1, 2. ¿Kunjamsa Jehová Diosajj amtanakap jaqenakar yatiyi?

 KUNANAKAS familian lurasiski ukwa munasir awk taykanakajj wawanakapar yatiyapjje. Ukampis wali amuyumpiw ukanak sapjje, kuntï wawanakapajj amuyirjamäpki ukakwa yatiyapjje.

² Jehová Diosajj ukhamarakiw jaqenakatakejj kuna amtanisa uk horasaparu jukʼat jukʼat yatiyi. Jichhajja, kunjamsa Diosajj Reino toqet parlir cheqa yatichäwinak nayratpach qhanañchañ qalltäna ukwa uñjañäni.

3, 4. ¿Kunsa jaqenakajj lurapjjani uk Jehová Diosat amtpacha? Uk qhanañchtʼam.

³ Qalltanjja, janiw Jehová Diosajj ‘Cristow aka Oraq apnaqani’ sasin siskänti. ¿Kunatsa? Jupajj janiw kuntï jaqenakajj jutïrin lurapkani uk amtkiti, jan ukasti, jiwasaw kun lurañs amttanjja, Diosaw ukham lurawayistu. Kunsa Jupajj jaqenakatak amtäna ukwa Adanampir Evampir akham sasin yatiyäna: “Jichhajj wali mirantapjjam, aka oraqerusti phoqhantapjjarakim, apnaqapjjarakim” sasa (Gén. 1:28). Ukat kunatï waliki, jan walïkaraki uk amuytʼasisa sum sarnaqapjjañapwa Jehová Diosajj munarakïna (Gén. 2:16, 17). Adanampi Evampejj Diosar istʼañwa amtapjjasapäna. Cheqansa, jupanakatï wawanakapamp Diosat jan jitheqtapkasapäna ukhajja, Diosan munañap phoqasiñapatakejj janiw Criston apnaqäwipajj wakiskasapänti. Aka Oraqenjja, Jehová Diosar yupaychiri jan juchani jaqenakaw jakapjjasapäna.

⁴ Supayasa, Adanasa ukat Eva warmisa Jehová Dios contraw saytʼasipjjäna. Ukhampachasa, Diosajj janiw kuntï jaqenakatak amtkäna uk armaskänti. Amuytʼañataki, Jehová Diosan amtapajj mä jachʼa jawirar uñtatawa. Maysar irpanukutas jawir umajj qotar puripuniwa,  janiw kunas jarkʼkaspati. Ukhamarakiw Diosan amtapajj phoqasi, janiw khitis ni kunas phoqasiñapatak jarkʼkaspati (Isaías 55:11 liytʼañataki). Jan walinak utjki ukhasa, yaqha toqnamwa Diosajj amtanakap phoqe (Éxo. 3:14, 15, NM). a Ukatjja, kunapachatï wakisi ukhaw Diosajj kunjamsa amtap phoqani uk Jupar taqe chuyma servipki ukanakar yatiyi.

5. Edén jardinan Jupa contra saytʼasipkäna ukhajja, ¿kunsa Jehová Diosajj luräna?

⁵ Edén jardinan Jupa contra saytʼasipjjatap laykuw Jehová Diosajj mä Reino uttʼayañ amtäna (Mat. 25:34). Cheqansa, jaqenakar jan walinakat qhespiyañataki ukat kuna jan walinakarutï Supayajj aptʼawaykistu ukanak askichañatakejja, kunsa lurani ukwa Diosajj nayratpach qhanañchañ qalltäna (Gén. 3:14-19). Ukampis Reinopajj kunjamänisa uk janiw taqpach yatiykänti.

6. ¿Kunsa Jehová Diosajj arsüna, ukat kunsa jan qhanañchkäna?

⁶ Nayrïr profecianjja, katarir tukjiri mä ‘wawaw’ utjani sasaw Jehová Diosajj arsüna (Génesis 3:15 liytʼañataki). Ukampis uka wawajj khitïnisa, katarin wawapajj khitirakïnisa uk janiw khä urunakan qhanañchkänti. Cheqansa, pä waranq maranak qhepatwa Diosajj ukanak qhanañchañ qalltäna. b

7. ¿Kunatsa Diosajj Abraham chachar ajllïna, ukat kunsa ukajj yatichistu?

⁷ Jutañapäkäna uka wawajja, Abraham chachan familiapatwa jutañapäna. ¿Kunatsa? Jehová Diosaw Jupar ‘istʼatap laykojj’ uka chachar ajllïna (Gén. 22:18). ¿Kunsa ukajj yatichistu? Jehová Diosajj Jupar istʼapki ukat respetapki ukanakarukiw amtanakap yatiyi (Salmo 25:14 liytʼañataki).

8, 9. ¿Kunanaksa Jehová Diosajj jutañapäkäna uka wawat Abrahamaru ukat Jacobur qhanañchäna?

⁸ Kunapachatï Jehová Diosajj mä angelap toqe Abraham amigopamp parlkäna ukhapuniw ak qhanstayäna: Jutañapäkäna uka wawajj mä jaqëñapänwa (Gén. 22:15-17; Sant. 2:23). Ukampis ¿kunjamsa jupajj katarir chhaqtayañapäna? ¿Katarejj khitïnsa? Qhepatwa uka jisktʼanakarojj qhanañchasiñapäna.

⁹ Jutkani uka wawajj Jacob chachan familiapatwa jutani sasaw Jehová Diosajj arsurakïna, uka chachajj Abrahaman allchhipänwa ukat taqe chuymaw Diosar confiyasïna (Gén. 28:13-22). Ukatjja, Jacob chachan Judá sat yoqapan familiapatwa uka wawajj jutañaparakïna, ukwa Diosajj Jacob toqejj qhanañchäna. Jacob chachan arunakaparjamajja, Judá chachan wawapajj mä ‘vara’ katoqañapäna, ukajj reyjam apnaqañatak  munañanïña sañwa muni. Ukatjja, taqe jaqenakaw juparojj istʼapjjañapäna (Gén. 49:1, 10). Ukhamasti, uka wawajj mä reyjamaw apnaqañapäna, ukwa Jehová Diosajj qhanañchäna.

10, 11. ¿Kunatsa Jehová Diosajj David reyirusa ukat Daniel profetarus amtap yatiyäna?

¹⁰ Judá chachajj jakkäna uka tiempotjja, 650 maranakaw pasjjäna, ukhaw Jehová Diosajj amtanakap David reyir jukʼamp qhanañchäna, uka reyejj Judá familiat jutirïnwa. Diosajj Davitat akham sänwa: ‘Jupajj nayan chuymajar purtʼkiriwa’ sasa (1 Sam. 13:14; 17:12; Hech. 13:22). David reyejj Diosar wal respetirïna ukat istʼarakirïna, ukatwa Diosajj jupamp mä amtar purïna ukat “familiamat jutiri mä wawamaw wiñayatak reyjam apnaqani” sasaw arsurakïna (2 Sam. 7:8, 12-16).

¹¹ Niya 500 maranak qhepatsti, Ajllita, jan ukajj Mesiasajj kuna maransa aka Oraqer jutañapäna, ukwa Jehová Diosajj Daniel profeta toqejj qhanañchäna (Dan. 9:25, NM). Uka profetajj Jehová Diosar taqe chuym serviñatakiw chʼamachasïna ukat wal respetarakïna, ukatwa Diosajj ‘jupar wal munasïna’ (Dan. 6:16; 9:22, 23).

12. ¿Kunsa Daniel profetajj lurañapäna, ukat kunatsa?

¹² Daniel profetjam taqe chuyma servir jaqenak toqew Diosajj kunjamsa Mesiasajj jutañapäna, uk sum qhanañchäna. Ukampis janiw ni jupanakas kuntï qellqapkäna uk sum amuytʼapkänti, cheqas ukanak amuytʼañ tiempojj janïraw purinkänti. Amuytʼañataki, kunjamsa Diosan Reinopajj uttʼayatäni uk mä visionan Daniel profetar uñachtʼayasajja, Diosajj akham sänwa: ‘Uka profecía arunak sellantam, tukuya horasajj purinkani ukhakama’ sasa. Cheqas tukuy tiemponwa ‘cheqa yatiñajj jukʼamp jiljjattañapäna’ (Dan. 12:4, NM).

13. 1) Jutañapäkäna uka wawajja, ¿khitïnsa? 2) ¿Kunjamsa Jesusajj Génesis 3:15 qellqatan jikjjataski uka profecía arunak qhanañchäna?

¹³ Jutañapäkäna uka wawajj Jesusänwa, ukwa Jehová Diosajj sum qhanañchäna. Davitan familiapat jutïri Jesusajj Reyjamaw apnaqañapäna (Luc. 1:30-33; 3:21, 22). Kunjamtï Intejj mistunisin qhantʼankejja, ukhamarakiw Jesusajj aka Oraqen yatiyañ qalltkäna ukhajj Diosan amtap jaqenakar jukʼamp qhanañchäna (Mat. 4:13-17). Amuytʼañataki, Génesis 3:14, 15 qellqatan parlki uka katarejj khitïnsa uk akham sasaw Jesusajj qhanañchäna: ‘Supayajj jaqe jiwayiriwa ukat kʼarin awkiparakiwa’ sasa (Juan 8:44). Qhepatjja, apóstol Juanaruw Jesusajj akham sarakïna: ‘Uka jachʼa katarejja,  Supaya Satanás satarakiwa’ sasa (Apocalipsis 1:1 ukat 12:9 liytʼañataki). c Ukatsti, Edenan arsuskäna uka arunakjja kunjamsa phoqani ukwa Jesusajj qhanañcharakïna, jupajj jan mayampitakiw Supayar tukjañapäna (Apo. 20:7-10).

14-16. Kuntï Jesusajj yatichkäna ukjja, ¿arkirinakapajj amuyapjjpachänti? Uk qhanañchtʼam.

¹⁴ Kunjamtï aka libron nayrïr yatichäwipan uñjaniwayktanjja, Jesusajj Diosan Reinopat wal parlirïna. Ukhamarus janiw kuntï arkirinakapajj yatiñ munapkäna uk taqpachpun qhanañchirïkänti. Awisajj qhanañchkäna ukhasa, arkirinakapajj janiw ukanak amuyapkänti, walja maranak qhepatwa kunsa Jesusajj sañ munäna uk amuyasipkäna. Uka toqet jichhajj mä qawqhanak uñjañäni.

¹⁵ Diosan Reinopan Jesusamp chika apnaqanipkani uka ajllitanakajja, aka Oraqet apatäpjjaniwa ukat ajayunakjamaw alajjpachan jaktapjjani, sasaw Jesusajj 33 maran arkirinakapar qhanañchäna. Ukampis janiw jupanakajj uk sum amuyapkänti (Dan. 7:18; Juan 14:2-5). Ukat alajjpachar sarjjatajat walja maranak qhepatwa Diosan Reinopajj uttʼayatäni sasaw Jesusajj 33 maran uñachtʼäwinakamp sum qhanañcharakïna (Mat. 25:14, 19; Luc. 19:11, 12). Arkirinakapajj janiw uk amuyapkänti, ukatwa jiwatanak taypit jaktankäna ukhajj Jesusar akham jisktʼapjjäna: “Tata, ¿jichhati Israel markarojj gobiernop wasitat churjjäta?” sasa. Jesusajj janiw uka jisktʼar qhanañchkänti (Hech. 1:6, 7). Ukat ‘yaqha uwijanakaw’ utjani sasaw Jesusajj yaticharakïna. Jupanakajj janiw Jesusamp chik apnaqanipkani uka ‘jiskʼa  tama’ taypinkapjjañapäkänti (Juan 10:16; Luc. 12:32). 1914 maran Diosan Reinopajj uttʼayaskäna, uka qhepatwa Jesusan arkirinakapajj khitinakas uka pä tamankapjje uk sum amuyasipkäna.

¹⁶ Aka Oraqenkkasajja, taqe kunwa Jesusajj arkirinakapar yatichasapäna, ukampis janiw jupanakajj taqe ukanak amuyapkasapänti, uk Jesusajj sum yatïna (Juan 16:12). Cheqansa, nayrïr patak maranakanwa Diosan Reinopat jukʼamp qhanañchasjjäna. Ukampis ‘cheqa yatiñajj jukʼamp jiljjattañapäkäna’ uka tiempojj janïraw purinkänti.

17. Diosan Reinopat jukʼamp yatjjatañatakejja, ¿kunsa lursna, ukat khitin yanaptʼapas wakisiraki?

¹⁷ ‘Qhepa urunakanjja, waljaniw yatjjatañatak chʼamachasipjjani, ukatsti Diosan amtapat cheqa yatiñajj jukʼampiw jiljjattarakini’ sasaw Jehová Diosajj Daniel profetar säna (Dan. 12:4, NM). Ukampis uk yatiñ munirinakajj chʼamachasipjjañapänwa. ‘Chʼamachasiña’ sasin aymarar jaqokipatäki uka arojja, ‘mä libro wali amuyumpi sum liytʼaña sañwa hebreo arunjj munarakispa’ sasaw mä librojj qhanañchi. Ukhamarusa, Jehová Diosatï jan amuytʼañas munkani ukhajja, wal yatjjatkasas janiw Reinopat parlir cheqa yatichäwinak amuytʼksnati (Mateo 13:11 liytʼañataki).

18. ¿Kunjamsa Diosan servirinakapajj altʼat chuymanïpjjatapa ukat Jupar confiyasipjjatap uñachtʼayapjjäna?

¹⁸ Jehová Diosajj 1914 mara nayrajj jukʼat jukʼatwa Reinopat parlir cheqa yatichäwinak qhanañchañ qalltäna, aka qhepa urunakansa qhanañchaskakiwa. Cheqas aka pasïr patak maranakanjja, kunanaktï Diosan  servirinakapajj amuyapkäna ukajj walja kutiw mayjtʼayasiwayi, ukwa 4 ukat 5 yatichäwinakan sumpach yatjjatañäni. Ukhamajj ¿janit Jehová Diosajj servirinakapar yanaptʼkpachäna? Janiw uk sañ munkiti, jupanakajj Jehová Diosaruw wal confiyasipjjäna ukat altʼat chuymanïpjjarakïnwa, ukatwa Diosajj jupanakar yanaptʼäna (Heb. 11:6; Sant. 4:6). Cheqansa, Jehová Diosan servirinakapajj taqe chuymaw Diosan arsutanakapar confiyasipjje. Ukat ‘Diosan arsutanakapajj kunjamsa phoqasini uk qhanañchasajja, awisajj pantjasiwayapjjtwa’ sasin sapki ukhaw altʼat chuymanïpjjatap uñachtʼayapjjaraki. Ukham altʼat chuymanïpjjatapajj Yatiyañataki marzo 1, 1925 maran mistkäna uka revistanwa amuysna, ukanjj akham sänwa: “Kunsa Arupajj sañ muni ukjja, Tatituw kunjamtï Jupajj munki ukat horasaparu sum qhanañchaskani” sasa.

19. ¿Kun amuyañsa Jehová Diosajj yanaptʼawayistu, ukat kunatsa?

¹⁹ Diosan Reinopajj 1914 maran uttʼayaskäna ukhajja, kunjamsa uka toqet parlir profecianakajj phoqasini, uk janiw Diosan servirinakapajj sum amuyapkänti (1 Cor. 13:9, 10, 12). Ukatwa kunanaktï Diosajj arsuwayki uk phoqasir uñjañ wal munasajja, amuyunakapan awisajj pantjasipjjäna. Yatiyañataki revistajj akham saskakïnwa: “Kunjamsa mä profeciajj phoqasini uk janiw sum amuyksnati, uka profeciajj phoqasjjani, jan ukajj phoqasiskani ukhakiw sum amuysna” sasa. Uka arunakajj cheqäskapuniwa. Jichhürunakanjja, qhep qhepa urunakanwa jakasktanjja ukat Reino toqet parlir profecianakajj waljaw phoqasiwayjje, jichhas phoqasiskakiwa. Ukat ewjjtʼanak altʼat chuymampi istʼapjjatap laykuw Jehová Diosajj amtanakap sum amuyapjjañapatakejj servirinakapar yanaptʼaski. ¡Cheqa yatiñajj jukʼampiw jiljjattawayi!

20, 21. Nayrïr cristianonakajja, ¿kunjamsa machaq yatichäwinak katoqapjjäna?

²⁰ Kunapachatï Jehová Diosajj yaqhep yatichäwinak jukʼamp qhanañchkistu ukhaw kunjam chuymanïtansa uk qhan amuyassna. ¿Diosar confiyasisa ukat altʼat chuymampit uka machaq yatichäwinak istʼañäni? Cristianonakajj ukhamanwa uñjasipjjarakïna. Ak amuytʼañäni, jumatï judío cristianösamäna ukhajja, wali respetompiw Moisesan Leyinakap uñjasamäna, Israel markat jutatamas wali askïsapänwa. Ukampis apóstol Pablojj Diosan amuytʼayatajj akham sasaw uka tiempon säna:  ‘Moisesan Leyinakaparjam sarnaqañajj janiw wakisjjeti ukat Israel marka lantejj yaqha markwa Jehová Diosajj ajllisiwayi, ukasti “Diosan Israelapa” satawa. Jupanakajj judionaka ukat yaqha markat jutir jaqenakäpjjewa’ sasa (Rom. 10:12; 11:17-24; Gál. 6:15, 16, NM; Col. 2:13, 14). ¿Uk istʼasajj kunjamakis jikjjatasisamäna?

²¹ Kuntï Pablojj Jehová Diosan amuytʼayatäsajj qhanañchkäna uk sumwa altʼat chuyman cristianonakajj katoqasipjjäna, ukatwa Jehová Diosajj jupanakar bendecïna (Hech. 13:48). Ukampis yaqhep jilat kullakanakajj chuym ustʼayasisaw amuyunakaparuk confiyasipjjäna (Gál. 5:7-12). Cheqas Cristomp apnaqanipjjañapatakejj uka jan wali amuyunakapjja, apanukupjjañapänwa (2 Ped. 2:1).

22. Kuntï Jehová Diosajj amtapat aka qhepa maranakan qhanañchawaykistu ukjja, ¿kunjamsa uñjta?

²² Kuntï Reino toqet amuykayätan ukwa Jehová Diosajj aka qhepa patak maranakan sumpach qhanañchawayistu. Amuytʼañataki, Diosan Reinopampi apnaqatäñ munirinakarojj kunapachas jan munirinakat jaljasini ukwa Diosajj sum qhanañchawayistu, jupanakajj kunjamtï uwijanakarojj cabritonakat jaljaski ukham jaljatäpjjañapänwa. Ukatsti, kunapachas 144.000 ajllitanakajj phoqachasjjani, Jesusajj Reino toqet parlkäna uka uñachtʼäwinakajj kamsañsa muni ukat kunapachas qhep qhepa ajllit cristianonakajj alajjpachan jakañatak jaktayatäpjjani, taqe ukanakwa Jehová Diosajj qhanañchawayistu. d Uka qhanañchäwinak istʼasajja, ¿kunjamsa jumajj jikjjatasta? ¿Jukʼampit Jehová Diosar confiyasta? ¿‘Jehová Diosaw taqe ukanak altʼat chuymani servirinakaparojj yatichaski’ sasat amuyta? ‘Jehová Diosaw Jupar respetapki ukat istʼapki ukanakarojj jukʼat jukʼat amtanakap yatiyi’ sasin jukʼamp confiyañatakiw aka libro liytʼañajj yanaptʼätam.