan ha kadayonan han Dios an mga tawo ha naglalaga nga impyerno! Oo, igin-andam han “sinugo” an dalan para ha Mesianiko nga Hadi!

¹⁴ Kumusta man kita yana? Ano an aton mahibabaroan tikang ha ira? Pariho ha ira, sadang kita magin maduruto nga magbarasa ngan estudyante han Pulong han Dios. (Juan 17:3) Samtang ‘nagugutom’ ha espirituwal inin materyalistiko nga kalibotan, hinaot mas magtikaduro pa an aton ‘gana’ ha espirituwal nga pagkaon!—Basaha an 1 Timoteo 4:15.

15. Ano an hinay-hinay nga nasantop han mga Estudyante han Biblia? (Kitaa liwat an footnote.)

¹⁵ An mga Estudyante han Biblia nagtutdo nga importante an pagbaya ha mga relihiyon han kalibotan. Han 1879, ginhisgotan han Watch Tower an “relihiyon han Babilonya.” An ginhihisgotan ba hito amo an pagmando han papa ha Roma, o an Romano Katoliko nga relihiyon? Ha damu ka siglo, an mga Protestante nasiring nga an Babilonya nga gin-unabi ha tagna han Biblia nagrirepresentar ha Iglesia Katolika. Kondi, hinay-hinay nga nasantop  han mga Estudyante han Biblia nga an ngatanan nga relihiyon han Kakristianohan kaapi ha moderno nga “Babilonya.” Kay ano? Tungod kay tanan hira nagtututdo han buwa nga mga doktrina sugad han ginhisgotan na. * Ha urhi, nagin mas prangka an aton publikasyon ha kon ano an sadang buhaton han tangkod an kasingkasing nga mga membro han mga relihiyon han Babilonya.

16, 17. (a) Ha ano nga paagi an Volume lll han Millennial Dawn ngan an Watch Tower nag-aghat ha mga tawo ha paggawas ha buwa nga relihiyon? (b) Kay ano nga waray dayon nira sunda ito nga pahamangno? (Kitaa an footnote.)

¹⁶ Pananglitan, han 1891, ginhisgotan han Millennial Dawn, Volume III an pagsalikway han Dios ha moderno nga panahon nga Babilonya ngan nagsiring: “An bug-os nga sistema—ngatanan nga relihiyon han Kakristianohan—iginsalikway.” Ito nagdugang nga an ngatanan nga “diri nadapig ha buwa nga mga katutdoan ngan mga buhat hito gin-aaghat yana nga bumulag.”

¹⁷ Han Enero 1900, ginsagdonan han Watch Tower adton an ngaran nagpabilin ha listahan han mga relihiyon han Kakristianohan ngan nasiring: “Dapig gud ako ha kamatuoran, ngan talagsa na la ako tumambong ha sermon han iba nga relihiyon.” An artikulo nagpakiana: “Kondi husto ba nga an katunga han imo lawas nakagawas na ha Babilonya pero an katunga waray pa? Ini ba an gin-oobligar nga pagkamasinugtanon . . . ngan pagin nalilipayan ngan kinakarawat han Dios? Matin-aw nga diri. Dayag nga sinulod hiya [membro han relihiyon] ha usa nga kauyonan han denominasyon han nagpamembro hiya hito, ngan sadang niya tumanon an ngatanan nga kondisyon hito nga kauyonan tubtob nga . . . ipahayag niya ha publiko nga iya ginkakansela an iya pagin membro.” Paglabay han katuigan, mas ginpabug-atan ito nga mensahe. * Sadang utdon han mga surugoon ni Jehova an ngatanan nga koneksyon ha buwa nga relihiyon.

18. Kay ano nga kinahanglan an paggawas ha Babilonya nga Gamhanan?

¹⁸ Kon waray uroutroha an pahamangno ha paggawas ha Babilonya nga Gamhanan, magkakaada ba an Kristo andam ngan dinihogan nga grupo hin surugoon dinhi ha tuna, sugad nga hiya an bag-o nga Hadi? Diri. Tungod kay an mga Kristiano la nga waray impluwensya han Babilonya an makakasingba kan Jehova “ha espiritu ngan ha kamatuoran.” (Juan 4:24) Pariho ha ira, determinado ba kita nga magpabilin nga bulag ha buwa nga relihiyon? Hinaot padayon nga sundon naton an sugo: “Gawas ha iya, katawohan ko”!—Basaha an Pahayag 18:4.

19, 20. Ha ano nga paagi gin-aghat han Watch Tower an katawohan han Dios nga magkatirok para ha pagsingba?

¹⁹ An mga Estudyante han Biblia nagtutdo nga an mga nag-aalagad ha Dios sadang urosa nga magkatirok para ha pagsingba, tubtob nga posible. Para ha tinuod nga Kristiano, diri igo an paggawas ha buwa nga relihiyon. Importante liwat an pakigbahin ha putli nga pagsingba. Tikang pa ha una nga mga gowa han Watch Tower, nag-aghat ito ha pagkatirok nga urosa para ha pagsingba. Pananglitan han Hulyo 1880, han nagreport hi Bugto Russell han iya pagbiyahe, hiya nagsiring nga makapadasig gud an mga katirok. Katapos iya gin-aghat an magbarasa nga  magpadara hin report mahitungod han ira pag-uswag, ngan an iba hito iaapi ha literatura. Kay ano? “Basi naton ngatanan mahibaroan . . . kon mationan-o kamo ginpapauswag han Ginoo; kon padayon kamo nga nagkakatirok upod han mga igkasi-tumuroo.”

²⁰ Han 1882, ginowa ha Watch Tower an artikulo nga “Assembling Together.” Gin-aghat hito nga artikulo an mga Kristiano nga magkatirok “basi magbalyoay hin kahibaro, magdinasigay ngan magparig-onay.” Ito nagsiring: “Diri importante kon may edukado o may abilidad ha iyo. An tagsa ha iyo magdara hin Biblia, papel, ngan lapis, ngan pahimulosan gud an damu nga bulig sugad han Concordance, . . . tubtob nga posible. Pagpili hin topiko; hangyoa an giya han Espiritu basi hisabtan ito; katapos basaha, hunahunaa, itanding an usa nga teksto ha iba nga teksto ngan sigurado nga magigiyahan kamo ngadto ha kamatuoran.”

21. Ano nga susbaranan an iginpakita han kongregasyon ha Allegheny, Pennsylvania, may kalabotan ha mga katirok ngan pagmangno ha tagsa nga membro han kongregasyon?

²¹ An headquarters han mga Estudyante han Biblia nahimumutang ha Allegheny, Pennsylvania, E.U.A. Didto nagpakita hira hin susbaranan pinaagi ha pagkatirok sugad nga pagsunod han Hebreo 10:24, 25. (Basaha.) Usa nga lagas nga bugto, hi  Charles Capen, an nahinunumdom pa ha pagtambong ha mga katirok han bata pa hiya: “Nahinunumdoman ko pa an usa nga teksto ha bungbong han assembly hall han Sosiedad. ‘Uusa an iyo Agaron, hi Kristo; ngan kamo ngatanan magburugto.’ Ito nga teksto nahisilsil ha akon hunahuna—waray pagkaiba an mga nangunguna ha mga membro ha sulod han katawohan ni Jehova.” (Mat. 23:8) Nahinumdoman liwat niya an makapaaghat nga mga katirok, an pagdinasigay, ngan an maduruto nga pangalimbasog ni Bugto Russell ha personal nga pagmangno ha kada tagsa ha kongregasyon.

22. Paonan-o ginkarawat han matinumanon nga mga tawo an sagdon nga tumambong ha Kristiano nga mga katirok, ngan ano an aton mahibabaroan tikang hito?

²² An matinumanon nga mga tawo ginios uyon hini nga susbaranan ngan ha instruksyon nga iginhatag. Natukod an mga kongregasyon ha iba nga estado, sugad ha Ohio ngan Michigan, katapos ha bug-os nga North America ngan ha iba pa nga lugar. Hunahunaa la: Magigin andam gud ba an matinumanon nga mga tawo ha presensya han Kristo kon waray hira mabansay ha pagsunod ha giniyahan nga sagdon nga magkatirok para ha pagsingba? Diri gud! Kumusta man kita yana? Pariho ha ira, kita liwat kinahanglan magin determinado nga tumambong pirme ha katirok, ngan pirme salingabuton an higayon ha pagsingba nga urosa ngan magin makapadasig ha espirituwalidad han kada tagsa.

23. Paonan-o ginklaro han Watch Tower nga an ngatanan nga dinihogan sadang magin magsarangyaw han kamatuoran?

²³ An mga Estudyante han Biblia nagtutdo nga an ngatanan nga dinihogan sadang magin magsarangyaw han kamatuoran. Han 1885, an Watch Tower nagsiring: “Diri naton sadang  hingalimtan nga an tagsa nga membro han dinihogan, gindihogan ha pagsangyaw (Isa. 61:1), tinawag para ha pagministeryo.” Usa nga gowa han 1888 an nag-aghat: “Klaro an sugo ha aton . . . Kon aton ito balewarayon ngan mamiling hin pasangil, mga hubya kita nga surugoon, nga diri takos ha hitaas nga katungdanan nga iginhatag ha aton.”

24, 25. (a) Labot ha pagdasig ha mga tawo ha pagsangyaw, ano pa an ginbuhat ni Bugto Russell ngan han iya mga kaupod? (b) Paonan-o ginhulagway han usa nga colporteur an iya buruhaton ha “panahon han diri pa uso an awto”?

²⁴ Labot ha pagdasig ha mga tawo ha pagsangyaw, hi Bugto Russell ngan an iya mga kaupod nagpublikar liwat hin mga tract nga gintawag nga Bible Students’ Tracts, nga ha urhi gintawag nga Old Theology Quarterly. Iginhahatag ini ha mga magbarasa han Watch Tower basi maipanaltag hin libre.

²⁵ Hadto, an aada ha bug-os-panahon nga pagministeryo gintawag nga colporteur. Usa ha ira hi Charles Capen nga gin-unabi kanina. Iya nahinunumdoman pa: “Ginamit ako hin mga mapa nga ginhimo han United States Goverment Geological Survey ha pagkobre han teritoryo ha Pennsylvania. Makikita hito nga mapa an ngatanan nga kalsada, salit nakadtoan ko an ngatanan nga baryo bisan kon nagbaktas la ako. Usahay, pagkatapos hin tulo ka adlaw nga pagbaktas ha pagkuha hin order han mga libro han serye nga Studies in the Scriptures, naplete ako hin kabayo ngan karomata ha pagdeliber. Agsob nga nahuron ako kaupod han mga parauma. Ito an panahon han diri pa uso an awto.”

26. (a) Kay ano nga an katawohan han Dios kinahanglan magsangyaw basi magin andam ha paghadi han Kristo? (b) Ano nga mga pakiana an maopay nga ipakiana naton ha aton kalugaringon?

²⁶ An sugad nga pangalimbasog ha pagsangyaw nanginginahanglan gud hin kaisog ngan kadasig. Magigin andam ba an tinuod nga mga Kristiano ha paghadi han Kristo kon waray hira matutdoi nga importante an pagsangyaw? Sigurado nga diri! Para ha ira, ito an dayag nga pangirilal-an han presensya han Kristo. (Mat. 24:14) An katawohan han Dios kinahanglan magin andam ha pag-una hiton nagtatalwas han kinabuhi nga buruhaton. Salit, maopay nga pakianhan naton an aton kalugaringon: ‘Gin-uuna ko ba ha akon kinabuhi an pagsangyaw nga buruhaton? Nagsasakripisyo ba ako basi magkaada bug-os nga pakigbahin hito?’

27, 28. Ano an nakita ni apostol Juan ha bisyon, ngan ano an ginbuhat ni Satanas ngan han iya mga demonyo ha kaestablisar han Ginhadian?

²⁷ Ha kataposan, inabot an importante nga tuig han 1914. Sugad han aton ginhisgotan ha tinikangan hini nga kapitulo, waray tawo an nakakita han mahimayaon nga panhitabo ha langit. Kondi hi apostol Juan nagkaada bisyon nga naghulagway hito ha simboliko nga paagi. Handurawa: Hi Juan nakakita hin “daku nga tigaman” ha langit. An “babaye” han Dios—an iya organisasyon han espiritu nga mga linarang ha langit—burod ngan nag-anak hin bata nga lalaki. Inin simboliko nga bata, ha diri maiha “magmamando han ngatanan nga nasud gamit an tungkod nga puthaw.” Kondi han matawo, an bata “gin-agaw ngadto ha Dios ngan ha iya trono.” Usa nga daku nga tingog tikang ha langit an nagsiring:  “Yana nahitabo na an katalwasan, ngan an pagpakita han gahum, ngan an kaestablisar han Ginhadian han aton Dios, ngan an paggamit han awtoridad han iya Kristo.”—Pah. 12:1, 5, 10.

²⁸ Waray ruhaduha nga an nakita ni Juan ha bisyon amo an kaestablisar han Mesianiko nga Ginhadian. Makalilipay gud adto, pero waray ito makalipay ha ngatanan. Hi Satanas ngan an iya mga demonyo nakiggirra ha matinumanon nga mga anghel, nga ginpapangunahan ni Miguel, o Kristo. Ano an resulta? Aton mababasa: “Iginlabog an daku nga dragon, an orihinal nga halas, an gintatawag nga Yawa ngan Satanas, nga nanlilimbong ha bug-os nga inuukyan nga tuna. Iginlabog hiya ha tuna, ngan an iya mga anghel iginlabog upod niya.”—Pah. 12:7, 9.

29, 30. Han maestablisar an Mesianiko nga Ginhadian, ano an mga nagbag-o ha (a) tuna? (b) langit?

²⁹ Antes pa han 1914, an mga Estudyante han Biblia maiha na nga nagsiring nga an panahon han kasakitan magtitikang hito nga tuig. Pero hira mismo waray ideya kon ha ano nga paagi ito husto nga matutuman. Sugad han iginpapakita han bisyon ni Juan, magtitikang an duro nga pag-atake ni Satanas ha katawohan: “Kairo han tuna ngan han dagat, kay an Yawa linusad ha iyo nga may daku nga kasina, kay maaram hiya nga halipot na la an iya panahon.” (Pah. 12:12) Han 1914, binuto an Girra ha Kalibotan l ngan nagtikang makita ha bug-os nga kalibotan an tigaman han presensya han Kristo sugad nga gamhanan nga Hadi. An “kataposan nga mga adlaw” hini nga sistema nagtikang.—2 Tim. 3:1.

³⁰ Kondi, nagkalipay ha langit. Hi Satanas ngan an iya mga demonyo ginpaiwas didto ha kadayonan. An asoy ni Juan nasiring: “Tungod hito magkalipay kamo, kamo nga mga langit ngan kamo nga naukoy dida!” (Pah. 12:12) Tungod kay malimpyo na an langit ngan Hadi na hi Jesus, andam na gumios an Mesianiko nga Ginhadian para ha katawohan han Dios dinhi ha tuna. Ano an pagbubuhaton hito? Sugad han aton hinbaroan ha tinikangan hini nga kapitulo, an Kristo sugad nga an “sinugo han kauyonan,” magios anay ha pag-uray han mga surugoon han Dios dinhi ha tuna. Ano an iginpapasabot hini?

31. Ano an igintagna ni Malakias mahitungod han peryodo han pagputli, ngan ha ano nga paagi natuman ito? (Kitaa liwat an footnote.)

³¹ Hi Malakias nagtagna nga diri masayon an proseso han pag-uray. Hiya nagsurat: “Hin-o an makakailob han adlaw nga iya iaabot? Ngan hin-o an matindog kon hiya pumakita? Kay hiya pariho hin kalayo han mag-uuray, ngan pariho hin sabon han parapamunak.” (Mal. 3:2) Natuman gud ito nga mga pulong! Tikang han 1914, an katawohan han Dios dinhi ha tuna nakaeksperyensya hin sunod-sunod nga dagku nga pagsari ngan kakurian. Durante han Girra ha Kalibotan l, damu nga Estudyante han Biblia an brutal nga ginlutos ngan ginpriso. *

32. Ano nga kasamok ha sulod han organisasyon an nahitabo han 1916?

³² Bisan ha sulod han organisasyon, nagkaada kasamok. Han 1916, namatay hi Bugto Russell ha edad nga 64, ngan damu han kabugtoan an natigdaan. An iya kamatayon naghayag nga nasobrahan  na an iba ha pagdayaw ha iya tungod han iya pagkamaopay. Bisan kon diri ito karuyag ni Bugto Russell, baga hin ginsingba na hiya han damu. Tungod kay patay na hiya, kahuna han damu nga maundang na an paghayag han kamatuoran, ngan an pipira kinontra nga ipadayon an buruhaton. Ito an nakaaghat ha pagtikang han apostasya nga nakagbahin han organisasyon.

33. Paonan-o an waray katuman nga mga ginlalaoman han katawohan han Dios nagsari han ira pagtoo?

³³ Usa pa nga pagsari amo an waray katuman nga mga ginlalaoman. Bisan kon husto an Watch Tower ha pagsiring nga ha 1914 matatapos an Panahon han mga Hentil, an kabugtoan waray makasabot kon ano an mahitatabo hito nga tuig. (Luc. 21:24) Kahuna nira nga hito nga tuig, dadad-on han Kristo ha langit an iya dinihogan nga nobya basi magmando kaupod niya. Pero waray ito matuman. Ha pag-ikatarapos han 1917, iginpahibaro han The Watch Tower nga an 40 ka tuig nga pag-ani matatapos ha katsaringsing han 1918. Kondi an pagsangyaw waray matapos hito nga tuig. Lugod, nagpadayon ito pag-uswag. An magasin nagsiring nga an pag-ani tapos na pero nagpapadayon pa an peryodo han pagtirok. Kondi, damu la gihap an inundang pag-alagad kan Jehova tungod han waray katuman nga mga ginlalaoman.

34. Ano nga daku nga pagsari an binangon han 1918, ngan kay ano nga kahuna han Kakristianohan nga “patay” na an katawohan han Dios?

³⁴ Han 1918, nagkaada daku nga pagsari. Hi J. F. Rutherford, an sumaliwan kan C. T. Russell ha pagpanguna han katawohan han Dios, ngan an pito nga nangunguna nga kabugtoan gin-aresto. Diri makatadunganon nga ginsentensyahan hira hin higlawig nga kaprisohan ha federal penitentiary ha Atlanta, Georgia, E.U.A. Salit baga hin naundang anay an buruhaton han katawohan han Dios. Nagrayhak an mga klero han Kakristianohan. Kahuna nira nga tungod kay napriso na an mga nangunguna, sarado na an headquarters ha Brooklyn, ngan gin-aatake an pagsangyaw nga buruhaton ha Amerika ngan Europa, an nakakasamok nga mga Estudyante han Biblia “patay” na ngan diri na magigin tarhog. (Pah. 11:3, 7-10) Sayop gud hira!

35. Kay ano nga gintugotan ni Jesus nga mag-antos an iya mga sumurunod, ngan ano an iya ginhimo ha pagbulig ha ira?

³⁵ Diri maaram an mga kaaway han kamatuoran nga gintutugotan la ni Jesus nga mag-antos hin kakurian an iya katawohan tungod kay hito nga panahon nalingkod na hi Jehova ‘sugad nga magpupurog ngan mag-uuray hin salapi.’ (Mal. 3:3) Sigurado hi Jehova ngan an iya Anak nga katapos hiton sugad-kalayo nga pagsari, an magtinumanon mabangon sugad nga gin-uray, ginputli, ngan mas angayan ha pag-alagad ha Hadi. Tikang ha temprano nga bahin han 1919, ginbuhat han espiritu han Dios an ginhunahuna han iya mga kaaway nga imposible. Bumangon utro an matinumanon nga mga tawo! (Pah. 11:11) Hito nga panahon, matin-aw nga gintuman han Kristo an usa nga importante nga pangirilal-an han tigaman han kataposan nga mga adlaw. Iya gintokahan “an matinumanon ngan maaramon nga uripon,” usa nga gutiay nga grupo han dinihogan nga kalalakin-an nga  mangunguna han iya katawohan ha pagtagana han espirituwal nga pagkaon ha husto nga panahon.—Mat. 24:45-47.

36. Ano an nagpakita nga nabangon utro ha espirituwal an katawohan han Dios?

³⁶ Han Marso 26, 1919, hi Bugto Rutherford ngan an iya mga kaupod nakagawas ha prisohan. Usa nga kombensyon an igin-eskedyol dayon hito nga Septyembre. Ginplano liwat an pagpublikar han ikaduha nga magasin nga tatawagon nga The Golden Age. Padis ini han The Watch Tower ngan gagamiton ha pagministeryo. * Naimprinta liwat an una nga gowa han Bulletin, yana gintatawag nga An Aton Ministeryo ha Ginhadian. Tikang han una nga gowa hito, mapulsanon ito ha ministeryo. Tikang han 1919 padayon, nagin prayoridad an personal nga pagsangyaw ha balay-balay.

37. Ha ano nga paagi nga an pipira napamatud-an nga diri maunungon ha mga tuig katapos han 1919?

³⁷ An pagsangyaw padayon nga nag-uray ha mga surugoon han Kristo tungod kay nadiri hiton minos nga buruhaton an mga hambog ngan mga arogante. Hira binulag ha organisasyon. Ha mga tuig katapos han 1919, pipira han diri maunungon an nangalas ngan naghimo hin mga pagpasipara ngan nagpasarang hin pakaraot ngan dinapig pa ngani ha mga nakontra ha matinumanon nga mga surugoon ni Jehova.

38. Ano an napamatud-an han mga kalamposan ngan kadaogan han mga sumurunod han Kristo?

 ³⁸ Bisan pa hito, an mga sumurunod han Kristo ha tuna nagtikadamu ngan nag-uswag ha espirituwal. Tikang pa hadto an ira kalamposan ngan kadaogan naghahatag hin makakombinse nga ebidensya nga nagmamando na an Ginhadian han Dios! Tungod han bulig ngan bendisyon han Dios—pinaagi han iya Anak ngan han Mesianiko nga Ginhadian—an usa nga gutiay nga grupo han diri hingpit nga mga tawo nagin madaugon kontra kan Satanas ngan han iya maraot nga sistema!—Basaha an Isaias 54:17.

39, 40. (a) Ano an pipira nga bahin hini nga libro? (b) Ano an imo mapapahimulsan ha pag-aram hini nga libro?

³⁹ Ha masunod nga mga kapitulo, paghihisgotan naton kon ano an nabuhat han Ginhadian han Dios ha tuna ha sulod han usa ka siglo tikang pa han maestablisar ito ha langit. Kukobrehan han tagsa nga seksyon hini nga libro an usa ka partikular nga bahin han buruhaton han Ginhadian dinhi ha tuna. An tagsa nga kapitulo may kahon ha repaso nga mabulig ha tagsa ha aton ha paghibaro kon mationan-o katinuod ha aton an Ginhadian. Ha kataposan nga mga kapitulo, paghihisgotan naton kon ano an aton sadang laoman pag-abot han Ginhadian nga magbubungkag ha mga magraot ngan magpapahinabo han paraiso nga tuna ha diri na maiha. Salit, ano an imo mapapahimulsan ha pag-aram hini nga libro?

⁴⁰ Karuyag ni Satanas magluya an imo pagtoo ha Ginhadian han Dios. Kondi, karuyag ni Jehova parig-unon an imo pagtoo tungod kay magpapanalipod ito ha imo ngan magtitipig ha imo nga marig-on. (Efe. 6:16) Salit, gin-aaghat ka namon nga mainampoon nga pag-adman ini nga libro. Pirme pakianhi an imo kalugaringon, ‘Tinuod gud ba ha akon an Ginhadian han Dios?’ Kon tinuod gud ito ha imo yana, daku an posibilidad nga aadto ka, matinumanon ngan aktibo nga nasuporta hito nga Ginhadian, ha adlaw diin an ngatanan nga buhi makakakita nga an Ginhadian han Dios tinuod ngan nagmamando na!