1, 2. Songon dia do Jahowa papatarhon sangkapNa tu jolma?

 DITOGIHON natuatua parholong do ianakhonna laho mangkatai na ringkot di keluarga. Alai, diboto natuatua do andigan jala sadia godang sipaboaonna tu ianakhonna.

² Songon i ma Jahowa papatarhon sangkapNa tu jolma. Dipaima do tingki na denggan laho paboahon sude sangkapNa. Taparrohahon ma songon dia Jahowa papatarhon HarajaonNa tu jolma.

3, 4. Naung ditontuhon Jahowa do angka na masa di parngoluon ni jolma? Patorang ma.

³ Pamarentaon ni Messias ndang sangkap ni Jahowa sian mulana. Boasa? Ala diloas Jahowa do jolma mamillit aha na laho ulahononna. Ndang ditontuhon Jahowa na masa di parngoluon ni jolma. Dipaboa do tu si Adam dohot tu si Hawa taringot tu sangkapNa. Jahowa mandok, ”Marpinompari ma hamu, asa sopar hamu, jala gohi hamu sandok tano on, jala patunduk hamu.” (1 Mus. 1:28) Alai, dipangido Jahowa do si Adam dohot si Hawa mangoloi patikNa. (1 Mus. 2:16, 17) Boi do pilliton ni si Adam dohot si Hawa, mangoloi Jahowa manang ndang. Molo dipillit si Adam dohot pinomparna mangoloi Jahowa, ndang porlu pajongjongon ni Jahowa Harajaon i laho manggohi sangkapNa. Jala saonari sude tano on digohi jolma na so mardosa na manomba Jahowa.

⁴ Ndang sundat sangkap ni Jahowa tu tano on ala Sibolis, si Adam dohot si Hawa mangalo tu Ibana. Alai, dilului Jahowa do dalan asa saut sangkapNa i. Sangkap ni Debata ndang songon kereta api na ingkon mardalan sian rel naung ditontuhon asa boi sahat tu na tinujuna. Alani i, ndang adong na boi mangambati sangkap ni Jahowa. (Jaha Jesaya 55:11.) Molo adong na mambahen sangkapNa i tarambat, luluan ni Jahowa do dalan na asing laho pasauthon i. a (2 Mus. 3:14, 15) Jala paboaon ni Jahowa do i tu naposoNa di tingkina.

5. Aha do diulahon Jahowa laho padengganhon parsoalan na masa di porlak eden?

 ⁵ Laho padengganhon parsoalan na masa di porlak Eden, marsangkap ma Jahowa laho pajongjongkon Harajaon. (Mat. 25:34) Di tingki i, dipaboa Jahowa do aha na laho ulahononNa paluahon jolma sian hasusaan alani Sibolis. (1 Mus. 3:14-19) Alai, ndang pintor patar sude dipaboa Jahowa taringot tu HarajaonNa i.

6. Aha do janji na dipaboa Jahowa, alai aha do na so pintor dipapatar Jahowa?

⁶ Marhite surirang na parjolo na disurat di Bibel, dipaboa Jahowa ma taringot tu ’pinompar’ na laho mangalisathon ulok. (Jaha 1 Musa 3:15.) Alai ditingki i, ndang pintor dipaboa Jahowa ise pinompar dohot ulok i. Jala ndang dipaboa dope i saleleng hirahira 2.000 taon. b

7. Boasa dipillit Jahowa si Abraham, jala aha do parsiajaranna tu hita?

⁷ Dipillit Jahowa ma si Abraham gabe ompu ni pinompar na dijanjihon i. Dipillit do si Abraham ’ala ditangihon ibana soara ni Jahowa’. (1 Mus. 22:18) Aha do na boi taparsiajari sian on? Holan tu angka na mangkabiari Ibana do dipaboa Jahowa na laho siulahononNa.​—Jaha Psalmen 25:14.

8, 9. Hatorangan aha do taringot tu pinompar i na dipapatar Jahowa tu si Abraham dohot tu si Jakkob?

⁸ Tingki mangkatai Jahowa tu si Abraham marhite surusuruan, i ma parjolo sahali dipaboa Jahowa taringot tu pinompar na dijanjihon i. Dipaboa ma molo pinompar i, sahalak jolma. (1 Mus. 22:15-17; Jak. 2:23) Alai songon dia do pinompar on mangalisathon ulu ni ulok i? Ise do ulok i? Hatorangan na mangihut paboahon taringot i.

⁹ Dipaboa Jahowa do muse molo pinompar i ro sian si Jakkob. Si Jakkob, i ma pahompu ni si Abraham na marhaporseaon na togu tu Debata. (1 Mus. 28:13-22) Marhite si Jakkob do muse dipaboa Jahowa molo pinompar manang Halak na Miniahan i ro sian si Juda. Songon na disurirangkon si Jakkob, ndang meret ”tungkot harajaon” sian si Juda. Tungkot harajaon, manggombarhon huaso laho mamarenta. Jala ibana do ”ihuthonon ni angka bangso”. (1 Mus. 49:1, 10) Marhite hata on dipatuduhon Jahowa ma molo pinompar i mamarenta gabe raja.

10, 11. Boasa dipapatar Jahowa sangkapNa tu si Daud dohot tu si Daniel?

¹⁰ Hirahira 650 taon dungkon si Juda, dipapatar Jahowa ma muse taringot tu sangkapNa tu Raja Daud, pinompar ni si Juda. Disurat do di Bibel molo si Daud halomoan ni Jahowa. (1 Sam. 13:14; 17:12; Ul. 13:22) Dihabiari si Daud do Jahowa, alani i dijanjihon ma tu ibana molo pinomparna gabe raja na mamarenta salelengna.​—2 Sam. 7:8, 12-16.

¹¹ Hirahira 500 taon dungkon i, dipaboa Jahowa ma tu panurirang Daniel andigan Messias manang Halak na  Miniahan i ro tu tano on. (Dan. 9:25) Sahalak ”hasudungan ni roha” ni Jahowa do si Daniel. Boasa? Ala ibana tongtong mangoloi jala manomba Jahowa.​—Dan. 6:17; 9:22, 23.

12. Aha do na diparentahon Jahowa tu si Daniel, jala boasa?

¹² Disuru Jahowa do angka panurirang songon si Daniel laho manurat hatorangan taringot tu pinompar na dijanjihon, i ma Messias. Alai, ndang dapot dope tingki naung ditontuhon Jahowa laho papatarhon i. Alani i, ndang diantusi panurirang i na disurat nasida. Umpamana, disuru Debata do dimeteraihon si Daniel parnidaan taringot tu parjongjong ni Harajaon ni Debata, sahat tu na dapot tingki naung ditontuhon Jahowa papatarhon i. Dung dapot tingki naung ditontuhon i, ”torop halak manulingkit hata i, gabe tamba situtu parbinotoanna”.​—Dan. 12:4.

13. (a) Ise do pinompar na dijanjihon i? (b) Songon dia do Jesus patorangkon surirang na disurat di 1 Musa 3:15?

¹³ Dipaboa Jahowa do tangkas molo pinompar i ro sian pinompar ni si Daud, i ma Jesus na laho gabe Raja. (Luk. 1:30-33; 3:21, 22) Tingki Jesus di tano on, ulaonna marbarita boi ma dipatudos songon mata ni ari binsar na mambahen lam tiur, ala diurupi ibana do godang halak mangantusi sangkap ni Debata. (Mat. 4:13-17) Umpamana, dipaboa Jesus do ise ”ulok” na disurat di 1 Musa 3:14, 15, i ma Sibolis ”Sibunu jolma” jala ”ama ni gapgap [gabus]”. (Joh. 8:44) Di buku Pangungkapon, dipaboa Jesus muse tu apostel Johannes marhite parnidaan taringot tu ”ulok na robi”, i ma ”sibolis” manang ”setan”. c (Jaha Pangungkapon 1:1; 12:9.) Songon na disurirangkon di porlak Eden, dipatuduhon Jesus do muse marhite parnidaan i, songon dia bahenonna mangaripashon Sibolis.​—Pgk. 20:7-10.

14-16. Diantusi angka sisean ni Jesus do sude hatorangan na dipaboa tu nasida? Patorang ma.

¹⁴ Di Pasal 1, nunga taboto molo Jesus jotjot paboahon taringot tu Harajaon ni Debata. Alai, ndang sude dipaboa Jesus tu siseanna taringot tu Harajaon i. Sipata, nang pe naung tangkas sada hatorangan dipaboa Jesus tu siseanna, dung pe di pudian ni ari manang marratus taon asa boi diantusi nasida. Taparrohahon ma pigapiga na masa.

¹⁵ Taon 33 M tangkas do dipaboa Jesus molo halak na mangurupi ibana gabe Raja, dipillit sian tongatonga ni jolma jala dipahehe tu surgo. Alai, ndang diantusi siseanna dope hatorangan i di tingki i. (Dan. 7:18; Joh. 14:2-5) Laos di tingki i muse, marhite sada tudosan dipaboa Jesus do molo Harajaon i pajongjongonna leleng dungkon hehe ibana tu surgo. (Mat. 25:14, 19; Luk. 19:11, 12) Alai tongtong do ndang diantusi nasida. Umpamana dung dipahehe  Jesus, disungkun nasida dope, ”Pajongjongonmu ma saonari, ale Tuhan, Harajaon i di Israel?” Ndang dipaboa Jesus sude tu nasida di tingki i. (Ul. 1:6, 7) Diajarhon Jesus do muse tu sisean i taringot tu ’birubiru na asing’. Birubiru on ndang sian ”punguan na metmet” na mamarenta rap dohot Jesus. (Joh. 10:16; Luk. 12:32) Ndang tangkas dope diboto siihuthon Jesus taringot tu punguan i. Alai, dung jongjong Harajaon i taon 1914, dipapatar ma taringot on.

¹⁶ Tingki di tano on, godang do na laho dipaboa Jesus tu siseanna, alai diboto Jesus do ndang tolap dope siseanna mangantusi i. (Joh. 16:12) Ndang tingkina dope dipapatar sude hasintongan taringot tu Harajaon ni Debata di abad na parjolo, nang pe nunga godang hasintongan taringot tu Harajaon dipaboa di tingki i.

17. Aha do na ingkon taulahon asa boi taantusi hasintongan taringot tu Harajaon ni Debata, alai aha do muse na tahaporluhon?

¹⁷ Dijanjihon Jahowa do tu si Daniel, di ”tingki panimpuli; jadi torop halak manulingkit hata i, gabe tamba situtu parbinotoanna”. (Dan. 12:4) Asa boi mangantusi sangkap ni Debata ingkon marsitutu do sasahalak manulingkit isi ni Bibel. Sada karya referensi mandok, hata Heber na diterjemahon ”manulingkit”, dos songon sasahalak na manat mamareso isi ni sada buku. Alai nang pe marsitutu hita manulingkit isi ni Bibel, ndang na boi taantusi taringot tu Harajaon i, molo ndang diurupi Jahowa.​—Jaha Mateus 13:11.

18. Songon dia do halak na mangkabiari Jahowa patuduhon haporseaon dohot serep ni roha?

¹⁸ Nunga dipapatar Jahowa hasintongan taringot tu HarajaonNa sian tingki tu tingki andorang so taon 1914  jala, tongtong dope dipapatar i sahat tu tingki parpudi. Songon na dipaboa di Pasal 4 dohot Pasal 5 di buku on, di bagasan 100 taon, godang do pangantusion ni naposo ni Debata na ingkon dipauba muse. Alai, na so diurupi Jahowa do nasida umbahen na godang muba pangantusion ni nasida? Ndang songon i! Gariada, tarida do na marserep ni roha jala marhaporseaon naposo ni Debata. (Heb. 11:6; Jak. 4:6) Pos do roha ni nasida na pasauton ni Jahowa do sude janjiNa na disurat di Bibel. Dung i, tarida do serep ni rohanasida ala olo mangangku naung sala pangantusionna taringot tu cara ni Jahowa pasauthon janjiNa. Majalah The Watch Tower 1 Maret 1925 mandok, ”Songon naung taantusi, Tuan i sandiri do na paboahon lapatan ni HataNa tu naposoNa marhite cara dohot tingki naung ditontuhon.”

19. Aha do na boi taantusi saonari, jala boasa songon i?

¹⁹ Tingki jongjong Harajaon ni Debata taon 1914, ndang diantusi naposo ni Debata dope songon dia angka surirang hombar tu parjongjong ni Harajaon i. (1 Kor. 13:9, 10, 12) Olo do sala pangantusionta ala hirim rohanta hatop saut janji ni Debata. Alani i, tutu do hatorangan na dipaboa di The Watch Tower 1 Maret 1925 na mandok, ”Ndang boi taantusi sada surirang ni Bibel sahat tu na digohi manang taida sandiri masa surirang i.” Hita mangolu di ujung ni tingki parpudi. Nunga godang surirang taringot tu Harajaon ni Debata naung digohi jala na taida masa saonari. Ala marserep ni roha jala rade mambahen hamubaon, diurupi Jahowa ma hita saonari asa lam mangantusi sude sangkapNa. Lam patar ma pangantusion i di tingkinta on!

20, 21. Songon dia do pangkilalaan ni halak Kristen di abad na parjolo mangihuthon pangantusion na lam tangkas?

²⁰ Boi do tarida aha na adong di rohanta tingki adong pangantusion na lam dipatangkas taringot tu hasintongan. Taronjar do rohanta alani haporseaon dohot serep ni roha mangihuthon hamubaon i? Halak Kristen di abad na parjolo, hea do mangkilala sisongon i. Umpamana, songon dia do molo hita halak Kristen Jahudi na mangolu di abad na parjolo. Las do rohanta mangihuthon Patik ni si Musa. Dung i, nunga diihuthon halak Jahudi patik i saleleng martaontaon. Alai, adong ma surat sian si Paulus na paboahon ndang ingkon diihuthon halak Kristen be Patik ni si Musa. Dipaboa muse, ndang holan halak Jahudi be na dipillit Jahowa gabe Israel ni Debata. (Rom 10:12; 11:17-24; Gal. 6:15, 16; Kol. 2:13, 14) Aha do na laho ulahononta?

²¹ Dipasupasu Jahowa do halak Kristen na marserep ni roha ala dijalo nasida surat ni apostel Paulus na sinihathon ni Debata. (Ul. 13:48) Alai na deba ndang olo manjalo tudutudu i, diihuthon nasida do pangantusionna sandiri. (Gal. 5:7-12) Molo ndang olo nasida muba, ndang parsidohot be nasida mamarenta rap dohot Jesus.​—2 Ptr. 2:1.

22. Songon dia do pangkilalaanta tu pangantusion na lam dipatangkas taringot tu sangkap ni Debata?

²² Saleleng marpulu taon on, nunga dipapatar Jahowa pangantusion taringot tu HarajaonNa. Diurupi do hita lam tangkas mangantusi andigan tingkina rayat ni Harajaon i disirang sian halak na so manangihon barita na uli, songon umpama ni Jesus taringot tu birubiru na disirang sian hambing. Dipaboa do muse tu hita andigan digohi bilangan ni 144.000 halak Kristen na miniahan, aha do lapatan ni tudosan taringot tu Harajaon ni Debata na pinaboa ni Jesus, jala andigan halak Kristen na miniahan parpudi sahali dipahehe tu surgo. d Songon dia do pangkilalaanta tu pangantusionta na lam dipatangkas? Lam togu do haporseaonta? Pos do rohanta molo i patuduhon na diajari Jahowa do naposoNa na marserep ni roha? Parsiajaran na mangihut boi paposhon rohanta molo Jahowa papatarhon sangkapNa tu naposoNa sian tingki tu tingki.