1, 2. Kasano nga impalgak ni Jehova ti panggepna iti sangatauan?

 DAGITI naayat a nagannak iramanda dagiti annakda no pagsasaritaanda dagiti banag a pakaseknan ti pamilia. Ngem ammoda no kasano kaadu nga impormasion ti ibagada​—dagiti laeng kabaelan a tarusan dagiti annakda.

² Umasping iti dayta, in-inut nga impalgak ni Jehova ti panggepna para iti sangatauan. Ngem inaramidna laeng dayta iti umiso a tiempo. Usigentayo iti ababa no kasano nga impalgak ni Jehova dagiti kinapudno maipapan iti Pagarian iti panaglabas ti panawen.

3, 4. Inkeddeng kadi ni Jehova ti pagbanagan ti tao? Ilawlawagyo.

³ Saan a paset ti orihinal a panggep ni Jehova ti Mesianiko a Pagarian. Apay? Gapu ta saan nga inkeddeng ni Jehova ti pagbanagan ti tao; ngamin pinarsuana ti tao nga addaan iti wayawaya nga agikeddeng. Imbagana kada Adan ken Eva ti panggepna iti sangatauan. Kinunana: “Agbungakayo ken agadukayo ket punnuenyo ti daga ken parukmaenyo.” (Gen. 1:28) Kinalikaguman met ni Jehova a raemenda ti pagalagadanna iti naimbag ken dakes. (Gen. 2:16, 17) Mabalin koma a pinili da Adan ken Eva ti agtalinaed a nasungdo. No kasta koma ti inaramidda ken dagiti kaputotanda, saantay koman a kasapulan ti Pagarian nga iturayan ni Kristo tapno maibanag ti pagayatan ti Dios. Napno koma itan ti daga iti perpekto a tattao nga agdaydayaw ken Jehova.

⁴ Uray no nagrebelde da Satanas, Adan, ken Eva, dina kayat a sawen a saanen a matungpal ti panggep ni Jehova a mapno ti daga iti perpekto a tattao. Imbes ketdi, binaliwan ni Jehova ti pamay-anna a mangitungpal iti dayta. Ti panggep ni Jehova ket saan a kas iti tren nga adda sursurotenna a riles tapno makadanon iti destinasionna ken mabalin a madiskaril wenno pasardengen ti asinoman. Apaman nga imbaga ni Jehova ti panggepna, awan ti puersa iti uniberso a makalapped iti pannakatungpalna. (Basaen ti Isaias 55:11.) No adda lapped, mangusar ni Jehova iti sabali a pamay-an. a (Ex. 3:14, 15) No makitana a maitutop,  ipakaammona kadagiti nasungdo nga adipenna ti baro a pamay-anna a mangitungpal iti panggepna.

5. Ania ti inaramid ni Jehova idi napasamak ti rebelion idiay Eden?

⁵ Gapu iti rebelion idiay Eden, inraman ni Jehova iti panggepna ti pannakaipasdek ti Pagarian. (Mat. 25:34) Iti dayta a nalidem a pagteng iti pakasaritaan ti tao, inrugi nga insilnag ni Jehova ti lawag maipapan iti instrumento nga usarenna a mangisubli iti dati a kasasaad ti sangatauan ken mangpunas iti saem nga inyeg ti ubbaw a pananggamgam ni Satanas iti turay. (Gen. 3:14-19) Nupay kasta, saan a namimpinsan nga impalgak ni Jehova dagiti detalye maipapan iti Pagarian.

6. Ania ti inkari ni Jehova, ngem ania ti saanna nga impalgak?

⁶ Iti kaunaan a padto, inkari ni Jehova nga adda ‘bin-i,’ wenno kaputotan, a mangrumek iti serpiente. (Basaen ti Genesis 3:15.) Ngem saan a naipalgak no siasino dayta a bin-i ken ti bin-i ti serpiente. Kinapudnona, iti las-ud ti agarup 2,000 a tawen, awan ti sabali a detalye nga impalgak ni Jehova maipapan iti dayta. b

7. Apay a ni Abraham ti napili? Ania ti napateg a masursurotayo iti daytoy?

⁷ Idi agangay, pinili ni Jehova ni Abraham a pagtaudan ti naikari a bin-i. Napili ni Abraham gapu ta ‘immimdeng iti timek ni Jehova.’ (Gen. 22:18) Ti napateg a masursurotayo ket​—ipalgak ni Jehova ti panggepna kadagiti laeng agbuteng kenkuana.​—Basaen ti Salmo 25:14.

8, 9. Ania dagiti impalgak ni Jehova kada Abraham ken Jacob maipapan iti naikari a bin-i?

⁸ Idi nakisarita iti gayyemna a ni Abraham babaen ti maysa nga anghel, impalgak ni Jehova iti umuna a gundaway ti napateg a kinapudno maipapan iti naikari a bin-i: Isu ket maysanto a tao. (Gen. 22:15-17; Sant. 2:23) Ngem kasano a rumeken daytoy a tao ti serpiente? Siasino ti serpiente? Masungbatan dayta kadagiti simmaruno nga impalgak ni Jehova.

⁹ Inkeddeng ni Jehova a ti naikari a bin-i ket agtaud iti apoko ni Abraham a ni Jacob, a nangipakita iti dakkel a pammati iti Dios. (Gen. 28:13-22) Babaen ken Jacob, impalgak ni Jehova a ti naikari a bin-i ket agtaud iti kaputotan ni Juda nga anak ni Jacob. Impadto ni Jacob a daytoy a kaputotan ni Juda ket umawat iti “setro,” maysa a sarukod a mangisimbolo iti naarian a turay, ket ‘agtulnog kenkuana dagiti ili.’ (Gen. 49:1, 10) Babaen dagita a sasao, impasimudaag ni Jehova iti umuna a gundaway a ti naikari a bin-i ket agbalin nga agturay, maysa nga ari.

10, 11. Apay nga impalgak ni Jehova ti panggepna kada David ken Daniel?

¹⁰ Agarup 650 a tawen kalpasan ti kaaldawan ni Juda, ad-adu pay ti impalgak ni Jehova maipapan iti panggepna ken ni Ari David, a kaputotan ni Juda. Dineskribir ni Jehova ni David kas “maysa a lalaki a naanamongan iti pusona.” (1 Sam. 13:14; 17:12; Ara. 13:22) Gapu ta ni David ket managbuteng iti Dios, nakitulag kenkuana ni Jehova, nga inkarina nga agturayto iti agnanayon ti maysa kadagiti kaputotanna.​—2 Sam. 7:8, 12-16.

 ¹¹ Kalpasan ti agarup 500 a tawen, inusar ni Jehova ni propeta Daniel a mangipalgak iti eksakto a tawen a panagparang ditoy daga Daydiay Napulotan, wenno Mesias. (Dan. 9:25) Imbilang ni Jehova ni Daniel kas ‘maysa a makaay-ayo unay.’ Apay? Gapu ta raraemen unay ni Daniel ni Jehova ken nagtultuloy a nagserbi kenkuana.​—Dan. 6:16; 9:22, 23.

12. Ania ti naibilin nga aramiden ni Daniel, ken apay?

¹² Nupay nagusar ni Jehova kadagiti matalek a mammadto a kas ken Daniel a mangisurat iti nakaad-adu a detalye maipapan iti naikari a bin-i, ti Mesias, saan pay a panawen nga ipalgak ni Jehova ti naan-anay a kaipapanan dagitoy. Kas pagarigan, kalpasan a naikkan iti sirmata mainaig iti pannakaipasdek ti Pagarian ti Dios, naibaga ken ni Daniel a selioanna ti padto agingga iti tiempo nga intuding ni Jehova. Iti dayta a tiempo, “umadunto” ti pudno a pannakaammo.​—Dan. 12:4.

13. (a) Siasino ti naikari a bin-i? (b) Kasano nga insilnag ni Jesus ti lawag maipapan iti padto iti Genesis 3:15?

¹³ Silalawag nga impabigbig ni Jehova a ni Jesus ti naikari a bin-i, ti kaputotan ni David nga agturay kas Ari. (Luc. 1:30-33; 3:21, 22) Idi inrugi ni Jesus ti ministeriona, kas man la simmingising ti init ti pannakaammo iti sangatauan maipapan iti panggep ti Dios. (Mat. 4:13-17) Kas pagarigan, inikkat ni Jesus ti aniaman a panagduadua maipapan iti kinasiasino ti “serpiente” a nadakamat iti Genesis 3:14, 15 idi inawaganna ti Diablo kas “mammapatay” ken “ama ti kinaulbod.” (Juan 8:44) Iti paltiing a naited ken ni Juan, impalgak ni Jesus a “ti kadaanan a serpiente” ket isu “daydiay naawagan iti Diablo ken Satanas.” c (Basaen ti Apocalipsis 1:1; 12:9.) Iti dayta met laeng a paltiing, impakita ni Jesus​—ti naikari a bin-i​—no kasanona nga itungpal ti padto a naisawang idiay Eden ken no kasanona a rumeken ni Satanas.​—Apoc. 20:7-10.

14-16. Kanayon kadi a naawatan dagiti adalan idi umuna a siglo ti naan-anay a kaipapanan dagiti kinapudno nga impalgak ni Jesus? Ilawlawagyo.

¹⁴ Kas nakitatayo iti Kapitulo 1 daytoy a libro, adu ti insuro ni Jesus maipapan iti Pagarian. Ngem saanna a kanayon nga inlawlawag ti amin a detalye a kayat a maammuan dagiti adalanna. Uray idi nangipaay kadagiti espesipiko a detalye, limmabas pay ti adu a tawen​—no dadduma, ginasut pay ketdi a tawen​—sakbay a naawatan dagiti pasurot ni Kristo ti naan-anay a kaipapanan dagiti kinapudno nga impalgak ti Apoda. Kitaentayo ti sumagmamano a pagarigan.

¹⁵ Idi 33 C.E., silalawag nga insuro ni Jesus a dagiti makipagturay iti Ari ti Pagarian ti Dios ket aggapu iti daga ken mapagungar kas espiritu a parsua idiay langit. Ngem saan a dagus a naawatan dagiti adalanna. (Dan. 7:18; Juan 14:2-5) Iti dayta met laeng a tawen, impakita ni Jesus babaen ti ilustrasion a kalpasan ti iyuulina idiay langit, aglabas pay ti adu a panawen sakbay a maipasdek ti Pagarian. (Mat. 25:14, 19; Luc. 19:11, 12)  Saan a naawatan dagiti adalan daytoy a napateg a punto ket insaludsodda iti napagungar a ni Jesus: “Apo, isublim kadi ti pagarian iti Israel iti daytoy a tiempo?” Nupay kasta, awanen ti kanayonan a detalye nga imbaga ni Jesus iti dayta a tiempo. (Ara. 1:6, 7) Insuro met ni Jesus nga addanto “sabsabali a karnero,” a saan a paset ti “bassit nga ipastoran” a makipagturay kenkuana. (Juan 10:16; Luc. 12:32) Adu pay a tawen ti naglabas kalpasan ti pannakaipasdek ti Pagarian idi 1914 sakbay a naawatan dagiti pasurot ni Jesus no siasino ti mangbukel iti daytoy dua a grupo.

¹⁶ Nakaad-adu ti mabalin koma nga imbaga ni Jesus kadagiti adalanna idi adda ditoy daga, ngem ammona a saanda pay a kabaelan a tarusan dagita. (Juan 16:12) Pudno nga adu a pannakaammo maipapan iti Pagarian ti naipalgak idi umuna a siglo. Nupay kasta, saan pay nga idi ti panawen nga umadu ti kasta a pannakaammo.

17. Ania ti rumbeng nga aramidentayo tapno matarusantayo dagiti kinapudno maipapan iti Pagarian, ngem ania pay ti napateg?

¹⁷ Inkari ni Jehova ken ni Daniel nga “iti tiempo ti panungpalan,” adunto ti “agdakiwas,” ket umadunto “ti pudno a pannakaammo” maipapan iti panggep ti Dios. (Dan. 12:4) Dagidiay mayat a maaddaan iti kasta a pannakaammo masapul nga igaedda a gun-oden dayta. Kuna ti maysa a reperensia a ti Hebreo a sao nga “agdakiwas” ipasimudaagna ti naannad ken naan-anay a panangsukimat iti maysa a libro. Ngem uray kasano ti panangsukimattayo iti Biblia, matarusantayo laeng a naan-anay dagiti kinapudno maipapan iti Pagarian no ipalgak kadatayo ni Jehova ti kaipapanan dagita.​—Basaen ti Mateo 13:11.

18. Kasano nga imparangarang dagiti agbuteng ken ni Jehova ti pammati ken kinapakumbaba?

 ¹⁸ Sakbay ti 1914, in-inut nga impalgak ni Jehova dagiti kinapudno maipapan iti Pagarian. Kasta met laeng ti aramidenna iti tiempo ti panungpalan. Kas ipakita ti Kapitulo 4 ken 5 daytoy a libro, iti unos ti nasurok a 100 a tawen, sumagmamano a daras a binalbaliwan ti ili ti Dios ti pannakatarusda. Kayatna kadi a sawen a saanen a tultulongan ida ni Jehova? Saan. Apay? Ngamin, iparparangarangda ti dua a kualidad a kaay-ayona​—pammati ken kinapakumbaba. (Heb. 11:6; Sant. 4:6) Mamati dagiti adipen ni Jehova a matungpalto amin a kari a nailanad iti Sao ti Dios. Ti panangbigbigda a nagkamalida iti pannakaawat iti kaitungpalan dagita a padto ipakpakitana a napakumbabada. Ti kasta a kinapakumbaba ket naipakita iti Marso 1, 1925 a ruar ti The Watch Tower. Kunana: “Ammomi a ti Apo ti makailawlawag iti mismo a Saona, nga ilawlawagna dayta iti ilina iti maitutop a pamay-an ken iti tiempo nga inkeddengna.”

19. Ania ti impalubos ni Jehova a matarusantayo ita, ken apay?

¹⁹ Idi naipasdek ti Pagarian idi 1914, bassit laeng ti ammo ti ili ti Dios no kasano a matungpal dagiti padto maipapan iti Pagarian. (1 Cor. 13:9, 10, 12) Gapu iti gagartayo a makakita iti kaitungpalan dagiti kari ti Dios, makaaramidtayo no dadduma iti di umiso a konklusion. Iti panaglabas dagiti tawen, ad-adda a napaneknekan nga umiso ti sabali pay a sasao iti The Watch Tower a nakotar iti napalabas a parapo. Kuna ti artikulo: “Nasaysayaat no bigbigentayo a maawatantayo laeng ti maysa a padto no natungpalen wenno no matungtungpal pay laeng.” Ita ta nakaas-asidegen ti panungpalan, adu a padto maipapan iti Pagarian ti natungpalen ken matungtungpal pay laeng. Gapu ta napakumbaba ken sidadaan nga agpailinteg ti ili ti Dios, impalubos ni Jehova a matarusantayo a naan-anay ti panggepna. Immadu ti pudno a pannakaammo!

20, 21. Ania ti reaksion dagiti Kristiano idi umuna a siglo kadagiti baro a pannakailawlawag ti kinapudno?

²⁰ No lawlawagan ni Jehova ti pannakaawattayo iti kinapudno, masubok ti kasasaad ti pusotayo. Ti kadi pammati ken kinapakumbaba tignayennatayo a mangakseptar kadagita a panagbalbaliw? Naipasango iti kasta a pannubok dagiti Kristiano idi katengngaan ti umuna a siglo. Ipapantayon a maysaka a Judio a Kristiano iti dayta a tiempo. Raraemem unay ti Mosaiko a Linteg ken pagpampannakkelmo a maysaka nga Israelita. Ita, nakaawatka kadagiti naipaltiing a surat ni apostol Pablo nga agkunkuna a saanen a maannurot ti Linteg ken linaksiden ni Jehova ti nasion ti Israel ket sinuktanna iti naespirituan nga Israel a buklen dagiti Judio ken Gentil. (Roma 10:12; 11:17-24; Gal. 6:15, 16; Col. 2:13, 14) Ania ngata ti reaksionmo?

²¹ Inawat dagiti napakumbaba a Kristiano ti naipaltiing a panangilawlawag ni Pablo ket binendisionan ida ni Jehova. (Ara. 13:48) Nakapungtot dagiti dadduma ken saanda a kayat a balbaliwan ti pannakaawatda. (Gal. 5:7-12) No saanda nga agbalbaliw, mapukaw ti pribilehioda a makipagturay ken Kristo.​—2 Ped. 2:1.

22. Ania ti reaksionmo iti pannakalawlawag ti pannakatarustayo maipapan iti panggep ti Dios?

²² Kadagiti kallabes a dekada, linawlawagan ni Jehova ti pannakatarustayo maipapan iti Pagarian. Kas pagarigan, tinulongannatayo a mangtarus a silalawag no kaano a maisina dagiti iturayan ti Pagarian manipud kadagiti saan a mangipangag kas iti pannakaisina dagiti karnero manipud kadagiti kalding. Insurona met no kaano a makompleto ti 144,000, no ania ti kayat a sawen dagiti ilustrasion ni Jesus maipapan iti Pagarian, ken no kaano a mapagungar iti nailangitan a biag ti maudi kadagiti napulotan. d Ania ti reaksionmo kadagiti kasta a pannakalawlawag? Napabileg kadi ti pammatim? Ibilangmo kadi dagita a pammaneknek nga agtultuloy nga isursuro ni Jehova ti napakumbaba nga ilina? Dagiti sumaruno a kapitulo pabilgenna ti panagtalekmo nga in-inut nga ipalpalgak ni Jehova ti panggepna kadagidiay agbuteng kenkuana.