1, 2. Mɛni blɔ nɔ Yehowa je e yi mi tomi kpo kɛ tsɔɔ adesahi ngɛ?

 FƆLI nɛ a susuɔ a bimɛ a he ɔ, ke a ma susu weku ɔ he ɔ, a kɛ jokuɛ ɔmɛ sɛɛ he ní. Se a hyɛɛ saminya ngɛ níhi nɛ a deɔ jokuɛ ɔmɛ ɔ he. Níhi nɛ jokuɛ ɔmɛ ma nyɛ maa nu sisi pɛ a deɔ mɛ.

² Jã nɔuu kɛ̃ nɛ Yehowa jeɔ e yi mi tomi kpo kɛ tsɔɔ adesahi bɔɔbɔɔbɔɔ. Se e peeɔ jã ngɛ be nɛ sa mi. Mo susu bɔ nɛ Yehowa je anɔkualehi nɛ kɔɔ Matsɛ Yemi ɔ he ɔ kpo ngɛ yi nɔ sane tsuo mi ɔ he kpiti nɛ o hyɛ.

3, 4. Anɛ Yehowa to níhi nɛ maa ya nɔ ngɛ adesahi a si himi mi ɔ tsuo blɔ nya momo lo? Moo tsɔɔ nya.

³ Sisije ɔ, Mesia Matsɛ Yemi ɔ piɛɛ we Yehowa yi mi tomi ɔ he. Mɛni he je? Ejakaa Yehowa to we bɔ nɛ adesahi maa ba a je mi ha a blɔ nya kɛ fɔɛ si; jehanɛ hu, e ha adesahi nɛ e bɔ ɔ he blɔ nɛ a hla nɔ́ nɛ a suɔ. Lɔ ɔ he ɔ, e de Adam kɛ Hawa e yi mi tomi kɛ ha adesahi, e de ke: “Nyɛ fɔ babauu nɛ nyɛɛ hiɛ; nyɛ hyi zugba a nɔ tsuo, nɛ nyɛɛ ye zugba a tsuo nɔ.” (1 Mose 1:28) Yehowa suɔ nɛ a ye e mlaa nɛ kɔɔ kpakpa kɛ yayami he ɔ nɔ. (1 Mose 2:16, 17) Adam kɛ Hawa ko nyɛ ye anɔkuale. Kaa a kɛ a bimɛ nyɛ nɛ a pee jã a, jinɛ Matsɛ Yemi nɛ Kristo maa ye nɔ kɛ tsu Mawu yi mi tomi he ní ɔ he be wɔ hiae. Jinɛ amlɔ nɛ ɔ, zugba a nɔ tsuo ko hyi tɔ kɛ nimli nɛ a ye mluku nɛ mɛ tsuo a jaa Yehowa.

⁴ Atuã nɛ Satan kɛ Adam kɛ Hawa tsɔ ɔ ha we nɛ Yehowa nɛ ngmɛɛ e yi mi tomi kaa e ma ha nɛ zugba a ma hyi kɛ nimli nɛ a ye mluku ɔ he. Mohu ɔ, Yehowa maa gu blɔ ko nɔ konɛ e ha nɛ e yi mi tomi ɔ nɛ ba mi. E yi mi tomi ɔ be kaa tlee nɛ nyɛɛ blɔ pɔtɛɛ ko nɔ nɛ́ ke nɔ́ ko tɔ̃tɔ̃ ɔ, e be nyɛe maa ya he nɛ e yaa a hu ɔ. Be abɔ nɛ Yehowa je e yi mi tomi kpo nɛ ɔ, he wami ko be je nɛ ɔ mi nɛ ma nyɛ ma ha nɛ e be mi bae. (Kane Yesaya 55:11.) Ke nɔ́ ko ngɛ hlae nɛ e tsi blɔ ɔ, Yehowa guu blɔ kpa nɔ. a (2 Mose 3:14, 15)  Ke e na kaa e he hia a, e deɔ e sɔmɔli nɛ yeɔ lɛ anɔkuale ɔ blɔ ehe nɛ e maa gu nɔ kɛ tsu e yi mi tomi ɔ he ní.

5. Mɛni Yehowa pee ngɛ atuã tsɔmi nɛ ya nɔ ngɛ Eden ɔ he?

⁵ Yehowa to e yi mi kaa e maa to Matsɛ Yemi sisi konɛ e kɛ tsu Eden atuã tsɔmi ɔ he ní. (Mat. 25:34) Be mi nɛ e pee kaa nɔ́ nɛ adesahi be hɛ nɔ kami ko ɔ, Yehowa bɔni nɔ́ nɛ e kɛ ma tsu ní nɛ e ha nɛ adesahi nɛ a ye mluku konɛ e dla níhi tsuo nɛ Satan puɛ ɔ kpo jemi. (1 Mose 3:14-19) Se Yehowa je we Matsɛ Yemi ɔ he níhi tsuo kpo si kake.

6. Mɛni ji si nɛ Yehowa wo, se mɛni nɛ e ha we nɛ adesahi nɛ a le?

⁶ Ngɛ kekleekle gbami ɔ mi ɔ, Yehowa wo si kaa “nina” ko ma kpata sinɔ ɔ hɛ mi. (Kane 1 Mose 3:15.) Se ngɛ jamɛ a be ɔ mi ɔ, e tsɔɔ we nɔ nɛ ji yo ɔ nina, kɛ nɔ nɛ ji sinɔ ɔ nina. Ngɛ anɔkuale mi ɔ, Yehowa tsɔɔ we munyu nɛ ɔ mi fitsofitso maa pee jeha 2,000. b

7. Mɛni he je nɛ Yehowa hla Abraham, nɛ mɛni wa ma nyɛ maa kase ngɛ mi?

⁷ Nyagbe ɔ, Yehowa hla Abraham kaa nɔ nɛ nina nɛ a wo e he si ɔ maa gu e nɔ kɛ ba. A hla Abraham ejakaa e ‘bu Yehowa tue.’ (1 Mose 22:18) Wa ma nyɛ maa kase nɔ́ titli ko ngɛ munyu nɛ ɔ mi​—Yehowa jeɔ e yi mi tomi kpo kɛ tsɔɔ nihi nɛ a ngɛ bu nɛ mi kuɔ kɛ ha lɛ ɔ pɛ.​—Kane La 25:14.

8, 9. Mɛni anɔkualehi nɛ kɔɔ nina nɛ a wo e he si ɔ he nɛ Yehowa je kpo kɛ tsɔɔ Abraham kɛ Yakob?

⁸ Benɛ Yehowa gu bɔfo ko nɔ nɛ e kɛ e huɛ Abraham tu munyu ɔ ji kekleekle be nɛ e je anɔkuale nɛ e he hia nɛ kɔɔ si womi nina a he ɔ kpo: Nina a maa pee adesa. (1 Mose 22:15-17; Yak. 2:23) Se mɛni blɔ nɔ nɛ nɔmlɔ nɛ ɔ maa gu kɛ kpata sinɔ ɔ hɛ mi? Mɛnɔ ji sinɔ ɔ? Níhi nɛ a ma je kpo pee se ɔ ma ha sane bimi nɛ ɔmɛ a heto.

⁹ Yehowa ma nɔ mi kaa nina nɛ a wo e he si ɔ maa gu Abraham bibi Yakob nɛ e ji nyumu nɛ e ngɛ hemi kɛ yemi nitsɛ ngɛ Mawu mi ɔ nɔ kɛ ba. (1 Mose 28:13-22) Yehowa de kɛ gu Yakob nɔ kaa Nɔ Nɛ A Wo E He Si ɔ maa pee Yakob bi Yuda nina. Yakob gba kaa Yuda nina nɛ ɔ maa hɛɛ “matsɛ tso,” nɛ lɔ ɔ tsɔɔ kaa e ngɛ he blɔ nɛ e kɛ maa ye matsɛ, nɛ ‘je ma amɛ maa bu lɛ tue.’ (1 Mose 49:1, 10) Yehowa tsɔɔ kaa Nɔ Nɛ A Wo E He Si ɔ maa ye matsɛ.

10, 11. Mɛni he je nɛ Yehowa je e yi mi tomi kpo kɛ tsɔɔ David kɛ Daniel ɔ?

¹⁰ Benɛ Yuda gbo maa pee jeha 650 se ɔ, Yehowa tsɔɔ Matsɛ David nɛ je Yuda wɛtso ɔ mi ɔ e yi mi tomi ɔ he ní fuu. Yehowa tu David he munyu kaa ‘nɔmlɔ nɛ e ná e he bua jɔmi.’ (1 Sam. 13:14; 17:12; Níts. 13:22) Akɛnɛ David yeɔ Mawu gbeye he je ɔ, Yehowa kɛ lɛ so kaa e nina mi nɔ ko maa ye matsɛ kɛ maa ya neneene.​—2 Sam. 7:8, 12-16.

 ¹¹ Maa pee jeha 500 se ɔ, Yehowa gu gbalɔ Daniel nɔ kɛ tsɔɔ jeha tutuutu nɛ Nɔ Nɛ A Pɔ Lɛ Nu loo Mesia a maa ba zugba a nɔ. (Dan. 9:25) Yehowa ‘suɔ Daniel sane saminya.’ Mɛni he je? Ejakaa Daniel ngɛ bu nɛ e mi kuɔ kɛ ha Yehowa, nɛ e ya nɔ nɛ e sɔmɔ lɛ.​—Dan. 6:16; 9:22, 23.

12. Mɛni a de Daniel kaa e pee, nɛ mɛni he je?

¹² E ngɛ mi kaa Yehowa ha nɛ gbali nɛ a yeɔ anɔkuale kaa Daniel ɔ ngma nina nɛ a wo e he si nɛ ji Mesia a he níhi fitsofitso mohu lɛɛ, se e sui be nɛ Yehowa ma ha nɛ e sɔmɔli nɛ a nu níhi nɛ e ha nɛ a ngma a tsuo sisi lolo. Kaa nɔ hyɛmi nɔ́ ɔ, benɛ a je Mawu Matsɛ Yemi nɛ a to sisi ɔ he nina kɛ tsɔɔ Daniel ɔ, a de lɛ ke e sɔu gbami ɔ nya kɛ ya si be nɛ Yehowa to ɔ. Ke jamɛ a be ɔ su ɔ, anɔkuale nile ‘ma ba hiɛ.’​—Dan. 12:4.

13. (a) Mɛnɔ ji nina nɛ a wo e he si ɔ? (b) Mɛni blɔ nɔ Yesu ha nɛ gbami nɛ ngɛ 1 Mose 3:15 ɔ pee heii ngɛ?

¹³ Yehowa ha nɛ e pee heii kaa nina nɛ a wo e he si ɔ ji Yesu nɛ ji David nina nɛ maa ye Matsɛ ɔ. (Luka 1:30-33; 3:21, 22) Benɛ Yesu je e sɔmɔmi ní tsumi ɔ sisi ɔ, e pee kaa nɔ́ nɛ pu ɔ je ngɛ Mawu yi mi tomi he nile nɛ adesahi ngɛ ɔ nɔ. (Mat. 4:13-17) Kaa nɔ hyɛmi nɔ́ ɔ, Yesu ha nɛ nɔ tutuutu nɛ “sinɔ” nɛ a tu e he munyu ngɛ 1 Mose 3:14, 15 ɔ ji ɔ pee heii benɛ e tsɛ Abosiami ke “nɔ gbelɔ” kɛ “lakpatsɛ kpanaku” ɔ. (Yoh. 8:44) Ngɛ kpojemi ko nɛ a kɛ ha Yohane ɔ mi ɔ, Yesu tsɔɔ kaa ‘blema sinɔ ngua a’ nɛ “a tsɛɛ lɛ Abosiami, loo Satan” ɔ nɛ. c (Kane Kpojemi 1:1; 12:9.) Ngɛ jamɛ a kpojemi ɔ nɔuu mi ɔ, Yesu tsɔɔ kaa lɛ Yesu nɛ e ji nina nɛ a wo e he si ɔ ma ha nɛ gbami nɛ a gba ngɛ Eden ɔ maa ba mi, nɛ e ma kpata Satan hɛ mi kulaa.​—Kpoj. 20:7-10.

14-16. Anɛ kaseli ɔmɛ nɛ a hi si blema a nu anɔkualehi nɛ Yesu je kpo ɔ sisi saminya lo? Moo tsɔɔ nya.

¹⁴ Kaa bɔ nɛ wa na ngɛ Yi 1 ɔ mi ɔ, Yesu tu Matsɛ Yemi ɔ he munyu babauu. Se pi be tsuaa be nɛ e tsɔɔ kaseli ɔmɛ níhi nɛ a ngɛ hlae nɛ a le ngɛ Matsɛ Yemi ɔ he ɔ mi fitsofitso. Be mi nɛ e tsɔɔ níhi a mi fitsofitso po ɔ, Kristo se nyɛɛli ɔmɛ nui sisi, jeha lafahi abɔ se loko a bɔni anɔkuale nɛ a Nyɔmtsɛ ɔ tsɔɔ mɛ ɔ sisi numi. Mo susu nɔ hyɛmi ní komɛ a he nɛ o hyɛ.

¹⁵ Ngɛ jeha 33 ɔ mi ɔ, Yesu tsɔɔ mi heii kaa a maa hla nihi nɛ maa ye bua Mawu Matsɛ Yemi ɔ nya Matsɛ ɔ kɛ je zugba a nɔ, nɛ a maa ngɔ mɛ kɛ ya hiɔwe kaa mumi mi bɔ níhi. Se e kaseli ɔmɛ nui nɔ́ nɛ e de mɛ ɔ sisi nɔuu. (Dan. 7:18; Yoh. 14:2-5) Ngɛ jamɛ a jeha nɔuu mi ɔ, Yesu kɛ nɔ́ hetomi níhi tsu ní kɛ tsɔɔ kaa ke e ya hiɔwe ɔ, jehahi babauu maa be loko a maa to Matsɛ Yemi ɔ sisi. (Mat. 25:14, 19; Luka 19:11, 12) Kaseli ɔmɛ nui oti nɛ ɔ sisi saminya,  lɔ ɔ he ɔ, benɛ a tle Yesu si ɔ, a bi lɛ ke: “Anɛ kikɛmɛ a be nɛ ɔ mi nɛ o maa kpale ngɔ matsɛ yemi ɔ kɛ ha Israel ɔ lo?” Se Yesu to e yi mi kaa e be mɛ nɔ́ ko dee jamɛ a be ɔ. (Níts. 1:6, 7) Yesu tsɔɔ hu kaa ‘to kpahi’ ngɛ nɛ a piɛɛ we “kuu nyafii” nɛ a kɛ lɛ maa ye matsɛ ɔ he. (Yoh. 10:16; Luka 12:32) Benɛ a to Matsɛ Yemi ɔ sisi ngɛ jeha 1914 ɔ mi ɔ se loko Kristo se nyɛɛli ɔmɛ nu nɔ́ nɛ kuu enyɔ ɔmɛ tsɔɔ ɔ sisi saminya.

¹⁶ Benɛ Yesu kɛ e kaseli ɔmɛ ngɛ zugba a nɔ ɔ, níhi fuu ngɛ nɛ e de we mɛ akɛnɛ e le kaa a be nyɛe maa pɛtɛ he ɔ he je. (Yoh. 16:12) Atsinyɛ jemi ko be he kaa a je Matsɛ Yemi ɔ he nile fuu kpo ngɛ kaseli ɔmɛ a be ɔ mi. Se kɛ̃ ɔ, pi jamɛ a be ɔ mi nɛ nile ɔ maa hiɛ.

17. Mɛni e sa nɛ waa pee loko wa ma nyɛ maa nu anɔkualehi nɛ kɔɔ Matsɛ Yemi ɔ he ɔ sisi, nɛ mɛni hu lɛ e he hia nɛ waa pee?

¹⁷ Yehowa wo Daniel si kaa ngɛ ‘nyagbe be ɔ’ mi ɔ, nihi babauu maa ‘nyɛɛ kɛ ya kɛ ba, nɛ anɔkuale nile’ nɛ kɔɔ Mawu yi mi tomi he ɔ ma ba hiɛ. (Dan. 12:4) E sa nɛ nihi nɛ a suɔ kaa a ná nile nɛ ɔ nɛ a bɔ mɔde wawɛɛ loko a nine ma nyɛ maa su nɔ. Níhi a mi hlami womi ko tsɔɔ kaa Hebri peemi munyungu nɛ ji, “nyɛɛ kɛ ya kɛ ba” a sisi ji, nɔ ko nɛ e ngɛ womi ko mi hyɛe saminya. Ke wa kase Baiblo ɔ kaa mɛni po ɔ, ja Yehowa ye bua wɔ loko wa ma nyɛ maa nu Matsɛ Yemi ɔ he anɔkuale ɔ sisi saminya.​—Kane Mateo 13:11.

18. Mɛni nɛ nihi nɛ a yee Yehowa gbeye ɔ pee kɛ tsɔɔ kaa a ngɛ hemi kɛ yemi kɛ he si bami?

¹⁸ Kaa bɔ nɛ Yehowa je anɔkualehi nɛ kɔɔ Matsɛ Yemi ɔ he ɔ kpo bɔɔbɔɔbɔɔ loko e su jeha 1914 ɔ, jã nɔuu kɛ̃ nɛ e ngɛ pee ngɛ nyagbe be nɛ ɔ mi. Kaa bɔ nɛ wa maa na ngɛ  womi nɛ ɔ Yi 4 kɛ 5 ɔ mi ɔ, ngɛ jeha 100 nɛ be ɔ mi ɔ, Mawu we bi tsake bɔ nɛ a nu níhi a sisi ha a si abɔ. Se anɛ enɛ ɔ tsɔɔ kaa Yehowa fĩ we a se lo? E tsɔɔ we jã kulaa! E fĩ a se. Mɛni he je? Ejakaa nihi nɛ a yeɔ Yehowa gbeye ɔ je suhi enyɔ nɛ e bua jɔ he ɔ kpo​—hemi kɛ yemi kɛ he si bami. (Heb. 11:6; Yak. 4:6) Yehowa sɔmɔli ngɛ hemi kɛ yemi kaa si womihi tsuo nɛ ngɛ Mawu Munyu ɔ mi ɔ maa ba mi. A je he si bami mi nɛ a kplɛɛ nɔ kaa bɔ nɛ a nu si womi ɔ mi bami sisi ha a dɛ. Munyuhi nɛ a ngma ngɛ March 1, 1925 Hwɔɔmi Mɔ ɔ mi ɔ tsɔɔ bɔ nɛ a ngɛ he si bami ha, womi ɔ de ke: “Wa le kaa Nyɔmtsɛ ɔ nitsɛ tsɔɔ e munyu sisi, nɛ e maa tsɔɔ e we bi e Munyu ɔ sisi ngɛ lɛ nitsɛ e be nɛ sa mi, kɛ blɔ nɛ da nɔ.”

19. Mɛni nɛ Yehowa ha nɛ wa nu sisi amlɔ nɛ ɔ, nɛ mɛni he je?

¹⁹ Bɔ nɛ gbamihi nɛ kɔɔ Matsɛ Yemi ɔ he ɔ ma plɛ kɛ ba mi ha a he ní bɔɔ ko pɛ nɛ Mawu we bi le ngɛ jeha 1914 ɔ mi benɛ a to Matsɛ Yemi ɔ sisi ɔ. (1 Kor. 13:9, 10, 12) Bua jɔmi nɛ waa kɛ ngɛ Mawu si womi ɔmɛ a mi bami blɔ hyɛe ɔ ha nɛ bɔ nɛ wa ma níhi a nya si ha be komɛ ɔ dɛ. Benɛ be ngɛ mi pue ɔ, e ba pee heii kaa munyu kpa ko nɛ a ngma ngɛ Hwɔɔmi Mɔ nɛ a tsɛ se kɛ sɛ hlami ɔ mi ɔ ji anɔkuale. Womi ɔ de ke: “Ja gbami ko ba mi loo e bɔni mi bami loko wa maa nu sisi saminya, lɔ ɔ he ɔ, e maa hi kaa waa kɛ oya yemi be gbami ko sisi tsɔɔe kɛ yaa si jamɛ a be ɔ.” Amlɔ nɛ ɔ, wa ngɛ nyagbe be ɔ mi vii, nɛ Matsɛ Yemi ɔ he gbamihi fuu ba mi, nɛ ekomɛ hu ngɛ mi bae. Akɛnɛ Mawu we bi baa a he si nɛ a suɔ kaa a dla mɛ he je ɔ, Yehowa ha nɛ bɔ nɛ wa nu e yi mi tomihi a sisi ha a pi si. Anɔkuale nile ba hiɛ niinɛ!

20, 21. Kɛ tsakemihi nɛ a pee ɔ sa Kristofohi nɛ a hi si blema a he ha kɛɛ?

²⁰ Ke Yehowa ha wɔ anɔkuale ɔ he sisi numi ehe ko ɔ, lɔ ɔ kaa wa tsui ɔ. Anɛ hemi kɛ yemi kɛ he si bami maa wo wɔ he wami konɛ waa kplɛɛ tsakemihi a nɔ lo? Kristofohi nɛ a hi si maa pee jeha 50 ɔ mi ɔ kɛ ka nɛ ngɛ kaa jã kpe. Kaa nɔ hyɛmi nɔ́ ɔ, ngɔɔ lɛɛ kaa o ngɛ jamɛ a be ɔ mi, nɛ o ji Yuda no Kristofo no. O ngɛ bu nɛ mi kuɔ kɛ ha Mose Mlaa a, nɛ o bua jɔ kaa o ji Yuda no. Kɛkɛ nɛ o nine su sɛ womi nɔ kɛ je bɔfo Paulo ngɔ nɛ tsɔɔ kaa Mlaa a ba nyagbe, nɛ Yehowa kua helo nya Israel bi ɔmɛ, nɛ e ngɛ mumi mi Israel nɛ a ji Yuda bi kɛ Ma Je Li a nya buae. (Rom. 10:12; 11:17-24; Gal. 6:15, 16; Kol. 2:13, 14) Kɛ o ko pee o ní ha kɛɛ?

²¹ Kristofohi nɛ a baa a he si ɔ kplɛɛ bɔ nɛ Paulo tsɔɔ níhi a mi ha a nɔ, nɛ Yehowa jɔɔ mɛ. (Níts. 13:48) Ni komɛ kplɛɛ we tsakemi ɔ nɔ, nɛ a suɔ nɛ a hɛɛ bɔ nɛ a nu níhi a sisi ha a mi. (Gal. 5:7-12) Ke jamɛ a ni ɔmɛ be a susumi tsakee ɔ, he blɔ nɛ a ma ná kaa a kɛ Kristo maa ye matsɛ ɔ maa je a dɛ.​—2 Pet. 2:1.

22. Kɛ o nuɔ he ngɛ tsakemihi nɛ a pee ngɛ Mawu yi mi tomi ɔ he sisi numi nɛ wa ngɛ ɔ he ha kɛɛ?

²² Yehowa ha nɛ wa nu Matsɛ Yemi ɔ he níhi a sisi saminya ngɛ wa be nɛ ɔ mi. Kaa nɔ hyɛmi nɔ́ ɔ, e ye bua wɔ nɛ wa na be nɛ a ma je Matsɛ Yemi ɔ sisi bimɛ kɛ je nihi nɛ a bui munyu ɔ tue ɔ a he kaa bɔ nɛ a gbaa jijɔhi kɛ apletsihi a mi ɔ. Jehanɛ hu, e tsɔɔ wɔ be nɛ nihi 144,000 ɔ a yibɔ maa su, nɔ́ nɛ Matsɛ Yemi ɔ he nɔ́ hetomi níhi nɛ Yesu kɛ tsu ní ɔ tsɔɔ, kɛ be nɛ nihi nɛ a pɔ mɛ nu ɔ a nyagbe nɔ ɔ maa ya hiɔwe. d Kɛ o peeɔ o ní ngɛ níhi a mi tsɔɔmi nɛ ɔmɛ a he ha kɛɛ? Anɛ e wo o hemi kɛ yemi ɔ mi he wami lo? Anɛ o naa tsakemi nɛ ɔmɛ kaa odase nɛ tsɔɔ kaa Yehowa yaa nɔ nɛ e tsɔɔ e we bi nɛ a baa a he si ɔ ní lo? Munyuhi nɛ nyɛɛ se ngɛ womi nɛ ɔ mi ɔ ma ha nɛ hemi kɛ yemi nɛ o ngɛ kaa Yehowa jeɔ e yi mi tomi kpo bɔɔbɔɔbɔɔ kɛ tsɔɔ nihi nɛ a yeɔ lɛ gbeye ɔ mi maa wa.