1, 2. Ki mannyer Zeova in revel son plan pour limanite?

 EN BON paran i enplik son zanfan dan bann diskisyon ki konsern lafanmir. Me, zot veye ki kantite zot pou dir. Zot dir zis bann detay ki zot santi zot zanfan i ase gran pour konpran.

² Pareyman, Zeova in ptitapti revel son plan pour bann imen. Me, i’n fer li zis ler i ti konnen ki sa ler ti’n arive. Annou vwar en pti apersi lo konman ki Zeova ti revel laverite konsernan son Rwayonm tou dilon listwar.

3, 4. Eski Zeova ti deside ki ti pou arive avek bann imen davans? Eksplike.

³ O konmansman, i pa ti dan plan Bondye pour annan en Rwayonm kot Kris i dirize konman Lerwa. Akoz? Parski Zeova pa ti’n deside davans sa ki imen ti pou fer, akoz apre tou i’n kre imen avek sa liberte pour swazir. Alor, i ti fer Adan ek Ev konn son plan pour bann imen. I ti dir zot: “Fer zanfan e vin bokou, ranpli later e domin li.” (Zen. 1:28) Zeova ti osi ekspekte ki zot respekte son standar lo sa ki byen ek mal. (Zen. 2:16, 17) Adan ek Ev ti’n kapab swazir pour reste fidel. Si zot ek zot desandans ti’n fer sa, i pa ti pou’n neseser pour annan sa Rwayonm kot Kris i dirize pour akonpli plan Bondye. La konmela, lemonn ti pou ranpli avek bann imen parfe e zot tou zot ti pou ador Zeova.

⁴ Rebelyon Satan, Adan ek Ev pa ti fer Zeova abandonn son plan pour ranpli later avek bann imen parfe. Plito, Zeova ti adapte son metod pour arive akonpli son plan. Son plan pa parey en semen dan bwa ki ou oblize swiv e ou pa kapab pase si en ros oubyen pye dibwa ki’n tonbe i bar ou. Plito, enn fwa ki Zeova in fini dir ki son plan, napa personn dan liniver ki kapab anpes li akonpli son plan. (Lir Izai 55:11.) Si i annan en lobstak dan son semen, Zeova i pran en lot semen. a (Egz. 3:14, 15) Kan i’n ariv ler, i enform  son bann serviter fidel konsernan sa nouvo metod ki i pou servi pour akonpli son plan.

5. Ki mannyer Zeova ti reazir an rapor avek sa rebelyon dan zarden Edenn?

⁵ Apre sa rebelyon dan zarden Edenn, Zeova ti fer plan pour etablir en Rwayonm. (Mat. 25:34) Diran sa moman sonm dan listwar imen, Zeova ti konmans montre ki mwayen i ti pou servi pour fer imen vin parfe e retir tou lemal ki Satan in fer pour li ganny pouvwar. (Zen. 3:14-19) Kantmenm sa, Zeova pa ti donn tou detay konsernan sa Rwayonm deswit.

6. Ki Zeova ti promet e ki i pa ti revele?

⁶ Dan sa premye profesi, Zeova ti promet ki en serten “desandans” ti pou kraz sa serpan. (Lir Zenez 3:15.) Me, lidantite sa desandans ek desandans sa serpan pa ti ankor ganny revele sa letan. Anfet, Zeova pa ti donn okenn detay konsernan sa pour apepre 2,000 an. b

7. Akoz Abraam ti ganny swazir e ki leson enportan nou aprann avek sa?

⁷ Finalman, Zeova ti swazir Abraam konman sa enn par ki sa desandans ki ti’n ganny promet ti pou sorti. Abraam ti ganny swazir akoz i ti “ekout [Zeova].” (Zen. 22:18) Nou aprann en leson enportan avek sa: Zeova i revel son plan zis avek sa bann ki annan lakrent pour li.​—Lir Psonm 25:14.

8, 9. Ki lenformasyon konsernan sa desandans, Zeova ti revele avek Abraam ek Zakob?

⁸ Ler i ti pe koz avek son zanmi Abraam atraver en lanz, pour premye fwa Zeova ti revel sa laverite enportan konsernan sa desandans ki ti’n ganny promet, anfet, i ti endike ki sa desandans ti pou en imen. (Zen. 22:15-17; Zak 2:23) Me, ki mannyer sa imen ti pou kraz sa serpan? Lekel sa serpan? Larepons sa bann kestyon ti pou ganny reponn pli tar.

⁹ Zeova ti endike ki sa desandans ki ti’n ganny promet ti pou sorti dan fanmir Zakob, pti zanfan Abraam, en zonm ki ti annan en gran lafwa dan Bondye. (Zen. 28:13-22) Atraver Zakob, Zeova ti revele ki sa Enn ki ti’n ganny promet ti pou en desandans Zida, garson Zakob. Zakob ti profetize ki sa desandans Zida ti pou ganny en “baton lerwa,” ki ti senboliz en lotorite rwayal e ki ‘sa bann ki obeisan ti pou vin pour’ sa enn. (Zen. 49:1, 10) Par dir sa, Zeova ti pe endike ki sa Enn ki ti’n ganny promet ti pou en dirizan, andotmo, en lerwa.

10, 11. Akoz Zeova ti revel son plan avek David ek Danyel?

¹⁰ Apepre 650 an apre lepok Zida, Zeova ti revel son plan plis ankor avek Lerwa David, en desandans Zida. Zeova ti dekrir David konman “en zonm ki fer plezir son leker.” (1 Sam. 13:14; 17:12; Akt 13:22) Lefet ki David ti annan lakrent pour Bondye, Zeova ti swazir pour fer en lalyans avek li konmkwa enn son desandans ti pou dirize pour touzour.​—2 Sam. 7:8, 12-16.

 ¹¹ Apepre 500 an pli tar, Zeova ti servi profet Danyel pour revel sa lannen egzakt ki Mesi oubyen sa Enn ki’n ganny swazir ti pou lo later. (Dan. 9:25) Pour Zeova, Danyel ti “en dimoun vreman presye.” Akoz? Parski Danyel ti annan en gran respe pour Zeova e i ti touzour pe servi li.​—Dan. 6:16; 9:22, 23.

12. Ki Danyel ti ganny demande pour fer e akoz?

¹² Menm si Zeova ti servi bann profet fidel parey Danyel pour ekri en kantite detay konsernan Mesi, sa desandans ki ti’n ganny promet, i pa ti ankor ler pour son bann serviter konpran sinifikasyon konplet sa ki i ti’n enspir zot pour ekrir. Par egzanp, apre ki i ti ganny en vizyon relye avek sa letan ler Rwayonm Bondye ti pou ganny etablir, Danyel ti ganny demande pour gard li en sekre ziska sa letan ki Zeova ti’n fikse. Se a lavenir ki sa vre konnesans ti “pou annabondans.”​—Dan. 12:4.

13. (a) Lekel sa desandans ki ti’n ganny promet? (b) Ki mannyer Zezi ti donn plis leklersisman lo sa profesi dan Zenez 3:15?

¹³ Zeova ti klerman idantifye Zezi konman sa desandans ki ti’n ganny swazir, sa desandans David ki ti pou dirize konman Lerwa. (Lik 1:30-33; 3:21, 22) Ler Zezi ti konmans son minister lo later, i ti konmsi soley ti leve lo limanite an rapor avek konnesans lo plan Bondye. (Mat. 4:13-17) Par egzanp, Zezi ti klerman idantifye sa “serpan” ki ganny mansyonnen dan Zenez 3:14, 15. I apel Dyab, “en kriminel” e “papa tou mansonz.” (Zan 8:44) Dan sa revelasyon ki i ti donn Zan, Zezi ti idantifye sa “serpan lantikite” konman ‘Dyab ou Satan.’ c (Lir Revelasyon 1:1; 12:9.) Dan sa menm vizyon, Zezi ti montre ki mannyer li, sa desandans ki ti’n ganny promet, ti pou finalman akonpli sa profesi ki ti ganny prononse dan zarden Edenn e kraz Satan pour ki i nepli egziste.​— Rev. 20:7-10.

14-16. Eski bann Kretyen dan premye syek ti konpran antyerman sinifikasyon bann laverite ki Zezi ti revele? Eksplike.

¹⁴ Parey nou’n vwar dan Sapit 1 sa liv, Zezi ti koz bokou lo Rwayonm Bondye. Par kont, pa toultan ki i ti revel tou bann detay ki son bann disip ti anvi konnen. Menm ler i ti donn serten detay spesifik, se en bann letan pli tar, menm plizyer syek pli tar ki bann disip Kris ti arive konpran konpletman sinifikasyon bann laverite par deryer sa ki zot Met ti’n dir. Get serten legzanp.

¹⁵ Lannen 33 N.L., Zezi ti fer kler ki sa bann ki ti pou diriz ansanm avek li dan Rwayonm Bondye ti pou ganny pran sorti lo later e resisite konman bann lespri envizib pour al viv dan lesyel. Me, son bann disip pa ti konpran deswit sa ki i ti pe dir. (Dan. 7:18; Zan 14:2-5) Sa menm lannen, Zezi ti servi bann parabol pour montre ki sa Rwayonm pa ti pou ganny etablir deswit, me plizyer lannen apre ki i ti pou’n  mont dan lesyel. (Mat. 25:14, 19; Lik 19:11, 12) Bann disip pa ti konpran sa pwen enportan sanmenm ki pli tar zot ti demann Zezi ki ti’n resisite: “Eski la aprezan, ou pou retabli rwayonm Izrael?” Me, Zezi pa ti donn zot plis detay sa letan. (Akt 1:6, 7) Zezi ti osi ansennyen ki i ti pou annan ‘lezot mouton’ ki pa ti pou form parti sa “pti troupo” ki ti pou diriz ansanm avek li. (Zan 10:16; Lik 12:32) Bann disip Kris pa ti antyerman konpran lidantite sa de group ziska apre ki sa Rwayonm ti ganny etablir an 1914.

¹⁶ I ti annan en kantite keksoz ki Zezi ti’n kapab dir son bann disip ler i ti avek zot lo later, me i ti konnen ki zot pa ti pou kapab konpran tousala pour lemoman. (Zan 16:12) San okenn dout, plis konnesans konsernan Rwayonm ti ganny revele dan premye syek. Me, i pa ti ankor ler pour sa konnesans vin annabondans.

17. Ki nou devret fer pour konpran laverite konsernan Rwayonm Bondye e kwa ki osi neseser?

¹⁷ Zeova ti promet Danyel ki pandan “letan lafen” bokou ti pou “rod partou partou, e sa vre konnesans” lo plan Bondye ti pou vin annabondans. (Dan. 12:4) Sa bann ki anvi ganny sa konnesans i bezwen travay dir pour ganny li. En liv referans i dir ki sa mo Ebre ki’n ganny tradwir “rod partou partou” i donn lide en dimoun ki pe get en liv avek bokou latansyon e fouy li anbalao. Me, ki swa nou pe egzamin Labib o profon ouswa non, nou pa pou vreman konpran tou laverite konsernan sa Rwayonm amwen ki Zeova li menm i ed nou konpran.​—Lir Matye 13:11.

18. Ki mannyer sa bann ki annan lakrent pour Zeova in demontre lafwa ek limilite?

¹⁸ Zis parey Zeova ti ptitapti revel laverite konsernan Rwayonm diran bann lannen avan 1914, i kontinyen fer li  pandan letan lafen. Parey Sapit 4 ek 5 sa liv pou montre, diran sa 100 dernyen lannen, pep Bondye in aziste zot konprenezon plizyer fwa. Me, eski sa i vedir ki zot pa pe ganny sipor Zeova? Definitivman non! O kontrer, i siport zot. Akoz? Parski sa bann ki annan lakrent pour Zeova in demontre de kalite ki i kontan e sa se lafwa ek limilite. (Ebr. 11:6; Zak 4:6) Bann serviter Zeova i annan lafwa ki tou promes ki dan Parol Bondye pou vin vre. Zot demontre limilite ler zot admet ki zot ti’n mal konpran ki mannyer egzakteman sa promes ti pou vin vre. Sa limilite ti klerman evidan dan nimero The Watch Tower le 1 Mars 1925 ki ti dir: “Nou konnen ki Senyer i sa enn ki enterpret son prop parol, ki i pou enterpret son Parol pour son pep dan son bon fason e dan son prop letan.”

19. Ki Zeova in permet nou konpran konmela e akoz?

¹⁹ Zour sa Rwayonm ti ganny etablir an 1914, pep Bondye ti annan zis en ptigin konnesans lo konman bann profesi ki relye avek Rwayonm Bondye ti pou ganny akonplir. (1 Kor. 13:9, 10, 12) Nou ti vreman anvi ki promes Bondye i ganny akonplir, alor tanzantan nou’n tonm lo bann move konklizyon. Avek letan ki’n pase, lasazes par deryer en lot parol dan sa Watch Tower ki nou’n site dan paragraf avan ti vin pli evidan. Sa lartik ti dir: “I paret en bon lareg pour swiv, nou pa pou konpran bann profesi ziska ki i ganny akonplir ouswa pandan ki i pe ganny akonplir.” La ki i fer en kantite letan depi ki nou dan letan lafen, en kantite profesi konsernan Rwayonm Bondye in ganny revele e pe ganny akonplir. Lefet ki pep Bondye i annan limilite e pare pour ganny korize, Zeova in permet nou konpran pli byen son plan. Vre konnesans in sirman vin annabondans, pa i vre?

20, 21. Ki lefe bann azisteman ti annan lo bann Kretyen dan premye syek?

²⁰ Ler Zeova i fer bann azisteman konsernan laverite, nou kondisyon leker i ganny teste. Eski lafwa ek limilite i pous nou pour aksepte bann sanzman? Bann Kretyen ki ti pe viv dan premye syek ti ganny teste dan sa fason. Par egzanp, meton ou ti en Kretyen Zwif sa letan. Ou annan gran respe pour Lalwa Moiz e ou fyer ki ou form parti sa nasyon swazir. La aprezan, ou ganny bann let enspire sorti kot zapot Pol ki dir ki Lalwa i nepli obligatwar e ki Zeova in rezet nasyon Izrael pour ki i kapab rasanble Izrael spirityel ki enkli bann Zwif ek dimoun lezot nasyon. (Rom. 10:12; 11:17-24; Gal. 6:15, 16; Kol. 2:13, 14) Ki mannyer ou ti pou’n reakte?

²¹ Bann Kretyen ki ti annan limilite ti aksepte leksplikasyon enspire Pol e Zeova ti beni zot. (Akt 13:48) Me, lezot pa ti aksepte sa bann azisteman e zot ti anvi reste atase avek sa ki zot zot ti konpran. (Gal. 5:7-12) Si zot pa ti sanz zot pwennvi, sa bann endividi ti pou perdi sa loportinite pour diriz ansanm avek Kris.​—2 Pyer 2:1.

22. Ki mannyer ou santi anver bann azisteman dan nou konprenezon konsernan plan Bondye?

²² Dan sa bann dernyen deseni, Zeova in fer bann azisteman dan nou konprenezon konsernan sa Rwayonm. Par egzanp, i’n ed nou konpran pli klerman kan i pou annan separasyon ant mouton ek kabri, andotmo, separasyon ant bann sitwayen Rwayonm Bondye ek sa bann ki pa aksepte sa mesaz Rwayonm. I’n osi ansenny nou kan ki sif konplet sa 144,000 pou ganny rasanble, sinifikasyon parabol Zezi lo Rwayonm e kan ki dernyen Kretyen swazir pou ganny resisite pour al dan lesyel. d Ki mannyer ou’n reakte anver sa bann azisteman? Eski i’n ranforsi ou lafwa? Eski ou konsider zot konman en levidans ki Zeova pe kontinyen ansenny son pep ki annan limilite? Sa lenformasyon ki swiv dan sa liv pou ogmant ou konviksyon ki Zeova i ptitapti revel son plan avek sa bann ki annan lakrent pour li.