1, 2. Јеһова бәшәријјәтлә бағлы нијјәтини неҹә ачыглајыр?

 АДӘТӘН, гајғыкеш валидејнләр аилә мәсәләләрини өз ушаглары илә дә мүзакирә едирләр. Анҹаг мүдрик давранараг онлар ушагларына һәр шеји данышмырлар; ушагларын јашындан асылы олараг, онларын гавраја биләҹәји гәдәр мәлуматы бөлүшүрләр.

² Ејнилә, Јеһова да бәшәријјәтлә бағлы Өз нијјәтини тәдриҹән ачыглајыр вә О буну јалныз мүнасиб билдији вахтда едир. Ҝәлин Јеһованын Падшаһлыгла бағлы һәгигәтләри тарих боју тәдриҹән неҹә ачыгладығыны гысаҹа олараг нәзәрдән кечирәк.

3, 4. Јеһова бәшәријјәтин тарихини габагҹадан мүәјјәнләшдирибми? Изаһ един.

³ Падшаһлыг гурмаг Јеһованын әзәли нијјәтинә дахил дејилди. Чүнки Јеһова бәшәр тарихинин ҝедишатыны габагҹадан мүәјјәнләшдирмәмишди; инсанлары ирадә азадлығы илә јаратмышды. О, Адәм вә Һәвваја бәшәријјәт үчүн нијјәтинин нәдән ибарәт олдуғуну ачыглајараг белә демишди: «Төрәјиб чохалын, бүтүн јер үзүнү долдурун вә она саһиб олун» (Јар. 1:28). Јеһова һәмчинин онлара пислијә вә јахшылыға даир гојдуғу нормалара табе олмағы әмр етмишди (Јар. 2:16, 17). Адәм вә Һәвва садиг галмағы сечә биләрдиләр. Әҝәр онлар вә онларын нәсли Аллаһын сөзүнә гулаг ассајдылар, онда Аллаһын нијјәтини һәјата кечирмәк үчүн Мәсиһин идарә етдији Падшаһлыға еһтијаҹ олмазды. Вә индинин өзүндә дә јер үзү Јеһоваја ибадәт едән камил инсанларла долу оларды.

⁴ Шејтанын, Адәм вә Һәвванын үсјан галдырмасына бахмајараг, Јеһова јер үзүнү камил инсанларла долдурмаг нијјәтиндән әл чәкмәди. О, Өз истәјини һәјата кечирмәк үчүн садәҹә башга үсула әл атды. Аллаһын нијјәти мәнзил башына јалныз мүәјјән јолла ҝедән вә кимләринсә тәсири илә релсдән чыха билән гатар кими дејил. Каинатда елә бир гүввә јохдур ки, Јеһоваја Өз нијјәтини һәјата кечирмәјә мане олсун. (Әшија 55:11 ајәсини охујун.) Гаршысына һәр һансы бир манеә чыханда О, дәрһал башга јол сечир a (Чых. 3:14, 15). Мүнасиб билдији вахтда О, Өз садиг бәндәләринә нијјәтини һәјата кечирәҹәји јени үсул барәдә мәлумат верир.

5. Әдән бағында галдырылан үсјандан сонра Јеһова нә етди?

 ⁵ Әдән бағында галдырылан үсјандан сонра Јеһова Аллаһ нијјәтинә Падшаһлыг гурмағы дахил етди (Мәт. 25:34). Бәшәријјәт тарихинин һәмин зүлмәт бир дөврүндә Јеһова инсанлары камиллијә неҹә гајтараҹағына вә Шејтанын һакимијјәти әлә кечирмәк ҹәһдләринин вурдуғу зәрәри неҹә арадан галдыраҹағына илк дәфә ајдынлыг ҝәтирди (Јар. 3:14—19). Анҹаг Јеһова Падшаһлыгла бағлы бүтүн тәфсилатлары ачыгламады.

6. Јеһова нә сөз вермишди, анҹаг нәјә ајдынлыг ҝәтирмәмишди?

⁶ Елә илк пејғәмбәрликдә Јеһова сөз вермишди ки, «өвлад» иланы мәһв едәҹәк. (Јарадылыш 3:15 ајәсини охујун.) Анҹаг һәмин вахт нә гадынын, нә дә иланын өвладынын кимлији ачыгланмамышды. Јеһова тәхминән 2000 ил әрзиндә бу барәдә мәлумат вермәди b.

7. Јеһова нәјә ҝөрә Ибраһим пејғәмбәри сечди вә бундан һансы ваҹиб дәрси өјрәнирик?

⁷ Онда Јеһова Ибраһим пејғәмбәри сечди ки, вәд олунмуш өвлад ондан төрәсин. Јеһова ону итаәткарлығына ҝөрә сечмишди (Јар. 22:18). Бундан ваҹиб бир дәрс өјрәнирик: Јеһова Өз нијјәтини јалныз Онун гаршысында еһтирам долу горхуја малик олан инсанлара ачыглајыр. (Зәбур 25:14 ајәсини охујун.)

8, 9. Јеһова вәд олунмуш өвлад барәдә Ибраһим вә Јагуб пејғәмбәрә нәләри ачыглады?

⁸ Јеһова мәләк васитәсилә досту Ибраһимлә данышанда вәд олунмуш «өвлад» барәдә илк дәфә ваҹиб бир мәлуматы ачыглады. О, билдирди ки, «өвлад» инсан олаҹаг (Јар. 22:15—17; Јаг. 2:23). Бәс бу инсан иланы неҹә мәһв едәҹәк? Сөһбәт һансы иландан ҝедир? Бу суаллар заман кечдикҹә ҹавабландырылды.

⁹ Јеһова билдирди ки, вәд олунмуш «өвлад» Ибраһим пејғәмбәрин нәвәсинин — бөјүк иман саһиби олан Јагубун нәслиндән ҝәләҹәк (Јар. 28:13—22). Јеһова Јагуб васитәсилә ачыглады ки, вәд олунмуш Өвлад Јагубун оғлу Јәһуданын нәслиндән ҝәләҹәк. Јагуб пејғәмбәрлик етмишди ки, Јәһуданын нәслиндән ҝәлән һәмин Өвлад һакимијјәт рәмзи олан «һөкмдар әсасы»ны алаҹаг вә «халглар она итаәт едәҹәк» (Јар. 49:1, 10). Бунунла да Аллаһ вәд олунмуш Өвладын һөкмдар, јәни падшаһ олаҹағыны билдирди.

10, 11. Нәјә ҝөрә Јеһова Өз нијјәтини Давуд падшаһа вә Дәнјал пејғәмбәрә ачыгламышды?

¹⁰ Јәһуданын јашадығы дөврдән тәхминән 650 ил сонра онун нәслиндән ҝәлән Давуд падшаһа Јеһова Өз нијјәти илә бағлы әлавә мәлумат верди. Јеһова Давудун Онун көнлүнә јатдығыны демишди (1 Ишм. 13:14; 17:12; Һәв. 13:22). Давуд Јеһова гаршысында горхуја малик олдуғу үчүн Күлли-Ихтијар Аллаһ онунла әһд бағлајараг вәд етмишди ки, онун нәслиндән ҝәлән бир нәфәр әбәди һөкмдарлыг едәҹәк (2 Ишм. 7:8, 12—16).

¹¹ Тәхминән 500 илдән сонра Јеһова Дәнјал пејғәмбәр васитәсилә мәсһ олунмуш шәхсин, јәни Мәсиһин јер үзүндә конкрет һансы илдә пејда олаҹағыны билдирди (Дән. 9:25).  Јеһова ону истәкли бәндәси һесаб едирди, ахы Дәнјал Она дәрин еһтирам бәсләјир вә ҝеҹә-ҝүндүз ибадәт едирди (Дән. 6:16; 9:22, 23).

12. Дәнјал пејғәмбәрә нә тапшырылмышды вә нәјә ҝөрә?

¹² Јеһова вәд олунмуш «өвлад», јәни Мәсиһ барәдә Дәнјал вә диҝәр садиг пејғәмбәрләр васитәсилә бир чох тәфәррүатлар јаздырса да, О һесаб едирди ки, хидмәтчиләринин бүтүн пејғәмбәрликләри баша дүшмәләринин вахты һәлә јетишмәјиб. Мәсәлән, Аллаһын Падшаһлығынын неҹә тәсис олунаҹағы барәдә ҝөрүнтү аланда Дәнјала бу пејғәмбәрлији Јеһованын тәјин етдији вахта кими мөһүрләмәк тапшырылды. Һәмин вахт ҝәләндә «һәгиги елм чохалаҹаг»ды (Дән. 12:4).

13. а) Вәд олунмуш «өвлад» кимдир? б) Иса Јарадылыш 3:15 ајәләриндәки пејғәмбәрлијә неҹә ајдынлыг ҝәтирди?

¹³ Јеһова вәд олунмуш «өвлад»ын, јәни Давудун нәслиндән ҝәләҹәк Падшаһын Иса олдуғуну ајдын шәкилдә билдирди (Лука 1:30—33; 3:21, 22). Ҝүнәш шүалары јер үзүнә шәфәг сачдығы кими, Иса да јер үзүндә хидмәт етмәјә башлајанда инсанлары Аллаһын нијјәтләри илә бағлы биликләрлә ајдынлатды (Мәт. 4:13—17). Мисал үчүн, Иса Шејтаны гатил вә јаланын атасы адландырараг Јарадылыш 3:14, 15 ајәләриндә гејд олунан «илан»ын ким олдуғуна даир бүтүн шүбһәләри арадан галдырды (Јәһ. 8:44). Еләҹә дә Јәһјаја вердији вәһјдә «гәдим илан»ын Иблис вә Шејтан олдуғуну ашкара чыхартды c. (Вәһј 1:1; 12:9 ајәләрини охујун.) Һәмин вәһјдә Иса, јәни вәд олунмуш «өвлад» Әдән бағында сөјләнилән пејғәмбәрлији неҹә јеринә јетирәҹәјини вә Шејтаны мәһв едәҹәјини ҝөстәрди (Вәһј 20:7—10).

14—16. Исанын биринҹи әсрдәки шаҝирдләри онун дедикләринин һамысыны там баша дүшүрдүләрми? Изаһ един.

¹⁴ Бу китабын 1-ҹи фәслиндән ҝөрдүјүмүз кими, Иса Падшаһлыг барәдә әтрафлы данышырды. Анҹаг о, чох вахт шаҝирдләринин билмәк истәдикләри тәфәррүатларын һамысыны ачыгламырды. Һәтта ачыгласа белә, онун давамчылары Ағаларынын онлара дедији һәгигәтләри сонра, бәзән исә јүзилликләр кечдикдән сонра там баша дүшүрдүләр. Ҝәлин бәзи нүмунәләрә нәзәр салаг.

¹⁵ Ерамызын 33-ҹү илиндә Иса ајдын шәкилдә билдирди ки, Аллаһын Падшаһлығынын Падшаһына көмәк едәҹәк һакимијјәт шәрикләри јер үзүндән ҝөтүрүләҹәкләр вә руһани варлыглар кими дирилдиләрәк ҝөјләр һәјатына говушаҹаглар. Анҹаг Исанын шаҝирдләри буну дәрһал анламадылар (Дән. 7:18; Јәһ. 14:2—5). Елә һәмин ил Иса нүмунәләрлә ҝөстәрди ки, Падшаһлыг о, ҝөјә галхандан узун мүддәт сонра гурулаҹаг (Мәт. 25:14, 19; Лука 19:11, 12). Шаҝирдләр бу ваҹиб һәгигәтләри баша дүшмәдиләр вә Иса дирилдикдән сонра ондан сорушдулар: «Исраилдә падшаһлығы инди бәрпа едәҹәксән?» Лакин Иса һәмин вахт бу мөвзуја даир һеч бир изаһат вермәди (Һәв. 1:6, 7). О һәмчинин өјрәтмишди ки, онун һакимијјәт шәрикләриндән ибарәт «кичик сүрү»јә дахил олмајан «башга гојунлар»ы  да олаҹаг (Јәһ. 10:16; Лука 12:32). Исанын давамчыларынын 1914-ҹү илдә Падшаһлыг гуруландан илләр сонра бу ики груп барәдә дүзҝүн анлајышлары олду.

¹⁶ Јер үзүндә јашајаркән Иса шаҝирдләринә чох шеј даныша биләрди, анҹаг онлар һәр шеји баша дүшмәјәҹәкләрини билирди (Јәһ. 16:12). Шүбһәсиз, Падшаһлыгла бағлы бир чох мәлуматлар артыг биринҹи әсрдә ачыгланмышды. Анҹаг бу кими биликләрин чохалмасынын һәлә вахты дејилди.

17. Падшаһлыгла бағлы һәгигәтләри анламаг үчүн биз нә етмәлијик вә кимин көмәјинә еһтијаҹымыз вар?

¹⁷ Јеһова Аллаһ Дәнјала демишди ки, ахырзаманда «чохлары өзүнү ора-бура вураҹаг» вә Аллаһын нијјәти илә бағлы «һәгиги елм чохалаҹаг» (Дән. 12:4). Бу билијә јијәләнмәк истәјән һәр кәс вар-ҝүҹү илә чалышмалыдыр. Бир енсиклопедијада гејд олунур ки, «өзүнү ора-бура вурмаг» кими тәрҹүмә олунан ибрани фели инсанын охудуғу китабы сәјлә вә дәриндән арашдырдығыны билдирир. Мүгәддәс Китабы нә дәрәҹәдә дәриндән арашдырсаг да, Падшаһлыгла бағлы һәгигәтләри Јеһованын көмәји олмадан дүзҝүн баша дүшмәк гејри-мүмкүндүр. (Мәтта 13:11 ајәсини охујун.)

18. Аллаһ горхусу олан инсанлар иман вә тәвазөкарлығы неҹә ҝөстәрмишдиләр?

¹⁸ Јеһова 1914-ҹү илә гәдәр Падшаһлыгла бағлы һәгигәтләри тәдриҹән ачыгладығы кими, сон ҝүнләрдә дә буну едир. Бу китабын 4 вә 5-ҹи фәсилләриндә ҝөрәҹәјик ки, сон 100 ил әрзиндә Аллаһын халгы бир чох мәсәләләрлә бағлы дәфәләрлә дәјишикликләр етмәли олуб. Бу о демәкдирми ки, Јеһова онлары дәстәкләмәјиб? Белә гәнаәтә ҝәлмәјә һеч бир сәбәб јохдур. Әксинә, О, һәмишә онлары дәстәкләјиб. Чүнки үрәјиндә Аллаһ горхусу олан бу инсанлар Онун дәјәрләндирдији ики хүсусијјәти — иманы вә тәвазөкарлығы тәзаһүр етдирирдиләр (Ибр. 11:6; Јаг. 4:6). Јеһованын хидмәтчиләри Онун Кәламында јазылан  бүтүн вәдләрин һәјата кечәҹәјинә иман едирләр. Онлар бу пејғәмбәрликләрин неҹә јеринә јетәҹәјини дәгиг баша дүшмәдикләрини етираф етмәклә тәвазөкарлыг ҝөстәрирләр. Онларын тәвазөкар олдуглары «Ҝөзәтчи гүлләси» журналынын 1925-ҹи ил 1 март сајында јазылан сөзләрдә әкс олунмушду. Орада дејилирди: «Биз билирик ки, Мүгәддәс Китабы изаһ едән Рәбб Өзүдүр. О, һәгигәтләри халгына мүнасиб вахтда вә лазым билдији тәрздә анламаға көмәк едәҹәк».

19. Бу ҝүн Јеһова бизә нәји анламаға имкан верир вә нәјә ҝөрә?

¹⁹ Падшаһлыг 1914-ҹү илдә гуруланда Аллаһын халгы бу сәмави һөкумәтлә бағлы пејғәмбәрликләрин неҹә һәјата кечәҹәјинә даир там билијә малик дејилди (1 Кор. 13:9, 10, 12). Бәзән биз Аллаһын вәдләринин јеринә јетмәсини о гәдәр чох арзулајырдыг ки, сонда јанлыш нәтиҹәләрә ҝәлирдик. Әввәлки абзасда ҝәтирилән «Ҝөзәтчи гүлләси» журналында гејд олунан нөвбәти сөзләрин нә дәрәҹәдә мүдрик олдуғу илләр өтдүкҹә өз тәсдигини тапды: «Ҝөрүнүр, нөвбәти гајдаја ујғун олараг һәрәкәт етмәк тәһлүкәсиз оларды: биз пејғәмбәрлији јеринә јетмәмиш вә ја јеринә јетмәјә башламамыш анлаја билмәрик». Инди сон, демәк олар ки, гапымызын ағзындадыр. Падшаһлыгла бағлы пејғәмбәрликләрин бәзиләри артыг јеринә јетиб, бәзиләри исә јеринә јетмәкдәдир. Аллаһын халгы олан бизләр тәвазөкар вә дүзәлмәјә һазыр олдуғумуз үчүн О, бизә нијјәтини там баша дүшмәјә имкан верир. Бәли, һәгиги елм чохалыр!

20, 21. Һәгигәтлә бағлы анлајышларында едилән дәјишикликләр биринҹи әсрдәки мәсиһиләрә неҹә тәсир етди?

²⁰ Јеһова һәгигәтлә бағлы анлајышымыза дәјишиклик едәндә үрәјимизин вәзијјәти сынаныр. Иман вә тәвазөкарлыг бизи бу дәјишикликләри гәбул етмәјә тәшвиг едәҹәкми? Биринҹи әсрин орталарында јашајан мәсиһиләр мәһз бу ҹүр сынагла  үзләшмишдиләр. Тәсәввүр един ки, сиз мәсиһилији гәбул етмиш јәһудисиниз вә һәмин дөврдә јашајырсыныз. Мусанын ганунуна дәрин еһтирам бәсләјир вә јәһуди олдуғунуз үчүн гүрур дујурсунуз. Вә будур, һәвари Булусун Аллаһдан илһам алараг јаздығы мәктубларыны алырсыныз. Орада дејилир ки, артыг Мусанын ганунуна риајәт етмәк тәләб олунмур вә Јеһова Исраил халгыны рәдд едәрәк јәһудиләрдән вә гејри-јәһудиләрдән ибарәт руһани Исраил топламаг гәрарына ҝәлиб (Ром. 10:12; 11:17—24; Гал. 6:15, 16; Кол. 2:13, 14). Сиз буна неҹә мүнасибәт ҝөстәрәрдиниз?

²¹ Тәвазөкар мәсиһиләр Булусун Аллаһдан илһам алараг вердији изаһатлары гәбул етдиләр вә Јеһовадан хејир-дуа алдылар (Һәв. 13:48). Диҝәрләри исә билдикләринә бағлы галмаг истәдикләри үчүн дәјишикликләри гәбул етмәдиләр (Гал. 5:7—12). Өз нөгтеји-нәзәрләриндә дәјишикликләр етмәјәнләр, Мәсиһлә бәрабәр һакимијјәт сүрмәк кими ҝөзәл үстүнлүјү итирәҹәкдиләр (2 Бут. 2:1).

22. Аллаһын нијјәтләринин ачыгламасы илә бағлы едилән дәјишикликләрә неҹә јанашырсыныз?

²² Сон бир нечә онилликләр әрзиндә Јеһова Падшаһлыгла бағлы анлајышымыза ајдынлыг ҝәтириб. Мәсәлән, Аллаһ бизә Падшаһлығын тәбәәләринин һәгигәтә һај вермәјәнләрдән, гојунлар кечиләрдән ајрылдығы кими, нә заман ајырылаҹағыны даһа дәгиг анламаға көмәк едиб. О, һәмчинин 144 000-нин нә вахт тамамланаҹағыны, Иса пејғәмбәрин Падшаһлыгла бағлы ҝәтирдији мәсәлләрин мәнасыны вә сонунҹу мәсһ олунмушун ҝөјләрә нә заман галдырылаҹағыны өјрәдиб d. Тәлим дәјишикликләринә неҹә һај верирсиниз? Онлар сизин иманынызы мөһкәмләндирирми? Бу ҹүр дүзәлишләр сизин үчүн Јеһованын Өз тәвазөкар халгыны маарифләндирдијинә сүбутдурму? Бу китабын нөвбәти фәсилләри Аллаһын Өз нијјәтини Ондан горханлара тәдриҹән ачыгладығына әминлијинизи артыраҹаг.