PASAL 3
Jahwe Mpebetehken PeratenNa
1, 2. Uga carana Jahwe mpebetehken peratenNa man manusia?
ORANG TUA si perkeleng ikut banna anak-anakna i bas pembahasen masalah keluarga. Tapi, iukurina ka asa kai buena keterangan si banci ipesehna. Adi anak-anakna nggo cukup dewasa guna ngantusisa, reh buena ipesehna keterangen.
2 Bage ka pe, ipebetehken Jahwe peratenNa man manusia alu ertahap. Tapi, si e ilakokenNa adi waktuna nggo tepat. Perdiatekenlah gambaren kerna uga Jahwe mpebetehken kebenaren kerna Kinirajan sedekah enda.
Engkai maka Iperluken Kinirajan?
3, 4. Enggo kin itetapken Jahwe perdalanen sejarah manusia? Jelasken.
3 Tangtangna, Kinirajan Mesias labo bagin i bas peraten Jahwe. Engkai? Sabap la itetapken Jahwe perdalanen sejarah manusia; selain si e, itepaNa manusia alu kebebasen guna milih. Erkiteken si e, ipebetehkenNa man Adam ras Hawa kerna peratenNa man manusia, nina, ”Ertuahlah kam jadi nterem, demi dingen taluken doni enda.” (Kej. 1:28) Ipindo Jahwe ka gelah iergai kalak e patokenNa kerna kai si mehuli ras si la mehuli. (Kej. 2:16, 17) Situhuna, banci ipilih Adam ras Hawa gelah tetap setia. Bicara setia ia ras kesusurenna, la kita perlu Kinirajan si iperentah Kristus guna njadiken peraten Dibata. Arusna min, doni enda nggo dem alu manusia si sempurna gundari, janah kerina nembah man Jahwe.
4 Pemberontaken si ilakoken Setan, Adam, ras Hawa labo erban peraten Jahwe la surung i bas erbahan doni enda dem alu manusia si sempurna. Sebalikna, isesuaiken Jahwe cara ngelakokenca. PeratenNa labo bagi kereta api si arus mentasi dalan tertentu gelah banci seh ku tujunna janah si banci ka ibelokken kalak. Adi nggo ipebetehken Jahwe peratenNa, la lit gegeh i bas alam semesta enda si banci ngambatisa. (Oge Jesaya 55:11.) Adi lit si ngambatisa i bas sada dalan, ipake Jahwe dalan si deban. a (Kel. 3:14, 15) Adi cocok iakapNa, ipebetehkenNa man juak-juakNa si setia kerna cara si mbaru si igunakenNa i bas njadiken peratenNa.
5. Kai si ilakoken Jahwe erkiteken pemberontaken si terjadi i peken Eden?
5 Erkiteken pemberontaken si terjadi i peken Eden, ersura-sura Jahwe majekken sada Kinirajan. (Mat. 25:34) Paksa tempa-tempa lanai lit arapen manusia, mulai ipebetehken Jahwe kai cara si igunakenNa i bas erbahan manusia jadi sempurna mulihken ras uga Ia nasapken kiniseran si terjadi erkiteken upaya Setan si sia-sia guna ngerebut kekuasan. (Kej. 3:14-19) Tapi, labo mis ipebetehken Jahwe kerina keterangen kerna Kinirajan e.
Mulai Ipetangkas Jahwe Kebenaren kerna Kinirajan
6. Kai si ijanjiken Jahwe, tapi kai si la ipebetehkenNa?
6 I bas nubuat si pemenana kal, ijanjiken Jahwe maka lit sada ’kesusuren’, si nandangi ngkernepken nipe e. (Oge Kejadin 3:15.) Tapi, ise kesusuren e ras ise kesusuren nipe e lenga ipebetehken paksa si e. La ipebetehken Jahwe keterangen kerna si e sedekah kira-kira 2.000 tahun. b
7. Engkai maka Abraham si ipilih, ras kai pelajarenna?
7 Dungna, kesusuren si ipadanken e reh i bas kesusuren Abraham nari. Abraham ipilih erkiteken ’erkemalangen ia man Jahwe’. (Kej. 22:18) Banci sidatken pelajaren si penting jenari. Ipebetehken Jahwe peratenNa man kalak si patuh dingen erkemalangen man baNa saja.—Oge Masmur 25:14.
8, 9. Keterangen kai saja kerna kesusuren e si ipetangkas Jahwe man Abraham ras Jakup?
8 Paksa Jahwe ngerana man temanNa, Abraham, arah sada malekat, enda me tangtangna ipetangkas Jahwe keterangen si seh kal pentingna kerna kesusuren si ipadanken e: Ia sekalak manusia. (Kej. 22:15-17; Jak. 2:23) Tapi, uga manusia enda banci ngkernepken nipe e? Ise nipe e? Penjelasen seterusna banci njabap penungkunen-penungkunen enda.
9 Enggo itetapken Jahwe maka kesusuren si ipadanken e reh arah kempu Abraham, Jakup, kalak si mbelin kal kinitekenna man Dibata. (Kej. 28:13-22) Ipebetehken Jahwe arah Jakup maka Pribadi si Ipadanken enda reh i bas kesusuren Juda nari, anak Jakup. Inubuatken Jakup maka kesusuren Juda enda me si ncikep ”tungkat kinirajan”, si ngelambangken wewenang kinirajan, janah ’bangsa-bangsa nembah alu erkemalangen i lebe-lebena’. (Kej. 49:1, 10) Bas kata-kata enda nari, icidahken Jahwe maka Pribadi si Ipadanken e nandangi jadi penguasa, raja.
10, 11. Engkai maka ipebetehken Jahwe peratenNa man Daud bage pe man Daniel?
10 Kira-kira 650 tahun kenca jaman Juda, reh tangkasna ituriken Jahwe kerna peratenNa man Raja Daud, kesusuren Juda. Daud ’kalak si ngena ate Jahwe’. (1 Sam. 13:14; 17:12; Perb. 13:22) Erkiteken Daud erkemalangen man Dibata, itetapkenNa sada perjanjin ras Daud maka salah sada kesusurenna banci merentah seh rasa lalap.—2 Sam. 7:8, 12-16.
11 Kira-kira 500 tahun kenca si e, igunaken Jahwe nabi Daniel lako mpebetehken tahun piga Pribadi si Iminaki ntah pe Mesias e, reh ku doni. (Dan. 9:25) ’Keleng kap ate Jahwe man Daniel’ janah meherga kal iakapNa Daniel. Engkai? Erkiteken Daniel tuhu-tuhu nghamati Jahwe janah terus ngelayani Ia.—Dan. 6:16; 9:22, 23.
12. Daniel iperentahken guna ngelakoken kai, janah ngkai?
12 Igunaken Jahwe nabi-nabi si setia bagi Daniel lako nuratken melala keterangen kerna kesusuren si ipadanken eme Mesias. Tapi, lenga seh waktuna iakap Jahwe juak-juakNa ngantusi kerina erti kai si isuruhNa guna itulis. Misalna, kenca ibereken pengenehenen kerna pajekna Kinirajan Dibata, Daniel isuruh gelah imeteraikenna nubuat e ngasa waktu si itetapken Jahwe. I bas waktu si nggo itetapken e, pemeteh si benar ”simpar me”.—Dan. 12:4, Terjemahan Dunia Baru (NW).
Jahwe nggunaken dilaki-dilaki si setia bagi Daniel lako nuratken keterangen kerna Kinirajan Mesias
Isalsalken Jesus Terang kerna Peraten Dibata
13. (a) Ise kesusuren si ipadanken e? (b) Uga Jesus njelasken nubuat i bas Kejadin 3:15?
13 Ipebetehken Jahwe alu tangkas maka Jesus me kesusuren si ipadanken e, kesusuren Daud si nandangi merentah jadi Raja. (Luk. 1:30-33; 3:21, 22) Paksa ibenaken Jesus pelayanenna, tempa mbincar terang nandangi pemeteh manusia kerna peraten Dibata. (Mat. 4:13-17) Misalna, ipetangkas Jesus kerna ise kin ”nipe” si ikataken i bas Kejadin 3:14, 15, alu nggelari Iblis e ”pemunuh” ras ”bapa kerina kalak si perguak”. (Joh. 8:44) I bas ketangkasen si ibereken man Johanes, ipebetehken Jesus maka ”nipe si nuria” eme ”Iblis ntah Setan”. c (Oge Ketangkasen 1:1; 12:9.) I bas ketangkasen e, ijelasken Jesus ka uga ia selaku kesusuren si ipadanken e dungna nggenepi nubuat si ibereken i Eden ras ngkernepken Setan.—Ket. 20:7-10.
14-16. Lalap nge iangkai ajar-ajar i bas abad si pemena erti situhuna kerna kebenaren si ipebetehken Jesus? Jelasken.
14 Bagi si ituriken i bas Pasal 1 buku enda, ibereken Jesus penjelasen si mbue pengertinna kerna Kinirajan. Tapi, labo lalap ipebetehkenna kerina keterangen si merhat ajar-ajarna metehsa. Janah paksa ibereken Jesus keterangen si khusus, erabad-abad kenca si e maka banci ieteh ajar-ajarna erti situhuna nandangi kebenaren si ipebetehken Tuanna. Perdiateken piga-piga contoh.
15 I bas tahun 33 M, ijelasken Jesus maka teman-temanna si ikut merentah si nandangi nampati Raja Kinirajan Dibata ibuat bas doni nari janah ipekeke guna nggeluh jadi mahluk roh i surga. Tapi, la mis iangkai ajar-ajarna kerna penjelasen e. (Dan. 7:18; Joh. 14:2-5) I bas tahun e, ijelasken Jesus alu perumpaman maka Kinirajan e ipajekken ndekah kenca ia nangkih ku surga. (Mat. 25:14, 19; Luk. 19:11, 12) La iangkai ajar-ajar kerna keterangen si seh kal pentingna e, janah i bas pudi wari isungkunna Jesus si nggo ipekeke, ”Genduari kin atendu manteki kerajan Israel mulihi?” Tapi, la ibereken Jesus melala penjelasen paksa si e. (Perb. 1:6, 7) Iajarken Jesus ka maka lit ’biri-biri si deban’, si labo bagin i bas ”rarasen si kitik” teman-temanna si ikut merentah. (Joh. 10:16; Luk. 12:32) La iangkai pengikut Kristus alu tepat ise kin duana terpuk e. Enda jadi jelas kenca Kinirajan ipajekken tahun 1914.
16 Melala si banci iajarken Jesus man ajar-ajarna paksa ia i doni, tapi ietehna maka kalak e lenga ngasup ngalokenca. (Joh. 16:12) Payo, melala pemeteh kerna Kinirajan si ipebetehken i bas abad si pemena. Tapi, lenga seh waktuna simpar pemeteh e.
Pemeteh si Benar Simpar i bas ”Pendungi Jaman”
17. Kai si arus silakoken gelah banci ngangkai kebenaren kerna Kinirajan, tapi kai ka si iperluken?
17 Erjanji Jahwe man Daniel maka i bas ”pendungi jaman” melala kalak si ”nelidiki janah pemeteh si benar” kerna peraten Dibata simpar me. (Dan. 12:4, NW) Kalak si merhat ndatken pemeteh e arus iupayakenna kal ndatkenca. Sada karya referensi ngataken maka bentuk kata kerja Heber ”nelidiki” banci ngertiken kerna sekalak jelma si mereksa sada buku alu tutus dingen megermet. Tapi, amin gia sipereksa Pustaka si Badia alu megermet, la banci siangkai alu tepat kebenaren kerna Kinirajan adi lenga ipebetehken Jahwe.—Oge Matius 13:11.
18. Uga kalak si erkemalangen man Jahwe ncidahken kiniteken ras sifat meteruk rukur?
18 Bali bagi Jahwe si alu ertahap mpebetehken kebenaren Kinirajan nandangi tahun 1914, bage ka pe i bas pendungi jaman enda. Bagi si ituriken bas Pasal 4 ras 5 buku enda, umat Dibata arus piga-piga kali nesuaiken pemetehna sedekah 100 tahun enda. Payo nge si e ertina kalak e la idukung Jahwe? Lang! IdukungNa nge kalak e. Engkai? Erkiteken kalak si erkemalangen man Jahwe ncidahken dua sifat si ngena ateNa eme erkiniteken ras meteruk rukur. (Heb. 11:6; Jak. 4:6) Tek juak-juak Jahwe maka kerina si ijanjiken i bas Pustaka si Badia pasti terjadi. Icidahken kalak enda sifat meteruk rukur paksa iakuina maka nggo salah pengertinna kerna uga situhuna janji-janji e igenepi. Sifat si meteruk rukur enda teridah i bas terbiten The Watch Tower, 1 Maret 1925, si ngataken, ”Sieteh maka Tuan sendiri me si ngertiken man baNa, si njelasken KataNa man umatNa alu caraNa si mehuli ras i bas waktu si nggo itetapkenNa.”
”Tuan . . . si njelasken KataNa man umatNa alu caraNa si mehuli ras i bas waktu si nggo itetapkenNa”
19. Alu penampat Jahwe kai si banci sidatken, janah ngkai?
19 Paksa Kinirajan ipajekken bas tahun 1914, lenga tangkas kal ieteh umat Dibata uga nubuat-nubuat si lit hubungenna ras Kinirajan banci terjadi. (1 Kor. 13:9, 10, 12) Erkiteken ergiah-giah kal kita nimai penggenepen janji Dibata, megati sibahan kesimpulen si salah. Asum waktu terus erdalan, kata-kata The Watch Tower si ikutip i bas paragraf sebelumna terbukti benar. Nina artikel e, ”Kemungkinenna, patoken si aman eme nubuat e la banci siangkai ngasa nubuat e igenepi ntah pe paksana igenepi.” Gundari, kita nggo ndauh ku pendungi jaman enda, melala nubuat Kinirajan si nggo igenepi ras si sangana igenepi. Erkiteken umat Dibata meteruk rukur janah nggit ikoreksi, Jahwe nampati kita ndatken pemeteh si reh lengkapna kerna peratenNa. Pemeteh si benar nggo simpar!
Pemurnin kerna Pemeteh Nguji Umat Dibata
20, 21. Uga pemurnin kerna pemeteh mpengaruhi kalak Kristen i bas abad si pemena?
20 Paksa imurniken Jahwe pemetehta kerna kebenaren, keadan pusuhta iuji. Sialoken nge perubahen e alu kiniteken ras meteruk rukur? Kalak Kristen si nggeluh i bas pertengahen abad si pemena ngadapi ujin si bage. Misalna, bayangkenndu adi kam sekalak Jahudi Kristen si nggeluh i bas paksa si e. Iergaindu kal Undang-Undang Musa janah megah akapndu warisen bangsandu. Kenca si e, ialokenndu surat-surat rasul Paulus i bas Dibata nari. Surat e ngataken maka Taurat lanai berlaku janah nggo itulak Jahwe Israel jasmani ras ipilihNa mpepulung Israel rohani i bas kalak Jahudi nari bage pe kalak si labo Jahudi. (Rom. 10:12; 11:17-24; Gal. 6:15, 16; Kol. 2:13, 14) Uga tanggapenndu?
21 Kalak Kristen si meteruk rukur ngaloken penjelasen Paulus janah ipasu-pasu Jahwe. (Perb. 13:48) Si debanna la nggit ngaloken pemurnin e janah pengertinna saja atena iikutkenna. (Gal. 5:7-12) Adi la iubah kalak e cara perukurenna, la banci datna kesempaten jadi penguasa ras Kristus.—2 Pet. 2:1.
22. Uga perasanndu nandangi pemetehta kerna peraten Dibata si reh tangkasna?
22 Sedekah puluhen tahun enda, nggo imurniken Jahwe pemetehta kerna Kinirajan. Misalna, isampatiNa kita gelah reh tangkasna sieteh ndigan kalak si jadi rayat Kinirajan iserapken i bas kalak si la ermediate bali bagi biri-biri iserapken i bas kambing nari. IajarkenNa ka man banta ndigan si 144.000 e lengkap jumlahna, kai erti perumpaman Jesus kerna Kinirajan, janah ndigan terpuk si iminaki si pendungi ipekeke ku surga. d Kai tanggapenndu nandangi penjelasen si reh tangkasna enda? Ipegegehi nge kinitekenndu? Ianggapndu nge enda bukti maka terus iajar Jahwe umatNa si meteruk rukur? Pembahasen seterusna i bas buku enda banci mpegegehi kinitekenndu maka ipebetehken Jahwe peratenNa alu ertahap man kalak si erkemalangen man baNa.
a Gelar Dibata eme bentuk kata kerja Heber si ertina ”jadi”. Gelar Jahwe ncidahken maka Ia me Si Nggenepi janji-janjiNa. Nehen kotak ”Erti Gelar Dibata”, i bas halamen 43.
b Amin gia tempa ndekah kal siakap waktu enda, arus siinget maka gedangen umur manusia si mbarenda asangken si gundari; lit empat jaman ngenca i bas jaman Adam nari seh ku jaman Abraham. Adam nggeluh sada jaman ras Lameh, bapa Nuah. Lameh nggeluh sada jaman ras Sem, anak Nuah. Sem nggeluh sada jaman ras Abraham.—Kej. 5:5, 31; 9:29; 11:10, 11; 25:7.
c Istilah ”Setan”, si ncidahken maka ia sada pribadi, lit 18 kali i bas Kitap-Kitap Heber. Tapi, i bas Kitap-Kitap Junani Kristen kata ”Setan” lit lebih 30 kali igunaken. I bas Kitap-Kitap Heber labo tangkas kal ijelasken kerna Setan, tapi si lebih ijelaskenna eme kerna ise Mesias e. Paksa Mesias e reh, ipebetehkenna ise situhuna Setan, si itulis i bas Kitap-Kitap Junani Kristen.
d Guna pembahasen kerna piga-piga pengertin si imurniken enda, nehen Menara Pengawal: 15 Oktober 1995, halamen 23-28; 15 Januari 2008, halamen 20-24; 15 Juli 2008, halamen 17-21; 15 Juli 2013, halamen 9-14.
